৮. নিগণ্ঠনাটপুত্তসুত্তৰণ্ণনা

৩৫০. অট্ঠমে তেনুপসঙ্কমীতি সযং আগতাগমো ৰিঞ্ঞাতসাসনো অনাগামী অরিযসাৰকো সমানো কস্মা নগ্গভোগ্গং নিস্সিরিকং নিগণ্ঠং উপসঙ্কমীতি? উপৰাদমোচনত্থঞ্চেৰ ৰাদারোপনত্থঞ্চ. নিগণ্ঠা কির ‘‘সমণস্স গোতমস্স সাৰকা থদ্ধখদিরখাণুকসদিসা, কেনচি সদ্ধিং পটিসন্থারম্পি ন করোন্তী’’তি উপৰদন্তি, তস্স উপৰাদস্স মোচনত্থঞ্চ, ‘‘ৰাদঞ্চস্স আরোপেস্সামী’’তি উপসঙ্কমি. ন খ্ৰাহং এত্থ ভন্তে ভগৰতো সদ্ধায গচ্ছামীতি যস্স ঞাণেন অসচ্ছিকতং হোতি. সো ‘‘এৰং কিরেত’’ন্তি অঞ্ঞস্স সদ্ধায গচ্ছেয্য, মযা পন ঞাণেনেতং সচ্ছিকতং, তস্মা নাহং এত্থ ভগৰতো সদ্ধায গচ্ছামীতি দীপেন্তো এৰমাহ.

উল্লোকেত্ৰাতি কাযং উন্নামেত্ৰা কুচ্ছিং নীহরিত্ৰা গীৰং পগ্গয্হ সব্বং দিসং পেক্খমানো উল্লোকেত্ৰা. বাধেতব্বং মঞ্ঞেয্যাতি যথা ৰিনিৰিজ্ঝিত্ৰা ন নিক্খমতি, এৰং পটিবাহিতব্বং মঞ্ঞেয্য বন্ধিতব্বং ৰা. সহধম্মিকাতি সকারণা. অথ মং পটিহরেয্যাসি সদ্ধিং নিগণ্ঠপরিসাযাতি এতেসং অত্থে ঞাতে অথ মে নিগণ্ঠপরিসায সদ্ধিং অভিগচ্ছেয্যাসি, পতীহারস্স মে সন্তিকং আগন্ত্ৰা অত্তনো আগতভাৰং জানাপেয্যাসীতি অত্থো. একো পঞ্হোতি একো পঞ্হমগ্গো, একং পঞ্হগৰেসনন্তি অত্থো. একো উদ্দেসোতি একং নাম কিন্তি? অযং একো উদ্দেসো. একং ৰেয্যাকরণন্তি ‘‘সব্বে সত্তা আহারট্ঠিতিকা’’তি (খু. পা. ৪.১; অ. নি. ১০.২৭) ইদং একং ৰেয্যাকরণং. এৰং সব্বত্থ অত্থো ৰেদিতব্বো.