১. পঠমপেয্যালৰগ্গো

১-২. মাতুগামসুত্তাদিৰণ্ণনা

২৮০-২৮১. মাতুগামসংযুত্তস্স পঠমে অঙ্গেহীতি অগুণঙ্গেহি. ন চ রূপৰাতি ন রূপসম্পন্নো ৰিরূপো দুদ্দসিকো. ন চ ভোগৰাতি ন ভোগসম্পন্নো নিদ্ধনো. ন চ সীলৰাতি ন সীলসম্পন্নো দুস্সীলো. অলসো চাতি কন্তনপচনাদীনি কম্মানি কাতুং ন সক্কোতি, কুসীতো আলসিযো নিসিন্নট্ঠানে নিসিন্নোৰ, ঠিতঠানে ঠিতোৰ নিদ্দাযতি এৰ. পজঞ্চস্স ন লভতীতি অস্স পুরিসস্স কুলৰংসপতিট্ঠাপকং পুত্তং ন লভতি, ৰঞ্ঝিত্থী নাম হোতি. সুক্কপক্খো ৰুত্তৰিপরিযাযেন ৰেদিতব্বো. দুতিযং পঠমে ৰুত্তনযেনেৰ পরিৰত্তেতব্বং.

৩. আৰেণিকদুক্খসুত্তৰণ্ণনা

২৮২. ততিযে আৰেণিকানীতি পাটিপুগ্গলিকানি পুরিসেহি অসাধারণানি. পারিচরিযন্তি পরিচারিকভাৰং.

৪. তীহিধম্মেহিসুত্তাদিৰণ্ণনা

২৮৩-৩০৩. চতুত্থে মচ্ছেরমলপরিযুট্ঠিতেনাতি পুব্বণ্হসমযস্মিঞ্হি মাতুগামো খীরদধিসঙ্গোপনরন্ধনপচনাদীনি কাতুং আরদ্ধো, পুত্তকেহিপি যাচিযমানো কিঞ্চি দাতুং ন ইচ্ছতি. তেনেতং ৰুত্তং ‘‘পুব্বণ্হসমযং মচ্ছেরমলপরিযুট্ঠিতেন চেতসা’’তি. মজ্ঝন্হিকসমযে পন মাতুগামো কোধাভিভূতোৰ হোতি, অন্তোঘরে কলহং অলভন্তো পটিৰিস্সকঘরম্পি গন্ত্ৰা কলহং করোতি, সামিকস্স চ ঠিতনিসিন্নট্ঠানানি ৰিলোকেন্তো ৰিচরতি. তেন ৰুত্তং ‘‘মজ্ঝন্হিকসমযং ইস্সাপরিযুট্ঠিতেন চেতসা’’তি. সাযন্হে পনস্সা অসদ্ধম্মপটিসেৰনায চিত্তং নমতি. তেন ৰুত্তং ‘‘সাযন্হসমযং কামরাগপরিযুট্ঠিতেন চেতসা’’তি. পঞ্চমাদীনি উত্তানত্থানেৰ.