৬. পাটিদেসনীযকণ্ডং

১. পঠমপাটিদেসনীযসিক্খাপদৰণ্ণনা

পাটিদেসনীযা ধম্মা, খুদ্দকানং অনন্তরা;

ঠপিতা যে অযং দানি, তেসং ভৰতি ৰণ্ণনা.

৫৫২. পঠমপাটিদেসনীযে তাৰ পটিক্কমনকালেতি পিণ্ডায চরিত্ৰা পটিআগমনকালে. সব্বেৰ অগ্গহেসীতি সব্বমেৰ অগ্গহেসি. পৰেধেন্তীতি কম্পমানা. অপেহীতি অপগচ্ছ.

৫৫৩-৫. গারয্হং আৰুসোতিআদি পটিদেসেতব্বাকারদস্সনং. রথিকাতি রচ্ছা. ব্যূহন্তি অনিব্বিজ্ঝিত্ৰা ঠিতা গতপচ্চাগতরচ্ছা. সিঙ্ঘাটকন্তি চতুক্কোণং ৰা তিকোণং ৰা মগ্গসমোধানট্ঠানং. ঘরন্তি কুলঘরং. এতেসু যত্থ কত্থচি ঠত্ৰা গণ্হন্তস্স গহণে দুক্কটং, অজ্ঝোহারে অজ্ঝোহারগণনায পাটিদেসনীযং. হত্থিসালাদীসু গণ্হন্তস্সাপি এসেৰ নযো. ভিক্খুনী রথিকায ঠত্ৰা দেতি, ভিক্খু সচেপি অন্তরারামাদীসু ঠত্ৰা গণ্হাতি, আপত্তিযেৰ. ‘‘অন্তরঘরং পৰিট্ঠাযা’’তি হি ৰচনতো ভিক্খুনিযা অন্তরঘরে ঠত্ৰা দদমানায ৰসেনেত্থ আপত্তি ৰেদিতব্বা, ভিক্খুস্স ঠিতট্ঠানং পন অপ্পমাণং. তস্মা সচেপি ৰীথিআদীসু ঠিতো ভিক্খু অন্তরারামাদীসু ঠত্ৰা দদমানায ভিক্খুনিযা গণ্হাতি, অনাপত্তিযেৰ.

যামকালিকং সত্তাহকালিকং যাৰজীৰিকং আহারত্থায পটিগ্গণ্হাতি, আপত্তি দুক্কটস্স. অজ্ঝোহারে অজ্ঝোহারে আপত্তি দুক্কটস্সাতি ইদং আমিসেন অসম্ভিন্নং সন্ধায ৰুত্তং, সম্ভিন্নে পন একরসে পাটিদেসনীযমেৰ. একতো উপসম্পন্নাযাতি ভিক্খুনীনং সন্তিকে উপসম্পন্নায. ভিক্খূনং সন্তিকে উপসম্পন্নায পন যথাৰত্থুকমেৰ.

৫৫৬. দাপেতি ন দেতীতি অঞ্ঞাতিকা অঞ্ঞেন কেনচি দাপেতি তং গণ্হন্তস্স অনাপত্তি. উপনিক্খিপিত্ৰা দেতীতি ভূমিযং ঠপেত্ৰা ‘‘ইদং অয্য তুম্হাকং দম্মী’’তি দেতি, এৰং দিন্নং ‘‘সাধু ভগিনী’’তি সম্পটিচ্ছিত্ৰা তায এৰ ৰা ভিক্খুনিযা অঞ্ঞেন ৰা কেনচি পটিগ্গহাপেত্ৰা ভুঞ্জিতুং ৰট্টতি. সিক্খমানায সামণেরিযাতি এতাসং দদমানানং গণ্হন্তস্স অনাপত্তি. সেসমেত্থ উত্তানমেৰ.

এল়কলোমসমুট্ঠানং – কিরিযং, নোসঞ্ঞাৰিমোক্খং, অচিত্তকং, পণ্ণত্তিৰজ্জং, কাযকম্মং, তিচিত্তং, তিৰেদনন্তি.

পঠমপাটিদেসনীযং.

২. দুতিযপাটিদেসনীযসিক্খাপদৰণ্ণনা

৫৫৮. দুতিযে – অপসক্ক তাৰ ভগিনীতিআদি অপসাদেতব্বাকারদস্সনং.

৫৬১. অত্তনো ভত্তং দাপেতি ন দেতীতি এত্থ সচেপি অত্তনো ভত্তং দেতি, ইমিনা সিক্খাপদেন অনাপত্তিযেৰ, পুরিমসিক্খাপদেন আপত্তি. অঞ্ঞেসং ভত্তং দেতি ন দাপেতীতি এত্থ সচেপি দাপেয্য, ইমিনা সিক্খাপদেন আপত্তি ভৰেয্য. দেন্তিযা পন নেৰ ইমিনা ন পুরিমেন আপত্তি. সেসমেত্থ উত্তানমেৰ. কথিনসমুট্ঠানং – কিরিযাকিরিযং, নোসঞ্ঞাৰিমোক্খং, অচিত্তকং, পণ্ণত্তিৰজ্জং, কাযকম্মং, ৰচীকম্মং, তিচিত্তং, তিৰেদনন্তি.

দুতিযপাটিদেসনীযং.

৩. ততিযপাটিদেসনীযসিক্খাপদৰণ্ণনা

৫৬২. ততিযে – উভতোপসন্নন্তি দ্ৰীহি পসন্নং উপাসকেনপি উপাসিকাযপি. তস্মিং কির কুলে উভোপি তে সোতাপন্নাযেৰ. ভোগেন হাযতীতি এদিসঞ্হি কুলং সচেপি অসীতিকোটিধনং হোতি, ভোগেহি হাযতিযেৰ. কস্মা? যস্মা তত্থ নেৰ উপাসিকা ন উপাসকো ভোগে রক্খতি.

৫৬৯. ঘরতো নীহরিত্ৰা দেন্তীতি আসনসালং ৰা ৰিহারং ৰা আনেত্ৰা দেন্তি. সচেপি অনাগতে ভিক্খুম্হি পঠমংযেৰ নীহরিত্ৰা দ্ৰারে ঠপেত্ৰা পচ্ছা সম্পত্তস্স দেন্তি, ৰট্টতি. ভিক্খুং পন দিস্ৰা অন্তোগেহতো নীহরিত্ৰা দিয্যমানং ন ৰট্টতীতি মহাপচ্চরিযং ৰুত্তং. সেসমেত্থ উত্তানমেৰ. এল়কলোমসমুট্ঠানং – কিরিযং, নোসঞ্ঞাৰিমোক্খং, অচিত্তকং, পণ্ণত্তিৰজ্জং, কাযকম্মং, ৰচীকম্মং তিচিত্তং, তিৰেদনন্তি.

ততিযপাটিদেসনীযং.

৪. চতুত্থপাটিদেসনীযসিক্খাপদৰণ্ণনা

৫৭০. চতুত্থে – অৰরুদ্ধা হোন্তীতি পটিৰিরুদ্ধা হোন্তি.

৫৭৩. পঞ্চন্নং পটিসংৰিদিতন্তি পঞ্চসু সহধম্মিকেসু যংকিঞ্চি পেসেত্ৰা খাদনীযং ভোজনীযং আহরিস্সামাতি পটিসংৰিদিতং কতম্পি অপ্পটিসংৰিদিতমেৰাতি অত্থো. আরামং আরামূপচারং ঠপেত্ৰাতি আরঞ্ঞকসেনাসনারামঞ্চ তস্স উপচারঞ্চ ঠপেত্ৰা; উপচারতো নিক্খন্তং অন্তরামগ্গে ভিক্খুং দিস্ৰা ৰা গামং আগতস্স ৰা পটিসংৰিদিতং কতম্পি অপ্পটিসংৰিদিতমেৰ হোতীতি ৰেদিতব্বং. সচে সাসঙ্কং হোতি সাসঙ্কন্তি আচিক্খিতব্বন্তি কস্মা আচিক্খিতব্বং? আরামে চোরে ৰসন্তে অম্হাকং নারোচেন্তীতি ৰচনপটিমোচনত্থং. চোরা ৰত্তব্বা মনুস্সা ইধূপচরন্তীতি কস্মা ৰত্তব্বং? অত্তনো উপট্ঠাকেহি অম্হে গণ্হাপেন্তীতি ৰচনপটিমোচনত্থং.

যাগুযা পটিসংৰিদিতে তস্সা পরিৰারো আহরিয্যতীতি যাগুযা পটিসংৰিদিতং কত্ৰা ‘‘কিং সুদ্ধযাগুযা দিন্নায পূৰভত্তাদীনিপি এতিস্সা যাগুযা পরিৰারং কত্ৰা দস্সামা’’তি এৰং যং কিঞ্চি আহরন্তি, সব্বং পটিসংৰিদিতমেৰ হোতি. ভত্তেন পটিসংৰিদিতেতিআদীসুপি এসেৰ নযো. অসুকং নাম কুলং পটিসংৰিদিতং কত্ৰা খাদনীযাদীনি গহেত্ৰা গচ্ছতীতি সুত্ৰা অঞ্ঞানিপি তেন সদ্ধিং অত্তনো দেয্যধম্মং আহরন্তি, ৰট্টতি. যাগুযা পটিসংৰিদিতং কত্ৰা পূৰং ৰা ভত্তং ৰা আহরন্তি, এতম্পি ৰট্টতীতি কুরুন্দিযং ৰুত্তং.

৫৭৫. গিলানস্সাতি অপ্পটিসংৰিদিতেপি গিলানস্স অনাপত্তি. পটিসংৰিদিতে ৰা গিলানস্স ৰা সেসকন্তি একস্সত্থায পটিসংৰিদিতং কত্ৰা আহটং, তস্স সেসকং অঞ্ঞস্সাপি ভুঞ্জিতুং ৰট্টতি. চতুন্নং পঞ্চন্নং ৰা পটিসংৰিদিতং কত্ৰা বহুং আহটং হোতি, অঞ্ঞেসম্পি দাতুং ইচ্ছন্তি, এতম্পি পটিসংৰিদিতসেসকমেৰ, সব্বেসম্পি ৰট্টতি. অথ অধিকমেৰ হোতি, সন্নিধিং মোচেত্ৰা ঠপিতং দুতিযদিৰসেপি ৰট্টতি. গিলানস্স আহটাৰসেসেপি এসেৰ নযো. যং পন অপ্পটিসংৰিদিতমেৰ কত্ৰা আভতং, তং বহিআরামং পেসেত্ৰা পটিসংৰিদিতং কারেত্ৰা আহরাপেতব্বং, ভিক্খূহি ৰা গন্ত্ৰা অন্তরামগ্গে গহেতব্বং. যম্পি ৰিহারমজ্ঝেন গচ্ছন্তা ৰা ৰনচরকাদযো ৰা ৰনতো আহরিত্ৰা দেন্তি, পুরিমনযেনেৰ পটিসংৰিদিতং কারেতব্বং. তত্থজাতকন্তি আরামে জাতকমেৰ; মূলখাদনীযাদিং অঞ্ঞেন কপ্পিযং কত্ৰা দিন্নং পরিভুঞ্জতো অনাপত্তি. সচে পন তং গামং হরিত্ৰা পচিত্ৰা আহরন্তি, ন ৰট্টতি. পটিসংৰিদিতং কারেতব্বং. সেসমেত্থ উত্তানমেৰ.

কথিনসমুট্ঠানং – কিরিযাকিরিযং, নোসঞ্ঞাৰিমোক্খং, অচিত্তকং, পণ্ণত্তিৰজ্জং, কাযকম্মং, ৰচীকম্মং, তিচিত্তং, তিৰেদনন্তি.

চতুত্থপাটিদেসনীযং.

সমন্তপাসাদিকায ৰিনযসংৰণ্ণনায

পাটিদেসনীযৰণ্ণনা নিট্ঠিতা.

পাটিদেসনীযকণ্ডং নিট্ঠিতং.