১. গণনৰার

১৫২. সোল়সৰত্থুকং আনাপানস্সতিসমাধিং [আনাপানসতিসমাধিং (সী. অট্ঠ.)] ভাৰযতো সমাধিকানি দ্ৰে ঞাণসতানি উপ্পজ্জন্তি – অট্ঠ পরিপন্থে [পরিবন্ধে (ক.)] ঞাণানি, অট্ঠ চ উপকারে ঞাণানি, অট্ঠারস উপক্কিলেসে ঞাণানি, তেরস ৰোদানে ঞাণানি, বাত্তিংস সতোকারিস্স [সতোকারীসু (স্যা.)] ঞাণানি, চতুৰীসতি সমাধিৰসেন ঞাণানি, দ্ৰেসত্ততি ৰিপস্সনাৰসেন ঞাণানি, অট্ঠ নিব্বিদাঞাণানি, অট্ঠ নিব্বিদানুলোমঞাণানি, অট্ঠ নিব্বিদাপটিপ্পস্সদ্ধিঞাণানি, একৰীসতি ৰিমুত্তিসুখে ঞাণানি.

কতমানি অট্ঠ পরিপন্থে ঞাণানি, অট্ঠ চ উপকারে ঞাণানি? কামচ্ছন্দো সমাধিস্স পরিপন্থো, নেক্খম্মং সমাধিস্স উপকারং. ব্যাপাদো সমাধিস্স পরিপন্থো, অব্যাপাদো সমাধিস্স উপকারং. থিনমিদ্ধং সমাধিস্স পরিপন্থো, আলোকসঞ্ঞা সমাধিস্স উপকারং. উদ্ধচ্চং সমাধিস্স পরিপন্থো, অৰিক্খেপো সমাধিস্স উপকারং. ৰিচিকিচ্ছা সমাধিস্স পরিপন্থো, ধম্মৰৰত্থানং সমাধিস্স উপকারং. অৰিজ্জা সমাধিস্স পরিপন্থো, ঞাণং সমাধিস্স উপকারং. অরতি সমাধিস্স পরিপন্থো, পামোজ্জং সমাধিস্স উপকারং. সব্বেপি অকুসলা ধম্মা সমাধিস্স পরিপন্থা, সব্বেপি কুসলা ধম্মা সমাধিস্স উপকারা. ইমানি অট্ঠ পরিপন্থে ঞাণানি, অট্ঠ চ উপকারে ঞাণানি.

গণনৰারো পঠমো.