১০. অব্যাকতসংযুত্তং

১. খেমাসুত্তৰণ্ণনা

৪১০. অব্যাকতসংযুত্তস্স পঠমে খেমাতি গিহিকালে বিম্বিসারস্স উপাসিকা সদ্ধাপব্বজিতা মহাথেরী ‘‘এতদগ্গং, ভিক্খৰে, মম সাৰিকানং ভিক্খুনীনং মহাপঞ্ঞানং যদিদং খেমা’’তি এৰং ভগৰতা মহাপঞ্ঞতায এতদগ্গে ঠপিতা. পণ্ডিতাতি পণ্ডিচ্চেন সমন্নাগতা. ৰিযত্তাতি ৰেয্যত্তিযেন সমন্নাগতা. মেধাৰিনীতি মেধায পঞ্ঞায সমন্নাগতা. বহুস্সুতাতি পরিযত্তিবাহুসচ্চেনপি পটিৰেধবাহুসচ্চেনপি সমন্নাগতা.

গণকোতি অচ্ছিদ্দকগণনায কুসলো. মুদ্দিকোতি অঙ্গুলিমুদ্দায গণনায কুসলো. সঙ্খাযকোতি পিণ্ডগণনায কুসলো. গম্ভীরোতি চতুরাসীতিযোজনসহস্সগম্ভীরো. অপ্পমেয্যোতি আল়্হকগণনায অপ্পমেয্যো. দুপ্পরিযোগাহোতি আল়্হকগণনায পমাণগহণত্থং দুরোগাহো. যেন রূপেন তথাগতন্তি যেন রূপেন দীঘো রস্সো সামো ওদাতোতি সত্তসঙ্খাতং তথাগতং পঞ্ঞপেয্য. তং রূপং তথাগতস্স পহীনন্তি তং ৰুত্তপ্পকাররূপং সমুদযপ্পহানেন সব্বঞ্ঞুতথাগতস্স পহীনং. রূপসঙ্খায ৰিমুত্তোতি আযতিং রূপস্স অনুপ্পত্তিযা রূপারূপকোট্ঠাসেনপি এৰরূপো নাম ভৰিস্সতীতি ৰোহারস্সপি পটিপস্সদ্ধত্তা রূপপণ্ণত্তিযাপি ৰিমুত্তো. গম্ভীরোতি অজ্ঝাসয গম্ভীরতায চ গুণগম্ভীরতায চ গম্ভীরো. তস্স এৰং গুণগম্ভীরস্স সতো সব্বঞ্ঞুতথাগতস্স যং উপাদায সত্তসঙ্খাতো তথাগতোতি পঞ্ঞত্তি হোতি, তদভাৰেন তস্সা পঞ্ঞত্তিযা অভাৰং পস্সন্তস্স অযং সত্তসঙ্খাতো হোতি তথাগতো পরং মরণাতি ইদং ৰচনং ন উপেতি ন যুজ্জতি, ন হোতি তথাগতো পরং মরণাতিআদিৰচনম্পি ন উপেতি ন যুজ্জতীতি অত্থো.

সংসন্দিস্সতীতি একং ভৰিস্সতি. সমেস্সতীতি নিরন্তরং ভৰিস্সতি. ন ৰিরোধযিস্সতীতি ন ৰিরুদ্ধং পদং ভৰিস্সতি. অগ্গপদস্মিন্তি দেসনায. দেসনা হি ইধ অগ্গপদন্তি অধিপ্পেতা.

২. অনুরাধসুত্তৰণ্ণনা

৪১১. দুতিযং খন্ধিযৰগ্গে ৰিত্থারিতমেৰ, অব্যাকতাধিকারতো পন ইধ ৰুত্তং.

৩-৮. পঠমসারিপুত্তকোট্ঠিকসুত্তাদিৰণ্ণনা

৪১২-৪১৭. ততিযে রূপগতমেতন্তি রূপমত্তমেতং. এত্থ রূপতো অঞ্ঞো কোচি সত্তো নাম ন উপলব্ভতি, রূপে পন সতি নামমত্তং এতং হোতীতি দস্সেতি. ৰেদনাগতমেতন্তিআদীসুপি এসেৰ নযো. অযং খো আৰুসো হেতূতি অযং রূপাদীনি মুঞ্চিত্ৰা অনুপলব্ভিযসভাৰো হেতু, যেনেতং অব্যাকতং ভগৰতাতি. চতুত্থাদীনি উত্তানত্থানেৰ.

৯. কুতূহলসালাসুত্তৰণ্ণনা

৪১৮. নৰমে কুতূহলসালাযন্তি কুতূহলসালা নাম পচ্চেকসালা নত্থি, যত্থ পন নানাতিত্থিযা সমণব্রাহ্মণা নানাৰিধং কথং পৰত্তেন্তি, সা বহূনং ‘‘অযং কিং ৰদতি, অযং কিং ৰদতী’’তি কুতূহলুপ্পৰত্তিট্ঠানতো কুতূহলসালাতি ৰুচ্চতি. দূরম্পি গচ্ছতীতি যাৰ আভস্সরব্রহ্মলোকা গচ্ছতি. ইমঞ্চ কাযং নিক্খিপতীতি চুতিচিত্তেন নিক্খিপতি. অনুপপন্নো হোতীতি চুতিক্খণেযেৰ পটিসন্ধিচিত্তস্স অনুপ্পন্নত্তা অনুপপন্নো হোতি.

১০. আনন্দসুত্তৰণ্ণনা

৪১৯. দসমে তেসমেতং সদ্ধিং অভৰিস্সাতি তেসং লদ্ধিযা সদ্ধিং এতং অভৰিস্স. অনুলোমং অভৰিস্স ঞাণস্স উপ্পাদায সব্বে ধম্মা অনত্তাতি যং এতং ‘‘সব্বে ধম্মা অনত্তা’’তি ৰিপস্সনাঞাণং উপ্পজ্জতি, অপি নু মে তস্স অনুলোমং অভৰিস্সাতি অত্থো.

১১. সভিযকচ্চানসুত্তৰণ্ণনা

৪২০. একাদসমে এতমেত্তকেন এত্তকমেৰাতি আৰুসো যস্সাপি এতং এত্তকেন কালেন ‘‘হেতুম্হি সতি রূপীতিআদি পঞ্ঞাপনা হোতি, অসতি ন হোতী’’তি ব্যাকরণং ভৰেয্য, তস্স এত্তকমেৰ বহু. কো পন ৰাদো অতিক্কন্তেতি অতিক্কন্তে পন অতিমনাপে ধম্মদেসনানযে ৰাদোযেৰ কো, নত্থি ৰাদো, ছিন্না কথাতি.

অব্যাকতসংযুত্তৰণ্ণনা নিট্ঠিতা.