১১. পঠমপতিব্বতাৰিমানৰত্থু

৯৩. ‘‘কোঞ্চা মযূরা দিৰিযা চ হংসা, ৰগ্গুস্সরা কোকিলা সম্পতন্তি;

পুপ্ফাভিকিণ্ণং রম্মমিদং ৰিমানং, অনেকচিত্তং নরনারিসেৰিতং [নরনারীভি সেৰিতং (ক.)].

৯৪. ‘‘তত্থচ্ছসি দেৰি মহানুভাৰে, ইদ্ধী ৰিকুব্বন্তি অনেকরূপা;

ইমা চ তে অচ্ছরাযো সমন্ততো, নচ্চন্তি গাযন্তি পমোদযন্তি চ.

৯৫. ‘‘দেৰিদ্ধিপত্তাসি মহানুভাৰে, মনুস্সভূতা কিমকাসি পুঞ্ঞং;

কেনাসি এৰং জলিতানুভাৰা, ৰণ্ণো চ তে সব্বদিসা পভাসতী’’তি.

৯৬. সা দেৰতা অত্তমনা, মোগ্গল্লানেন পুচ্ছিতা;

পঞ্হং পুট্ঠা ৰিযাকাসি, যস্স কম্মস্সিদং ফলং.

৯৭. ‘‘অহং মনুস্সেসু মনুস্সভূতা, পতিব্বতানঞ্ঞমনা অহোসিং;

মাতাৰ পুত্তং অনুরক্খমানা, কুদ্ধাপিহং [কুদ্ধাপহং (সী.)] নপ্ফরুসং অৰোচং.

৯৮. ‘‘সচ্চে ঠিতা মোসৰজ্জং পহায, দানে রতা সঙ্গহিতত্তভাৰা;

অন্নঞ্চ পানঞ্চ পসন্নচিত্তা, সক্কচ্চ দানং ৰিপুলং অদাসিং.

৯৯. ‘‘তেন মেতাদিসো ৰণ্ণো, তেন মে ইধ মিজ্ঝতি;

উপ্পজ্জন্তি চ মে ভোগা, যে কেচি মনসো পিযা.

১০০. ‘‘অক্খামি তে ভিক্খু মহানুভাৰ, মনুস্সভূতা যমকাসি পুঞ্ঞং;

তেনম্হি এৰং জলিতানুভাৰা, ৰণ্ণো চ মে সব্বদিসা পভাসতী’’তি.

পঠমপতিব্বতাৰিমানং একাদসমং.