৯. ৰনসংযুত্তং

১. ৰিৰেকসুত্তৰণ্ণনা

২২১. ৰনসংযুত্তস্স পঠমে কোসলেসু ৰিহরতীতি সত্থু সন্তিকে কম্মট্ঠানং গহেত্ৰা তস্স জনপদস্স সুলভভিক্খতায তত্থ গন্ত্ৰা ৰিহরতি. সংৰেজেতুকামাতি ৰিৰেকং পটিপজ্জাপেতুকামা. ৰিৰেককামোতি তযো ৰিৰেকে পত্থযন্তো. নিচ্ছরতী বহিদ্ধাতি বাহিরেসু পুথুত্তারম্মণেসু চরতি. জনো জনস্মিন্তি ত্ৰং জনো অঞ্ঞস্মিং জনে ছন্দরাগং ৰিনযস্সু. পজহাসীতি পজহ. ভৰাসীতি ভৰ. সতং তং সারযামসেতি সতিমন্তং পণ্ডিতং তং মযম্পি সারযাম, সতং ৰা ধম্মং মযং তং সারযামাতি অত্থো. পাতালরজোতি অপ্পতিট্ঠট্ঠেন পাতালসঙ্খাতো কিলেসরজো. মা তং কামরজোতি অযং কামরাগরজো তং মা অৰহরি, অপাযমেৰ মা নেতূতি অত্থো. পংসুকুন্থিতোতি পংসুমক্খিতো. ৰিধুনন্তি ৰিধুনন্তো. সিতং রজন্তি সরীরলগ্গং রজং. সংৰেগমাপাদীতি দেৰতাপি নাম মং এৰং সারেতীতি ৰিৰেকমাপন্নো, উত্তমৰীরিযং ৰা পগ্গয্হ পরমৰিৰেকং মগ্গমেৰ পটিপন্নোতি. পঠমং.

২. উপট্ঠানসুত্তৰণ্ণনা

২২২. দুতিযে সুপতীতি অযং কির খীণাসৰো, সো দূরে ভিক্খাচারগামং গন্ত্ৰা আগতো পণ্ণসালায পত্তচীৰরং পটিসামেত্ৰা অৰিদূরে জাতস্সরং ওতরিত্ৰা গত্তানি উতুং গাহাপেত্ৰা দিৰাট্ঠানং সম্মজ্জিত্ৰা তত্থ নীচমঞ্চকং পঞ্ঞাপেত্ৰা নিদ্দং অনোক্কমন্তোৰ নিপন্নো. খীণাসৰস্সাপি হি কাযদরথো হোতিযেৰাতি তস্স ৰিনোদনত্থং, তং সন্ধায সুপতীতি ৰুত্তং. অজ্ঝভাসীতি ‘‘অযং ভিক্খু সত্থু সন্তিকে কম্মট্ঠানং গহেত্ৰা দিৰা সুপতি, দিৰাসোপ্পঞ্চ নামেতং ৰড্ঢিতং দিট্ঠধম্মিকসম্পরাযিকং অত্থং নাসেতী’’তি মঞ্ঞমানা ‘‘চোদেস্সামি ন’’ন্তি চিন্তেত্ৰা অভাসি.

আতুরস্সাতি জরাতুরো রোগাতুরো কিলেসাতুরোতি তযো আতুরা, তেসু কিলেসাতুরং সন্ধাযেৰমাহ. সল্লৰিদ্ধস্সাতি সৰিসেন সত্তিসল্লেন ৰিয অৰিজ্জাৰিসৰিট্ঠেন তণ্হাসল্লেন হদযে ৰিদ্ধস্স. রুপ্পতোতি ঘট্টিযমানস্স.

ইদানিস্স কামেসু আদীনৰং কথযন্তী অনিচ্চাতিআদিমাহ. তত্থ অসিতন্তি তণ্হাদিট্ঠিনিস্সযেন অনিস্সিতং. কস্মা পব্বজিতং তপেতি এৰরূপং খীণাসৰং দিৰাসোপ্পং ন তপতি, তাদিসং পন কস্মা ন তপেস্সতীতি? ৰদতি. থেরস্সেৰ ৰা এতং ৰচনং, তস্মা অযমেত্থ অত্থো – বদ্ধেসু মুত্তং অসিতং মাদিসং খীণাসৰপব্বজিতং কস্মা দিৰাসোপ্পং তপে, ন তপেস্সতীতি? সেসগাথাসুপি এসেৰ নযো. দেৰতায হি ৰচনপক্খে – ‘‘এৰরূপং খীণাসৰপব্বজিতং দিৰাসোপ্পং ন তপতি, তাদিসং পন কস্মা ন তপেস্সতি? তপেস্সতিযেৰা’’তি অত্থো. থেরস্স ৰচনপক্খে – ‘‘এৰরূপং মাদিসং খীণাসৰপব্বজিতং কস্মা দিৰাসোপ্পং তপে? ন তপতিযেৰা’’তি অত্থো. অযং পনেত্থ অনুত্তানপদৰণ্ণনা. ৰিনযাতি ৰিনযেন. সমতিক্কমাতি ৰট্টমূলিকায অৰিজ্জায সমতিক্কমেন. তং ঞাণন্তি তং চতুসচ্চঞাণং. পরমোদানন্তি পরমপরিসুদ্ধং. পব্বজিতন্তি এৰরূপেন ঞাণেন সমন্নাগতং পব্বজিতং. ৰিজ্জাযাতি চতুত্থমগ্গৰিজ্জায. আরদ্ধৰীরিযন্তি পগ্গহিতৰীরিযং পরিপুণ্ণৰীরিযং. দুতিযং.

৩. কস্সপগোত্তসুত্তৰণ্ণনা

২২৩. ততিযে ছেতন্তি একং মিগলুদ্দকং. ওৰদতীতি সো কির মিগলুদ্দকো পাতোৰ ভুঞ্জিত্ৰা ‘‘মিগে ৰধিস্সামী’’তি অরঞ্ঞং পৰিট্ঠো একং রোহিতমিগং দিস্ৰা ‘‘সত্তিযা নং পহরিস্সামী’’তি অনুবন্ধমানো থেরস্স পঠমসুত্তে ৰুত্তনযেনেৰ দিৰাৰিহারং নিসিন্নস্স অৰিদূরেন পক্কমতি. অথ নং থেরো – ‘‘উপাসক, পাণাতিপাতো নামেস অপাযসংৰত্তনিকো অপ্পাযুকসংৰত্তনিকো, সক্কা অঞ্ঞেনপি কসিৰণিজ্জাদিকম্মেন দারভরণং কাতুং, মা এৰরূপং কক্খল়কম্মং করোহী’’তি আহ. সোপি ‘‘মহাপংসুকূলিকত্থেরো কথেতী’’তি গারৰেন ঠত্ৰা সোতুং আরদ্ধো. অথস্স সোতুকামতং জনেস্সামীতি থেরো অঙ্গুট্ঠকং জালাপেসি. সো অক্খীহিপি পস্সতি, কণ্ণেহিপি সুণাতি, চিত্তং পনস্স ‘‘অসুকট্ঠানং মিগো গতো ভৰিস্সতি, অসুকতিত্থং ওতিণ্ণো, তত্থ নং গন্ত্ৰা ঘাতেত্ৰা যাৰদিচ্ছকং মংসং খাদিত্ৰা সেসং কাজেনাদায গন্ত্ৰা পুত্তকে তোসেস্সামী’’তি এৰং মিগস্সেৰ অনুপদং ধাৰতি. এৰং ৰিক্খিত্তচিত্তস্স ধম্মং দেসেন্তং থেরং সন্ধায ৰুত্তং ‘‘ওৰদতী’’তি. অজ্ঝভাসীতি ‘‘অযং থেরো অদারুং তচ্ছন্তো ৰিয অখেত্তে ৰপ্পন্তো ৰিয অত্তনোপি কম্মং নাসেতি, এতস্সাপি চোদেস্সামি ন’’ন্তি অভাসি.

অপ্পপঞ্ঞন্তি নিপ্পঞ্ঞং. অচেতসন্তি কারণজাননসমত্থেন চিত্তেন রহিতং. মন্দোৰাতি অন্ধবালো ৰিয. সুণাতীতি তৰ ধম্মকথং সুণাতি. ন ৰিজানাতীতি অত্থমস্স ন জানাতি. আলোকেতীতি তৰ পুথুজ্জনিকইদ্ধিযা জলন্তং অঙ্গুট্ঠকং আলোকেতি. ন পস্সতীতি এত্থ ‘‘নেৰ তেলং ন ৰট্টি ন দীপকপল্লিকা, থেরস্স পন আনুভাৰেনাযং জলতী’’তি ইমং কারণং ন পস্সতি. দস পজ্জোতেতি দসসু অঙ্গুলীসু দস পদীপে. রূপানীতি কারণরূপানি. চক্খূতি পঞ্ঞাচক্খু. সংৰেগমাপাদীতি কিং মে ইমিনাতি? ৰীরিযং পগ্গয্হ পরমৰিৰেকং অরহত্তমগ্গং পটিপজ্জি. ততিযং.

৪. সম্বহুলসুত্তৰণ্ণনা

২২৪. চতুত্থে সম্বহুলাতি বহূ সুত্তন্তিকা আভিধম্মিকা ৰিনযধরা চ. ৰিহরন্তীতি সত্থু সন্তিকে কম্মট্ঠানং গহেত্ৰা ৰিহরন্তি. পক্কমিংসূতি তে কির তস্মিং জনপদে অঞ্ঞতরং গামং উপসঙ্কমন্তে দিস্ৰা মনুস্সা পসন্নচিত্তা আসনসালায কোজৰত্থরণাদীনি পঞ্ঞাপেত্ৰা যাগুখজ্জকানি দত্ৰা উপনিসীদিংসু. মহাথেরো একং ধম্মকথিকং ‘‘ধম্মং কথেহী’’তি আহ. সো চিত্তং ধম্মকথং কথেসি. মনুস্সা পসীদিত্ৰা ভোজনৰেলাযং পণীতভোজনং অদংসু. মহাথেরো মনুঞ্ঞং ভত্তানুমোদনমকাসি. মনুস্সা ভিয্যোসোমত্তায পসন্না ‘‘ইধেৰ, ভন্তে, তেমাসং ৰসথা’’তি পটিঞ্ঞং কারেত্ৰা গমনাগমনসম্পন্নে ঠানে সেনাসনানি কারেত্ৰা চতূহি পচ্চযেহি উপট্ঠহিংসু. মহাথেরো ৰস্সূপনাযিকদিৰসে ভিক্খূ ওৰদি – ‘‘আৰুসো, তুম্হেহি গরুকস্স সত্থু সন্তিকে কম্মট্ঠানং গহিতং, বুদ্ধপাতুভাৰো নাম দুল্লভো. মাসস্স অট্ঠ দিৰসে ধম্মস্সৰনং কত্ৰা গণসঙ্গণিকং পহায অপ্পমত্তা ৰিহরথা’’তি. তে ততো পট্ঠায যুঞ্জন্তি ঘটেন্তি. কদাচি সব্বরত্তিকং ধম্মস্সৰনং করোন্তি, কদাচি পঞ্হং ৰিস্সজ্জেন্তি, কদাচি পধানং করোন্তি. তেসং ধম্মস্সৰনদিৰসে ধম্মং কথেন্তানংযেৰ অরুণো উগ্গচ্ছতি. পঞ্হাৰিস্সজ্জনদিৰসে ব্যত্তো ভিক্খু পঞ্হং পুচ্ছতি, পণ্ডিতো ৰিস্সজ্জেতীতি পুচ্ছনৰিস্সজ্জনং করোন্তানংযেৰ. পধানদিৰসে সূরিযত্থঙ্গমনে গণ্ডিং পহরিত্ৰাৰ চঙ্কমং ওতরিত্ৰা পধানং করোন্তানংযেৰ. তে এৰং ৰস্সং ৰস্সিত্ৰা পৰারেত্ৰা পক্কমিংসু. তং সন্ধাযেতং ৰুত্তং. পরিদেৰমানাতি ‘‘ইদানি তথারূপং মধুরং ধম্মস্সৰনং পঞ্হাকথনং কুতো লভিস্সামী’’তিআদীনি ৰত্ৰা রোদমানা.

খাযতীতি পঞ্ঞাযতি উপট্ঠাতি. কো মেতি কহং ইমে. ৰজ্জিভূমিযাতি ৰজ্জিরট্ঠাভিমুখা গতা. মগা ৰিযাতি যথা মগা তস্মিং তস্মিং পব্বতপাদে ৰা ৰনসণ্ডে ৰা ৰিচরন্তা – ‘‘ইদং অম্হাকং মাতুসন্তকং পিতুসন্তকং পৰেণিআগত’’ন্তি অগহেত্ৰা, যত্থেৰ নেসং গোচরফাসুতা চ হোতি পরিপন্থাভাৰো চ, তত্থ ৰিচরন্তি. এৰং অনিকেতা অগেহা ভিক্খৰোপি ‘‘অযং, আৰুসো, অম্হাকং আচরিযুপজ্ঝাযানং সন্তকো পৰেণিআগতো’’তি অগহেত্ৰা যত্থেৰ নেসং উতুসপ্পাযং ভোজনসপ্পাযং পুগ্গলসপ্পাযং সেনাসনসপ্পাযং ধম্মস্সৰনসপ্পাযঞ্চ সুলভং হোতি, তত্থ ৰিহরন্তি. চতুত্থং.

৫. আনন্দসুত্তৰণ্ণনা

২২৫. পঞ্চমে আনন্দোতি ধম্মভণ্ডাগারিকত্থেরো. অতিৰেলন্তি অতিক্কন্তং ৰেলং. গিহিসঞ্ঞত্তিবহুলোতি রত্তিঞ্চ দিৰা চ বহুকালং গিহী সঞ্ঞাপযন্তো. ভগৰতি পরিনিব্বুতে মহাকস্সপত্থেরো থেরং আহ – ‘‘আৰুসো, মযং রাজগহে ৰস্সং উপগন্ত্ৰা ধম্মং সঙ্গাযিস্সাম, গচ্ছ ত্ৰং অরঞ্ঞং পৰিসিত্ৰা উপরিমগ্গত্তযত্থায ৰাযামং করোহী’’তি. সো ভগৰতো পত্তচীৰরমাদায কোসলরট্ঠং গন্ত্ৰা একস্মিং অরঞ্ঞাৰাসে ৰসিত্ৰা পুনদিৰসে একং গামং পাৰিসি. মনুস্সা থেরং দিস্ৰা – ‘‘ভন্তে আনন্দ, তুম্হে পুব্বে সত্থারা সদ্ধিং আগচ্ছথ. অজ্জ এককাৰ আগতা. কহং সত্থারং ঠপেত্ৰা আগতত্থ? ইদানি কস্স পত্তচীৰরং গহেত্ৰা ৰিচরথ? কস্স মুখোদকং দন্তকট্ঠং দেথ, পরিৰেণং সম্মজ্জথ, ৰত্তপটিৰত্তং করোথা’’তি বহুং ৰত্ৰা পরিদেৰিংসু. থেরো – ‘‘মা, আৰুসো, সোচিত্থ, মা পরিদেৰিত্থ, অনিচ্চা সঙ্খারা’’তিআদীনি ৰত্ৰা তে সঞ্ঞাপেত্ৰা ভত্তকিচ্চাৰসানে ৰসনট্ঠানমেৰ গচ্ছতি. মনুস্সা সাযম্পি তত্থ গন্ত্ৰা তথেৰ পরিদেৰন্তি. থেরোপি তথেৰ ওৰদতি. তং সন্ধাযেতং ৰুত্তং. অজ্ঝভাসীতি ‘‘অযং থেরো ভিক্খুসঙ্ঘস্স কথং সুত্ৰা ‘সমণধম্মং করিস্সামী’তি অরঞ্ঞং পৰিসিত্ৰা ইদানি গিহী সঞ্ঞাপেন্তো ৰিহরতি, সত্থু সাসনং অসঙ্গহিতপুপ্ফরাসি ৰিয ঠিতং, ধম্মসঙ্গহং ন করোতি, চোদেস্সামি ন’’ন্তি চিন্তেত্ৰা অভাসি.

পসক্কিযাতি পৰিসিত্ৰা. হদযস্মিং ওপিযাতি কিচ্চতো চ আরম্মণতো চ হদযম্হি পক্খিপিত্ৰা. ‘‘নিব্বানং পাপুণিস্সামী’’তি ৰীরিযং করোন্তো নিব্বানং কিচ্চতো হদযম্হি ওপেতি নাম, নিব্বানারম্মণং পন সমাপত্তিং অপ্পেত্ৰা নিসীদন্তো আরম্মণতো. তদুভযম্পি সন্ধাযেসা ভাসতি. ঝাযাতি দ্ৰীহি ঝানেহি ঝাযিকো ভৰ. বিল়িবিল়িকাতি অযং গিহীহি সদ্ধিং বিল়িবিল়িকথা. পঞ্চমং.

৬. অনুরুদ্ধসুত্তৰণ্ণনা

২২৬. ছট্ঠে পুরাণদুতিযিকাতি অনন্তরে অত্তভাৰে অগ্গমহেসী. সোভসীতি পুব্বেপি সোভসি, ইদানিপি সোভসি. দুগ্গতাতি ন গতিদুগ্গতিযা দুগ্গতা. তা হি সুগতিযং ঠিতা সম্পত্তিং অনুভৰন্তি, পটিপত্তিদুগ্গতিযা পন দুগ্গতা. ততো চুতা হি তা নিরযেপি উপপজ্জন্তীতি দুগ্গতা. পতিট্ঠিতাতি সক্কাযস্মিং হি পতিট্ঠহন্তো অট্ঠহি কারণেহি পতিট্ঠাতি – রত্তো রাগৰসেন পতিট্ঠাতি, দুট্ঠো দোসৰসেন… মূল়্হো মোহৰসেন… ৰিনিবদ্ধো মানৰসেন… পরামট্ঠো দিট্ঠিৰসেন… থামগতো অনুসযৰসেন… অনিট্ঠঙ্গতো ৰিচিকিচ্ছাৰসেন… ৰিক্খেপগতো উদ্ধচ্চৰসেন পতিট্ঠাতি. তাপি এৰং পতিট্ঠিতাৰ. নরদেৰানন্তি দেৰনরানং.

নত্থি দানীতি সা কির দেৰধীতা থেরে বলৰসিনেহা অহোসি, পটিগন্তুং নাসক্খি. কালেন আগন্ত্ৰা পরিৰেণং সম্মজ্জতি, মুখোদকং দন্তকট্ঠং পানীযং পরিভোজনীযং উপট্ঠপেতি. থেরো অনাৰজ্জনেন পরিভুঞ্জতি. একস্মিং দিৰসে থেরস্স জিণ্ণচীৰরস্স চোল়কভিক্খং চরতো সঙ্কারকূটে দিব্বদুস্সং ঠপেত্ৰা পক্কমি. থেরো তং দিস্ৰা উক্খিপিত্ৰা, ওলোকেন্তো দুস্সন্তং দিস্ৰা ‘‘দুস্সমেত’’ন্তি ঞত্ৰা, ‘‘অলং এত্তাৰতা’’তি অগ্গহেসি. তেনেৰস্স চীৰরং নিট্ঠাসি. অথ দ্ৰে অগ্গসাৰকা অনুরুদ্ধত্থেরো চাতি তযো জনা চীৰরং করিংসু. সত্থা সূচিং যোজেত্ৰা অদাসি. নিট্ঠিতচীৰরস্স পিণ্ডায চরতো দেৰতা পিণ্ডপাতং সমাদপেতি. সা কালেন একিকা, কালেন অত্তদুতিযা থেরস্স সন্তিকং আগচ্ছতি. তদা পন অত্তততিযা আগন্ত্ৰা দিৰাট্ঠানে থেরং উপসঙ্কমিত্ৰা – ‘‘মযং মনাপকাযিকা নাম মনসা ইচ্ছিতিচ্ছিতরূপং মাপেমা’’তি আহ. থেরো – ‘‘এতা এৰং ৰদন্তি, ৰীমংসিস্সামি, সব্বা নীলকা হোন্তূ’’তি চিন্তেসি. তা থেরস্স মনং ঞত্ৰা সব্বাৰ নীলৰণ্ণা অহেসুং, এৰং পীতলোহিতওদাতৰণ্ণাতি. ততো চিন্তযিংসু – ‘‘থেরো অম্হাকং দস্সনং অস্সাদেতী’’তি তা সমজ্জং কাতুং আরদ্ধা, একাপি গাযি, একাপি নচ্চি, একাপি অচ্ছরং পহরি. থেরো ইন্দ্রিযানি ওক্খিপি. ততো – ‘‘ন অম্হাকং দস্সনং থেরো অস্সাদেতী’’তি ঞত্ৰা সিনেহং ৰা সন্থৰং ৰা অলভমানা নিব্বিন্দিত্ৰা গন্তুমারদ্ধা. থেরো তাসং গমনভাৰং ঞত্ৰা – ‘‘মা পুনপ্পুনং আগচ্ছিংসূ’’তি অরহত্তং ব্যাকরোন্তো ইমং গাথমাহ. তত্থ ৰিক্খীণোতি খীণো. জাতিসংসারোতি তত্থ তত্থ জাতিসঙ্খাতো সংসারো. ছট্ঠং.

৭. নাগদত্তসুত্তৰণ্ণনা

২২৭. সত্তমে অতিকালেনাতি সব্বরত্তিং নিদ্দাযিত্ৰা বলৰপচ্চূসে কোটিসম্মুঞ্জনিযা থোকং সম্মজ্জিত্ৰা মুখং ধোৰিত্ৰা যাগুভিক্খায পাতোৰ পৰিসতি. অতিদিৰাতি যাগুং আদায আসনসালং গন্ত্ৰা পিৰিত্ৰা একস্মিং ঠানে নিপন্নো নিদ্দাযিত্ৰা – ‘‘মনুস্সানং ভোজনৰেলায পণীতং ভিক্খং লভিস্সামী’’তি উপকট্ঠে মজ্ঝন্হিকে উট্ঠায ধম্মকরণেন উদকং গহেত্ৰা অক্খীনি পমজ্জিত্ৰা পিণ্ডায চরিত্ৰা যাৰদত্থং ভুঞ্জিত্ৰা মজ্ঝন্হিকে ৰীতিৰত্তে পটিক্কমতি. দিৰা চ আগন্ত্ৰাতি অতিকালে পৰিট্ঠেন নাম অঞ্ঞেহি ভিক্খূহি পঠমতরং আগন্তব্বং হোতি, ত্ৰং পন অতিৰিয দিৰা আগন্ত্ৰা গতাসীতি অত্থো. ভাযামি নাগদত্তন্তি তং নাগদত্তং অহং ভাযামি. সুপ্পগব্ভন্তি সুট্ঠু পগব্ভং. কুলেসূতি খত্তিযকুলাদিউপট্ঠাককুলেসু. সত্তমং.

৮. কুলঘরণীসুত্তৰণ্ণনা

২২৮. অট্ঠমে অজ্ঝোগাল়্হপ্পত্তোতি ওগাহপ্পত্তো. সো কির সত্থু সন্তিকে কম্মট্ঠানং গহেত্ৰা তং ৰনসণ্ডং পৰিসিত্ৰা দুতিযদিৰসে গামং পিণ্ডায পাৰিসি পাসাদিকেহি অভিক্কন্তাদীহি. অঞ্ঞতরং কুলং তস্স ইরিযাপথে পসীদিত্ৰা পঞ্চপতিট্ঠিতেন ৰন্দিত্ৰা পিণ্ডপাতং অদাসি. ভত্তানুমোদনং পুন সুত্ৰা অতিরেকতরং পসীদিত্ৰা, ‘‘ভন্তে, নিচ্চকালং ইধেৰ ভিক্খং গণ্হথা’’তি নিমন্তেসি. থেরো অধিৰাসেত্ৰা তেসং আহারং পরিভুঞ্জমানো ৰীরিযং পগ্গয্হ ঘটেন্তো অরহত্তং পত্ৰা চিন্তেসি – ‘‘বহূপকারং মে এতং কুলং, অঞ্ঞত্থ গন্ত্ৰা কিং করিস্সামী’’তি? ফলসমাপত্তিসুখং অনুভৰন্তো তত্থেৰ ৰসি. অজ্ঝভাসীতি সা কির থেরস্স খীণাসৰভাৰং অজানন্তী চিন্তেসি – ‘‘অযং থেরো নেৰ অঞ্ঞং গামং গচ্ছতি, ন অঞ্ঞং ঘরং, ন রুক্খমূলআসনসালাদীসু নিসীদতি, নিচ্চকালং ঘরং পৰিসিত্ৰাৰ নিসীদতি, উভোপেতে ওগাধপ্পত্তা পটিগাধপ্পত্তা, কদাচি এস ইমং কুলং দূসেয্য, চোদেস্সামি ন’’ন্তি. তস্মা অভাসি.

সণ্ঠানেতি নগরদ্ৰারস্স আসন্নে মনুস্সানং ভণ্ডকং ওতারেত্ৰা ৰিস্সমনট্ঠানে. সঙ্গম্মাতি সমাগন্ত্ৰা. মন্তেন্তীতি কথেন্তি. মঞ্চ তঞ্চাতি মঞ্চ কথেন্তি তঞ্চ কথেন্তি. কিমন্তরন্তি কিং কারণং? বহূ হি সদ্দা পচ্চূহাতি বহুকা এতে লোকস্মিং পটিলোমসদ্দা. ন তেনাতি তেন কারণেন, তেন ৰা তপস্সিনা ন মঙ্কু হোতব্বং. ন হি তেনাতি ন হি তেন পরেহি ৰুত্তৰচনেন সত্তো কিলিস্সতি, অত্তনা কতেন পন পাপকম্মেনেৰ কিলিস্সতীতি দস্সেতি. ৰাতমিগো যথাতি যথা ৰনে ৰাতমিগো ৰাতেরিতানং পণ্ণাদীনং সদ্দেন পরিতস্সতি, এৰং যো সদ্দপরিত্তাসী হোতীতি অত্থো. নাস্স সম্পজ্জতে ৰতন্তি তস্স লহুচিত্তস্স ৰতং ন সম্পজ্জতি. থেরো পন খীণাসৰত্তা সম্পন্নৰতোতি ৰেদিতব্বো. অট্ঠমং.

৯. ৰজ্জিপুত্তসুত্তৰণ্ণনা

২২৯. নৰমে ৰজ্জিপুত্তকোতি ৰজ্জিরট্ঠে রাজপুত্তো ছত্তং পহায পব্বজিতো. সব্বরত্তিচারোতি কত্তিকনক্খত্তং ঘোসেত্ৰা সকলনগরং ধজপটাকাদীহি পটিমণ্ডেত্ৰা পৰত্তিতো সব্বরত্তিচারো. ইদঞ্হি নক্খত্তং যাৰ চাতুমহারাজিকেহি একাবদ্ধং হোতি. তূরিযতাল়িতৰাদিতনিগ্ঘোসসদ্দন্তি ভেরিআদিতূরিযানং তাল়িতানং ৰীণাদীনঞ্চ ৰাদিতানং নিগ্ঘোসসদ্দং. অভাসীতি ৰেসালিযং কির সত্ত রাজসহস্সানি সত্তসতানি সত্ত চ রাজানো, তত্তকাৰ তেসং উপরাজসেনাপতিআদযো. তেসু অলঙ্কতপটিযত্তেসু নক্খত্তকীল়নত্থায ৰীথিং ওতিণ্ণেসু সট্ঠিহত্থে মহাচঙ্কমে চঙ্কমমানো নভস্স মজ্ঝে ঠিতং চন্দং দিস্ৰা চঙ্কমনকোটিযং ফলকং নিস্সায ঠিতো অভাসি. অপৰিদ্ধংৰ ৰনস্মিং দারুকন্তি ৰত্থৰেঠনালঙ্কাররহিতত্তা ৰনে ছড্ডিতদারুকং ৰিয জাতং. পাপিযোতি লামকতরো অম্হেহি অঞ্ঞো কোচি অত্থি. পিহযন্তীতি থেরো আরঞ্ঞিকো পংসুকূলিকো পিণ্ডপাতিকো সপদানচারিকো অপ্পিচ্ছো সন্তুট্ঠোতি বহূ তুয্হং পত্থযন্তীতি অত্থো. সগ্গগামিনন্তি সগ্গং গচ্ছন্তানং গতানম্পি. নৰমং.

১০. সজ্ঝাযসুত্তৰণ্ণনা

২৩০. দসমে যং সুদন্তি নিপাতমত্তং. সজ্ঝাযবহুলোতি নিস্সরণপরিযত্তিৰসেন সজ্ঝাযনতো বহুতরং কালং সজ্ঝাযন্তো. সো কির আচরিযস্স দিৰাট্ঠানং সম্মজ্জিত্ৰা আচরিযং উদিক্খন্তো তিট্ঠতি. অথ নং আগচ্ছন্তং দিস্ৰাৰ পচ্চুগ্গন্ত্ৰা পত্তচীৰরং পটিগ্গহেত্ৰা পঞ্ঞত্তাসনে নিসিন্নস্স তালৰণ্টৰাতং দত্ৰা পানীযং আপুচ্ছিত্ৰা পাদে ধোৰিত্ৰা তেলং মক্খেত্ৰা ৰন্দিত্ৰা ঠিতো উদ্দেসং গহেত্ৰা যাৰ সূরিযত্থঙ্গমা সজ্ঝাযং করোতি. সো ন্হানকোট্ঠকে উদকং উপট্ঠপেত্ৰা অঙ্গারকপল্লে অগ্গিং করোতি. আচরিযস্স ন্হত্ৰা আগতস্স পাদেসু উদকং পুঞ্ছিত্ৰা পিট্ঠিপরিকম্মং কত্ৰা ৰন্দিত্ৰা উদ্দেসং গহেত্ৰা পঠমযামে সজ্ঝাযং কত্ৰা মজ্ঝিমযামে সরীরং সমস্সাসেত্ৰা পচ্ছিমযামে উদ্দেসং গহেত্ৰা যাৰ অরুণুগ্গমনা সজ্ঝাযং কত্ৰা নিরুদ্ধসদ্দং খযতো সম্মসতি. ততো সেসং উপাদাযরূপং ভূতরূপং নামরূপন্তি পঞ্চসু খন্ধেসু ৰিপস্সনং ৰড্ঢেত্ৰা অরহত্তং পাপুণি. অপ্পোস্সুক্কোতি উদ্দেসগ্গহণে চ সজ্ঝাযকরণীযে চ নিরুস্সুক্কো. সঙ্কসাযতীতি যস্স দানি অত্থায অহং সজ্ঝাযং করেয্যং, সো মে অত্থো মত্থকং পত্তো. কিং মে ইদানি সজ্ঝাযেনাতি ফলসমাপত্তিসুখেন কালং অতিৰত্তেতি. অজ্ঝভাসীতি, ‘‘কিং নু খো অস্স থেরস্স অফাসুকং জাতং, উদাহুস্স আচরিযস্স? কেন নু খো কারণেন পুব্বে ৰিয মধুরস্সরেন ন সজ্ঝাযতী’’তি? আগন্ত্ৰা সন্তিকে ঠিতা অভাসি.

ধম্মপদানীতি ইধ সব্বম্পি বুদ্ধৰচনং অধিপ্পেতং. নাধীযসীতি ন সজ্ঝাযসি. নাদিযসীতি ৰা পাঠো, ন গণ্হাসীতি অত্থো. পসংসন্তি ধম্মভাণকো পসংসং লভতি, আভিধম্মিকো সুত্তন্তিকো ৰিনযধরোতিস্স পসংসিতা ভৰন্তি. ৰিরাগেনাতি অরিযমগ্গেন. অঞ্ঞাযাতি জানিত্ৰা. নিক্খেপনন্তি তস্স দিট্ঠসুতাদিনো ৰিস্সজ্জনং সন্তো ৰদন্তীতি দীপেতি, ন বুদ্ধৰচনস্স. এত্তাৰতা ‘‘থেরো বুদ্ধৰচনং ন ৰিস্সজ্জাপেতী’’তি ন নিচ্চকালং সজ্ঝাযন্তেনেৰ ভৰিতব্বং, সজ্ঝাযিত্ৰা পন – ‘‘এত্তকস্সাহং অত্থস্স ৰা ধম্মস্স ৰা আধারো ভৰিতুং সমত্থো’’তি ঞত্ৰা ৰট্টদুক্খস্স অন্তকিরিযায পটিপজ্জিতব্বং. দসমং.

১১. অকুসলৰিতক্কসুত্তৰণ্ণনা

২৩১. একাদসমে অকুসলে ৰিতক্কেতি কামৰিতক্কাদযো তযো মহাৰিতক্কে. অযোনিসো মনসিকারাতি অনুপাযমনসিকারেন. সোতি সো ত্ৰং. অযোনিসো পটিনিস্সজ্জাতি এতং অনুপাযমনসিকারং ৰজ্জেহি. সত্থারন্তি ইমায গাথায পাসাদিককম্মট্ঠানং কথেতি. পীতিসুখমসংসযন্তি একংসেনেৰ বলৰপীতিঞ্চ সুখঞ্চ অধিগমিস্সসি. একাদসমং.

১২. মজ্ঝন্হিকসুত্তৰণ্ণনা

২৩২. দ্ৰাদসমে যং ৰত্তব্বং, তং দেৰতাসংযুত্তে নন্দনৰগ্গে ৰুত্তমেৰ. দ্ৰাদসমং.

১৩. পাকতিন্দ্রিযসুত্তৰণ্ণনা

২৩৩. তেরসমং দেৰপুত্তসংযুত্তে জন্তুদেৰপুত্তসুত্তে ৰিত্থারিতমেৰ. তেরসমং.

১৪. গন্ধত্থেনসুত্তৰণ্ণনা

২৩৪. চুদ্দসমে অজ্ঝভাসীতি তং ভিক্খুং নাল়ে গহেত্ৰা পদুমং সিঙ্ঘমানং দিস্ৰাৰ – ‘‘অযং ভিক্খু সত্থু সন্তিকে কম্মট্ঠানং গহেত্ৰা সমণধম্মং কাতুং অরঞ্ঞং পৰিট্ঠো গন্ধারম্মণং উপনিজ্ঝাযতি, স্ৰাযং অজ্জ উপসিঙ্ঘং স্ৰেপি পুনদিৰসেপি উপসিঙ্ঘিস্সতি, এৰমস্স সা গন্ধতণ্হা ৰড্ঢিত্ৰা দিট্ঠধম্মিকসম্পরাযিকং অত্থং নাসেস্সতি, মা মযি পস্সন্তিযা নস্সতু, চোদেস্সামি ন’’ন্তি উপসঙ্কমিত্ৰা অভাসি.

একঙ্গমেতং থেয্যানন্তি থেনিতব্বানং রূপারম্মণাদীনং পঞ্চকোট্ঠাসানং ইদং একঙ্গং, এককোট্ঠাসোতি অত্থো. ন হরামীতি ন গহেত্ৰা গচ্ছামি. আরাতি দূরে নাল়ে গহেত্ৰা নামেত্ৰা দূরে ঠিতো উপসিঙ্ঘামীতি ৰদতি. ৰণ্ণেনাতি কারণেন.

য্ৰাযন্তি যো অযং. তস্মিং কির দেৰতায সদ্ধিং কথেন্তেযেৰ একো তাপসো ওতরিত্ৰা ভিসখননাদীনি কাতুং আরদ্ধো, তং সন্ধাযেৰমাহ. আকিণ্ণকম্মন্তোতি এৰং অপরিসুদ্ধকম্মন্তো. অখীণকম্মন্তোতিপি পাঠো, কক্খল়কম্মন্তোতি অত্থো. ন ৰুচ্চতীতি গন্ধচোরোতি ৰা পুপ্ফচোরোতি ৰা কস্মা ন ৰুচ্চতি.

আকিণ্ণলুদ্দোতি বহুপাপো গাল়্হপাপো ৰা, তস্মা ন ৰুচ্চতি. ধাতিচেলংৰ মক্খিতোতি যথা ধাতিযা নিৰত্থকিলিট্ঠৰত্থং উচ্চারপস্সাৰপংসুমসিকদ্দমাদীহি মক্খিতং, এৰমেৰং রাগদোসাদীহি মক্খিতো. অরহামি ৰত্তৰেতি অরহামি ৰত্তুং. দেৰতায চোদনা কির সুগতানুসিট্ঠিসদিসা, ন তং লামকা হীনাধিমুত্তিকা মিচ্ছাপটিপন্নকপুগ্গলা লভন্তি. তস্মিং পন অত্তভাৰে মগ্গফলানং ভব্বরূপা পুগ্গলা তং লভন্তি, তস্মা এৰমাহ.

সুচিগৰেসিনোতি সুচীনি সীলসমাধিঞাণানি গৰেসন্তস্স. অব্ভামত্তং ৰাতি ৰলাহককূটমত্তং ৰিয. জানাসীতি সুদ্ধো অযন্তি জানাসি. ৰজ্জাসীতি ৰদেয্যাসি. নেৰ তং উপজীৰামাতি দেৰতা কির চিন্তেসি – ‘‘অযং ভিক্খু অত্থি মে হিতকামা দেৰতা, সা মং চোদেস্সতি সারেস্সতীতি পমাদম্পি অনুযুঞ্জেয্য, নাস্স ৰচনং সম্পটিচ্ছিস্সামী’’তি. তস্মা এৰমাহ. ত্ৰমেৰাতি ত্ৰংযেৰ. জানেয্যাতি জানেয্যাসি. যেনাতি যেন কম্মেন সুগতিং গচ্ছেয্যাসি, তং কম্মং ত্ৰংযেৰ জানেয্যাসীতি. চুদ্দসমং.

ইতি সারত্থপ্পকাসিনিযা

সংযুত্তনিকায-অট্ঠকথায

ৰনসংযুত্তৰণ্ণনা নিট্ঠিতা.