৬. মোগ্গল্লানসংযুত্তং

১-৮. পঠমঝানপঞ্হাসুত্তাদিৰণ্ণনা

৩৩২-৩৩৯. মোগ্গল্লানসংযুত্তে কামসহগতাতি পঞ্চনীৰরণসহগতা. তস্স হি পঠমজ্ঝানৰুট্ঠিতস্স পঞ্চ নীৰরণানি সন্ততো উপট্ঠহিংসু. তেনস্স তং পঠমজ্ঝানং হানভাগিযং নাম অহোসি. তং পমাদং ঞত্ৰা সত্থা ‘‘মা পমাদো’’তি ওৰাদং অদাসি. দুতিযজ্ঝানাদীসুপি ইমিনাৰ নযেন অত্থো ৰেদিতব্বো. আরম্মণসহগতমেৰ হেত্থ ‘‘সহগত’’ন্তি ৰুত্তং.

৯. অনিমিত্তপঞ্হাসুত্তৰণ্ণনা

৩৪০. অনিমিত্তং চেতোসমাধিন্তি নিচ্চনিমিত্তাদীনি পহায পৰত্তং ৰিপস্সনাসমাধিংযেৰ সন্ধাযেতং ৰুত্তন্তি. নিমিত্তানুসারি ৰিঞ্ঞাণং হোতীতি এৰং ইমিনা ৰিপস্সনাসমাধিৰিহারেন ৰিহরতো ৰিপস্সনাঞাণে তিক্খে সূরে ৰহমানে. যথা নাম পুরিসস্স তিখিণেন ফরসুনা রুক্খং ছিন্দন্তস্স ‘‘সুট্ঠু ৰত মে ফরসু ৰহতী’’তি খণে খণে ফরসুধারং ওলোকেন্তস্স ছেজ্জকিচ্চং ন নিপ্ফজ্জতি, এৰং থেরস্সাপি ‘‘সূরং ৰত মে হুত্ৰা ঞাণং ৰহতী’’তি ৰিপস্সনং আরব্ভ নিকন্তি উপ্পজ্জতি. অথ ৰিপস্সনাকিচ্চং সাধেতুং নাসক্খি. তং সন্ধায ৰুত্তং ‘‘নিমিত্তানুসারি ৰিঞ্ঞাণং হোতী’’তি. সব্বনিমিত্তানং অমনসিকারা অনিমিত্তং চেতোসমাধিং উপসম্পজ্জ ৰিহাসিন্তি সব্বেসং নিচ্চসুখঅত্তনিমিত্তানং অমনসিকারেন অনিমিত্তং ৰুট্ঠানগামিনিৰিপস্সনাসম্পযুত্তং চেতোসমাধিং নিব্বানারম্মণং উপরিমগ্গফলসমাধিং উপসম্পজ্জ ৰিহাসিং.

১০-১১. সক্কসুত্তাদিৰণ্ণনা

৩৪১-৩৪২. অৰেচ্চপ্পসাদেনাতি অচলপ্পসাদেন. দসহি ঠানেহীতি দসহি কারণেহি. অধিগণ্হন্তীতি অভিভৰন্তি, অতিক্কমিত্ৰা তিট্ঠন্তি. সেসং সব্বত্থ উত্তানত্থমেৰাতি.

মোগ্গল্লানসংযুত্তৰণ্ণনা নিট্ঠিতা.