৮. নিধিকণ্ডসুত্তং

১. নিধিং নিধেতি পুরিসো, গম্ভীরে ওদকন্তিকে;

অত্থে কিচ্চে সমুপ্পন্নে, অত্থায মে ভৰিস্সতি.

২. রাজতো ৰা দুরুত্তস্স, চোরতো পীল়িতস্স ৰা;

ইণস্স ৰা পমোক্খায, দুব্ভিক্খে আপদাসু ৰা;

এতদত্থায লোকস্মিং, নিধি নাম নিধীযতি.

৩. তাৰস্সুনিহিতো [তাৰ সুনিহিতো (সী.)] সন্তো, গম্ভীরে ওদকন্তিকে;

ন সব্বো সব্বদা এৰ, তস্স তং উপকপ্পতি.

৪. নিধি ৰা ঠানা চৰতি, সঞ্ঞা ৰাস্স ৰিমুয্হতি;

নাগা ৰা অপনামেন্তি, যক্খা ৰাপি হরন্তি নং.

৫. অপ্পিযা ৰাপি দাযাদা, উদ্ধরন্তি অপস্সতো;

যদা পুঞ্ঞক্খযো হোতি, সব্বমেতং ৰিনস্সতি.

৬. যস্স দানেন সীলেন, সংযমেন দমেন চ;

নিধী সুনিহিতো হোতি, ইত্থিযা পুরিসস্স ৰা.

৭. চেতিযম্হি চ সঙ্ঘে ৰা, পুগ্গলে অতিথীসু ৰা;

মাতরি পিতরি চাপি [ৰাপি (স্যা. কং.)], অথো জেট্ঠম্হি ভাতরি.

৮. এসো নিধি সুনিহিতো, অজেয্যো অনুগামিকো;

পহায গমনীযেসু, এতং আদায গচ্ছতি.

৯. অসাধারণমঞ্ঞেসং, অচোরাহরণো নিধি;

কযিরাথ ধীরো পুঞ্ঞানি, যো নিধি অনুগামিকো.

১০. এস দেৰমনুস্সানং, সব্বকামদদো নিধি;

যং যদেৰাভিপত্থেন্তি, সব্বমেতেন লব্ভতি.

১১. সুৰণ্ণতা সুসরতা, সুসণ্ঠানা সুরূপতা [সুসণ্ঠানসুরূপতা (সী.), সুসণ্ঠানং সুরূপতা (স্যা. কং.)];

আধিপচ্চপরিৰারো, সব্বমেতেন লব্ভতি.

১২. পদেসরজ্জং ইস্সরিযং, চক্কৰত্তিসুখং পিযং;

দেৰরজ্জম্পি দিব্বেসু, সব্বমেতেন লব্ভতি.

১৩. মানুস্সিকা চ সম্পত্তি, দেৰলোকে চ যা রতি;

যা চ নিব্বানসম্পত্তি, সব্বমেতেন লব্ভতি.

১৪. মিত্তসম্পদমাগম্ম, যোনিসোৰ [যোনিসো ৰে (সী.), যোনিসো চে (স্যা.), যোনিসো চ (?)] পযুঞ্জতো;

ৰিজ্জা ৰিমুত্তি ৰসীভাৰো, সব্বমেতেন লব্ভতি.

১৫. পটিসম্ভিদা ৰিমোক্খা চ, যা চ সাৰকপারমী;

পচ্চেকবোধি বুদ্ধভূমি, সব্বমেতেন লব্ভতি.

১৬. এৰং মহত্থিকা এসা, যদিদং পুঞ্ঞসম্পদা;

তস্মা ধীরা পসংসন্তি, পণ্ডিতা কতপুঞ্ঞতন্তি.

নিধিকণ্ডসুত্তং নিট্ঠিতং.