৬৯. আসযানুসযঞাণনিদ্দেসো

১১৩. কতমং তথাগতস্স সত্তানং আসযানুসযে ঞাণং? ইধ তথাগতো সত্তানং আসযং জানাতি, অনুসযং জানাতি, চরিতং জানাতি, অধিমুত্তিং জানাতি, ভব্বাভব্বে সত্তে পজানাতি. কতমো [কতমো চ (স্যা. ক.)] সত্তানং আসযো? ‘‘সস্সতো লোকো’’তি ৰা, ‘‘অসস্সতো লোকো’’তি ৰা, ‘‘অন্তৰা লোকো’’তি ৰা, ‘‘অনন্তৰা লোকো’’তি ৰা, ‘‘তং জীৰং তং সরীর’’ন্তি ৰা, ‘‘অঞ্ঞং জীৰং অঞ্ঞং সরীর’’ন্তি ৰা, ‘‘হোতি তথাগতো পরং মরণা’’তি ৰা, ‘‘ন হোতি তথাগতো পরং মরণা’’তি ৰা, ‘‘হোতি চ ন চ হোতি তথাগতো পরং মরণা’’তি ৰা, ‘‘নেৰ হোতি ন ন হোতি তথাগতো পরং মরণা’’তি ৰা. ইতি ভৰদিট্ঠিসন্নিস্সিতা ৰা সত্তা হোন্তি ৰিভৰদিট্ঠিসন্নিস্সিতা ৰা.

এতে ৰা পন উভো অন্তে অনুপগম্ম ইদপ্পচ্চযতাপটিচ্চসমুপ্পন্নেসু ধম্মেসু অনুলোমিকা খন্তি পটিলদ্ধা হোতি, যথাভূতং ৰা ঞাণং. কামং সেৰন্তঞ্ঞেৰ জানাতি – ‘‘অযং পুগ্গলো কামগরুকো কামাসযো কামাধিমুত্তো’’তি. কামং সেৰন্তঞ্ঞেৰ জানাতি – ‘‘অযং পুগ্গলো নেক্খম্মগরুকো নেক্খম্মাসযো নেক্খম্মাধিমুত্তো’’তি. নেক্খম্মং সেৰন্তঞ্ঞেৰ জানাতি – ‘‘অযং পুগ্গলো (নেক্খম্মগরুকো নেক্খম্মাসযো নেক্খম্মাধিমুত্তো’’তি. নেক্খম্মং সেৰন্তঞ্ঞেৰ জানাতি – ‘‘অযং পুগ্গলো কামগরুকো কামাসযো কামাধিমুত্তো’’তি. ব্যাপাদং সেৰন্তঞ্ঞেৰ জানাতি) [( ) এত্থন্তরে পাঠা নত্থি স্যামপোত্থকে, এৰমুপরিপি] – ‘‘অযং পুগ্গলো ব্যাপাদগরুকো ব্যাপাদাসযো ব্যাপাদাধিমুত্তো’’তি. ব্যাপাদং সেৰন্তঞ্ঞেৰ জানাতি – ‘‘অযং পুগ্গলো (অব্যাপাদগরুকো অব্যাপাদাসযো অব্যাপাদাধিমুত্তো’’তি. অব্যাপাদং সেৰন্তঞ্ঞেৰ জানাতি – ‘‘অযং পুগ্গলো অব্যাপাদগরুকো অব্যাপাদাসযো অব্যাপাদাধিমুত্তো’’তি. অব্যাপাদং সেৰন্তঞ্ঞেৰ জানাতি – ‘‘অযং পুগ্গলো ব্যাপাদগরুকো ব্যাপাদাসযো ব্যাপাদাধিমুত্তো’’তি. থিনমিদ্ধং সেৰন্তঞ্ঞেৰ জানাতি) – ‘‘অযং পুগ্গলো থিনমিদ্ধগরুকো থিনমিদ্ধাসযো থিনমিদ্ধাধিমুত্তো’’তি. থিনমিদ্ধং সেৰন্তঞ্ঞেৰ জানাতি – ‘‘অযং পুগ্গলো আলোকসঞ্ঞাগরুকো আলোকসঞ্ঞাসযো আলোকসঞ্ঞাধিমুত্তো’’তি. আলোকসঞ্ঞং সেৰন্তঞ্ঞেৰ জানাতি – ‘‘অযং পুগ্গলো (আলোকসঞ্ঞাগরুকো আলোকসঞ্ঞাসযো আলোকসঞ্ঞাধিমুত্তো’’তি. আলোকসঞ্ঞং সেৰন্তঞ্ঞেৰ জানাতি – ‘‘অযং পুগ্গলো থিনমিদ্ধগরুকো থিনমিদ্ধাসযো থিনমিদ্ধাধিমুত্তো’’তি.) অযং সত্তানং আসযো.

১১৪. কতমো চ সত্তানং অনুসযো? সত্তানুসযা – কামরাগানুসযো, পটিঘানুসযো, মানানুসযো, দিট্ঠানুসযো, ৰিচিকিচ্ছানুসযো, ভৰরাগানুসযো, অৰিজ্জানুসযো. যং লোকে পিযরূপং সাতরূপং, এত্থ সত্তানং কামরাগানুসযো অনুসেতি. যং লোকে অপ্পিযরূপং অসাতরূপং, এত্থ সত্তানং পটিঘানুসযো অনুসেতি. ইতি ইমেসু দ্ৰীসু ধম্মেসু অৰিজ্জা অনুপতিতা, তদেকট্ঠো মানো চ দিট্ঠি চ ৰিচিকিচ্ছা চ দট্ঠব্বা. অযং সত্তানং অনুসযো.

কতমঞ্চ সত্তানং চরিতং? পুঞ্ঞাভিসঙ্খারো অপুঞ্ঞাভিসঙ্খারো আনেঞ্জাভিসঙ্খারো পরিত্তভূমকো ৰা মহাভূমকো ৰা. ইদং সত্তানং চরিতং.

১১৫. কতমা চ সত্তানং অধিমুত্তি? সন্তি সত্তা হীনাধিমুত্তিকা, সন্তি সত্তা পণীতাধিমুত্তিকা. হীনাধিমুত্তিকা সত্তা হীনাধিমুত্তিকে সত্তে সেৰন্তি ভজন্তি পযিরুপাসন্তি. পণীতাধিমুত্তিকা সত্তা পণীতাধিমুত্তিকে সত্তে সেৰন্তি ভজন্তি পযিরুপাসন্তি. অতীতম্পি অদ্ধানং হীনাধিমুত্তিকা সত্তা হীনাধিমুত্তিকে সত্তে সেৰিংসু ভজিংসু পযিরুপাসিংসু; পণীতাধিমুত্তিকা সত্তা পণীতাধিমুত্তিকে সত্তে সেৰিংসু ভজিংসু পযিরুপাসিংসু. অনাগতম্পি অদ্ধানং হীনাধিমুত্তিকা সত্তা হীনাধিমুত্তিকে সত্তে সেৰিস্সন্তি ভজিস্সন্তি পযিরুপাসিস্সন্তি; পণীতাধিমুত্তিকা সত্তা পণীতাধিমুত্তিকে সত্তে সেৰিস্সন্তি ভজিস্সন্তি পযিরুপাসিস্সন্তি. অযং সত্তানং অধিমুত্তি.

কতমে সত্তা অভব্বা? যে তে সত্তা কম্মাৰরণেন সমন্নাগতা, কিলেসাৰরণেন সমন্নাগতা, ৰিপাকাৰরণেন সমন্নাগতা, অস্সদ্ধা অচ্ছন্দিকা দুপ্পঞ্ঞা, অভব্বা নিযামং ওক্কমিতুং কুসলেসু ধম্মেসু সম্মত্তং – ইমে তে সত্তা অভব্বা.

কতমে সত্তা ভব্বা? যে তে সত্তা ন কম্মাৰরণেন সমন্নাগতা, ন কিলেসাৰরণেন সমন্নাগতা, ন ৰিপাকাৰরণেন সমন্নাগতা, সদ্ধা ছন্দিকা পঞ্ঞৰন্তো, ভব্বা নিযামং ওক্কমিতুং কুসলেসু ধম্মেসু সম্মত্তং – ইমে তে সত্তা ভব্বা. ইদং তথাগতস্স সত্তানং আসযানুসযে ঞাণং.

আসযানুসযঞাণনিদ্দেসো নৰসট্ঠিমো.