গন্থারম্ভকথা

করুণাসীতলহদযং, পঞ্ঞাপজ্জোতৰিহতমোহতমং;

সনরামরলোকগরুং, ৰন্দে সুগতং গতিৰিমুত্তং.

বুদ্ধোপি বুদ্ধভাৰং, ভাৰেত্ৰা চেৰ সচ্ছিকত্ৰা চ;

যং উপগতো গতমলং, ৰন্দে তমনুত্তরং ধম্মং.

সুগতস্স ওরসানং, পুত্তানং মারসেনমথনানং;

অট্ঠন্নম্পি সমূহং, সিরসা ৰন্দে অরিযসঙ্ঘং.

ইতি মে পসন্নমতিনো, রতনত্তযৰন্দনামযং পুঞ্ঞং;

যং সুৰিহতন্তরাযো, হুত্ৰা তস্সানুভাৰেন.

সংযুত্তৰগ্গপটিমণ্ডিতস্স, সংযুত্তআগমৰরস্স;

বুদ্ধানুবুদ্ধসংৰণ্ণিতস্স, ঞাণপ্পভেদজননস্স.

অত্থপ্পকাসনত্থং, অট্ঠকথা আদিতো ৰসিসতেহি;

পঞ্চহি যা সঙ্গীতা, অনুসঙ্গীতা চ পচ্ছাপি.

সীহল়দীপং পন আভতাথ, ৰসিনা মহামহিন্দেন;

ঠপিতা সীহল়ভাসায, দীপৰাসীনমত্থায.

অপনেত্ৰান ততোহং, সীহল়ভাসং মনোরমং ভাসং;

তন্তিনযানুচ্ছৰিকং, আরোপেন্তো ৰিগতদোসং.

সমযং অৰিলোমেন্তো, থেরানং থেরৰংসদীপানং;

সুনিপুণৰিনিচ্ছযানং, মহাৰিহারে নিৰাসীনং.

হিত্ৰা পুনপ্পুনাগত-মত্থং, অত্থং পকাসযিস্সামি;

সুজনস্স চ তুট্ঠত্থং, চিরট্ঠিতত্থঞ্চ ধম্মস্স.

সাৰত্থিপভূতীনং, নগরানং ৰণ্ণনা কতা হেট্ঠা;

সঙ্গীতীনং দ্ৰিন্নং, যা মে অত্থং ৰদন্তেন.

ৰিত্থারৰসেন সুদং, ৰত্থূনি চ যানি তত্থ ৰুত্তানি;

তেসম্পি ন ইধ ভিয্যো, ৰিত্থারকথং করিস্সামি.

সুত্তানং পন অত্থা, ন ৰিনা ৰত্থূহি যে পকাসন্তি;

তেসং পকাসনত্থং, ৰত্থূনিপি দস্সযিস্সামি.

সীলকথা ধুতধম্মা, কম্মট্ঠানানি চেৰ সব্বানি;

চরিযাৰিধানসহিতো, ঝানসমাপত্তিৰিত্থারো.

সব্বা চ অভিঞ্ঞাযো, পঞ্ঞাসঙ্কলননিচ্ছযো চেৰ;

খন্ধাধাতাযতনিন্দ্রিযানি, অরিযানি চেৰ চত্তারি.

সচ্চানি পচ্চযাকারদেসনা, সুপরিসুদ্ধনিপুণনযা;

অৰিমুত্ততন্তিমগ্গা, ৰিপস্সনাভাৰনা চেৰ.

ইতি পন সব্বং যস্মা, ৰিসুদ্ধিমগ্গে মযা সুপরিসুদ্ধং;

ৰুত্তং তস্মা ভিয্যো, ন তং ইধ ৰিচারযিস্সামি.

‘‘মজ্ঝে ৰিসুদ্ধিমগ্গো, এস চতুন্নম্পি আগমানঞ্হি;

ঠত্ৰা পকাসযিস্সতি, তত্থ যথাভাসিতমত্থং’’.

ইচ্চেৰ কতো তস্মা, তম্পি গহেত্ৰান সদ্ধিমেতায;

অট্ঠকথায ৰিজানথ, সংযুত্তৰিনিস্সিতং অত্থন্তি.