৫. কুঞ্জরৰিমানৰত্থু

৩১. ‘‘কুঞ্জরো তে ৰরারোহো, নানারতনকপ্পনো;

রুচিরো থামৰা জৰসম্পন্নো, আকাসম্হি সমীহতি.

৩২. ‘‘পদুমি পদ্ম [পদুম… (সী. স্যা.) এৰমুপরিপি] পত্তক্খি, পদ্মুপ্পলজুতিন্ধরো;

পদ্মচুণ্ণাভিকিণ্ণঙ্গো, সোণ্ণপোক্খরমালধা [… মালৰা (সী. স্যা.)].

৩৩. ‘‘পদুমানুসটং মগ্গং, পদ্মপত্তৰিভূসিতং.

ঠিতং ৰগ্গুমনুগ্ঘাতী, মিতং গচ্ছতি ৰারণো.

৩৪. ‘‘তস্স পক্কমমানস্স, সোণ্ণকংসা রতিস্সরা;

তেসং সুয্যতি নিগ্ঘোসো, তুরিযে পঞ্চঙ্গিকে যথা.

৩৫. ‘‘তস্স নাগস্স খন্ধম্হি, সুচিৰত্থা অলঙ্কতা;

মহন্তং অচ্ছরাসঙ্ঘং, ৰণ্ণেন অতিরোচসি.

৩৬. ‘‘দানস্স তে ইদং ফলং, অথো সীলস্স ৰা পন;

অথো অঞ্জলিকম্মস্স, তং মে অক্খাহি পুচ্ছিতা’’তি;

৩৭. সা দেৰতা অত্তমনা, মোগ্গল্লানেন পুচ্ছিতা;

পঞ্হং পুট্ঠা ৰিযাকাসি, যস্স কম্মস্সিদং ফলং.

৩৮. ‘‘দিস্ৰান গুণসম্পন্নং, ঝাযিং ঝানরতং সতং;

অদাসিং পুপ্ফাভিকিণ্ণং, আসনং দুস্সসন্থতং.

৩৯. ‘‘উপড্ঢং পদ্মমালাহং, আসনস্স সমন্ততো;

অব্ভোকিরিস্সং পত্তেহি, পসন্না সেহি পাণিভি.

৪০. ‘‘তস্স কম্মকুসলস্স [কম্মস্স কুসলস্স (সী. পী.)], ইদং মে ঈদিসং ফলং;

সক্কারো গরুকারো চ, দেৰানং অপচিতা অহং.

৪১. ‘‘যো ৰে সম্মাৰিমুত্তানং, সন্তানং ব্রহ্মচারিনং;

পসন্নো আসনং দজ্জা, এৰং নন্দে যথা অহং.

৪২. ‘‘তস্মা হি অত্তকামেন [অত্থকামেন (ক.)], মহত্তমভিকঙ্খতা;

আসনং দাতব্বং হোতি, সরীরন্তিমধারিন’’ন্তি.

কুঞ্জরৰিমানং পঞ্চমং.