৩. অকম্মনিযৰগ্গৰণ্ণনা

২১-২২. ততিযস্স পঠমে অভাৰিতন্তি অৰড্ঢিতং ভাৰনাৰসেন অপ্পৰত্তিতং. অকম্মনিযং হোতীতি কম্মক্খমং কম্মযোগ্গং ন হোতি. দুতিযে ৰুত্তৰিপরিযাযেন অত্থো ৰেদিতব্বো. এত্থ চ পঠমে চিত্তন্তি ৰট্টৰসেন উপ্পন্নচিত্তং, দুতিযে ৰিৰট্টৰসেন উপ্পন্নচিত্তং. তত্থ চ ৰট্টং ৰট্টপাদং, ৰিৰট্টং ৰিৰট্টপাদন্তি অযং পভেদো ৰেদিতব্বো. ৰট্টং নাম তেভূমকৰট্টং, ৰট্টপাদং নাম ৰট্টপটিলাভায কম্মং, ৰিৰট্টং নাম নৰ লোকুত্তরধম্মা, ৰিৰট্টপাদং নাম ৰিৰট্টপটিলাভায কম্মং. ইতি ইমেসু সুত্তেসু ৰট্টৰিৰট্টমেৰ কথিতন্তি.

২৩-২৪. ততিযে ৰট্টৰসেনেৰ উপ্পন্নচিত্তং ৰেদিতব্বং. মহতো অনত্থায সংৰত্ততীতি দেৰমনুস্সসম্পত্তিযো মারব্রহ্মইস্সরিযানি চ দদমানম্পি পুনপ্পুনং জাতিজরাব্যাধিমরণসোকপরিদেৰদুক্খদোমনস্সুপাযাসে খন্ধধাতুআযতনপটিচ্চসমুপ্পাদৰট্টানি চ দদমানং কেৰলং দুক্খক্খন্ধমেৰ দেতীতি মহতো অনত্থায সংৰত্ততি নামাতি. চতুত্থে চিত্তন্তি ৰিৰট্টৰসেনেৰ উপ্পন্নচিত্তং.

২৫-২৬. পঞ্চমছট্ঠেসু অভাৰিতং অপাতুভূতন্তি অযং ৰিসেসো. তত্রামযধিপ্পাযো – ৰট্টৰসেন উপ্পন্নচিত্তং নাম উপ্পন্নম্পি অভাৰিতং অপাতুভূতমেৰ হোতি. কস্মা? লোকুত্তরপাদকজ্ঝানৰিপস্সনামগ্গফলনিব্বানেসু পক্খন্দিতুং অসমত্থত্তা. ৰিৰট্টৰসেন উপ্পন্নং পন ভাৰিতং পাতুভূতং নাম হোতি. কস্মা? তেসু ধম্মেসু পক্খন্দিতুং সমত্থত্তা. কুরুন্দকৰাসী ফুস্সমিত্তত্থেরো পনাহ – ‘‘মগ্গচিত্তমেৰ, আৰুসো, ভাৰিতং পাতুভূতং নাম হোতী’’তি.

২৭-২৮. সত্তমট্ঠমেসু অবহুলীকতন্তি পুনপ্পুনং অকতং. ইমানিপি দ্ৰে ৰট্টৰিৰট্টৰসেন উপ্পন্নচিত্তানেৰ ৰেদিতব্বানীতি.

২৯. নৰমে ‘‘জাতিপি দুক্খা’’তিআদিনা নযেন ৰুত্তং দুক্খং অধিৰহতি আহরতীতি দুক্খাধিৰহং. দুক্খাধিৰাহন্তিপি পাঠো. তস্সত্থো – লোকুত্তরপাদকজ্ঝানাদি অরিযধম্মাভিমুখং দুক্খেন অধিৰাহীযতি পেসীযতীতি দুক্খাধিৰাহং. ইদম্পি ৰট্টৰসেন উপ্পন্নচিত্তমেৰ. তঞ্হি ৰুত্তপ্পকারা দেৰমনুস্সাদিসম্পত্তিযো দদমানম্পি জাতিআদীনং অধিৰহনতো দুক্খাধিৰহং, অরিযধম্মাধিগমায দুপ্পেসনতো দুক্খাধিৰাহঞ্চ নাম হোতীতি.

৩০. দসমে ৰিৰট্টৰসেন উপ্পন্নচিত্তমেৰ চিত্তং. তঞ্হি মানুসকসুখতো দিব্বসুখং, দিব্বসুখতো ঝানসুখং, ঝানসুখতো ৰিপস্সনাসুখং, ৰিপস্সনাসুখতো মগ্গসুখং, মগ্গসুখতো ফলসুখং, ফলসুখতো নিব্বানসুখং অধিৰহতি আহরতীতি সুখাধিৰহং নাম হোতি, সুখাধিৰাহং ৰা. তঞ্হি লোকুত্তরপাদকজ্ঝানাদিঅরিযধম্মাভিমুখং সুপেসযং ৰিস্সট্ঠইন্দৰজিরসদিসং হোতীতি সুখাধিৰাহন্তিপি ৰুচ্চতি. ইমস্মিম্পি ৰগ্গে ৰট্টৰিৰট্টমেৰ কথিতন্তি.

অকম্মনিযৰগ্গৰণ্ণনা.