৩২. আনন্তরিকসমাধিঞাণনিদ্দেসো

৮০. কথং অৰিক্খেপপরিসুদ্ধত্তা আসৰসমুচ্ছেদে পঞ্ঞা আনন্তরিকসমাধিম্হি ঞাণং? নেক্খম্মৰসেন চিত্তস্স একগ্গতা অৰিক্খেপো সমাধি. তস্স সমাধিস্স ৰসেন উপ্পজ্জতি ঞাণং. তেন ঞাণেন আসৰা খীযন্তি. ইতি পঠমং সমথো, পচ্ছা ঞাণং. তেন ঞাণেন আসৰানং খযো হোতি. তেন ৰুচ্চতি – ‘‘অৰিক্খেপপরিসুদ্ধত্তা আসৰসমুচ্ছেদে পঞ্ঞা আনন্তরিকসমাধিম্হি ঞাণং’’.

আসৰাতি কতমে তে আসৰা? কামাসৰো, ভৰাসৰো, দিট্ঠাসৰো, অৰিজ্জাসৰো. কত্থেতে আসৰা খীযন্তি? সোতাপত্তিমগ্গেন অনৰসেসো দিট্ঠাসৰো খীযতি, অপাযগমনীযো কামাসৰো খীযতি, অপাযগমনীযো ভৰাসৰো খীযতি, অপাযগমনীযো অৰিজ্জাসৰো খীযতি. এত্থেতে আসৰা খীযন্তি. সকদাগামিমগ্গেন ওল়ারিকো কামাসৰো খীযতি, তদেকট্ঠো ভৰাসৰো খীযতি, তদেকট্ঠো অৰিজ্জাসৰো খীযতি. এত্থেতে আসৰা খীযন্তি. অনাগামিমগ্গেন অনৰসেসো কামাসৰো খীযতি, তদেকট্ঠো ভৰাসৰো খীযতি, তদেকট্ঠো অৰিজ্জাসৰো খীযতি. এত্থেতে আসৰা খীযন্তি. অরহত্তমগ্গেন অনৰসেসো ভৰাসৰো খীযতি, অনৰসেসো অৰিজ্জাসৰো খীযতি. এত্থেতে আসৰা খীযন্তি.

অব্যাপাদৰসেন …পে… আলোকসঞ্ঞাৰসেন… অৰিক্খেপৰসেন… ধম্মৰৰত্থানৰসেন… ঞাণৰসেন… পামোজ্জৰসেন… পঠমজ্ঝানৰসেন… দুতিযজ্ঝানৰসেন… ততিযজ্ঝানৰসেন… চতুত্থজ্ঝানৰসেন… আকাসানঞ্চাযতনসমাপত্তিৰসেন… ৰিঞ্ঞাণঞ্চাযতনসমাপত্তিৰসেন… আকিঞ্চঞ্ঞাযতনসমাপত্তিৰসেন… নেৰসঞ্ঞানাসঞ্ঞাযতনসমাপত্তিৰসেন… পথৰীকসিণৰসেন… আপোকসিণৰসেন … তেজোকসিণৰসেন… ৰাযোকসিণৰসেন… নীলকসিণৰসেন… পীতকসিণৰসেন… লোহিতকসিণৰসেন… ওদাতকসিণৰসেন… আকাসকসিণৰসেন… ৰিঞ্ঞাণকসিণৰসেন… বুদ্ধানুস্সতিৰসেন… ধম্মানুস্সতিৰসেন… সঙ্ঘানুস্সতিৰসেন… সীলানুস্সতিৰসেন… চাগানুস্সতিৰসেন… দেৰতানুস্সতিৰসেন… আনাপানস্সতিৰসেন… মরণস্সতিৰসেন… কাযগতাসতিৰসেন… উপসমানুস্সতিৰসেন… উদ্ধুমাতকসঞ্ঞাৰসেন… ৰিনীলকসঞ্ঞাৰসেন… ৰিপুব্বকসঞ্ঞাৰসেন… ৰিচ্ছিদ্দকসঞ্ঞাৰসেন… ৰিক্খাযিতকসঞ্ঞাৰসেন… ৰিক্খিত্তকসঞ্ঞাৰসেন… হতৰিক্খিত্তকসঞ্ঞাৰসেন … লোহিতকসঞ্ঞাৰসেন… পুল়ৰকসঞ্ঞাৰসেন… অট্ঠিকসঞ্ঞাৰসেন.

৮১. দীঘং অস্সাসৰসেন…পে… দীঘং পস্সাসৰসেন… রস্সং অস্সাসৰসেন… রস্সং পস্সাসৰসেন… সব্বকাযপটিসংৰেদী অস্সাসৰসেন… সব্বকাযপটিসংৰেদী পস্সাসৰসেন… পস্সম্ভযং কাযসঙ্খারং অস্সাসৰসেন… পস্সম্ভযং কাযসঙ্খারং পস্সাসৰসেন… পীতিপটিসংৰেদী অস্সাসৰসেন… পীতিপটিসংৰেদী পস্সাসৰসেন… সুখপটিসংৰেদী অস্সাসৰসেন… সুখপটিসংৰেদী পস্সাসৰসেন… চিত্তসঙ্খারপটিসংৰেদী অস্সাসৰসেন… চিত্তসঙ্খারপটিসংৰেদী পস্সাসৰসেন… পস্সম্ভযং চিত্তসঙ্খারং অস্সাসৰসেন… পস্সম্ভযং চিত্তসঙ্খারং পস্সাসৰসেন… চিত্তপটিসংৰেদী অস্সাসৰসেন… চিত্তপটিসংৰেদী পস্সাসৰসেন… অভিপ্পমোদযং চিত্তং অস্সাসৰসেন… অভিপ্পমোদযং চিত্তং পস্সাসৰসেন… সমাদহং চিত্তং…পে… ৰিমোচযং চিত্তং… অনিচ্চানুপস্সী … ৰিরাগানুপস্সী… নিরোধানুপস্সী… পটিনিস্সগ্গানুপস্সী অস্সাসৰসেন… পটিনিস্সগ্গানুপস্সী পস্সাসৰসেন চিত্তস্স একগ্গতা অৰিক্খেপো সমাধি. তস্স সমাধিস্স ৰসেন উপ্পজ্জতি ঞাণং, তেন ঞাণেন আসৰা খীযন্তি. ইতি পঠমং সমথো, পচ্ছা ঞাণং. তেন ঞাণেন আসৰানং খযো হোতি. তেন ৰুচ্চতি – ‘‘অৰিক্খেপপরিসুদ্ধত্তা আসৰসমুচ্ছেদে পঞ্ঞা আনন্তরিকসমাধিম্হি ঞাণং’’.

আনন্তরিকসমাধিঞাণনিদ্দেসো দ্ৰত্তিংসতিমো.