৯. মগ্গকথা

২৩৭. মগ্গোতি কেনট্ঠেন মগ্গো? সোতাপত্তিমগ্গক্খণে দস্সনট্ঠেন সম্মাদিট্ঠি মিচ্ছাদিট্ঠিযা পহানায মগ্গো চেৰ হেতু চ, সহজাতানং ধম্মানং উপত্থম্ভনায মগ্গো চেৰ হেতু চ, কিলেসানং পরিযাদানায মগ্গো চেৰ হেতু চ, পটিৰেধাদিৰিসোধনায মগ্গো চেৰ হেতু চ, চিত্তস্স অধিট্ঠানায মগ্গো চেৰ হেতু চ, চিত্তস্স ৰোদানায মগ্গো চেৰ হেতু চ, ৰিসেসাধিগমায মগ্গো চেৰ হেতু চ, উত্তরি পটিৰেধায [উত্তরিং পটিৰেধায (স্যা.)] মগ্গো চেৰ হেতু চ, সচ্চাভিসমযায মগ্গো চেৰ হেতু চ, নিরোধে পতিট্ঠাপনায মগ্গো চেৰ হেতু চ.

অভিনিরোপনট্ঠেন সম্মাসঙ্কপ্পো মিচ্ছাসঙ্কপ্পস্স পহানায মগ্গো চেৰ হেতু চ, সহজাতানং ধম্মানং উপত্থম্ভনায মগ্গো চেৰ হেতু চ, কিলেসানং পরিযাদানায মগ্গো চেৰ হেতু চ, পটিৰেধাদিৰিসোধনায মগ্গো চেৰ হেতু চ, চিত্তস্স অধিট্ঠানায মগ্গো চেৰ হেতু চ, চিত্তস্স ৰোদানায মগ্গো চেৰ হেতু চ, ৰিসেসাধিগমায মগ্গো চেৰ হেতু চ, উত্তরি পটিৰেধায মগ্গো চেৰ হেতু চ, সচ্চাভিসমযায মগ্গো চেৰ হেতু চ, নিরোধে পতিট্ঠাপনায মগ্গো চেৰ হেতু চ.

পরিগ্গহট্ঠেন সম্মাৰাচা মিচ্ছাৰাচায পহানায মগ্গো চেৰ হেতু চ, সহজাতানং ধম্মানং উপত্থম্ভনায মগ্গো চেৰ হেতু চ, কিলেসানং পরিযাদানায মগ্গো চেৰ হেতু চ, পটিৰেধাদিৰিসোধনায মগ্গো চেৰ হেতু চ, চিত্তস্স অধিট্ঠানায মগ্গো চেৰ হেতু চ, চিত্তস্স ৰোদানায মগ্গো চেৰ হেতু চ, ৰিসেসাধিগমায মগ্গো চেৰ হেতু চ, উত্তরি পটিৰেধায মগ্গো চেৰ হেতু চ, সচ্চাভিসমযায মগ্গো চেৰ হেতু চ, নিরোধে পতিট্ঠাপনায মগ্গো চেৰ হেতু চ.

সমুট্ঠানট্ঠেন সম্মাকম্মন্তো মিচ্ছাকম্মন্তস্স পহানায মগ্গো চেৰ হেতু চ, সহজাতানং ধম্মানং উপত্থম্ভনায মগ্গো চেৰ হেতু চ, কিলেসানং পরিযাদানায মগ্গো চেৰ হেতু চ পটিৰেধাদিৰিসোধনায মগ্গো চেৰ হেতু চ, চিত্তস্স অধিট্ঠানায মগ্গো চেৰ হেতু চ, চিত্তস্স ৰোদানায মগ্গো চেৰ হেতু চ, ৰিসেসাধিগমায মগ্গো চেৰ হেতু চ, উত্তরি পটিৰেধায মগ্গো চেৰ হেতু চ, সচ্চাভিসমযায মগ্গো চেৰ হেতু চ, নিরোধে পতিট্ঠাপনায মগ্গো চেৰ হেতু চ.

ৰোদানট্ঠেন সম্মাআজীৰো মিচ্ছাআজীৰস্স পহানায মগ্গো চেৰ হেতু চ…পে… পগ্গহট্ঠেন সম্মাৰাযামো মিচ্ছাৰাযামস্স পহানায মগ্গো চেৰ হেতু চ…পে… উপট্ঠানট্ঠেন সম্মাসতি মিচ্ছাসতিযা পহানায মগ্গো চেৰ হেতু চ…পে… অৰিক্খেপট্ঠেন সম্মাসমাধি মিচ্ছাসমাধিস্স পহানায মগ্গো চেৰ হেতু চ, সহজাতানং ধম্মানং উপত্থম্ভনায মগ্গো চেৰ হেতু চ, কিলেসানং পরিযাদানায মগ্গো চেৰ হেতু চ, পটিৰেধাদিৰিসোধনায মগ্গো চেৰ হেতু চ, চিত্তস্স অধিট্ঠানায মগ্গো চেৰ হেতু চ, চিত্তস্স ৰোদানায মগ্গো চেৰ হেতু চ, ৰিসেসাধিগমায মগ্গো চেৰ হেতু চ, উত্তরি পটিৰেধায মগ্গো চেৰ হেতু চ, সচ্চাভিসমযায মগ্গো চেৰ হেতু চ, নিরোধে পতিট্ঠাপনায মগ্গো চেৰ হেতু চ.

সকদাগামিমগ্গক্খণে দস্সনট্ঠেন সম্মাদিট্ঠি…পে… অৰিক্খেপট্ঠেন সম্মাসমাধি ওল়ারিকস্স কামরাগসঞ্ঞোজনস্স পটিঘসঞ্ঞোজনস্স ওল়ারিকস্স কামরাগানুসযস্স পটিঘানুসযস্স পহানায মগ্গো চেৰ হেতু চ, সহজাতানং ধম্মানং উপত্থম্ভনায মগ্গো চেৰ হেতু চ, কিলেসানং পরিযাদানায মগ্গো চেৰ হেতু চ, পটিৰেধাদিৰিসোধনায মগ্গো চেৰ হেতু চ, চিত্তস্স অধিট্ঠানায মগ্গো চেৰ হেতু চ, চিত্তস্স ৰোদানায মগ্গো চেৰ হেতু চ, ৰিসেসাধিগমায মগ্গো চেৰ হেতু চ, উত্তরি পটিৰেধায মগ্গো চেৰ হেতু চ, সচ্চাভিসমযায মগ্গো চেৰ হেতু চ, নিরোধে পতিট্ঠাপনায মগ্গো চেৰ হেতু চ.

অনাগামিমগ্গক্খণে দস্সনট্ঠেন সম্মাদিট্ঠি…পে… অৰিক্খেপট্ঠেন সম্মাসমাধি অনুসহগতস্স কামরাগসঞ্ঞোজনস্স পটিঘসঞ্ঞোজনস্স, অনুসহগতস্স কামরাগানুসযস্স পটিঘানুসযস্স পহানায মগ্গো চেৰ হেতু চ, সহজাতানং ধম্মানং উপত্থম্ভনায মগ্গো চেৰ হেতু চ, কিলেসানং পরিযাদানায মগ্গো চেৰ হেতু চ, পটিৰেধাদিৰিসোধনায মগ্গো চেৰ হেতু চ, চিত্তস্স অধিট্ঠানায মগ্গো চেৰ হেতু চ, চিত্তস্স ৰোদানায মগ্গো চেৰ হেতু চ, ৰিসেসাধিগমায মগ্গো চেৰ হেতু চ, উত্তরি পটিৰেধায মগ্গো চেৰ হেতু চ, সচ্চাভিসমযায মগ্গো চেৰ হেতু চ, নিরোধে পতিট্ঠাপনায মগ্গো চেৰ হেতু চ.

অরহত্তমগ্গক্খণে দস্সনট্ঠেন সম্মাদিট্ঠি…পে… অৰিক্খেপট্ঠেন সম্মাসমাধি রূপরাগস্স অরূপরাগস্স মানস্স উদ্ধচ্চস্স অৰিজ্জায, মানানুসযস্স ভৰরাগানুসযস্স অৰিজ্জানুসযস্স পহানায মগ্গো চেৰ হেতু চ, সহজাতানং ধম্মানং উপত্থম্ভনায মগ্গো চেৰ হেতু চ, কিলেসানং পরিযাদানায মগ্গো চেৰ হেতু চ, পটিৰেধাদিৰিসোধনায মগ্গো চেৰ হেতু চ, চিত্তস্স অধিট্ঠানায মগ্গো চেৰ হেতু চ, চিত্তস্স, ৰোদানায মগ্গো চেৰ হেতু চ, ৰিসেসাধিগমায মগ্গো চেৰ হেতু চ, উত্তরি পটিৰেধায মগ্গো চেৰ হেতু চ, সচ্চাভিসমযায মগ্গো চেৰ, হেতু চ, নিরোধে পতিট্ঠাপনায মগ্গো চেৰ হেতু চ.

দস্সনমগ্গো সম্মাদিট্ঠি, অভিনিরোপনমগ্গো সম্মাসঙ্কপ্পো, পরিগ্গহমগ্গো সম্মাৰাচা, সমুট্ঠানমগ্গো সম্মাকম্মন্তো, ৰোদানমগ্গো সম্মাআজীৰো, পগ্গহমগ্গো সম্মাৰাযামো, উপট্ঠানমগ্গো সম্মাসতি, অৰিক্খেপমগ্গো সম্মাসমাধি. উপট্ঠানমগ্গো সতিসম্বোজ্ঝঙ্গো, পৰিচযমগ্গো ধম্মৰিচযসম্বোজ্ঝঙ্গো, পগ্গহমগ্গো ৰীরিযসম্বোজ্ঝঙ্গো, ফরণমগ্গো পীতিসম্বোজ্ঝঙ্গো, উপসমমগ্গো পস্সদ্ধিসম্বোজ্ঝঙ্গো, অৰিক্খেপমগ্গো সমাধিসম্বোজ্ঝঙ্গো, পটিসঙ্খানমগ্গো উপেক্খাসম্বোজ্ঝঙ্গো.

অস্সদ্ধিযে অকম্পিযমগ্গো সদ্ধাবলং, কোসজ্জে অকম্পিযমগ্গো ৰীরিযবলং, পমাদে অকম্পিযমগ্গো সতিবলং, উদ্ধচ্চে অকম্পিযমগ্গো সমাধিবলং, অৰিজ্জায অকম্পিযমগ্গো পঞ্ঞাবলং. অধিমোক্খমগ্গো সদ্ধিন্দ্রিযং, পগ্গহমগ্গো ৰীরিযিন্দ্রিযং, উপট্ঠানমগ্গো সতিন্দ্রিযং, অৰিক্খেপমগ্গো সমাধিন্দ্রিযং, দস্সনমগ্গো পঞ্ঞিন্দ্রিযং.

আধিপতেয্যট্ঠেন ইন্দ্রিযা মগ্গো, অকম্পিযট্ঠেন বলা মগ্গো, নিয্যানট্ঠেন বোজ্ঝঙ্গা মগ্গো, হেতুট্ঠেন মগ্গঙ্গা মগ্গো, উপট্ঠানট্ঠেন সতিপট্ঠানা মগ্গো, পদহনট্ঠেন সম্মপ্পধানা মগ্গো, ইজ্ঝনট্ঠেন ইদ্ধিপাদা মগ্গো, তথট্ঠেন সচ্চানি মগ্গো, অৰিক্খেপট্ঠেন সমথো মগ্গো, অনুপস্সনট্ঠেন ৰিপস্সনা মগ্গো, একরসট্ঠেন সমথৰিপস্সনা মগ্গো, অনতিৰত্তনট্ঠেন যুগনদ্ধা মগ্গো, সংৰরট্ঠেন সীলৰিসুদ্ধি মগ্গো, অৰিক্খেপট্ঠেন চিত্তৰিসুদ্ধি মগ্গো, দস্সনট্ঠেন দিট্ঠিৰিসুদ্ধি মগ্গো, মুত্তট্ঠেন ৰিমোক্খো মগ্গো, পটিৰেধট্ঠেন ৰিজ্জা মগ্গো, পরিচ্চাগট্ঠেন ৰিমুত্তি মগ্গো, সমুচ্ছেদট্ঠেন খযে ঞাণং মগ্গো, ছন্দো মূলট্ঠেন মগ্গো, মনসিকারো সমুট্ঠানট্ঠেন মগ্গো, ফস্সো সমোধানট্ঠেন মগ্গো, ৰেদনা সমোসরণট্ঠেন মগ্গো, সমাধি পমুখট্ঠেন মগ্গো, সতি আধিপতেয্যট্ঠেন মগ্গো, পঞ্ঞা ততুত্তরট্ঠেন মগ্গো, ৰিমুত্তি সারট্ঠেন মগ্গো, অমতোগধং নিব্বানং পরিযোসানট্ঠেন মগ্গোতি.

মগ্গকথা নিট্ঠিতা.