চারিকাঅনুজাননং

৮৬. ‘‘তেন খো পন, ভিক্খৰে, সমযেন বন্ধুমতিযা রাজধানিযা মহাভিক্খুসঙ্ঘো পটিৰসতি অট্ঠসট্ঠিভিক্খুসতসহস্সং. অথ খো, ভিক্খৰে, ৰিপস্সিস্স ভগৰতো অরহতো সম্মাসম্বুদ্ধস্স রহোগতস্স পটিসল্লীনস্স এৰং চেতসো পরিৰিতক্কো উদপাদি – ‘মহা খো এতরহি ভিক্খুসঙ্ঘো বন্ধুমতিযা রাজধানিযা পটিৰসতি অট্ঠসট্ঠিভিক্খুসতসহস্সং, যংনূনাহং ভিক্খূ অনুজানেয্যং – ‘চরথ, ভিক্খৰে, চারিকং বহুজনহিতায বহুজনসুখায লোকানুকম্পায অত্থায হিতায সুখায দেৰমনুস্সানং; মা একেন দ্ৰে অগমিত্থ; দেসেথ, ভিক্খৰে, ধম্মং আদিকল্যাণং মজ্ঝেকল্যাণং পরিযোসানকল্যাণং সাত্থং সব্যঞ্জনং কেৰলপরিপুণ্ণং পরিসুদ্ধং ব্রহ্মচরিযং পকাসেথ. সন্তি সত্তা অপ্পরজক্খজাতিকা, অস্সৰনতা ধম্মস্স পরিহাযন্তি, ভৰিস্সন্তি ধম্মস্স অঞ্ঞাতারো. অপি চ ছন্নং ছন্নং ৰস্সানং অচ্চযেন বন্ধুমতী রাজধানী উপসঙ্কমিতব্বা পাতিমোক্খুদ্দেসাযা’’’তি.

৮৭. ‘‘অথ খো, ভিক্খৰে, অঞ্ঞতরো মহাব্রহ্মা ৰিপস্সিস্স ভগৰতো অরহতো সম্মাসম্বুদ্ধস্স চেতসা চেতোপরিৰিতক্কমঞ্ঞায সেয্যথাপি নাম বলৰা পুরিসো সমিঞ্জিতং ৰা বাহং পসারেয্য, পসারিতং ৰা বাহং সমিঞ্জেয্য. এৰমেৰ ব্রহ্মলোকে অন্তরহিতো ৰিপস্সিস্স ভগৰতো অরহতো সম্মাসম্বুদ্ধস্স পুরতো পাতুরহোসি. অথ খো সো, ভিক্খৰে, মহাব্রহ্মা একংসং উত্তরাসঙ্গং করিত্ৰা যেন ৰিপস্সী ভগৰা অরহং সম্মাসম্বুদ্ধো তেনঞ্জলিং পণামেত্ৰা ৰিপস্সিং ভগৰন্তং অরহন্তং সম্মাসম্বুদ্ধং এতদৰোচ – ‘এৰমেতং, ভগৰা, এৰমেতং, সুগত. মহা খো, ভন্তে, এতরহি ভিক্খুসঙ্ঘো বন্ধুমতিযা রাজধানিযা পটিৰসতি অট্ঠসট্ঠিভিক্খুসতসহস্সং, অনুজানাতু, ভন্তে, ভগৰা ভিক্খূ – ‘‘চরথ, ভিক্খৰে, চারিকং বহুজনহিতায বহুজনসুখায লোকানুকম্পায অত্থায হিতায সুখায দেৰমনুস্সানং; মা একেন দ্ৰে অগমিত্থ; দেসেথ, ভিক্খৰে, ধম্মং আদিকল্যাণং মজ্ঝেকল্যাণং পরিযোসানকল্যাণং সাত্থং সব্যঞ্জনং কেৰলপরিপুণ্ণং পরিসুদ্ধং ব্রহ্মচরিযং পকাসেথ. সন্তি সত্তা অপ্পরজক্খজাতিকা, অস্সৰনতা ধম্মস্স পরিহাযন্তি, ভৰিস্সন্তি ধম্মস্স অঞ্ঞাতারো’’তি [অঞ্ঞাতারো (স্সব্বত্থ)]. অপি চ, ভন্তে, মযং তথা করিস্সাম যথা ভিক্খূ ছন্নং ছন্নং ৰস্সানং অচ্চযেন বন্ধুমতিং রাজধানিং উপসঙ্কমিস্সন্তি পাতিমোক্খুদ্দেসাযা’তি. ইদমৰোচ, ভিক্খৰে, সো মহাব্রহ্মা, ইদং ৰত্ৰা ৰিপস্সিং ভগৰন্তং অরহন্তং সম্মাসম্বুদ্ধং অভিৰাদেত্ৰা পদক্খিণং কত্ৰা তত্থেৰ অন্তরধাযি.

৮৮. ‘‘অথ খো, ভিক্খৰে, ৰিপস্সী ভগৰা অরহং সম্মাসম্বুদ্ধো সাযন্হসমযং পটিসল্লানা ৰুট্ঠিতো ভিক্খূ আমন্তেসি – ‘ইধ ময্হং, ভিক্খৰে, রহোগতস্স পটিসল্লীনস্স এৰং চেতসো পরিৰিতক্কো উদপাদি – মহা খো এতরহি ভিক্খুসঙ্ঘো বন্ধুমতিযা রাজধানিযা পটিৰসতি অট্ঠসট্ঠিভিক্খুসতসহস্সং. যংনূনাহং ভিক্খূ অনুজানেয্যং – ‘চরথ, ভিক্খৰে, চারিকং বহুজনহিতায বহুজনসুখায লোকানুকম্পায অত্থায হিতায সুখায দেৰমনুস্সানং; মা একেন দ্ৰে অগমিত্থ; দেসেথ, ভিক্খৰে, ধম্মং আদিকল্যাণং মজ্ঝেকল্যাণং পরিযোসানকল্যাণং সাত্থং সব্যঞ্জনং কেৰলপরিপুণ্ণং পরিসুদ্ধং ব্রহ্মচরিযং পকাসেথ. সন্তি সত্তা অপ্পরজক্খজাতিকা, অস্সৰনতা ধম্মস্স পরিহাযন্তি, ভৰিস্সন্তি ধম্মস্স অঞ্ঞাতারো. অপি চ, ছন্নং ছন্নং ৰস্সানং অচ্চযেন বন্ধুমতী রাজধানী উপসঙ্কমিতব্বা পাতিমোক্খুদ্দেসাযাতি.

‘‘‘অথ খো, ভিক্খৰে, অঞ্ঞতরো মহাব্রহ্মা মম চেতসা চেতোপরিৰিতক্কমঞ্ঞায সেয্যথাপি নাম বলৰা পুরিসো সমিঞ্জিতং ৰা বাহং পসারেয্য, পসারিতং ৰা বাহং সমিঞ্জেয্য, এৰমেৰ ব্রহ্মলোকে অন্তরহিতো মম পুরতো পাতুরহোসি. অথ খো সো, ভিক্খৰে, মহাব্রহ্মা একংসং উত্তরাসঙ্গং করিত্ৰা যেনাহং তেনঞ্জলিং পণামেত্ৰা মং এতদৰোচ – ‘‘এৰমেতং, ভগৰা, এৰমেতং, সুগত. মহা খো, ভন্তে, এতরহি ভিক্খুসঙ্ঘো বন্ধুমতিযা রাজধানিযা পটিৰসতি অট্ঠসট্ঠিভিক্খুসতসহস্সং. অনুজানাতু, ভন্তে, ভগৰা ভিক্খূ – ‘চরথ, ভিক্খৰে, চারিকং বহুজনহিতায বহুজনসুখায লোকানুকম্পায অত্থায হিতায সুখায দেৰমনুস্সানং; মা একেন দ্ৰে অগমিত্থ; দেসেথ, ভিক্খৰে, ধম্মং…পে… সন্তি সত্তা অপ্পরজক্খজাতিকা, অস্সৰনতা ধম্মস্স পরিহাযন্তি, ভৰিস্সন্তি ধম্মস্স অঞ্ঞাতারো’তি. অপি চ, ভন্তে, মযং তথা করিস্সাম, যথা ভিক্খূ ছন্নং ছন্নং ৰস্সানং অচ্চযেন বন্ধুমতিং রাজধানিং উপসঙ্কমিস্সন্তি পাতিমোক্খুদ্দেসাযা’’তি. ইদমৰোচ, ভিক্খৰে, সো মহাব্রহ্মা, ইদং ৰত্ৰা মং অভিৰাদেত্ৰা পদক্খিণং কত্ৰা তত্থেৰ অন্তরধাযি’.

‘‘‘অনুজানামি, ভিক্খৰে, চরথ চারিকং বহুজনহিতায বহুজনসুখায লোকানুকম্পায অত্থায হিতায সুখায দেৰমনুস্সানং; মা একেন দ্ৰে অগমিত্থ; দেসেথ, ভিক্খৰে, ধম্মং আদিকল্যাণং মজ্ঝেকল্যাণং পরিযোসানকল্যাণং সাত্থং সব্যঞ্জনং কেৰলপরিপুণ্ণং পরিসুদ্ধং ব্রহ্মচরিযং পকাসেথ. সন্তি সত্তা অপ্পরজক্খজাতিকা, অস্সৰনতা ধম্মস্স পরিহাযন্তি, ভৰিস্সন্তি ধম্মস্স অঞ্ঞাতারো. অপি চ, ভিক্খৰে, ছন্নং ছন্নং ৰস্সানং অচ্চযেন বন্ধুমতী রাজধানী উপসঙ্কমিতব্বা পাতিমোক্খুদ্দেসাযা’তি. অথ খো, ভিক্খৰে, ভিক্খূ যেভুয্যেন একাহেনেৰ জনপদচারিকং পক্কমিংসু.

৮৯. ‘‘তেন খো পন সমযেন জম্বুদীপে চতুরাসীতি আৰাসসহস্সানি হোন্তি. একম্হি হি ৰস্সে নিক্খন্তে দেৰতা সদ্দমনুস্সাৰেসুং – ‘নিক্খন্তং খো, মারিসা, একং ৰস্সং; পঞ্চ দানি ৰস্সানি সেসানি; পঞ্চন্নং ৰস্সানং অচ্চযেন বন্ধুমতী রাজধানী উপসঙ্কমিতব্বা পাতিমোক্খুদ্দেসাযা’তি. দ্ৰীসু ৰস্সেসু নিক্খন্তেসু… তীসু ৰস্সেসু নিক্খন্তেসু… চতূসু ৰস্সেসু নিক্খন্তেসু… পঞ্চসু ৰস্সেসু নিক্খন্তেসু দেৰতা সদ্দমনুস্সাৰেসুং – ‘নিক্খন্তানি খো, মারিসা, পঞ্চৰস্সানি; একং দানি ৰস্সং সেসং; একস্স ৰস্সস্স অচ্চযেন বন্ধুমতী রাজধানী উপসঙ্কমিতব্বা পাতিমোক্খুদ্দেসাযা’তি. ছসু ৰস্সেসু নিক্খন্তেসু দেৰতা সদ্দমনুস্সাৰেসুং – ‘নিক্খন্তানি খো, মারিসা, ছব্বস্সানি, সমযো দানি বন্ধুমতিং রাজধানিং উপসঙ্কমিতুং পাতিমোক্খুদ্দেসাযা’তি. অথ খো তে, ভিক্খৰে, ভিক্খূ অপ্পেকচ্চে সকেন ইদ্ধানুভাৰেন অপ্পেকচ্চে দেৰতানং ইদ্ধানুভাৰেন একাহেনেৰ বন্ধুমতিং রাজধানিং উপসঙ্কমিংসু পাতিমোক্খুদ্দেসাযাতি [পাতিমোক্খুদ্দেসায (?)].

৯০. ‘‘তত্র সুদং, ভিক্খৰে, ৰিপস্সী ভগৰা অরহং সম্মাসম্বুদ্ধো ভিক্খুসঙ্ঘে এৰং পাতিমোক্খং উদ্দিসতি –

‘খন্তী পরমং তপো তিতিক্খা,

নিব্বানং পরমং ৰদন্তি বুদ্ধা;

ন হি পব্বজিতো পরূপঘাতী,

ন সমণো [সমণো (সী. স্যা. পী.)] হোতি পরং ৰিহেঠযন্তো.

‘সব্বপাপস্স অকরণং, কুসলস্স উপসম্পদা;

সচিত্তপরিযোদপনং, এতং বুদ্ধানসাসনং.

‘অনূপৰাদো অনূপঘাতো [অনুপৰাদো অনুপঘাতো (পী. ক.)], পাতিমোক্খে চ সংৰরো;

মত্তঞ্ঞুতা চ ভত্তস্মিং, পন্তঞ্চ সযনাসনং;

অধিচিত্তে চ আযোগো, এতং বুদ্ধানসাসন’ন্তি.