৩৭. সল্লেখট্ঠঞাণনিদ্দেসো

৮৮. কথং পুথুনানত্তেকত্ততেজপরিযাদানে পঞ্ঞা সল্লেখট্ঠে [পুথুনানত্তেকত্ততেজপরিযাদানে (ক.)] ঞাণং? পুথূতি – রাগো পুথু, দোসো পুথু, মোহো পুথু, কোধো…পে… উপনাহো… মক্খো… পল়াসো… ইস্সা… মচ্ছরিযং… মাযা… সাঠেয্যং… থম্ভো… সারম্ভো… মানো… অতিমানো… মদো… পমাদো… সব্বে কিলেসা… সব্বে দুচ্চরিতা… সব্বে অভিসঙ্খারা… সব্বে ভৰগামিকম্মা.

নানত্তেকত্তন্তি কামচ্ছন্দো নানত্তং, নেক্খম্মং একত্তং. ব্যাপাদো নানত্তং, অব্যাপাদো একত্তং. থিনমিদ্ধং নানত্তং, আলোকসঞ্ঞা একত্তং. উদ্ধচ্চং নানত্তং, অৰিক্খেপো একত্তং. ৰিচিকিচ্ছা নানত্তং, ধম্মৰৰত্থানং একত্তং. অৰিজ্জা নানত্তং, ঞাণং একত্তং. অরতি নানত্তং, পামোজ্জং একত্তং. নীৰরণা নানত্তং, পঠমং ঝানং একত্তং…পে… সব্বে কিলেসা নানত্তং, অরহত্তমগ্গো একত্তং.

তেজোতি পঞ্চ তেজা – চরণতেজো, গুণতেজো, পঞ্ঞাতেজো, পুঞ্ঞতেজো, ধম্মতেজো. চরণতেজেন তেজিতত্তা দুস্সীল্যতেজং পরিযাদিযতি. গুণতেজেন তেজিতত্তা অগুণতেজং পরিযাদিযতি. পঞ্ঞাতেজেন তেজিতত্তা দুপ্পঞ্ঞতেজং পরিযাদিযতি. পুঞ্ঞতেজেন তেজিতত্তা অপুঞ্ঞতেজং পরিযাদিযতি. ধম্মতেজেন তেজিতত্তা অধম্মতেজং পরিযাদিযতি.

সল্লেখোতি কামচ্ছন্দো অসল্লেখো, নেক্খম্মং সল্লেখো. ব্যাপাদো অসল্লেখো, অব্যাপাদো সল্লেখো. থিনমিদ্ধং অসল্লেখো, আলোকসঞ্ঞা সল্লেখো. উদ্ধচ্চং অসল্লেখো, অৰিক্খেপো সল্লেখো. ৰিচিকিচ্ছা অসল্লেখো, ধম্মৰৰত্থানং সল্লেখো. অৰিজ্জা অসল্লেখো, ঞাণং সল্লেখো. অরতি অসল্লেখো, পামোজ্জং সল্লেখো. নীৰরণা অসল্লেখো, পঠমং ঝানং সল্লেখো…পে… সব্বকিলেসা অসল্লেখো, অরহত্তমগ্গো সল্লেখো. তং ঞাতট্ঠেন ঞাণং, পজাননট্ঠেন পঞ্ঞা. তেন ৰুচ্চতি – ‘‘পুথুনানত্ততেজপরিযাদানে পঞ্ঞা সল্লেখট্ঠে ঞাণং’’.

সল্লেখট্ঠঞাণনিদ্দেসো সত্ততিংসতিমো.