৫. অনঙ্গণসুত্তং

৫৭. এৰং মে সুতং – একং সমযং ভগৰা সাৰত্থিযং ৰিহরতি জেতৰনে অনাথপিণ্ডিকস্স আরামে. তত্র খো আযস্মা সারিপুত্তো ভিক্খূ আমন্তেসি – ‘‘আৰুসো, ভিক্খৰে’’তি. ‘‘আৰুসো’’তি খো তে ভিক্খূ আযস্মতো সারিপুত্তস্স পচ্চস্সোসুং. আযস্মা সারিপুত্তো এতদৰোচ –

‘‘চত্তারোমে, আৰুসো, পুগ্গলা সন্তো সংৰিজ্জমানা লোকস্মিং. কতমে চত্তারো? ইধাৰুসো, একচ্চো পুগ্গলো সাঙ্গণোৰ সমানো ‘অত্থি মে অজ্ঝত্তং অঙ্গণ’ন্তি যথাভূতং নপ্পজানাতি. ইধ পনাৰুসো, একচ্চো পুগ্গলো সাঙ্গণোৰ সমানো ‘অত্থি মে অজ্ঝত্তং অঙ্গণ’ন্তি যথাভূতং পজানাতি. ইধাৰুসো, একচ্চো পুগ্গলো অনঙ্গণোৰ সমানো ‘নত্থি মে অজ্ঝত্তং অঙ্গণ’ন্তি যথাভূতং নপ্পজানাতি. ইধ পনাৰুসো, একচ্চো পুগ্গলো অনঙ্গণোৰ সমানো ‘নত্থি মে অজ্ঝত্তং অঙ্গণ’ন্তি যথাভূতং পজানাতি. তত্রাৰুসো, য্ৰাযং পুগ্গলো সাঙ্গণোৰ সমানো ‘অত্থি মে অজ্ঝত্তং অঙ্গণ’ন্তি যথাভূতং নপ্পজানাতি, অযং ইমেসং দ্ৰিন্নং পুগ্গলানং সাঙ্গণানংযেৰ সতং হীনপুরিসো অক্খাযতি. তত্রাৰুসো, য্ৰাযং পুগ্গলো সাঙ্গণোৰ সমানো ‘অত্থি মে অজ্ঝত্তং অঙ্গণ’ন্তি যথাভূতং পজানাতি, অযং ইমেসং দ্ৰিন্নং পুগ্গলানং সাঙ্গণানংযেৰ সতং সেট্ঠপুরিসো অক্খাযতি. তত্রাৰুসো, য্ৰাযং পুগ্গলো অনঙ্গণোৰ সমানো ‘নত্থি মে অজ্ঝত্তং অঙ্গণ’ন্তি যথাভূতং নপ্পজানাতি, অযং ইমেসং দ্ৰিন্নং পুগ্গলানং অনঙ্গণানংযেৰ সতং হীনপুরিসো অক্খাযতি. তত্রাৰুসো, য্ৰাযং পুগ্গলো অনঙ্গণোৰ সমানো ‘নত্থি মে অজ্ঝত্তং অঙ্গণ’ন্তি যথাভূতং পজানাতি, অযং ইমেসং দ্ৰিন্নং পুগ্গলানং অনঙ্গণানংযেৰ সতং সেট্ঠপুরিসো অক্খাযতী’’তি.

৫৮. এৰং ৰুত্তে, আযস্মা মহামোগ্গল্লানো আযস্মন্তং সারিপুত্তং এতদৰোচ –

‘‘কো নু খো, আৰুসো সারিপুত্ত, হেতু কো পচ্চযো যেনিমেসং দ্ৰিন্নং পুগ্গলানং সাঙ্গণানংযেৰ সতং একো হীনপুরিসো অক্খাযতি, একো সেট্ঠপুরিসো অক্খাযতি? কো পনাৰুসো সারিপুত্ত, হেতু কো পচ্চযো যেনিমেসং দ্ৰিন্নং পুগ্গলানং অনঙ্গণানংযেৰ সতং একো হীনপুরিসো অক্খাযতি, একো সেট্ঠপুরিসো অক্খাযতী’’তি?

৫৯. ‘‘তত্রাৰুসো, য্ৰাযং পুগ্গলো সাঙ্গণোৰ সমানো ‘অত্থি মে অজ্ঝত্তং অঙ্গণ’ন্তি যথাভূতং নপ্পজানাতি, তস্সেতং পাটিকঙ্খং – ন ছন্দং জনেস্সতি ন ৰাযমিস্সতি ন ৰীরিযং আরভিস্সতি তস্সঙ্গণস্স পহানায; সো সরাগো সদোসো সমোহো সাঙ্গণো সংকিলিট্ঠচিত্তো কালং করিস্সতি. সেয্যথাপি, আৰুসো, কংসপাতি আভতা আপণা ৰা কম্মারকুলা ৰা রজেন চ মলেন চ পরিযোনদ্ধা. তমেনং সামিকা ন চেৰ পরিভুঞ্জেয্যুং ন চ পরিযোদপেয্যুং [পরিযোদাপেয্যুং (?)], রজাপথে চ নং নিক্খিপেয্যুং. এৰঞ্হি সা, আৰুসো, কংসপাতি অপরেন সমযেন সংকিলিট্ঠতরা অস্স মলগ্গহিতা’’তি? ‘‘এৰমাৰুসো’’তি. ‘‘এৰমেৰ খো, আৰুসো, য্ৰাযং পুগ্গলো সাঙ্গণোৰ সমানো ‘অত্থি মে অজ্ঝত্তং অঙ্গণ’ন্তি যথাভূতং নপ্পজানাতি, তস্সেতং পাটিকঙ্খং – ন ছন্দং জনেস্সতি ন ৰাযমিস্সতি ন ৰীরিযং আরভিস্সতি তস্সঙ্গণস্স পহানায; সো সরাগো সদোসো সমোহো সাঙ্গণো সংকিলিট্ঠচিত্তো কালং করিস্সতি.

‘‘তত্রাৰুসো, য্ৰাযং পুগ্গলো সাঙ্গণোৰ সমানো ‘অত্থি মে অজ্ঝত্তং অঙ্গণ’ন্তি যথাভূতং পজানাতি, তস্সেতং পাটিকঙ্খং – ছন্দং জনেস্সতি ৰাযমিস্সতি ৰীরিযং আরভিস্সতি তস্সঙ্গণস্স পহানায; সো অরাগো অদোসো অমোহো অনঙ্গণো অসংকিলিট্ঠচিত্তো কালং করিস্সতি. সেয্যথাপি, আৰুসো, কংসপাতি আভতা আপণা ৰা কম্মারকুলা ৰা রজেন চ মলেন চ পরিযোনদ্ধা. তমেনং সামিকা পরিভুঞ্জেয্যুঞ্চেৰ পরিযোদপেয্যুঞ্চ, ন চ নং রজাপথে নিক্খিপেয্যুং. এৰঞ্হি সা, আৰুসো, কংসপাতি অপরেন সমযেন পরিসুদ্ধতরা অস্স পরিযোদাতা’’তি? ‘‘এৰমাৰুসো’’তি. ‘‘এৰমেৰ খো, আৰুসো, য্ৰাযং পুগ্গলো সাঙ্গণোৰ সমানো ‘অত্থি মে অজ্ঝত্তং অঙ্গণ’ন্তি যথাভূতং পজানাতি, তস্সেতং পাটিকঙ্খং – ছন্দং জনেস্সতি ৰাযমিস্সতি ৰীরিযং আরভিস্সতি তস্সঙ্গণস্স পহানায; সো অরাগো অদোসো অমোহো অনঙ্গণো অসংকিলিট্ঠচিত্তো কালং করিস্সতি.

‘‘তত্রাৰুসো, য্ৰাযং পুগ্গলো অনঙ্গণোৰ সমানো ‘নত্থি মে অজ্ঝত্তং অঙ্গণ’ন্তি যথাভূতং নপ্পজানাতি, তস্সেতং পাটিকঙ্খং – সুভনিমিত্তং মনসি করিস্সতি, তস্স সুভনিমিত্তস্স মনসিকারা রাগো চিত্তং অনুদ্ধংসেস্সতি; সো সরাগো সদোসো সমোহো সাঙ্গণো সংকিলিট্ঠচিত্তো কালং করিস্সতি. সেয্যথাপি, আৰুসো, কংসপাতি আভতা আপণা ৰা কম্মারকুলা ৰা পরিসুদ্ধা পরিযোদাতা. তমেনং সামিকা ন চেৰ পরিভুঞ্জেয্যুং ন চ পরিযোদপেয্যুং, রজাপথে চ নং নিক্খিপেয্যুং. এৰঞ্হি সা, আৰুসো, কংসপাতি অপরেন সমযেন সংকিলিট্ঠতরা অস্স মলগ্গহিতা’’তি? ‘‘এৰমাৰুসো’’তি. ‘‘এৰমেৰ খো, আৰুসো, য্ৰাযং পুগ্গলো অনঙ্গণোৰ সমানো ‘নত্থি মে অজ্ঝত্তং অঙ্গণ’ন্তি যথাভূতং নপ্পজানাতি, তস্সেতং পাটিকঙ্খং – সুভনিমিত্তং মনসি করিস্সতি, তস্স সুভনিমিত্তস্স মনসিকারা রাগো চিত্তং অনুদ্ধংসেস্সতি;সো সরাগো সদোসো সমোহো সাঙ্গণো সংকিলিট্ঠচিত্তোকালংকরিস্সতি.

‘‘তত্রাৰুসো, য্ৰাযং পুগ্গলো অনঙ্গণোৰ সমানো ‘নত্থি মে অজ্ঝত্তং অঙ্গণ’ন্তি যথাভূতং পজানাতি, তস্সেতং পাটিকঙ্খং – সুভনিমিত্তং ন মনসি করিস্সতি, তস্স সুভনিমিত্তস্স অমনসিকারা রাগো চিত্তং নানুদ্ধংসেস্সতি; সো অরাগো অদোসো অমোহো অনঙ্গণো অসংকিলিট্ঠচিত্তো কালং করিস্সতি. সেয্যথাপি, আৰুসো, কংসপাতি আভতা আপণা ৰা কম্মারকুলা ৰা পরিসুদ্ধা পরিযোদাতা. তমেনং সামিকা পরিভুঞ্জেয্যুঞ্চেৰ পরিযোদপেয্যুঞ্চ, ন চ নং রজাপথে নিক্খিপেয্যুং. এৰঞ্হি সা, আৰুসো, কংসপাতি অপরেন সমযেন পরিসুদ্ধতরা অস্স পরিযোদাতা’’তি? ‘‘এৰমাৰুসো’’তি. ‘‘এৰমেৰ খো, আৰুসো, য্ৰাযং পুগ্গলো অনঙ্গণোৰ সমানো ‘নত্থি মে অজ্ঝত্তং অঙ্গণ’ন্তি যথাভূতং পজানাতি, তস্সেতং পাটিকঙ্খং – সুভনিমিত্তং ন মনসি করিস্সতি, তস্স সুভনিমিত্তস্স অমনসিকারা রাগো চিত্তং নানুদ্ধংসেস্সতি; সো অরাগো অদোসো অমোহো অনঙ্গণো অসংকিলিট্ঠচিত্তো কালং করিস্সতি.

‘‘অযং খো, আৰুসো মোগ্গল্লান, হেতু অযং পচ্চযো যেনিমেসং দ্ৰিন্নং পুগ্গলানং সাঙ্গণানংযেৰ সতং একো হীনপুরিসো অক্খাযতি, একো সেট্ঠপুরিসো অক্খাযতি. অযং পনাৰুসো মোগ্গল্লান, হেতু অযং পচ্চযো যেনিমেসং দ্ৰিন্নং পুগ্গলানং অনঙ্গণানংযেৰ সতং একো হীনপুরিসো অক্খাযতি, একো সেট্ঠপুরিসো অক্খাযতী’’তি.

৬০. ‘‘অঙ্গণং অঙ্গণন্তি, আৰুসো, ৰুচ্চতি. কিস্স নু খো এতং, আৰুসো, অধিৰচনং যদিদং অঙ্গণ’’ন্তি? ‘‘পাপকানং খো এতং, আৰুসো, অকুসলানং ইচ্ছাৰচরানং অধিৰচনং, যদিদং অঙ্গণ’’ন্তি.

‘‘ঠানং খো পনেতং, আৰুসো, ৰিজ্জতি যং ইধেকচ্চস্স ভিক্খুনো এৰং ইচ্ছা উপ্পজ্জেয্য – ‘আপত্তিঞ্চ ৰত আপন্নো অস্সং, ন চ মং ভিক্খূ জানেয্যুং আপত্তিং আপন্নো’তি. ঠানং খো পনেতং, আৰুসো, ৰিজ্জতি যং তং ভিক্খুং ভিক্খূ জানেয্যুং – ‘আপত্তিং আপন্নো’তি. ‘জানন্তি মং ভিক্খূ আপত্তিং আপন্নো’তি – ইতি সো কুপিতো হোতি অপ্পতীতো. যো চেৰ খো, আৰুসো, কোপো যো চ অপ্পচ্চযো – উভযমেতং অঙ্গণং.

‘‘ঠানং খো পনেতং, আৰুসো, ৰিজ্জতি যং ইধেকচ্চস্স ভিক্খুনো এৰং ইচ্ছা উপ্পজ্জেয্য – ‘আপত্তিঞ্চ ৰত আপন্নো অস্সং, অনুরহো মং ভিক্খূ চোদেয্যুং, নো সঙ্ঘমজ্ঝে’তি. ঠানং খো পনেতং, আৰুসো, ৰিজ্জতি যং তং ভিক্খুং ভিক্খূ সঙ্ঘমজ্ঝে চোদেয্যুং, নো অনুরহো. ‘সঙ্ঘমজ্ঝে মং ভিক্খূ চোদেন্তি, নো অনুরহো’তি – ইতি সো কুপিতো হোতি অপ্পতীতো. যো চেৰ খো, আৰুসো, কোপো যো চ অপ্পচ্চযো – উভযমেতং অঙ্গণং.

‘‘ঠানং খো পনেতং, আৰুসো, ৰিজ্জতি যং ইধেকচ্চস্স ভিক্খুনো এৰং ইচ্ছা উপ্পজ্জেয্য – ‘আপত্তিঞ্চ ৰত আপন্নো অস্সং, সপ্পটিপুগ্গলো মং চোদেয্য, নো অপ্পটিপুগ্গলো’তি. ঠানং খো পনেতং, আৰুসো, ৰিজ্জতি যং তং ভিক্খুং অপ্পটিপুগ্গলো চোদেয্য, নো সপ্পটিপুগ্গলো. ‘অপ্পটিপুগ্গলো মং চোদেতি, নো সপ্পটিপুগ্গলো’তি – ইতি সো কুপিতো হোতি অপ্পতীতো. যো চেৰ খো, আৰুসো, কোপো যো চ অপ্পচ্চযো – উভযমেতং অঙ্গণং.

‘‘ঠানং খো পনেতং, আৰুসো, ৰিজ্জতি যং ইধেকচ্চস্স ভিক্খুনো এৰং ইচ্ছা উপ্পজ্জেয্য – ‘অহো ৰত মমেৰ সত্থা পটিপুচ্ছিত্ৰা পটিপুচ্ছিত্ৰা ভিক্খূনং ধম্মং দেসেয্য, ন অঞ্ঞং ভিক্খুং সত্থা পটিপুচ্ছিত্ৰা পটিপুচ্ছিত্ৰা ভিক্খূনং ধম্মং দেসেয্যা’তি. ঠানং খো পনেতং, আৰুসো, ৰিজ্জতি যং অঞ্ঞং ভিক্খুং সত্থা পটিপুচ্ছিত্ৰা পটিপুচ্ছিত্ৰা ভিক্খূনং ধম্মং দেসেয্য, ন তং ভিক্খুং সত্থা পটিপুচ্ছিত্ৰা পটিপুচ্ছিত্ৰা ভিক্খূনং ধম্মং দেসেয্য. ‘অঞ্ঞং ভিক্খুং সত্থা পটিপুচ্ছিত্ৰা পটিপুচ্ছিত্ৰা ভিক্খূনং ধম্মং দেসেতি, ন মং সত্থা পটিপুচ্ছিত্ৰা পটিপুচ্ছিত্ৰা ভিক্খূনং ধম্মং দেসেতী’তি – ইতি সো কুপিতো হোতি অপ্পতীতো. যো চেৰ খো, আৰুসো, কোপো যো চ অপ্পচ্চযো – উভযমেতং অঙ্গণং.

‘‘ঠানং খো পনেতং, আৰুসো, ৰিজ্জতি যং ইধেকচ্চস্স ভিক্খুনো এৰং ইচ্ছা উপ্পজ্জেয্য – ‘অহো ৰত মমেৰ ভিক্খূ পুরক্খত্ৰা পুরক্খত্ৰা গামং ভত্তায পৰিসেয্যুং, ন অঞ্ঞং ভিক্খুং ভিক্খূ পুরক্খত্ৰা পুরক্খত্ৰা গামং ভত্তায পৰিসেয্যু’ন্তি. ঠানং খো পনেতং, আৰুসো, ৰিজ্জতি যং অঞ্ঞং ভিক্খুং ভিক্খূ পুরক্খত্ৰা পুরক্খত্ৰা গামং ভত্তায পৰিসেয্যুং, ন তং ভিক্খুং ভিক্খূ পুরক্খত্ৰা পুরক্খত্ৰা গামং ভত্তায পৰিসেয্যুং. ‘অঞ্ঞং ভিক্খুং ভিক্খূ পুরক্খত্ৰা পুরক্খত্ৰা গামং ভত্তায পৰিসন্তি, ন মং ভিক্খূ পুরক্খত্ৰা পুরক্খত্ৰা গামং ভত্তায পৰিসন্তী’তি – ইতি সো কুপিতো হোতি অপ্পতীতো. যো চেৰ খো, আৰুসো, কোপো যো চ অপ্পচ্চযো – উভযমেতং অঙ্গণং.

‘‘ঠানং খো পনেতং, আৰুসো, ৰিজ্জতি যং ইধেকচ্চস্স ভিক্খুনো এৰং ইচ্ছা উপ্পজ্জেয্য – ‘অহো ৰত অহমেৰ লভেয্যং ভত্তগ্গে অগ্গাসনং অগ্গোদকং অগ্গপিণ্ডং, ন অঞ্ঞো ভিক্খু লভেয্য ভত্তগ্গে অগ্গাসনং অগ্গোদকং অগ্গপিণ্ড’ন্তি. ঠানং খো পনেতং, আৰুসো, ৰিজ্জতি যং অঞ্ঞো ভিক্খু লভেয্য ভত্তগ্গে অগ্গাসনং অগ্গোদকং অগ্গপিণ্ডং, ন সো ভিক্খু লভেয্য ভত্তগ্গে অগ্গাসনং অগ্গোদকং অগ্গপিণ্ডং. ‘অঞ্ঞো ভিক্খু লভতি ভত্তগ্গে অগ্গাসনং অগ্গোদকং অগ্গপিণ্ডং, নাহং লভামি ভত্তগ্গে অগ্গাসনং অগ্গোদকং অগ্গপিণ্ড’ন্তি – ইতি সো কুপিতো হোতি অপ্পতীতো. যো চেৰ খো, আৰুসো, কোপো যো চ অপ্পচ্চযো – উভযমেতং অঙ্গণং.

‘‘ঠানং খো পনেতং, আৰুসো, ৰিজ্জতি যং ইধেকচ্চস্স ভিক্খুনো এৰং ইচ্ছা উপ্পজ্জেয্য – ‘অহো ৰত অহমেৰ ভত্তগ্গে ভুত্তাৰী অনুমোদেয্যং, ন অঞ্ঞো ভিক্খু ভত্তগ্গে ভুত্তাৰী অনুমোদেয্যা’তি. ঠানং খো পনেতং, আৰুসো, ৰিজ্জতি যং অঞ্ঞো ভিক্খু ভত্তগ্গে ভুত্তাৰী অনুমোদেয্য, ন সো ভিক্খু ভত্তগ্গে ভুত্তাৰী অনুমোদেয্য. ‘অঞ্ঞো ভিক্খু ভত্তগ্গে ভুত্তাৰী অনুমোদতি, নাহং ভত্তগ্গে ভুত্তাৰী অনুমোদামী’তি – ইতি সো কুপিতো হোতি অপ্পতীতো. যো চেৰ খো, আৰুসো, কোপো যো চ অপ্পচ্চযো – উভযমেতং অঙ্গণং.

‘‘ঠানং খো পনেতং, আৰুসো, ৰিজ্জতি যং ইধেকচ্চস্স ভিক্খুনো এৰং ইচ্ছা উপ্পজ্জেয্য – ‘অহো ৰত অহমেৰ আরামগতানং ভিক্খূনং ধম্মং দেসেয্যং, ন অঞ্ঞো ভিক্খু আরামগতানং ভিক্খূনং ধম্মং দেসেয্যা’তি. ঠানং খো পনেতং, আৰুসো, ৰিজ্জতি যং অঞ্ঞো ভিক্খু আরামগতানং ভিক্খূনং ধম্মং দেসেয্য, ন সো ভিক্খু আরামগতানং ভিক্খূনং ধম্মং দেসেয্য. ‘অঞ্ঞো ভিক্খু আরামগতানং ভিক্খূনং ধম্মং দেসেতি, নাহং আরামগতানং ভিক্খূনং ধম্মং দেসেমী’তি – ইতি সো কুপিতো হোতি অপ্পতীতো. যো চেৰ খো, আৰুসো, কোপো যো চ অপ্পচ্চযো – উভযমেতং অঙ্গণং.

‘‘ঠানং খো পনেতং, আৰুসো, ৰিজ্জতি যং ইধেকচ্চস্স ভিক্খুনো এৰং ইচ্ছা উপ্পজ্জেয্য – ‘অহো ৰত অহমেৰ আরামগতানং ভিক্খুনীনং ধম্মং দেসেয্যং…পে… উপাসকানং ধম্মং দেসেয্যং…পে… উপাসিকানং ধম্মং দেসেয্যং, ন অঞ্ঞো ভিক্খু আরামগতানং উপাসিকানং ধম্মং দেসেয্যা’তি. ঠানং খো পনেতং, আৰুসো, ৰিজ্জতি যং অঞ্ঞো ভিক্খু আরামগতানং উপাসিকানং ধম্মং দেসেয্য, ন সো ভিক্খু আরামগতানং উপাসিকানং ধম্মং দেসেয্য. ‘অঞ্ঞো ভিক্খু আরামগতানং উপাসিকানং ধম্মং দেসেতি, নাহং আরামগতানং উপাসিকানং ধম্মং দেসেমী’তি – ইতি সো কুপিতো হোতি অপ্পতীতো. যো চেৰ খো, আৰুসো, কোপো যো চ অপ্পচ্চযো – উভযমেতং অঙ্গণং.

‘‘ঠানং খো পনেতং, আৰুসো, ৰিজ্জতি যং ইধেকচ্চস্স ভিক্খুনো এৰং ইচ্ছা উপ্পজ্জেয্য – ‘অহো ৰত মমেৰ ভিক্খূ সক্করেয্যুং গরুং করেয্যুং [গরুকরেয্যুং (সী. স্যা. পী.)] মানেয্যুং পূজেয্যুং, ন অঞ্ঞং ভিক্খুং ভিক্খূ সক্করেয্যুং গরুং করেয্যুং মানেয্যুং পূজেয্যু’ন্তি. ঠানং খো পনেতং, আৰুসো, ৰিজ্জতি যং অঞ্ঞং ভিক্খুং ভিক্খূ সক্করেয্যুং গরুং করেয্যুং মানেয্যুং পূজেয্যুং, ন তং ভিক্খুং ভিক্খূ সক্করেয্যুং গরুং করেয্যুং মানেয্যুং পূজেয্যুং. ‘অঞ্ঞং ভিক্খুং ভিক্খূ সক্করোন্তি গরুং করোন্তি মানেন্তি পূজেন্তি, ন মং ভিক্খূ সক্করোন্তি গরুং করোন্তি মানেন্তি পূজেন্তী’তি – ইতি সো কুপিতো হোতি অপ্পতীতো. যো চেৰ খো, আৰুসো, কোপো যো চ অপ্পচ্চযো – উভযমেতং অঙ্গণং.

‘‘ঠানং খো পনেতং, আৰুসো, ৰিজ্জতি যং ইধেকচ্চস্স ভিক্খুনো এৰং ইচ্ছা উপ্পজ্জেয্য – ‘অহো ৰত মমেৰ ভিক্খুনিযো…পে… উপাসকা…পে… উপাসিকা সক্করেয্যুং গরুং করেয্যুং মানেয্যুং পূজেয্যুং, ন অঞ্ঞং ভিক্খুং উপাসিকা সক্করেয্যুং গরুং করেয্যুং মানেয্যুং পূজেয্যু’ন্তি. ঠানং খো পনেতং, আৰুসো, ৰিজ্জতি যং অঞ্ঞং ভিক্খুং উপাসিকা সক্করেয্যুং গরুং করেয্যুং মানেয্যুং পূজেয্যুং, ন তং ভিক্খুং উপাসিকা সক্করেয্যুং গরুং করেয্যুং মানেয্যুং পূজেয্যুং. ‘অঞ্ঞং ভিক্খুং উপাসিকা সক্করোন্তি গরুং করোন্তি মানেন্তি পূজেন্তি, ন মং উপাসিকা সক্করোন্তি গরুং করোন্তি মানেন্তি পূজেন্তী’তি – ইতি সো কুপিতো হোতি অপ্পতীতো. যো চেৰ খো, আৰুসো, কোপো যো চ অপ্পচ্চযো – উভযমেতং অঙ্গণং.

‘‘ঠানং খো পনেতং, আৰুসো, ৰিজ্জতি যং ইধেকচ্চস্স ভিক্খুনো এৰং ইচ্ছা উপ্পজ্জেয্য – ‘অহো ৰত অহমেৰ লাভী অস্সং পণীতানং চীৰরানং, ন অঞ্ঞো ভিক্খু লাভী অস্স পণীতানং চীৰরান’ন্তি. ঠানং খো পনেতং, আৰুসো, ৰিজ্জতি যং অঞ্ঞো ভিক্খু লাভী অস্স পণীতানং চীৰরানং, ন সো ভিক্খু লাভী অস্স পণীতানং চীৰরানং. ‘অঞ্ঞো ভিক্খু লাভী [লাভী অস্স (ক.)] পণীতানং চীৰরানং, নাহং লাভী [লাভী অস্সং (ক.)] পণীতানং চীৰরান’ন্তি – ইতি সো কুপিতো হোতি অপ্পতীতো. যো চেৰ খো, আৰুসো, কোপো যো চ অপ্পচ্চযো – উভযমেতং অঙ্গণং.

‘‘ঠানং খো পনেতং, আৰুসো, ৰিজ্জতি যং ইধেকচ্চস্স ভিক্খুনো এৰং ইচ্ছা উপ্পজ্জেয্য – ‘অহো ৰত অহমেৰ লাভী অস্সং পণীতানং পিণ্ডপাতানং…পে… পণীতানং সেনাসনানং…পে… পণীতানং গিলানপ্পচ্চযভেসজ্জপরিক্খারানং, ন অঞ্ঞো ভিক্খু লাভী অস্স পণীতানং গিলানপ্পচ্চযভেসজ্জপরিক্খারান’ন্তি. ঠানং খো পনেতং, আৰুসো, ৰিজ্জতি যং অঞ্ঞো ভিক্খু লাভী অস্স পণীতানং গিলানপ্পচ্চযভেসজ্জপরিক্খারানং, ন সো ভিক্খু লাভী অস্স পণীতানং গিলানপ্পচ্চযভেসজ্জপরিক্খারানং. ‘অঞ্ঞো ভিক্খু লাভী [লাভী অস্স (ক.)] পণীতানং গিলানপ্পচ্চযভেসজ্জপরিক্খারানং, নাহং লাভী [লাভী অস্সং (ক.)] পণীতানং গিলানপ্পচ্চযভেসজ্জপরিক্খারান’ন্তি – ইতি সো কুপিতো হোতি অপ্পতীতো. যো চেৰ খো, আৰুসো, কোপো যো চ অপ্পচ্চযো – উভযমেতং অঙ্গণং.

‘‘ইমেসং খো এতং, আৰুসো, পাপকানং অকুসলানং ইচ্ছাৰচরানং অধিৰচনং, যদিদং অঙ্গণ’’ন্তি.

৬১. ‘‘যস্স কস্সচি, আৰুসো, ভিক্খুনো ইমে পাপকা অকুসলা ইচ্ছাৰচরা অপ্পহীনা দিস্সন্তি চেৰ সূযন্তি চ, কিঞ্চাপি সো হোতি আরঞ্ঞিকো পন্তসেনাসনো পিণ্ডপাতিকো সপদানচারী পংসুকূলিকো লূখচীৰরধরো, অথ খো নং সব্রহ্মচারী ন চেৰ সক্করোন্তি ন গরুং করোন্তি ন মানেন্তি ন পূজেন্তি. তং কিস্স হেতু? তে হি তস্স আযস্মতো পাপকা অকুসলা ইচ্ছাৰচরা অপ্পহীনা দিস্সন্তি চেৰ সূযন্তি চ. সেয্যথাপি, আৰুসো, কংসপাতি আভতা আপণা ৰা কম্মারকুলা ৰা পরিসুদ্ধা পরিযোদাতা. তমেনং সামিকা অহিকুণপং ৰা কুক্কুরকুণপং ৰা মনুস্সকুণপং ৰা রচযিত্ৰা অঞ্ঞিস্সা কংসপাতিযা পটিকুজ্জিত্ৰা অন্তরাপণং পটিপজ্জেয্যুং. তমেনং জনো দিস্ৰা এৰং ৰদেয্য – ‘অম্ভো, কিমেৰিদং হরীযতি জঞ্ঞজঞ্ঞং ৰিযা’তি? তমেনং উট্ঠহিত্ৰা অপাপুরিত্ৰা [অৰাপুরিত্ৰা (সী.)] ওলোকেয্য. তস্স সহদস্সনেন অমনাপতা চ সণ্ঠহেয্য, পাটিকুল্যতা [পটিকূলতা (ক.), পাটিকূল্যতা (স্যা.)] চ সণ্ঠহেয্য, জেগুচ্ছতা চ [জেগুচ্ছিতা চ (পী. ক.)] সণ্ঠহেয্য; জিঘচ্ছিতানম্পি ন ভোত্তুকম্যতা অস্স, পগেৰ সুহিতানং. এৰমেৰ খো, আৰুসো, যস্স কস্সচি ভিক্খুনো ইমে পাপকা অকুসলা ইচ্ছাৰচরা অপ্পহীনা দিস্সন্তি চেৰ সূযন্তি চ, কিঞ্চাপি সো হোতি আরঞ্ঞিকো পন্তসেনাসনো পিণ্ডপাতিকো সপদানচারী পংসুকূলিকো লূখচীৰরধরো, অথ খো নং সব্রহ্মচারী ন চেৰ সক্করোন্তি ন গরুং করোন্তি ন মানেন্তি ন পূজেন্তি. তং কিস্স হেতু? তে হি তস্স আযস্মতো পাপকা অকুসলা ইচ্ছাৰচরা অপ্পহীনা দিস্সন্তি চেৰ সূযন্তি চ.

৬২. ‘‘যস্স কস্সচি, আৰুসো, ভিক্খুনো ইমে পাপকা অকুসলা ইচ্ছাৰচরা পহীনা দিস্সন্তি চেৰ সূযন্তি চ, কিঞ্চাপি সো হোতি গামন্তৰিহারী নেমন্তনিকো গহপতিচীৰরধরো, অথ খো নং সব্রহ্মচারী সক্করোন্তি গরুং করোন্তি মানেন্তি পূজেন্তি. তং কিস্স হেতু? তে হি তস্স আযস্মতো পাপকা অকুসলা ইচ্ছাৰচরা পহীনা দিস্সন্তি চেৰ সূযন্তি চ. সেয্যথাপি, আৰুসো, কংসপাতি আভতা আপণা ৰা কম্মারকুলা ৰা পরিসুদ্ধা পরিযোদাতা. তমেনং সামিকা সালীনং ওদনং ৰিচিতকাল়কং [ৰিচিনিতকাল়কং (ক.)] অনেকসূপং অনেকব্যঞ্জনং রচযিত্ৰা অঞ্ঞিস্সা কংসপাতিযা পটিকুজ্জিত্ৰা অন্তরাপণং পটিপজ্জেয্যুং. তমেনং জনো দিস্ৰা এৰং ৰদেয্য – ‘অম্ভো, কিমেৰিদং হরীযতি জঞ্ঞজঞ্ঞং ৰিযা’তি? তমেনং উট্ঠহিত্ৰা অপাপুরিত্ৰা ওলোকেয্য. তস্স সহ দস্সনেন মনাপতা চ সণ্ঠহেয্য, অপ্পাটিকুল্যতা চ সণ্ঠহেয্য, অজেগুচ্ছতা চ সণ্ঠহেয্য; সুহিতানম্পি ভোত্তুকম্যতা অস্স, পগেৰ জিঘচ্ছিতানং. এৰমেৰ খো, আৰুসো, যস্স কস্সচি ভিক্খুনো ইমে পাপকা অকুসলা ইচ্ছাৰচরা পহীনা দিস্সন্তি চেৰ সূযন্তি চ, কিঞ্চাপি সো হোতি গামন্তৰিহারী নেমন্তনিকো গহপতিচীৰরধরো, অথ খো নং সব্রহ্মচারী সক্করোন্তি গরুং করোন্তি মানেন্তি পূজেন্তি. তং কিস্স হেতু? তে হি তস্স আযস্মতো পাপকা অকুসলা ইচ্ছাৰচরা পহীনা দিস্সন্তি চেৰ সূযন্তি চা’’তি.

৬৩. এৰং ৰুত্তে, আযস্মা মহামোগ্গল্লানো আযস্মন্তং সারিপুত্তং এতদৰোচ – ‘‘উপমা মং, আৰুসো সারিপুত্ত, পটিভাতী’’তি. ‘‘পটিভাতু তং, আৰুসো মোগ্গল্লানা’’তি. ‘‘একমিদাহং, আৰুসো, সমযং রাজগহে ৰিহরামি গিরিব্বজে. অথ খ্ৰাহং, আৰুসো, পুব্বণ্হসমযং নিৰাসেত্ৰা পত্তচীৰরমাদায রাজগহং পিণ্ডায পাৰিসিং. তেন খো পন সমযেন সমীতি যানকারপুত্তো রথস্স নেমিং তচ্ছতি. তমেনং পণ্ডুপুত্তো আজীৰকো পুরাণযানকারপুত্তো পচ্চুপট্ঠিতো হোতি. অথ খো, আৰুসো, পণ্ডুপুত্তস্স আজীৰকস্স পুরাণযানকারপুত্তস্স এৰং চেতসো পরিৰিতক্কো উদপাদি – ‘অহো ৰতাযং সমীতি যানকারপুত্তো ইমিস্সা নেমিযা ইমঞ্চ ৰঙ্কং ইমঞ্চ জিম্হং ইমঞ্চ দোসং তচ্ছেয্য, এৰাযং নেমি অপগতৰঙ্কা অপগতজিম্হা অপগতদোসা সুদ্ধা অস্স [সুদ্ধাস্স (সী. পী.), সুদ্ধা (ক.)] সারে পতিট্ঠিতা’তি. যথা যথা খো, আৰুসো, পণ্ডুপুত্তস্স আজীৰকস্স পুরাণযানকারপুত্তস্স চেতসো পরিৰিতক্কো হোতি, তথা তথা সমীতি যানকারপুত্তো তস্সা নেমিযা তঞ্চ ৰঙ্কং তঞ্চ জিম্হং তঞ্চ দোসং তচ্ছতি. অথ খো, আৰুসো, পণ্ডুপুত্তো আজীৰকো পুরাণযানকারপুত্তো অত্তমনো অত্তমনৰাচং নিচ্ছারেসি – ‘হদযা হদযং মঞ্ঞে অঞ্ঞায তচ্ছতী’তি.

‘‘এৰমেৰ খো, আৰুসো, যে তে পুগ্গলা অস্সদ্ধা, জীৰিকত্থা ন সদ্ধা অগারস্মা অনগারিযং পব্বজিতা, সঠা মাযাৰিনো কেতবিনো [কেটুভিনো (বহূসু)] উদ্ধতা উন্নল়া চপলা মুখরা ৰিকিণ্ণৰাচা, ইন্দ্রিযেসু অগুত্তদ্ৰারা, ভোজনে অমত্তঞ্ঞুনো, জাগরিযং অননুযুত্তা, সামঞ্ঞে অনপেক্খৰন্তো, সিক্খায ন তিব্বগারৰা, বাহুলিকা সাথলিকা, ওক্কমনে পুব্বঙ্গমা, পৰিৰেকে নিক্খিত্তধুরা, কুসীতা হীনৰীরিযা মুট্ঠস্সতী অসম্পজানা অসমাহিতা ৰিব্ভন্তচিত্তা দুপ্পঞ্ঞা এল়মূগা, তেসং আযস্মা সারিপুত্তো ইমিনা ধম্মপরিযাযেন হদযা হদযং মঞ্ঞে অঞ্ঞায তচ্ছতি.

‘‘যে পন তে কুলপুত্তা সদ্ধা অগারস্মা অনগারিযং পব্বজিতা, অসঠা অমাযাৰিনো অকেতবিনো অনুদ্ধতা অনুন্নল়া অচপলা অমুখরা অৰিকিণ্ণৰাচা, ইন্দ্রিযেসু গুত্তদ্ৰারা, ভোজনে মত্তঞ্ঞুনো, জাগরিযং অনুযুত্তা, সামঞ্ঞে অপেক্খৰন্তো, সিক্খায তিব্বগারৰা, ন বাহুলিকা ন সাথলিকা, ওক্কমনে নিক্খিত্তধুরা, পৰিৰেকে পুব্বঙ্গমা, আরদ্ধৰীরিযা পহিতত্তা উপট্ঠিতস্সতী সম্পজানা সমাহিতা একগ্গচিত্তা পঞ্ঞৰন্তো অনেল়মূগা, তে আযস্মতো সারিপুত্তস্স ইমং ধম্মপরিযাযং সুত্ৰা পিৰন্তি মঞ্ঞে, ঘসন্তি মঞ্ঞে ৰচসা চেৰ মনসা চ – ‘সাধু ৰত, ভো, সব্রহ্মচারী অকুসলা ৰুট্ঠাপেত্ৰা কুসলে পতিট্ঠাপেতী’তি. সেয্যথাপি, আৰুসো, ইত্থী ৰা পুরিসো ৰা দহরো যুৰা মণ্ডনকজাতিকো সীসংন্হাতো উপ্পলমালং ৰা ৰস্সিকমালং ৰা অতিমুত্তকমালং [অধিমুত্তকমালং (স্যা.)] ৰা লভিত্ৰা উভোহি হত্থেহি পটিগ্গহেত্ৰা উত্তমঙ্গে সিরস্মিং পতিট্ঠপেয্য, এৰমেৰ খো, আৰুসো, যে তে কুলপুত্তা সদ্ধা অগারস্মা অনগারিযং পব্বজিতা, অসঠা অমাযাৰিনো অকেতবিনো অনুদ্ধতা অনুন্নল়া অচপলা অমুখরা অৰিকিণ্ণৰাচা, ইন্দ্রিযেসু গুত্তদ্ৰারা, ভোজনে মত্তঞ্ঞুনো, জাগরিযং অনুযুত্তা, সামঞ্ঞে অপেক্খৰন্তো, সিক্খায তিব্বগারৰা, ন বাহুলিকা ন সাথলিকা, ওক্কমনে নিক্খিত্তধুরা, পৰিৰেকে পুব্বঙ্গমা, আরদ্ধৰীরিযা পহিতত্তা উপট্ঠিতস্সতী সম্পজানা সমাহিতা একগ্গচিত্তা পঞ্ঞৰন্তো অনেল়মূগা, তে আযস্মতো সারিপুত্তস্স ইমং ধম্মপরিযাযং সুত্ৰা পিৰন্তি মঞ্ঞে, ঘসন্তি মঞ্ঞে ৰচসা চেৰ মনসা চ – ‘সাধু ৰত, ভো, সব্রহ্মচারী অকুসলা ৰুট্ঠাপেত্ৰা কুসলে পতিট্ঠাপেতী’তি. ইতিহ তে উভো মহানাগা অঞ্ঞমঞ্ঞস্স সুভাসিতং সমনুমোদিংসূ’’তি.

অনঙ্গণসুত্তং নিট্ঠিতং পঞ্চমং.