১৮. ভূমিনানত্তঞাণনিদ্দেসো

৭২. কথং চতুধম্মৰৰত্থানে পঞ্ঞা ভূমিনানত্তে ঞাণং? চতস্সো ভূমিযো – কামাৰচরা ভূমি, রূপাৰচরা ভূমি, অরূপাৰচরা ভূমি, অপরিযাপন্না ভূমি. কতমা কামাৰচরা ভূমি? হেট্ঠতো অৰীচিনিরযং পরিযন্তং করিত্ৰা উপরিতো পরনিম্মিতৰসৰত্তী দেৰে [পরনিম্মিতৰসৰত্তিদেৰে (ক.)] অন্তোকরিত্ৰা যং এতস্মিং অন্তরে এত্থাৰচরা এত্থ পরিযাপন্না খন্ধধাতুআযতনা রূপং ৰেদনা সঞ্ঞা সঙ্খারা ৰিঞ্ঞাণং – অযং কামাৰচরা ভূমি.

কতমা রূপাৰচরা ভূমি? হেট্ঠতো ব্রহ্মলোকং পরিযন্তং করিত্ৰা উপরিতো অকনিট্ঠে দেৰে অন্তোকরিত্ৰা যং এতস্মিং অন্তরে এত্থাৰচরা এত্থ পরিযাপন্না সমাপন্নস্স ৰা উপপন্নস্স ৰা দিট্ঠধম্মসুখৰিহারিস্স ৰা চিত্তচেতসিকা ধম্মা – অযং রূপাৰচরা ভূমি.

কতমা অরূপাৰচরা ভূমি? হেট্ঠতো আকাসানঞ্চাযতনূপগে দেৰে পরিযন্তং করিত্ৰা উপরিতো নেৰসঞ্ঞানাসঞ্ঞাযতনূপগে দেৰে অন্তোকরিত্ৰা যং এতস্মিং অন্তরে এত্থাৰচরা এত্থ পরিযাপন্না সমাপন্নস্স ৰা উপপন্নস্স ৰা দিট্ঠধম্মসুখৰিহারিস্স ৰা চিত্তচেতসিকা ধম্মা – অযং অরূপাৰচরা ভূমি.

কতমা অপরিযাপন্না ভূমি? অপরিযাপন্না মগ্গা চ মগ্গফলানি চ অসঙ্খতা চ ধাতু – অযং অপরিযাপন্না ভূমি. ইমা চতস্সো ভূমিযো.

অপরাপি চতস্সো ভূমিযো চত্তারো সতিপট্ঠানা চত্তারো সম্মপ্পধানা, চত্তারো ইদ্ধিপাদা, চত্তারি ঝানানি, চতস্সো অপ্পমঞ্ঞাযো, চতস্সো অরূপসমাপত্তিযো, চতস্সো পটিসম্ভিদা, চতস্সো পটিপদা, চত্তারি আরম্মণানি, চত্তারো অরিযৰংসা, চত্তারি সঙ্গহৰত্থূনি, চত্তারি চক্কানি, চত্তারি ধম্মপদানি – ইমা চতস্সো ভূমিযো. তং ঞাতট্ঠেন ঞাণং, পজাননট্ঠেন পঞ্ঞা. তেন ৰুচ্চতি – ‘‘চতুধম্মৰৰত্থানে পঞ্ঞা ভূমিনানত্তে ঞাণং’’.

ভূমিনানত্তঞাণনিদ্দেসো অট্ঠারসমো.