৭. সত্তকনিদ্দেসৰণ্ণনা

২০৩. সত্তকে – সকিং নিমুগ্গোতি একৰারং নিমুগ্গো. একন্তকাল়কেহীতি একন্তেনেৰ কাল়কেহি নত্থিকৰাদঅহেতুকৰাদঅকিরিযৰাদসঙ্খাতেহি নিযতমিচ্ছাদিট্ঠিধম্মেহি. এৰং পুগ্গলোতি ইমিনা কারণেন পুগ্গলো একৰারং নিমুগ্গো তথা নিমুগ্গোৰ হোতি. এতস্স হি পুন ভৰতো ৰুট্ঠানং নাম নত্থীতি ৰদন্তি. মক্খলিগোসালাদযো ৰিয হেট্ঠা নরকগ্গীনংযেৰ আহারো হোতি.

সাহু সদ্ধা কুসলেসু ধম্মেসূতি কুসলধম্মেসু সদ্ধা নাম সাধুলদ্ধিকাতি উম্মুজ্জতি. সো তাৰতকেনেৰ কুসলেন উম্মুজ্জতি নাম. সাধু হিরীতিআদীসুপি এসেৰ নযো. হাযতিযেৰাতি চঙ্কৰারে আসিত্তউদকং ৰিয একন্তেন পরিহাযতেৰ. এৰং পুগ্গলোতি এৰং সাহু সদ্ধাতি. ইমেসং সদ্ধাদীনং ৰসেন একৰারং উম্মুজ্জিত্ৰা তেসং পরিহানিযা পুন নিমুজ্জতিযেৰ, দেৰদত্তাদযো ৰিয. দেৰদত্তো হি অট্ঠ সমাপত্তিযো, পঞ্চ চ অভিঞ্ঞাযো নিব্বত্তেত্ৰাপি পুন বুদ্ধানং পটিকণ্টকতায তেহি গুণেহি পরিহীনো রুহিরুপ্পাদকম্মং সঙ্ঘভেদকম্মঞ্চ কত্ৰা কাযস্স ভেদা দুতিযচিত্তৰারেন নিরযে নিব্বত্তি. কোকালিকো দ্ৰে অগ্গসাৰকে উপৰদিত্ৰা পদুমনিরযে নিব্বত্তো.

নেৰ হাযতি নো ৰড্ঢতীতি অপ্পহোনককালেপি ন হাযতি, পহোনককালেপি ন ৰড্ঢতি. উভযম্পি পনেতং অগারিকেনপি অনগারিকেনপি দীপেতব্বং. একচ্চো হি অগারিকো অপ্পহোনককালে পক্খিকভত্তং ৰা সলাকভত্তং ৰা ৰস্সাৰাসিকং ৰা উপনিবন্ধাপেতি. সো পচ্ছা পহোনককালেপি পক্খিকভত্তাদিমত্তমেৰ পৰত্তেতি. অনগারিকোপি আদিম্হি অপ্পহোনককালে উদ্দেসং ৰা ধুতঙ্গং ৰা গণ্হাতি, মেধাবলৰীরিযসম্পত্তিযা পহোনককালেপি ততো উত্তরিং ন করোতি. এৰং পুগ্গলোতি এৰং ইমায সদ্ধাদীনং ঠিতিযা পুগ্গলো উম্মুজ্জিত্ৰা ঠিতো নাম হোতি.

উম্মুজ্জিত্ৰা ৰিপস্সতি ৰিলোকেতীতি সোতাপন্নো পুগ্গলো উট্ঠহিত্ৰা গমনমগ্গং গন্তব্বং দিসং ৰা আলোকেতি নাম.

উম্মুজ্জিত্ৰা পতরতীতি সকদাগামিপুগ্গলো কিলেসতনুতায উট্ঠহিত্ৰা গন্তব্বদিসাভিমুখো পতরতি নাম.

পতিগাধপ্পত্তো হোতীতি অনাগামিপুগ্গলো উট্ঠায ৰিলোকেত্ৰা পতরিত্ৰা গন্ত্ৰা একস্মিং ঠানে পতিট্ঠাপত্তো নাম হোতি, তিট্ঠতি, ন পুনাগচ্ছতি.

তিণ্ণো পারঙ্গতো থলে তিট্ঠতীতি সব্বকিলেসোঘং তরিত্ৰা পরতীরং গন্ত্ৰা নিব্বানথলে ঠিতো নাম হোতি. ইমে পন সত্ত পুগ্গলা উদকোপমেন দীপিতা.

সত্ত কির জঙ্ঘৰাণিজা অদ্ধানমগ্গপটিপন্না অন্তরামগ্গে একং পুণ্ণনদিং পাপুণিংসু. তেসু পঠমং ওতিণ্ণো উদকভীরুকো পুরিসো ওতিণ্ণট্ঠানেযেৰ নিমুজ্জিত্ৰা পুন উট্ঠাতুং নাসক্খি, অন্তোযেৰ মচ্ছকচ্ছপভক্খো জাতো. দুতিযো ওতিণ্ণট্ঠানে নিমুজ্জিত্ৰা সকিং উট্ঠহিত্ৰা পুন নিমুগ্গো উট্ঠাতুং নাসক্খি, অন্তোযেৰ মচ্ছকচ্ছপভক্খো জাতো. ততিযো নিমুজ্জিত্ৰা উট্ঠহি. সো মজ্ঝে নদিযা ঠত্ৰা নেৰ ওরতো আগন্তুং, ন পরতো গন্তুং অসক্খি. চতুত্থো উট্ঠায ঠিতো উত্তরণতিত্থং ওলোকেসি. পঞ্চমো ওতরণতিত্থং ওলোকেত্ৰা পতরি. ছট্ঠো তরিত্ৰা পারিমতীরং গন্ত্ৰা কটিপ্পমাণে উদকে ঠিতো. সত্তমো পারিমতীরং গন্ত্ৰা গন্ধচুণ্ণাদীহি ন্হাত্ৰা ৰরৰত্থানি নিৰাসেত্ৰা সুরভিৰিলেপনং ৰিলিম্পিত্ৰা নীলুপ্পলাদীনি পিল়ন্ধিত্ৰা নানালঙ্কারপটিমণ্ডিতো মহানগরং পৰিসিত্ৰা পাসাদৰরমারুয্হ উত্তমভোজনং ভুঞ্জি.

তত্থ সত্ত জঙ্ঘৰাণিজা ৰিয ইমে সত্ত পুগ্গলা. নদী ৰিয ৰট্টং. পঠমস্স উদকভীরুকস্স পুরিসস্স ওতিণ্ণট্ঠানেযেৰ নিমুজ্জনং ৰিয মিচ্ছাদিট্ঠিকস্স ৰট্টে নিমুজ্জনং. উম্মুজ্জিত্ৰা নিমুগ্গপুরিসো ৰিয সদ্ধাদীনং উপ্পত্তিমত্তকেন উম্মুজ্জিত্ৰা তেসং পরিহানিযা নিমুগ্গপুগ্গলো. মজ্ঝে নদিযা ঠিতো ৰিয সদ্ধাদীনং ঠিতিযা ঠিতপুগ্গলো. উত্তরণতিত্থং ওলোকেন্তো ৰিয গন্তব্বমগ্গং গন্তব্বদিসং ৰা ওলোকেন্তো সোতাপন্নো. পতরিতপুরিসো ৰিয কিলেসতনুতায পতরন্তো সকদাগামী. তরিত্ৰা কটিমত্তে উদকে ঠিতপুরিসো ৰিয অনাৰত্তিতধম্মতায ঠিতো অনাগামী. ন্হত্ৰা পারিমতীরং উত্তরিত্ৰা থলে ঠিতপুরিসো ৰিয চত্তারো ওঘে অতিক্কমিত্ৰা নিব্বানথলে ঠিতো খীণাসৰব্রাহ্মণো. থলে ঠিতপুরিসস্স নগরং পৰিসিত্ৰা পাসাদৰরং আরুয্হ উত্তমভোজনভুঞ্জনং ৰিয খীণাসৰস্স নিব্বানারম্মণং ফলসমাপত্তিং অপ্পেত্ৰা ৰীতিনামনং ৰেদিতব্বং. উভতোভাগৰিমুত্তাদযো হেট্ঠা পকাসিতাযেৰাতি.

সত্তকনিদ্দেসৰণ্ণনা.

২০৭. অট্ঠকনৰকনিদ্দেসাপি হেট্ঠা ৰুত্তনযেনেৰ ৰেদিতব্বা.