৮. গামণিসংযুত্তং

১. চণ্ডসুত্তৰণ্ণনা

৩৫৩. গামণিসংযুত্তস্স পঠমে চণ্ডো গামণীতি ধম্মসঙ্গাহকত্থেরেহি চণ্ডোতি গহিতনামো একো গামণি. পাতুকরোতীতি ভণ্ডন্তং পটিভণ্ডন্তো অক্কোসন্তং পচ্চক্কোসন্তো পহরন্তং পটিপহরন্তো পাকটং করোতীতি দস্সেতি. ন পাতুকরোতীতি অক্কুট্ঠোপি পহটোপি কিঞ্চি পচ্চনীকং অকরোন্তোতি দস্সেতি.

২. তালপুটসুত্তৰণ্ণনা

৩৫৪. দুতিযে তালপুটোতি এৰংনামকো. তস্স কির বন্ধনা পমুত্ততালপক্কৰণ্ণো ৰিয মুখৰণ্ণো ৰিপ্পসন্নো অহোসি, তেনস্স তালপুটোতি নামং অকংসু. স্ৰাযং অভিনীহারসম্পন্নো পচ্ছিমভৰিকপুগ্গলো. যস্মা পন পটিসন্ধি নাম অনিযতা আকাসে খিত্তদণ্ডসদিসা, তস্মা এস নটকুলে নিব্বত্তি. ৰুড্ঢিপ্পত্তো পন নটসিপ্পে অগ্গো হুত্ৰা সকলজম্বুদীপে পাকটো জাতো. তস্স পঞ্চ সকটসতানি পঞ্চ মাতুগামসতানি পরিৰারো, ভরিযাযপিস্স তাৰতকাৰাতি মাতুগামসহস্সেন চেৰ সকটসহস্সেন চ সদ্ধিং যং যং নগরং ৰা নিগমং ৰা পৰিসতি, তত্থস্স পুরেতরমেৰ সতসহস্সং দেন্তি. সমজ্জৰেসং গণ্হিত্ৰা পন মাতুগামসহস্সেন সদ্ধিং কীল়ং করোন্তস্স যং হত্থূপগপাদূপগাদিআভরণজাতং খিপন্তি, তস্স পরিযন্তো নত্থি. সো তংদিৰসং মাতুগামসহস্সপরিৰারিতো রাজগহে কীল়ং কত্ৰা পরিপক্কঞাণত্তা সপরিৰারোৰ যেন ভগৰা তেনুপসঙ্কমি.

সচ্চালিকেনাতি সচ্চেন চ অলিকেন চ. তিট্ঠতেতন্তি তিট্ঠতু এতং. রজনীযাতি রাগপ্পচ্চযা মুখতো পঞ্চৰণ্ণসুত্তনীহরণৰাতৰুট্ঠিদস্সনাদযো অঞ্ঞে চ কামস্সাদসংযুত্তাকারদস্সনকা অভিনযা. ভিয্যোসোমত্তাযাতি অধিকপ্পমাণত্তায. দোসনীযাতি দোসপ্পচ্চযা হত্থপাদচ্ছেদাদিদস্সনাকারা. মোহনীযাতি মোহপ্পচ্চযা উদকং গহেত্ৰা তেলকরণং, তেলং গহেত্ৰা উদককরণন্তি এৰমাদযো মাযাপভেদা.

পহাসো নাম নিরযোতি ৰিসুং পহাসনামকো নিরযো নাম নত্থি, অৰীচিস্সেৰ পন একস্মিং কোট্ঠাসে নচ্চন্তা ৰিয গাযন্তা ৰিয চ নটৰেসং গহেত্ৰাৰ পচ্চন্তি, তং সন্ধাযেতং ৰুত্তং. নাহং, ভন্তে, এতং রোদামীতি অহং, ভন্তে, এতং ভগৰতো ব্যাকরণং ন রোদামীতি এৰং সকম্মকৰসেনেত্থ অত্থো ৰেদিতব্বো, ন অস্সুৰিমোচনমত্তেন. ‘‘মতং ৰা অম্মরোদন্তী’’তিআদযো চেত্থ অঞ্ঞেপি ৰোহারা ৰেদিতব্বা.

৩-৫. যোধাজীৰসুত্তাদিৰণ্ণনা

৩৫৫-৩৫৭. ততিযে যোধাজীৰোতি যুদ্ধেন জীৰিকং কপ্পনকো ধম্মসঙ্গাহকত্থেরেহি এৰং গহিতনামো. উস্সহতি ৰাযমতীতি উস্সাহং ৰাযামং করোতি. পরিযাপাদেন্তীতি মরণং পটিপজ্জাপেন্তি. দুক্কটন্তি দুট্ঠু কতং. দুপ্পণিহিতন্তি দুট্ঠু ঠপিতং. পরজিতো নাম নিরযোতি অযম্পি ন ৰিসুং একো নিরযো, অৰীচিস্সেৰ পন একস্মিং কোট্ঠাসে পঞ্চাৰুধসন্নদ্ধা ফলকহত্থা হত্থিঅস্সরথে আরুয্হ সঙ্গামে যুজ্ঝন্তা ৰিয পচ্চন্তি, তং সন্ধাযেতং ৰুত্তং. চতুত্থপঞ্চমেসুপি এসেৰ নযো.

৬. অসিবন্ধকপুত্তসুত্তৰণ্ণনা

৩৫৮. ছট্ঠে পচ্ছাভূমকাতি পচ্ছাভূমিৰাসিনো. কামণ্ডলুকাতি সকমণ্ডলুনো. সেৰালমালিকাতি পাতোৰ উদকতো সেৰালঞ্চেৰ উপ্পলাদীনি চ গহেত্ৰা উদকসুদ্ধিকভাৰজাননত্থায মালং কত্ৰা পিল়ন্ধনকা. উদকোরোহকাতি সাযংপাতং উদকং ওরোহনকা. উয্যাপেন্তীতি উপরি যাপেন্তি. সঞ্ঞাপেন্তীতি সম্মা ঞাপেন্তি. সগ্গং নাম ওক্কামেন্তীতি পরিৰারেত্ৰা ঠিতা ‘‘গচ্ছ, ভো, ব্রহ্মলোকং, গচ্ছ, ভো, ব্রহ্মলোক’’ন্তি ৰদন্তা সগ্গং পৰেসেন্তি. অনুপরিসক্কেয্যাতি অনুপরিগচ্ছেয্য. উম্মুজ্জাতি উম্মুজ্জ উট্ঠহ. থলমুপ্লৰাতি থলমভিরুহ. তত্র যাস্সাতি তত্র যা ভৰেয্য. সক্খরা ৰা কঠলা ৰাতি সক্খরা চ কঠলা চ. সা অধোগামী অস্সাতি সা অধো গচ্ছেয্য, হেট্ঠাগামী ভৰেয্য. অধোগচ্ছাতি হেট্ঠা গচ্ছ.

৭. খেত্তূপমসুত্তৰণ্ণনা

৩৫৯. সত্তমে জঙ্গলন্তি থদ্ধং ন মুদু. ঊসরন্তি সঞ্জাতলোণং. পাপভূমীতি লামকভূমিভাগং. মংদীপাতিআদীসু অহং দীপো পতিট্ঠা এতেসন্তি মংদীপা. অহং লেণো অল্লীযনট্ঠানং এতেসন্তি মংলেণা. অহং তাণং রক্খা এতেসন্তি মংতাণা. অহং সরণং ভযনাসনং এতেসন্তি মংসরণা. ৰিহরন্তীতি মং এৰং কত্ৰা ৰিহরন্তি.

গোভত্তম্পীতি ধঞ্ঞফলস্স অভাৰেন লাযিত্ৰা কলাপকলাপং বন্ধিত্ৰা ঠপিতং গিম্হকালে গুন্নম্পি খাদনং ভৰিস্সতীতি অত্থো. উদকমণিকোতি কুচ্ছিযং মণিকমেখলায এৰং লদ্ধনামো ভাজনৰিসেসো. অহারী অপরিহারীতি উদকং ন হরতি ন পরিহরতি, ন পরিযাদিযতীতি অত্থো. ইতি ইমস্মিং সুত্তে সক্কচ্চধম্মদেসনাৰ কথিতা. বুদ্ধানঞ্হি অসক্কচ্চধম্মদেসনা নাম নত্থি. সীহসমানৰুত্তিনো হি বুদ্ধা, যথা সীহো পভিন্নৰরৰারণস্সপি সসবিল়ারাদীনম্পি গহণত্থায একসদিসমেৰ ৰেগং করোতি, এৰং বুদ্ধাপি একস্স দেসেন্তাপি দ্ৰিন্নং বহূনং ভিক্খুপরিসায ভিক্খুনিউপাসকউপাসিকাপরিসাযপি তিত্থিযানম্পি দেসেন্তা সক্কচ্চমেৰ দেসেন্তি. চতস্সো পন পরিসা সদ্দহিত্ৰা ওকপ্পেত্ৰা সুণন্তীতি তাসং দেসনা সক্কচ্চদেসনা নাম জাতা.

৮. সঙ্খধমসুত্তৰণ্ণনা

৩৬০. অট্ঠমে যংবহুলং যংবহুলন্তি ইমিনা নিগণ্ঠো অত্তনাৰ অত্তনো ৰাদং ভিন্দতি. তস্মা ভগৰা এৰং সন্তে ন কোচি আপাযিকোতিআদিমাহ. পুরিমানি পন চত্তারি পদানি দিট্ঠিযা পচ্চযা হোন্তি. তস্মা তেসুপি আদীনৰং দস্সেন্তো ইধ, গামণি, একচ্চো সত্থা এৰংৰাদী হোতীতিআদিমাহ. তত্থ অহম্পম্হীতি অহম্পি অম্হি.

মেত্তাসহগতেনাতিআদীসু যং ৰত্তব্বং, তং সব্বং সদ্ধিং ভাৰনানযেন ৰিসুদ্ধিমগ্গে ৰুত্তমেৰ. সেয্যথাপি, গামণি, বলৰা সঙ্খধমোতিআদি পন ইধ অপুব্বং. তত্থ বলৰাতি বলসম্পন্নো. সঙ্খধমোতি সঙ্খধমকো. অপ্পকসিরেনাতি অকিচ্ছেন অদুক্খেন. দুব্বলো হি সঙ্খধমো সঙ্খং ধমন্তোপি ন সক্কোতি চতস্সো দিসা সরেন ৰিঞ্ঞাপেতুং, নাস্স সঙ্খসদ্দো সব্বতো ফরতি, বলৰতো পন ৰিপ্ফারিকো হোতি, তস্মা ‘‘বলৰা’’তি আহ.

মেত্তায চেতোৰিমুত্তিযাতি এত্থ ‘‘মেত্তা’’তি ৰুত্তে উপচারোপি অপ্পনাপি ৰট্টতি, ‘‘চেতোৰিমুত্তী’’তি ৰুত্তে পন অপ্পনাৰ ৰট্টতি. যং পমাণকতং কম্মন্তি পমাণকতং কম্মং নাম কামাৰচরং ৰুচ্চতি, অপ্পমাণকতং কম্মং নাম রূপাৰচরং. তঞ্হি পমাণং অতিক্কমিত্ৰা ওধিসকঅনোধিসকদিসাফরণৰসেন ৰড্ঢেত্ৰা কতত্তা অপ্পমাণকতন্তি ৰুচ্চতি.

ন তং তত্রাৰসিস্সতি, ন তং তত্রাৰতিট্ঠতীতি তং কামাৰচরকম্মং তস্মিং রূপারূপাৰচরকম্মে ন ওহীযতি ন তিট্ঠতি. কিং ৰুত্তং হোতি? তং কামাৰচরকম্মং তস্স রূপারূপাৰচরকম্মস্স অন্তরা লগ্গিতুং ৰা ঠাতুং ৰা রূপারূপাৰচরকম্মং ফরিত্ৰা পরিযাদিযিত্ৰা অত্তনো ওকাসং গহেত্ৰা পতিট্ঠাতুং ৰা ন সক্কোতি. অথ খো রূপারূপাৰচরকম্মমেৰ কামাৰচরং মহোঘো ৰিয পরিত্তং উদকং ফরিত্ৰা পরিযাদিযিত্ৰা অত্তনো ওকাসং কত্ৰা তিট্ঠতি, তস্স ৰিপাকং পটিবাহিত্ৰা সযমেৰ ব্রহ্মসহব্যতং উপনেতীতি. ইতি ইদং সুত্তং আদিম্হি কিলেসৰসেন ৰুট্ঠায অৰসানে ব্রহ্মৰিহারৰসেন গহিতত্তা যথানুসন্ধিনাৰ গতং.

৯. কুলসুত্তৰণ্ণনা

৩৬১. নৰমে দুব্ভিক্খাতি দুল্লভভিক্খা. দ্ৰীহিতিকাতি ‘‘জীৰিস্সাম নু খো ন নু খো’’তি এৰং পৰত্তঈহিতিকা. ‘‘দুহিতিকা’’তিপি পাঠো. অযমেৰ অত্থো. দুক্খা ঈহিতি এত্থ ন সক্কা কোচি পযোগো সুখেন কাতুন্তি দুহিতিকা. তত্থ তত্থ মতমনুস্সানং ৰিপ্পকিণ্ণানি সেতানি অট্ঠিকানি এত্থাতি সেতট্ঠিকা. সলাকাৰুত্তাতি সলাকমত্তৰুত্তা, যং তত্থ ৰুত্তং ৰাপিতং, তং সলাকমত্তমেৰ অহোসি, ফলে ন জনযতীতি অত্থো.

উগ্গিলিতুন্তি দ্ৰে অন্তে মোচেত্ৰা কথেতুং অসক্কোন্তো উগ্গিলিতুং বহি নীহরিতুং ন সক্খীতি. ওগিলিতুন্তি পুচ্ছায দোসং দিস্ৰা হারেতুং অসক্কোন্তো ওগিলিতুং অন্তো পৰেসেতুং ন সক্খীতি.

ইতো সো গামণি একনৰুতিকপ্পেতি ভগৰা কথযমানোৰ যাৰ নিক্খন্তো নাসিকৰাতো ন পুন পৰিসতি, তাৰতকেন কালেন একনৰুতিকপ্পে অনুস্সরি ‘‘অত্থি নু খো কিঞ্চি কুলে পক্কভিক্খাদানেন উপহতপুব্ব’’ন্তি পরিজাননত্থং. অথেকম্পি অপস্সন্তো ‘‘ইতো সো, গামণী’’তিআদিমাহ. ইদানি দানাদীনং আনিসংসং কথেন্তো অথ খো যানি তানি কুলানি অড্ঢানীতি ধম্মদেসনং আরভি. তত্থ দানসম্ভূতানীতি দানেন সম্ভূতানি নিব্বত্তানি. সেসপদদ্ৰযেপি এসেৰ নযো. এত্থ পন সচ্চং নাম সচ্চৰাদিতা. সামঞ্ঞং নাম সেসসীলং. ৰিকিরতীতি অযোগেন ৰল়ঞ্জেন্তো ৰিপ্পকিরতি. ৰিধমতীতি ধমেন্তো ৰিয নাসেতি. ৰিদ্ধংসেতীতি নাসেতি. অনিচ্চতাতি হুত্ৰা অভাৰো বহুনাপি কালেন সঙ্গতানং খণেনেৰ অন্তরধানং.

১০. মণিচূল়কসুত্তৰণ্ণনা

৩৬২. দসমে তং পরিসং এতদৰোচাতি তস্স কির এৰং অহোসি ‘‘কুলপুত্তা পব্বজন্তা পুত্তদারঞ্চেৰ জাতরূপরজতঞ্চ পহাযেৰ পব্বজন্তি, ন চ সক্কা যং পহায পব্বজিতা, তং তেহি গহেতু’’ন্তি নযগ্গাহে ঠত্ৰা ‘‘মা অয্যো’’তিআদিৰচনং অৰোচ. একংসেনেতন্তি এতং পঞ্চকামগুণকপ্পনং অস্সমণধম্মো অসক্যপুত্তিযধম্মোতি একংসেন ধারেয্যাসি.

তিণন্তি সেনাসনচ্ছদনতিণং. পরিযেসিতব্বন্তি তিণচ্ছদনে ৰা ইট্ঠকচ্ছদনে ৰা গেহে পলুজ্জন্তে যেহি তং কারিতং, তেসং সন্তিকং গন্ত্ৰা ‘‘তুম্হেহি কারিতসেনাসনং ওৰস্সতি, ন সক্কা তত্থ ৰসিতু’’ন্তি আচিক্খিতব্বং. মনুস্সা সক্কোন্তা করিস্সন্তি, অসক্কোন্তা ‘‘তুম্হে ৰড্ঢকিং গহেত্ৰা কারাপেথ, মযং তে সঞ্ঞাপেস্সামা’’তি ৰক্খন্তি. এৰং ৰুত্তে কারেত্ৰা তেসং আচিক্খিতব্বং. মনুস্সা ৰড্ঢকীনং দাতব্বং দস্সন্তি. সচে আৰাসসামিকা নত্থি, অঞ্ঞেসম্পি ভিক্খাচারৰত্তেন আরোচেত্ৰা কারেতুং ৰট্টতি. ইদং সন্ধায ‘‘পরিযেসিতব্ব’’ন্তি ৰুত্তং.

দারুন্তি সেনাসনে গোপানসিআদীসু পলুজ্জমানেসু তদত্থায দারুং. সকটন্তি গিহিৰিকতং কত্ৰা তাৰকালিকসকটং. ন কেৰলঞ্চ সকটমেৰ, অঞ্ঞম্পি ৰাসিফরসুকুদ্দালাদিউপকরণং এৰং পরিযেসিতুং ৰট্টতি. পুরিসোতি হত্থকম্মৰসেন পুরিসো পরিযেসিতব্বো. যংকিঞ্চি হি পুরিসং ‘‘হত্থকম্মং, আৰুসো, কত্ৰা দস্সসী’’তি ৰত্ৰা ‘‘দস্সামি, ভন্তে,’’তি ৰুত্তে ‘‘ইদঞ্চিদঞ্চ করোহী’’তি যং ইচ্ছতি, তং কারেতুং ৰট্টতি. ন ত্ৰেৰাহং, গামণি, কেনচি পরিযাযেনাতি জাতরূপরজতং পনাহং কেনচিপি কারণেন পরিযেসিতব্বন্তি ন ৰদামি.

১১. ভদ্রকসুত্তৰণ্ণনা

৩৬৩. একাদসমে মল্লেসূতি এৰংনামকে জনপদে. ৰধেনাতি মারণেন. জানিযাতি ধনজানিযা. অকালিকেন পত্তেনাতি ন কালন্তরেন পত্তেন, কালং অনতিক্কমিত্ৰাৰ পত্তেনাতি অত্থো. চিরৰাসী নাম কুমারোতি এৰংনামকো তস্স পুত্তো. বহি আৰসথে পটিৰসতীতি বহিনগরে কিঞ্চিদেৰ সিপ্পং উগ্গণ্হন্তো ৰসতি. ইমস্মিং সুত্তে ৰট্টদুক্খং কথিতং.

১২. রাসিযসুত্তৰণ্ণনা

৩৬৪. দ্ৰাদসমে রাসিযোতি রাসিং কত্ৰা পঞ্হস্স পুচ্ছিতত্তা রাসিযোতি এৰং ধম্মসঙ্গাহকত্থেরেহি গহিতনামো. তপস্সিন্তি তপনিস্সিতকং. লূখজীৰিন্তি লূখজীৰিকং. অন্তাতি কোট্ঠাসা. গামোতি গাম্মো. গম্মোতিপি পাঠো, গামৰাসীনং ধম্মোতি অত্থো. অত্তকিলমথানুযোগোতি অত্তনো কিলমথানুযোগো, সরীরদুক্খকরণন্তি অত্থো.

কস্মা পনেত্থ কামসুখল্লিকানুযোগো গহিতো, কস্মা অত্তকিলমথানুযোগো, কস্মা মজ্ঝিমা পটিপদাতি? কামসুখল্লিকানুযোগো তাৰ কামভোগীনং দস্সনত্থং গহিতো, অত্তকিলমথানুযোগো তপনিস্সিতকানং, মজ্ঝিমা পটিপদা তিণ্ণং নিজ্জরৰত্থূনং দস্সনত্থং গহিতা. কিং এতেসং দস্সনে পযোজনন্তি? ইমে দ্ৰে অন্তে পহায তথাগতো মজ্ঝিমায পটিপদায সম্মাসম্বোধিং পত্তো. সো কামভোগিনোপি ন সব্বে গরহতি ন পসংসতি, তপনিস্সিতকেপি ন সব্বে গরহতি ন পসংসতি, গরহিতব্বযুত্তকেযেৰ গরহতি, পসংসিতব্বযুত্তকে পসংসতীতি ইমস্সত্থস্স পকাসনং এতেসং দস্সনে পযোজনন্তি ৰেদিতব্বং.

ইদানি তমত্থং পকাসেন্তো তযো খোমে, গামণি, কামভোগিনোতিআদিমাহ. তত্থ সাহসেনাতি সাহসিককম্মেন. ন সংৰিভজতীতি মিত্তসহাযসন্দিট্ঠসম্ভত্তানং সংৰিভাগং ন করোতি. ন পুঞ্ঞানি করোতীতি অনাগতভৰস্স পচ্চযভূতানি পুঞ্ঞানি ন করোতি. ধম্মাধম্মেনাতি ধম্মেন চ অধম্মেন চ. ঠানেহীতি কারণেহি. সচ্ছিকরোতীতি কথং অত্তানং আতাপেন্তো পরিতাপেন্তো সচ্ছিকরোতি? চতুরঙ্গৰীরিযৰসেন চ ধুতঙ্গৰসেন চ. তিস্সো সন্দিট্ঠিকা নিজ্জরাতি এত্থ একোপি মগ্গো তিণ্ণং কিলেসানং নিজ্জরণতায তিস্সো নিজ্জরাতি ৰুত্তোতি.

১৩. পাটলিযসুত্তৰণ্ণনা

৩৬৫. তেরসমে দূতেয্যানীতি দূতকম্মানি পণ্ণানি চেৰ মুখসাসনানি চ. পাণাতিপাতঞ্চাহন্তি ইদং কস্মা আরদ্ধং? ন কেৰলং অহং মাযং জানামি, অঞ্ঞম্পি ইদঞ্চিদঞ্চ জানামীতি সব্বঞ্ঞুভাৰদস্সনত্থং আরদ্ধং. সন্তি হি, গামণি, একে সমণব্রাহ্মণাতি ইদং সেসসমণব্রাহ্মণানং লদ্ধিং দস্সেত্ৰা তস্সা পজহাপনত্থং আরদ্ধং.

মালী কুণ্ডলীতি মালায মালী, কুণ্ডলেহি কুণ্ডলী. ইত্থিকামেহীতি ইত্থীহি সদ্ধিং কামা ইত্থিকামা, তেহি ইত্থিকামেহি. আৰসথাগারন্তি কুলঘরস্স একস্মিং ঠানে একেকস্সেৰ সুখনিৰাসত্থায কতং ৰাসাগারং. তেনাহং যথাসত্তি যথাবলং সংৰিভজামীতি তস্সাহং অত্তনো সত্তিঅনুরূপেন চেৰ বলানুরূপেন চ সংৰিভাগং করোমি. অলন্তি যুত্তং. কঙ্খনিযে ঠানেতি কঙ্খিতব্বে কারণে. চিত্তসমাধিন্তি তস্মিং ধম্মসমাধিস্মিং ঠিতো ত্ৰং সহ ৰিপস্সনায চতুন্নং মগ্গানং ৰসেন চিত্তসমাধিং সচে পটিলভেয্যাসীতি দস্সেতি. অপণ্ণকতায ময্হন্তি অযং পটিপদা ময্হং অপণ্ণকতায অনপরাধকতায এৰ সংৰত্ততীতি অত্থো. কটগ্গাহোতি জযগ্গাহো.

অযং খো, গামণি, ধম্মসমাধি, তত্র চে ত্ৰং চিত্তসমাধিং পটিলভেয্যাসীতি এত্থ ধম্মসমাধীতি দসকুসলকম্মপথধম্মা, চিত্তসমাধীতি সহ ৰিপস্সনায চত্তারো মগ্গা. অথ ৰা ‘‘পামোজ্জং জাযতি, পমুদিতস্স পীতি জাযতী’’তি (অ. নি. ৫.২৬) এৰং ৰুত্তা পামোজ্জপীতিপস্সদ্ধিসুখসমাধিসঙ্খাতা পঞ্চ ধম্মা ধম্মসমাধি নাম, চিত্তসমাধি পন সহ ৰিপস্সনায চত্তারো মগ্গাৰ. অথ ৰা দসকুসলকম্মপথা চত্তারো ব্রহ্মৰিহারা চাতি অযং ধম্মসমাধি নাম, তং ধম্মসমাধিং পূরেন্তস্স উপ্পন্না চিত্তেকগ্গতা চিত্তসমাধি নাম. এৰং ত্ৰং ইমং কঙ্খাধম্মং পজহেয্যাসীতি এৰং ত্ৰং ইমস্মিং ৰুত্তপ্পভেদে ধম্মসমাধিস্মিং ঠিতো সচে এৰং চিত্তসমাধিং পটিলভেয্যাসি, একংসেনেতং কঙ্খং পজহেয্যাসীতি অত্থো. সেসং সব্বত্থ ৰুত্তনযমেৰাতি.

গামণিসংযুত্তৰণ্ণনা নিট্ঠিতা.