তত্থ ইমা উদ্দানগাথা

তণ্হা চ অৰিজ্জা লোভো, দোসো তথেৰ মোহো চ;

চত্তারো চ ৰিপল্লাসা, কিলেসভূমি নৰ পদানি.

যে চ সতিপট্ঠানা সমথো, ৰিপস্সনা কুসলমূলং;

এতং সব্বং কুসলং, ইন্দ্রিযভূমি নৰপদানি.

সব্বং কুসলং নৰহি পদেহি যুজ্জতি, নৰহি চেৰ অকুসলং;

এককে নৰ মূলপদানি, উভযতো অট্ঠারস মূলপদানি.

ইমেসং অট্ঠারসন্নং মূলপদানং যানি নৰ পদানি অকুসলানি, অযং দুক্খসমুদযো; যানি নৰ পদানি কুসলানি, অযং দুক্খনিরোধগামিনী পটিপদা. ইতি সমুদযস্স দুক্খং ফলং, দুক্খনিরোধগামিনিযা পটিপদায নিরোধং ফলং. ইমানি চত্তারি অরিযসচ্চানি ভগৰতা বারাণসিযং দেসিতানি.

৭. তত্থ দুক্খস্স অরিযসচ্চস্স অপরিমাণানি অক্খরানি পদানি ব্যঞ্জনানি আকারানি নিরুত্তিযো নিদ্দেসা দেসিতা এতস্সেৰত্থস্স সঙ্কাসনায পকাসনায ৰিৰরণায ৰিভজনায উত্তানীকম্মতায পঞ্ঞাপনাযাতি যা এৰং সব্বেসং সচ্চানং. ইতি একমেকং সচ্চং অপরিমাণেহি অক্খরপদব্যঞ্জনআকারনিরুত্তিনিদ্দেসেহি পরিযেসিতব্বং, তঞ্চ ব্যঞ্জনং অত্থপুথুত্তেন পন অত্থেৰ ব্যঞ্জনপুথুত্তেন.

যো হি কোচি সমণো ৰা ব্রাহ্মণো ৰা এৰং ৰদেয্য ‘‘অহং ইদং দুক্খং পচ্চক্খায অঞ্ঞং দুক্খং পঞ্ঞপেস্সামী’’তি তস্স তং ৰাচাৰত্থুকমেৰস্স পুচ্ছিতো চ ন সম্পাযিস্সতি. এৰং সচ্চানি. যঞ্চ রত্তিং ভগৰা অভিসম্বুদ্ধো, যঞ্চ রত্তিং অনুপাদায পরিনিব্বুতো, এত্থন্তরে যং কিঞ্চি ভগৰতা ভাসিতং সুত্তং গেয্যং ৰেয্যাকরণং গাথা উদানং ইতিৰুত্তকং জাতকং অব্ভুতধম্মং ৰেদল্লং, সব্বং তং ধম্মচক্কং পৰত্তিতং. ন কিঞ্চি বুদ্ধানং ভগৰন্তানং ধম্মদেসনায ধম্মচক্কতো বহিদ্ধা, তস্স সব্বং সুত্তং অরিযধম্মেসু পরিযেসিতব্বং. তত্থ পরিগ্গণ্হনায আলোকসভানি চত্তারি অরিযসচ্চানি থাৰরানি ইমানি.

তত্থ কতমং দুক্খং? জাতি জরা ব্যাধি মরণং সংখিত্তেন পঞ্চুপাদানক্খন্ধা দুক্খা. তত্থাযং লক্খণনিদ্দেসো, পাতুভাৰলক্খণা জাতি, পরিপাকলক্খণা জরা, দুক্খদুক্খতালক্খণো ব্যাধি, চুতিলক্খণং মরণং, পিযৰিপ্পযোগৰিপরিণামপরিতাপনলক্খণো সোকো, লালপ্পনলক্খণো পরিদেৰো, কাযসম্পীল়নলক্খণং দুক্খং, চিত্তসম্পীল়নলক্খণং দোমনস্সং, কিলেসপরিদহনলক্খণো উপাযাসো, অমনাপসমোধানলক্খণো অপ্পিযসম্পযোগো, মনাপৰিনাভাৰলক্খণো পিযৰিপ্পযোগো, অধিপ্পাযৰিৰত্তনলক্খণো অলাভো, অপরিঞ্ঞালক্খণা পঞ্চুপাদানক্খন্ধা, পরিপাকচুতিলক্খণং জরামরণং, পাতুভাৰচুতিলক্খণং চুতোপপত্তি, পটিসন্ধিনিব্বত্তনলক্খণো সমুদযো, সমুদযপরিজহনলক্খণো নিরোধো, অনুসযসমুচ্ছেদলক্খণো মগ্গো. ব্যাধিলক্খণং দুক্খং, সঞ্জাননলক্খণো সমুদযো, নিয্যানিকলক্খণো মগ্গো, সন্তিলক্খণো নিরোধো. অপ্পটিসন্ধিভাৰনিরোধলক্খণা অনুপাদিসেসা নিব্বানধাতু, দুক্খঞ্চ সমুদযো চ, দুক্খঞ্চ নিরোধো চ, দুক্খঞ্চ মগ্গো চ, সমুদযো চ দুক্খঞ্চ, সমুদযো চ নিরোধো চ, সমুদযো চ মগ্গো চ, নিরোধো চ সমুদযো চ, নিরোধো চ দুক্খঞ্চ, নিরোধো চ মগ্গো চ, মগ্গো চ নিরোধো চ, মগ্গো চ সমুদযো চ, মগ্গো চ দুক্খঞ্চ.

৮. তত্থিমানি সুত্তানি.

‘‘যমেকরত্তিং [জাতক ১ ৰীসতিনিপাতে অযোঘরজাতকে] পঠমং, গব্ভে ৰসতি মাণৰো;

অব্ভুট্ঠিতোৰ সো যাতি, স গচ্ছং ন নিৰত্ততী’’তি.

অট্ঠিমা, আনন্দ, দানুপপত্তিযো একুত্তরিকে সুত্তং – অযং জাতি.

তত্থ কতমা জরা?

অচরিত্ৰা [ধ. প. ১৫৫] ব্রহ্মচরিযং, অলদ্ধা যোব্বনে ধনং;

জিণ্ণকোঞ্চাৰ ঝাযন্তি, খীণমচ্ছেৰ পল্ললে.

পঞ্চ পুব্বনিমিত্তানি দেৰেসু – অযং জরা.

তত্থ কতমো ব্যাধি?

সামং তেন কুতো রাজ, তুৰম্পি জরাযন্তি ৰেদেসি;

খত্তিয কম্মস্স ফলো, লোকো ন হি কম্মং পনযতি.

তযো গিলানা – অযং ব্যাধি.

তত্থ কতমং মরণং?

যথাপি [দীঘনিকাযে অধোলিখিতগাথা] কুম্ভকারস্স, কতং মত্তিকভাজনং;

খুদ্দকঞ্চ মহন্তঞ্চ, যং পক্কং যঞ্চ আমকং;

সব্বং ভেদনপরিযন্তং, এৰং মচ্চান জীৰিতং.

মমাযিতে পস্সথ ফন্দমানে [হঞ্ঞমানে (পী) পস্স সু. নি. ৭৮৩], মচ্ছেৰ অপ্পোদকে খীণসোতে;

এতম্পি দিস্ৰা অমমো চরেয্য, ভৰেসু আসত্তিমকুব্বমানো.

উদকপ্পনসুত্তং – ইদং মরণং.

তত্থ কতমো সোকো?

ইধ সোচতি পেচ্চ সোচতি, পাপকারী উভযত্থ সোচতি;

সো সোচতি সো ৰিহঞ্ঞতি, দিস্ৰা কম্মকিলিট্ঠমত্তনো [কম্মকিলিট্ঠং অত্থনো (পী.) পস্স ধ. প. ১৫].

তীণি দুচ্চরিতানি – অযং সোকো.

তত্থ কতমো পরিদেৰো?

কামেসু [সু. নি. ৭৮০] গিদ্ধা পসুতা পমূল়্হা, অৰদানিযা তে ৰিসমে নিৰিট্ঠা;

দুক্খূপনীতা পরিদেৰযন্তি, কিংসু ভৰিস্সাম ইতো চুতাসে.

তিস্সো ৰিপত্তিযো – অযং পরিদেৰো.

তত্থ কতমং দুক্খং?

সতং আসি অযোসঙ্কূ [অযোসঙ্কু (পী. ক.) পস্স থেরগা. ১১৯৭], সব্বে পচ্চত্তৰেদনা;

জলিতা জাতৰেদাৰ, অচ্চিসঙ্ঘসমাকুলা.

মহা ৰত সো পরিল়াহো [পরিদাঘো (পী. ক.) পস্স সং. নি. ৫.১১১৩] সংযুত্তকে সুত্তং সচ্চসংযুত্তেসু – ইদং দুক্খং.

তত্থ কতমং দোমনস্সং?

সঙ্কপ্পেহি পরেতো [পরতো (ক.) পস্স সু. নি. ৮২৪] সো, কপণো ৰিয ঝাযতি;

সুত্ৰা পরেসং নিগ্ঘোসং, মঙ্কু হোতি তথাৰিধো.

দ্ৰেমে তপনীযা ধম্মা – ইদং দোমনস্সং.

তত্থ কতমো উপাযাসো?

কম্মারানং যথা উক্কা, অন্তো ডয্হতি নো বহি;

এৰং ডয্হতি মে হদযং, সুত্ৰা নিব্বত্তমম্বুজং.

তযো অগ্গী – অযং উপাযাসো.

তত্থ কতমো অপ্পিযসম্পযোগো?

অযসাৰ [ধ. প. ২৪০] মলং সমুট্ঠিতং, ততুট্ঠায তমেৰ খাদতি;

এৰং অতিধোনচারিনং, সানি কম্মানি নযন্তি দুগ্গতিং.

দ্ৰেমে তথাগতং অব্ভাচিক্খন্তি, একুত্তরিকে সুত্তং দুকেসু – অযং অপ্পিযসম্পযোগো.

তত্থ কতমো পিযৰিপ্পযোগো?

সুপিনেন যথাপি সঙ্গতং, পটিবুদ্ধো পুরিসো ন পস্সতি;

এৰম্পি পিযাযিতং [মমাযিতং (পী. ক.) পস্স সু. নি. ৮১৩] জনং, পেতং কালঙ্কতং [কালকতং (পী.)] ন পস্সতি.

তে দেৰা চৰনধম্মং ৰিদিত্ৰা তীহি ৰাচাহি অনুসাসন্তি. অযং পিযৰিপ্পযোগো.

যম্পিচ্ছং ন লভতি, তিস্সো মারধীতরো;

তস্স চে কামযানস্স [কামযমানস্স (ক.) পস্স সু. নি. ৭৭৩], ছন্দজাতস্স জন্তুনো;

তে কামা পরিহাযন্তি, সল্লৰিদ্ধোৰ রুপ্পতি.

সংখিত্তেন পঞ্চুপাদানক্খন্ধা দুক্খা.

চক্খু সোতঞ্চ ঘানঞ্চ, জিৰ্হা কাযো ততো মনং;

এতে লোকামিসা ঘোরা, যত্থ সত্তা পুথুজ্জনা.

পঞ্চিমে ভিক্খৰে খন্ধা – ইদং দুক্খং.

তত্থ কতমা জরা চ মরণঞ্চ?

অপ্পং ৰত জীৰিতং ইদং, ওরং ৰস্সসতাপি মীযতে [মীযতি (সু. নি. ৮১০)];

অথ ৰাপি অকিচ্ছং জীৰিতং, অথ খো সো জরসাপি মীযতে.

সংযুত্তকে পসেনদিসংযুত্তকে সুত্তং অয্যিকা মে কালঙ্কতা – অযং জরা চ মরণঞ্চ.

তত্থ কতমা চুতি চ উপপত্তি চ?

‘‘সব্বে সত্তা মরিস্সন্তি, মরণন্তং হি জীৰিতং;

যথাকম্মং গমিস্সন্তি, অত্তকম্মফলূপগা’’তি [পুঞ্ঞপাপফলূপগাতি (সং. নি. ১.১৩৩)]. –

অযং চুতি চ উপপত্তি চ.

ইমেহি সুত্তেহি একসদিসেহি চ অঞ্ঞেহি নৰৰিধং সুত্তং তং অনুপৰিট্ঠেহি লক্খণতো দুক্খং ঞত্ৰা সাধারণঞ্চ অসাধারণঞ্চ দুক্খং অরিযসচ্চং নিদ্দিসিতব্বং. গাথাহি গাথা অনুমিনিতব্বা, ব্যাকরণেহি ৰা ব্যাকরণং – ইদং দুক্খং.

৯. তত্থ কতমো দুক্খসমুদযো?

কামেসু সত্তা কামসঙ্গসত্তা [কামপসঙ্গসত্তা (পী.) পস্স উদা. ৬৩], সংযোজনে ৰজ্জমপস্সমানা;

ন হি জাতু সংযোজনসঙ্গসত্তা, ওঘং তরেয্যুং ৰিপুলং মহন্তং.

চত্তারো আসৰা সুত্তং – অযং দুক্খসমুদযো.

তত্থ কতমো দুক্খনিরোধো?

যম্হি ন মাযা ৰসতী ন মানো,

যো ৰীতলোভো অমমো নিরাসো,

পনুণ্ণকোধো [পনুন্নকোধো (পী.) পস্স উদা. ২৬] অভিনিব্বুতত্তো;

সো ব্রাহ্মণো সো সমণো স ভিক্খু.

দ্ৰেমা ৰিমুত্তিযো, রাগৰিরাগা চ চেতোৰিমুত্তি; অৰিজ্জাৰিরাগা চ পঞ্ঞাৰিমুত্তি – অযং নিরোধো.

তত্থ কতমো মগ্গো?

এসেৰ মগ্গো নত্থঞ্ঞো, দস্সনস্স ৰিসুদ্ধিযা;

অরিযো অট্ঠঙ্গিকো মগ্গো, মারস্সেতং পমোহনং.

সত্তিমে, ভিক্খৰে, বোজ্ঝঙ্গা – অযং মগ্গো.

তত্থ কতমানি চত্তারি অরিযসচ্চানি?

‘‘যে ধম্মা [মহাৰ. ৬০] হেতুপ্পভৰা, তেসং হেতুং তথাগতো আহ;

তেসঞ্চ যো নিরোধো, এৰংৰাদী মহাসমণো’’তি.

হেতুপ্পভৰা ধম্মা দুক্খং, হেতুসমুদযো, যং ভগৰতো ৰচনং. অযং ধম্মো যো নিরোধো, যে হি কেচি সংযোজনিযেসু ধম্মেসু অস্সদানুপস্সিনো ৰিহরন্তি. কিলেসা তণ্হা পৰড্ঢতি, তণ্হাপচ্চযা উপাদানং…পে… এৰমেতস্স কেৰলস্স দুক্খক্খন্ধস্স সমুদযো হোতি. তত্থ যং সংযোজনং – অযং সমুদযো. যে সংযোজনিযা ধম্মা যে চ সোকপরিদেৰদুক্খদোমনস্সুপাযাসা সম্ভৰন্তি – ইদং দুক্খং. যা সংযোজনিযেসু ধম্মেসু আদীনৰানুপস্সনা – অযং মগ্গো. পরিমুচ্চতি জাতিযা জরায ব্যাধীহি মরণেহি সোকেহি পরিদেৰেহি যাৰ উপাযাসেহি – ইদং নিব্বানং. ইমানি চত্তারি সচ্চানি.

তত্থ কতমা অনুপাদিসেসা নিব্বানধাতু?

অত্থঙ্গতস্স ন পমাণমত্থি, তং হি ৰা নত্থি যেন নং পঞ্ঞপেয্য;

সব্বসঙ্গানং সমূহতত্তা ৰিদূ, সিতা ৰাদসতস্সু [ৰাদসতস্স (পী. ক.)] সব্বে.

সংযুত্তকে গোধিকসংযুত্তং.

ইমানি অসাধারণানি সুত্তানি. যহিং যহিং সচ্চানি নিদ্দিট্ঠানি, তহিং তহিং সচ্চলক্খণতো ওতারেত্ৰা [ওহারেত্ৰা (পী. ক.)] অপরিমাণেহি ব্যঞ্জনেহি সো অত্থো পরিযেসিতব্বো. তত্থ অত্থানুপরিৰত্তি ব্যঞ্জনেন পুন ব্যঞ্জনানুপরিৰত্তি অত্থেন তস্স একমেকস্স অপরিমাণানি ব্যঞ্জনানি ইমেহি সুত্তেহি যথানিক্খিত্তেহি চত্তারি অরিযসচ্চানি নিদ্দিসিতব্বানি. পঞ্চনিকাযে অনুপৰিট্ঠাহি গাথাহি গাথা অনুমিনিতব্বা, ব্যাকরণেন ব্যাকরণং. ইমানি অসাধারণানি সুত্তানি.

তেসং ইমা উদ্দানগাথা

যমেকরত্তিং পঠমং, অট্ঠ দানূপপত্তিযো;

পঞ্চ পুব্বনিমিত্তানি, খীণমচ্ছংৰ পল্ললং.

সামং তেন কুতো রাজ, তযো দেৰা গিলানকা;

যথাপি কুম্ভকারস্স, যথা নদিদকপ্পনং.

ইধ সোচতি পেচ্চ সোচতি, তীণি দুচ্চরিতানি চ;

কামেসু গিদ্ধা পসুতা, যাৰ তিস্সো ৰিপত্তিযো.

সতং আসি [সতমাযু (সী.), সতধাতু (পী.)] অযোসঙ্কূ, পরিল়াহো মহত্তরো;

সঙ্কপ্পেহি পরেতো সো, তত্থ তপনিযেহি চ.

কম্মারানং যথা উক্কা, তযো অগ্গী পকাসিতা;

অযতো মলমুপ্পন্নং, অব্ভক্খানং তথাগতে.

তিৰিধং দেৰানুসাসন্তি, সুপিনেন সঙ্গমো যথা;

তিস্সো চেৰ মারধীতা, সল্লৰিদ্ধোৰ রুপ্পতি.

চক্খু সোতঞ্চ ঘানঞ্চ, পঞ্চক্খন্ধা পকাসিতা;

অপ্পং ৰত জীৰিতং ইদং, অয্যিকা মে মহল্লিকা.

সব্বে সত্তা মরিস্সন্তি, উপপত্তি চুতিচযং;

কামেসু সত্তা পসুতা, আসৰেহি চতূহি চ.

যম্হি ন মাযা ৰসতি, দ্ৰেমা চেতোৰিমুত্তিযো;

এসেৰ মগ্গো নত্থঞ্ঞো, বোজ্ঝঙ্গা চ সুদেসিতা.

অত্থঙ্গতস্স ন পমাণমত্থি, গোধিকো পরিনিব্বুতো;

যে ধম্মা হেতুপ্পভৰা, সংযোজনানুপস্সিনো.

ইমা দস তেসং উদ্দানগাথা.

১০. তত্থিমানি সাধারণানি সুত্তানি যেসু সুত্তেসু সাধারণানি সচ্চানি দেসিতানি অনুলোমম্পি পটিলোমম্পি ৰোমিস্সকম্পি. তত্থ অযং আদি.

অৰিজ্জায নিৰুতো লোকো, [অজিতাতি ভগৰা]

ৰিৰিচ্ছা পমাদা নপ্পকাসতি;

জপ্পাভিলেপনং [জপ্পানুলেপনং (ক.) পস্স সু. নি. ১০৩৯] ব্রূমি, দুক্খমস্স মহব্ভযং.

তত্থ যা অৰিজ্জা চ ৰিৰিচ্ছা চ, অযং সমুদযো. যং মহব্ভযং, ইদং দুক্খং. ইমানি দ্ৰে সচ্চানি – দুক্খঞ্চ সমুদযো চ. ‘‘সংযোজনং সংযোজনিযা চ ধম্মা’’তি সংযুত্তকে চিত্তসংযুত্তকেসু ব্যাকরণং. তত্থ যং সংযোজনং, অযং সমুদযো. যে সংযোজনিযা ধম্মা, ইদং দুক্খং. ইমানি দ্ৰে সচ্চানি – দুক্খঞ্চ সমুদযো চ.

তত্থ কতমং দুক্খঞ্চ নিরোধো চ?

উচ্ছিন্নভৰতণ্হস্স, নেত্তিচ্ছিন্নস্স [সন্তচিত্তস্স (সু. নি. ৭৫১)] ভিক্খুনো;

ৰিক্খীণো জাতিসংসারো, নত্থি দানি পুনব্ভৰো.

যং চিত্তং, ইদং দুক্খং. যো ভৰতণ্হায উপচ্ছেদো, অযং দুক্খনিরোধো. ৰিক্খীণো জাতিসংসারো, নত্থি দানি পুনব্ভৰোতি নিদ্দেসো. ইমানি দ্ৰে সচ্চানি – দুক্খঞ্চ নিরোধো চ. দ্ৰেমা, ভিক্খৰে, ৰিমুত্তিযো; রাগৰিরাগা চ চেতোৰিমুত্তি, অৰিজ্জাৰিরাগা চ পঞ্ঞাৰিমুত্তি. যং চিত্তং, ইদং দুক্খং. যা ৰিমুত্তি, অযং নিরোধো. ইমানি দ্ৰে সচ্চানি – দুক্খঞ্চ নিরোধো চ.

তত্থ কতমং দুক্খঞ্চ মগ্গো চ?

কুম্ভূপমং [ধ. প. ৪০] কাযমিমং ৰিদিত্ৰা, নগরূপমং চিত্তমিদং ঠপেত্ৰা;

যোধেথ মারং পঞ্ঞাৰুধেন, জিতঞ্চ রক্খে অনিৰেসনো সিযা.

তত্থ যঞ্চ কুম্ভূপমো কাযো যঞ্চ নগরূপমং চিত্তং, ইদং দুক্খং. যং পঞ্ঞাৰুধেন মারং যোধেথাতি অযং মগ্গো. ইমানি দ্ৰে সচ্চানি. যং, ভিক্খৰে, ন তুম্হাকং, তং পজহিতব্বং. যা সংযোজনা, অযং মগ্গো. যে তে ধম্মা অনত্তনিযা পহাতব্বা, রূপং যাৰ ৰিঞ্ঞাণং, ইদং দুক্খঞ্চ মগ্গো চ.

তত্থ কতমং দুক্খঞ্চ সমুদযো চ নিরোধো চ?

যে কেচি সোকা পরিদেৰিতা ৰা, দুক্খা চ [দুক্খঞ্চ (পী. ক.) পস্স উদা. ৭০] লোকস্মিমনেকরূপা;

পিযং পটিচ্চপ্পভৰন্তি এতে, পিযে অসন্তে ন ভৰন্তি এতে.

যে সোকপরিদেৰা, যং চ অনেকরূপং দুক্খং, যং পেমতো ভৰতি, ইদং দুক্খং. যং পেমং, অযং সমুদযো. যো তত্থ ছন্দরাগৰিনযো পিযস্স অকিরিযা, অযং নিরোধো. ইমানি তীণি সচ্চানি. তিম্বরুকো পরিব্বাজকো পচ্চেতি ‘‘সযংকতং পরংকত’’ন্তি. যথেসা ৰীমংসা, ইদং দুক্খং. যা এতে দ্ৰে অন্তে অনুপগম্ম মজ্ঝিমা পটিপদা অৰিজ্জাপচ্চযা সঙ্খারা যাৰ জাতিপচ্চযা জরামরণং, ইদম্পি দুক্খঞ্চ সমুদযো চ. ৰিঞ্ঞাণং নামরূপং সল়াযতনং ফস্সো ৰেদনা ভৰো জাতি জরামরণং, ইদং দুক্খং. অৰিজ্জা সঙ্খারা তণ্হা উপাদানং, অযং সমুদযো. ইতি ইদং সযংকতং ৰীমংসেয্যাতি [ৰীমংসীযতি (পী. ক.)] যঞ্চ পটিচ্চসমুপ্পাদে দুক্খং, ইদং এসো সমুদযো নিদ্দিট্ঠো. অৰিজ্জানিরোধা সঙ্খারনিরোধো চ যাৰ চ জরামরণনিরোধোতি অযং নিরোধো. ইমানি তীণি সচ্চানি দুক্খঞ্চ সমুদযো চ নিরোধো চ.

১১. তত্থ কতমং দুক্খঞ্চ সমুদযো চ মগ্গো চ?

‘‘যো দুক্খমদ্দক্খি [সং. নি. ১.১৫৭] যতোনিদানং, কামেসু সো জন্তু কথং নমেয্য;

কামা হি লোকে সঙ্গাতি ঞত্ৰা, তেসং সতীমা ৰিনযায সিক্খে’’তি.

যো দুক্খমদ্দক্খি, ইদং দুক্খং. যতো ভৰতি, অযং সমুদযো. সন্দিট্ঠং যতো ভৰতি যাৰ তস্স ৰিনযায সিক্খা, অযং মগ্গো. ইমানি তীণি সচ্চানি.

একাদসঙ্গুত্তরেসু গোপালকোপমসুত্তং.

তত্থ যাৰ রূপসঞ্ঞুত্তা যঞ্চ সল়াযতনং যথা ৰণং পটিচ্ছাদেতি যঞ্চ তিত্থং যথা চ লভতি ধম্মূপসঞ্হিতং উল়ারং পীতিপামোজ্জং চতুব্বিধং চ অত্তভাৰতো চ ৰত্থু, ইদং দুক্খং. যাৰ আসাটিকং হারেতা [সাটেতা (সী. পী.) পস্স অঙ্গুত্তরনিকাযে] হোতি, অযং সমুদযো. রূপসঞ্ঞুত্তা আসাটকহরণং [আসাটিকসাটনা (পী.)] ৰণপটিচ্ছাদনং ৰীথিঞ্ঞুতা গোচরকুসলঞ্চ, অযং মগ্গো. অৰসেসা ধম্মা অত্থি হেতূ অত্থি পচ্চযা অত্থি নিস্সযা সাৰসেসদোহিতা অনেকপূজা চ কল্যাণমিত্ততপ্পচ্চযা ধম্মা ৰীথিঞ্ঞুতা চ হেতু, ইমানি তীণি সচ্চানি.

তত্থ কতমং দুক্খঞ্চ মগ্গো চ নিরোধো চ?

সতি কাযগতা উপট্ঠিতা, ছসু ফস্সাযতনেসু সংৰুতো [সংৰরো (পী. ক.) পস্স উদা. ২৫];

সততং ভিক্খু সমাহিতো, জঞ্ঞা [জানেয্য (পী. ক.)] নিব্বানমত্তনো.

তত্থ যা চ কাযগতা সতি যঞ্চ সল়াযতনং যত্থ সব্বঞ্চেতং দুক্খং. যা চ কাযগতা সতি যো চ সীলসংৰরো যো চ সমাধি যত্থ যা সতি, অযং পঞ্ঞাক্খন্ধো. সব্বম্পি সীলক্খন্ধো সমাধিক্খন্ধো, অযং মগ্গো. এৰংৰিহারিনা ঞাতব্বং নিব্বানং. অযং নিরোধো, ইমানি তীণি সচ্চানি. সীলে পতিট্ঠায দ্ৰে ধম্মা ভাৰেতব্বা সমথো চ ৰিপস্সনা চ. তত্থ যং চিত্তসহজাতা ধম্মা, ইদং দুক্খং. যো চ সমথো যা চ ৰিপস্সনা, অযং মগ্গো. রাগৰিরাগা চ চেতোৰিমুত্তি, অৰিজ্জাৰিরাগা চ পঞ্ঞাৰিমুত্তি, অযং নিরোধো. ইমানি তীণি সচ্চানি.

তত্থ কতমো সমুদযো চ নিরোধো চ?

আসা চ পীহা অভিনন্দনা চ, অনেকধাতূসু সরা পতিট্ঠিতা;

অঞ্ঞাণমূলপ্পভৰা পজপ্পিতা, সব্বা মযা ব্যন্তিকতা সমূলিকা.

অঞ্ঞাণমূলপ্পভৰাতি পুরিমকেহি সমুদযো. সব্বা মযা ব্যন্তিকতা সমূলিকাতি নিরোধো. ইমানি দ্ৰে সচ্চানি. চতুন্নং ধম্মানং অননুবোধা অপ্পটিৰেধা ৰিত্থারেন কাতব্বং. অরিযস্স সীলস্স সমাধিনো পঞ্ঞায ৰিমুত্তিযা. তত্থ যো ইমেসং চতুন্নং ধম্মানং অননুবোধা অপ্পটিৰেধা, অযং সমুদযো. পটিৰেধো ভৰনেত্তিযা, অযং নিরোধো. অযং সমুদযো চ নিরোধো চ.