৯. মানকামসুত্তৰণ্ণনা

৯. নৰমে মানকামস্সাতি মানং কামেন্তস্স ইচ্ছন্তস্স. দমোতি এৰরূপস্স পুগ্গলস্স সমাধিপক্খিকো দমো নত্থীতি ৰদতি. ‘‘সচ্চেন দন্তো দমসা উপেতো, ৰেদন্তগূ ৰুসিতব্রহ্মচরিযো’’তি (সং. নি. ১.১৯৫) এত্থ হি ইন্দ্রিযসংৰরো দমোতি ৰুত্তো. ‘‘যদি সচ্চা দমা চাগা, খন্ত্যা ভিয্যোধ ৰিজ্জতী’’তি (সং. নি. ১.২৪৬; সু. নি. ১৯১) এত্থ পঞ্ঞা. ‘‘দানেন দমেন সংযমেন সচ্চৰজ্জেন অত্থি পুঞ্ঞং, অত্থি পুঞ্ঞস্স আগমো’’তি (সং. নি. ৪.৩৬৫) এত্থ উপোসথকম্মং. ‘‘সক্খিস্সসি খো ত্ৰং, পুণ্ণ, ইমিনা দমূপসমেন সমন্নাগতো সুনাপরন্তস্মিং জনপদে ৰিহরিতু’’ন্তি (সং. নি. ৪.৮৮; ম. নি. ৩.৩৯৬) এত্থ অধিৰাসনখন্তি. ইমস্মিং পন সুত্তে দমোতি সমাধিপক্খিকধম্মানং এতং নামং. তেনেৰাহ – ‘‘ন মোনমত্থি অসমাহিতস্সা’’তি. তত্থ মোনন্তি চতুমগ্গঞাণং, তঞ্হি মুনাতীতি মোনং, চতুসচ্চধম্মে জানাতীতি অত্থো. মচ্চুধেয্যস্সাতি তেভূমকৰট্টস্স. তঞ্হি মচ্চুনো পতিট্ঠানট্ঠেন মচ্চুধেয্যন্তি ৰুচ্চতি. পারন্তি তস্সেৰ পারং নিব্বানং. তরেয্যাতি পটিৰিজ্ঝেয্য পাপুণেয্য ৰা. ইদং ৰুত্তং হোতি – একো অরঞ্ঞে ৰিহরন্তো পমত্তো পুগ্গলো মচ্চুধেয্যস্স পারং ন তরেয্য ন পটিৰিজ্ঝেয্য ন পাপুণেয্যাতি.

মানং পহাযাতি অরহত্তমগ্গেন নৰৰিধমানং পজহিত্ৰা. সুসমাহিতত্তোতি উপচারপ্পনাসমাধীহি সুট্ঠু সমাহিতত্তো. সুচেতসোতি ঞাণসম্পযুত্ততায সুন্দরচিত্তো. ঞাণৰিপ্পযুত্তচিত্তেন হি সুচেতসোতি ন ৰুচ্চতি, তস্মা ঞাণসম্পযুত্তেন সুচেতসো হুত্ৰাতি অত্থো. সব্বধি ৰিপ্পমুত্তোতি সব্বেসু খন্ধাযতনাদীসু ৰিপ্পমুত্তো হুত্ৰা. তরেয্যাতি এত্থ তেভূমকৰট্টং সমতিক্কমন্তো নিব্বানং পটিৰিজ্ঝন্তো তরতীতি পটিৰেধতরণং নাম ৰুত্তং. ইতি ইমায গাথায তিস্সো সিক্খা কথিতা হোন্তি. কথং – মানো নামাযং সীলভেদনো, তস্মা ‘‘মানং পহাযা’’তি ইমিনা অধিসীলসিক্খা কথিতা হোতি. ‘‘সুসমাহিতত্তো’’তি ইমিনা অধিচিত্তসিক্খা. ‘‘সুচেতসো’’তি এত্থ চিত্তেন পঞ্ঞা দস্সিতা, তস্মা ইমিনা অধিপঞ্ঞাসিক্খা কথিতা. অধিসীলঞ্চ নাম সীলে সতি হোতি, অধিচিত্তং চিত্তে সতি, অধিপঞ্ঞা পঞ্ঞায সতি. তস্মা সীলং নাম পঞ্চপি দসপি সীলানি, পাতিমোক্খসংৰরো অধিসীলং নামাতি ৰেদিতব্বং. অট্ঠ সমাপত্তিযো চিত্তং, ৰিপস্সনাপাদকজ্ঝানং অধিচিত্তং. কম্মস্সকতঞাণং পঞ্ঞা, ৰিপস্সনা অধিপঞ্ঞা. অনুপ্পন্নেপি হি বুদ্ধুপ্পাদে পৰত্ততীতি পঞ্চসীলং দসসীলং সীলমেৰ, পাতিমোক্খসংৰরসীলং বুদ্ধুপ্পাদেযেৰ পৰত্ততীতি অধিসীলং. চিত্তপঞ্ঞাসুপি এসেৰ নযো. অপিচ নিব্বানং পত্থযন্তেন সমাদিন্নং পঞ্চসীলম্পি দসসীলম্পি অধিসীলমেৰ. সমাপন্না অট্ঠ সমাপত্তিযোপি অধিচিত্তমেৰ. সব্বম্পি ৰা লোকিযসীলং সীলমেৰ, লোকুত্তরং অধিসীলং. চিত্তপঞ্ঞাসুপি এসেৰ নযোতি. ইতি ইমায গাথায সমোধানেত্ৰা তিস্সো সিক্খা সকলসাসনং কথিতং হোতীতি.

মানকামসুত্তৰণ্ণনা নিট্ঠিতা.