৭. আনাপানৰগ্গো

১. অট্ঠিকমহপ্ফলসুত্তাদিৰণ্ণনা

২৩৮. সত্তমাদীসু অট্ঠিকসঞ্ঞাতি অট্ঠিকং অট্ঠিকন্তি ভাৰেন্তস্স উপ্পন্নসঞ্ঞা. তং পনেতং ভাৰযতো যাৰ নিমিত্তং ন উপ্পজ্জতি, তাৰ ছৰিপি চম্মম্পি উপট্ঠাতি. নিমিত্তে পন উপ্পন্নে ছৰিচম্মানি নেৰ উপট্ঠহন্তি, সঙ্খৰণ্ণো সুদ্ধঅট্ঠিকসঙ্ঘাটোৰ উপট্ঠাতি হত্থিক্খন্ধগতং ধম্মিকতিস্সরাজানং ওলোকেন্তস্স সামণেরস্স ৰিয, পটিমগ্গে হসমানং ইত্থিং ওলোকেন্তস্স চেতিযপব্বতৰাসিনো তিস্সত্থেরস্স ৰিয চাতি. ৰত্থূনি ৰিসুদ্ধিমগ্গে (ৰিসুদ্ধি. ১.১৫) ৰিত্থারিতানি. সতি ৰা উপাদিসেসেতি গহণসেসে উপাদানসেসে ৰিজ্জমানম্হি.

২-১০. পুল়ৰকসুত্তাদিৰণ্ণনা

২৩৯-২৪৭. পুল়ৰকসঞ্ঞাতি পুল়ৰং পুল়ৰন্তি ভাৰেন্তস্স উপ্পন্নসঞ্ঞা. ৰিনীলকসঞ্ঞাদীসুপি এসেৰ নযো. ৰিনিচ্ছযকথা পনেত্থ সদ্ধিং ভাৰনানযেন ৰিসুদ্ধিমগ্গে (ৰিসুদ্ধি. ১.১০২) ৰুত্তা. মেত্তাদযো তিকচতুক্কজ্ঝানৰসেন ৰেদিতব্বা, উপেক্খা চতুত্থজ্ঝানৰসেনেৰ.