১. জরাসুত্তৰণ্ণনা

৫১. জরাৰগ্গস্স পঠমে সাধূতি লদ্ধকং ভদ্দকং. সীলং যাৰ জরাতি ইমিনা ইদং দস্সেতি – যথা মুত্তামণিরত্তৰত্থাদীনি আভরণানি তরুণকালেযেৰ সোভন্তি, জরাজিণ্ণকালে তানি ধারেন্তো ‘‘অযং অজ্জাপি বালভাৰং পত্থেতি, উম্মত্তকো মঞ্ঞে’’তি ৰত্তব্বতং আপজ্জতি, ন এৰং সীলং. সীলঞ্হি নিচ্চকালং সোভতি. বালকালেপি হি সীলং রক্খন্তং ‘‘কিং ইমস্স সীলেনা’’তি? ৰত্তারো নত্থি. মজ্ঝিমকালেপি মহল্লককালেপীতি.

সদ্ধা সাধু পতিট্ঠিতাতি হত্থাল়ৰকচিত্তগহপতিআদীনং ৰিয মগ্গেন আগতা পতিট্ঠিতসদ্ধা নাম সাধু. পঞ্ঞা নরানং রতনন্তি এত্থ চিত্তীকতট্ঠাদীহি রতনং ৰেদিতব্বং. ৰুত্তঞ্হেতং –

‘‘যদি চিত্তীকতন্তি রতনং, ননু ভগৰা চিত্তীকতো পুরিসসীহো, যে চ লোকে চিত্তীকতা, তেসং চিত্তীকতো ভগৰা. যদি রতিকরন্তি রতনং, ননু ভগৰা রতিকরো পুরিসসীহো, তস্স ৰচনেন চরন্তা ঝানরতিসুখেন অভিরমন্তি. যদি অতুল্যন্তি রতনং, ননু ভগৰা অতুলো পুরিসসীহো. ন হি সক্কা তুলেতুং গুণেহি গুণপারমিং গতো. যদি দুল্লভন্তি রতনং, ননু ভগৰা দুল্লভো পুরিসসীহো. যদি অনোমসত্তপরিভোগন্তি রতনং, ননু ভগৰা অনোমো সীলেন সমাধিনা পঞ্ঞায ৰিমুত্তিযা ৰিমুত্তিঞাণদস্সনেনা’’তি.

ইধ পন দুল্লভপাতুভাৰট্ঠেন পঞ্ঞা ‘‘রতন’’ন্তি ৰুত্তং. পুঞ্ঞন্তি পুঞ্ঞচেতনা, সা হি অরূপত্তা পরিহরিতুং ন সক্কাতি. পঠমং.