১৯. কাযগতাসতিৰগ্গৰণ্ণনা

৫৬৩. চেতসা ফুটোতি এত্থ দুৰিধং ফরণং আপোফরণঞ্চ দিব্বচক্খুফরণঞ্চ. তত্থ আপোকসিণং সমাপজ্জিত্ৰা আপেন ফরণং আপোফরণং নাম. এৰং ফুটেপি মহাসমুদ্দে সব্বা সমুদ্দঙ্গমা কুন্নদিযো অন্তোগধাৰ হোন্তি. আলোকং পন ৰড্ঢেত্ৰা দিব্বচক্খুনা সকলসমুদ্দদস্সনং দিব্বচক্খুফরণং নাম. এৰং ফুটেপি মহাসমুদ্দে সব্বা মহাসমুদ্দঙ্গমা কুন্নদিযো অন্তোগধাৰ হোন্তি. অন্তোগধা তস্সাতি তস্স ভিক্খুনো ভাৰনায অব্ভন্তরগতাৰ হোন্তি. ৰিজ্জাভাগিযাতি এত্থ সম্পযোগৰসেন ৰিজ্জং ভজন্তীতি ৰিজ্জাভাগিযা, ৰিজ্জাভাগে ৰিজ্জাকোট্ঠাসে ৰত্তন্তীতিপি ৰিজ্জাভাগিযা. তত্থ ৰিপস্সনাঞাণং মনোমযিদ্ধি ছ অভিঞ্ঞাতি অট্ঠ ৰিজ্জা, পুরিমেন অত্থেন তাহি সম্পযুত্তধম্মাপি ৰিজ্জাভাগিযা. পচ্ছিমেন অত্থেন তাসু যা কাচি একা ৰিজ্জা ৰিজ্জা, সেসা ৰিজ্জাভাগিযাতি এৰং ৰিজ্জাপি ৰিজ্জাসম্পযুত্তধম্মাপি ৰিজ্জাভাগিযাতেৰ ৰেদিতব্বা.

৫৬৪. মহতো সংৰেগাযাতি মহন্তস্স সংৰেগস্স অত্থায. উপরিপদদ্ৰযেপি এসেৰ নযো. এত্থ চ মহাসংৰেগো নাম ৰিপস্সনা, মহাঅত্থো নাম চত্তারো মগ্গা, মহাযোগক্খেমো নাম চত্তারি সামঞ্ঞফলানি. অথ ৰা মহাসংৰেগো নাম সহ ৰিপস্সনায মগ্গো, মহাঅত্থো নাম চত্তারি সামঞ্ঞফলানি, মহাযোগক্খেমো নাম নিব্বানং. সতিসম্পজঞ্ঞাযাতি সতিযা চ ঞাণস্স চ অত্থায. ঞাণদস্সনপটিলাভাযাতি দিব্বচক্খুঞাণায. দিট্ঠধম্মসুখৰিহারাযাতি ইমস্মিংযেৰ পচ্চক্খে অত্তভাৰে সুখৰিহারত্থায. ৰিজ্জাৰিমুত্তিফলসচ্ছিকিরিযাযাতি ৰিজ্জাৰিমুত্তীনং ফলস্স পচ্চৰেক্খকরণত্থায. এত্থ চ ৰিজ্জাতি মগ্গপঞ্ঞা, ৰিমুত্তীতি তংসম্পযুত্তা সেসধম্মা. তেসং ফলং নাম অরহত্তফলং, তস্স সচ্ছিকিরিযাযাতি অত্থো.

৫৭১. কাযোপি পস্সম্ভতীতি নামকাযোপি করজকাযোপি পস্সম্ভতি, ৰূপসন্তদরথো হোতি. ৰিতক্কৰিচারাপীতি এতে ধম্মা দুতিযজ্ঝানেন ৰূপসম্মন্তি নাম, ইধ পন ওল়ারিকৰূপসমং সন্ধায ৰুত্তং. কেৰলাতি সকলা, সব্বে নিরৰসেসাতি অত্থো. ৰিজ্জাভাগিযাতি ৰিজ্জাকোট্ঠাসিযা, তে হেট্ঠা ৰিভজিত্ৰা দস্সিতাৰ.

৫৭৪. অৰিজ্জা পহীযতীতি অট্ঠসু ঠানেসু ৰট্টমূলকং বহলন্ধকারং মহাতমং অঞ্ঞাণং পহীযতি. ৰিজ্জা উপ্পজ্জতীতি অরহত্তমগ্গৰিজ্জা উপ্পজ্জতি. অস্মিমানো পহীযতীতি অস্মীতি নৰৰিধো মানো পহীযতি. অনুসযাতি সত্ত অনুসযা. সংযোজনানীতি দস সংযোজনানি.

৫৭৫. পঞ্ঞাপভেদাযাতি পঞ্ঞায পভেদগমনত্থং. অনুপাদাপরিনিব্বানাযাতি অপচ্চযপরিনিব্বানস্স সচ্ছিকিরিযত্থায.

৫৭৬. অনেকধাতুপটিৰেধো হোতীতি অট্ঠারসন্নং ধাতূনং লক্খণপটিৰেধো হোতি. নানাধাতুপটিৰেধো হোতীতি তাসংযেৰ অট্ঠারসন্নং ধাতূনং নানাভাৰেন লক্খণপটিৰেধো হোতি. অনেকধাতুপটিসম্ভিদা হোতীতি ইমিনা ধাতুভেদঞাণং কথিতং. ধাতুপভেদঞাণং নাম ‘‘ইমায ধাতুযা উস্সন্নায ইদং নাম হোতী’’তি জাননপঞ্ঞা. তং পনেতং ধাতুভেদঞাণং ন সব্বেসং হোতি, বুদ্ধানমেৰ নিপ্পদেসং হোতি. তং সম্মাসম্বুদ্ধেন সব্বসো ন কথিতং. কস্মা? তস্মিং কথিতে অত্থো নত্থীতি.

৫৮৪. পঞ্ঞাপটিলাভাযাতিআদীনি সোল়স পদানি পটিসম্ভিদামগ্গে ‘‘সপ্পুরিসসংসেৰো, সদ্ধম্মসৰনং, যোনিসোমনসিকারো, ধম্মানুধম্মপটিপত্তি. ইমে খো, ভিক্খৰে, চত্তারো ধম্মা ভাৰিতা বহুলীকতা পঞ্ঞাপটিলাভায সংৰত্তন্তি …পে… নিব্বেধিকপঞ্ঞতায সংৰত্তন্তী’’তি এৰং মাতিকং ঠপেত্ৰা ৰিত্থারিতানেৰ. ৰুত্তঞ্হেতং (পটি. ম. ৩.৪) –

পঞ্ঞাপটিলাভায সংৰত্তন্তীতি. ‘‘কতমো পঞ্ঞাপটিলাভো? চতুন্নং মগ্গঞাণানং, চতুন্নং ফলঞাণানং, চতুন্নং পটিসম্ভিদাঞাণানং, ছন্নং অভিঞ্ঞাঞাণানং, তেসত্ততীনং ঞাণানং, সত্তসত্ততীনং ঞাণানং লাভো পটিলাভো পত্তিসম্পত্তি ফস্সনা সচ্ছিকিরিযা উপসম্পদা, পঞ্ঞাপটিলাভায সংৰত্তন্তীতি অযং পঞ্ঞাপটিলাভো.

পঞ্ঞাৰুদ্ধিযা সংৰত্তন্তীতি. ‘‘কতমা পঞ্ঞাৰুদ্ধি? সত্তন্নঞ্চ সেক্খানং পুথুজ্জনকল্যাণকস্স চ পঞ্ঞা ৰড্ঢতি, অরহতো পঞ্ঞা ৰড্ঢিতৰড্ঢনা, পঞ্ঞাৰুদ্ধিযা সংৰত্তন্তীতি অযং পঞ্ঞাৰুদ্ধি.

পঞ্ঞাৰেপুল্লায সংৰত্তন্তীতি. ‘‘কতমং পঞ্ঞাৰেপুল্লং? সত্তন্নঞ্চ সেক্খানং পুথুজ্জনকল্যাণকস্স চ পঞ্ঞা ৰেপুল্লং গচ্ছতি, অরহতো পঞ্ঞা ৰেপুল্লং গতা, পঞ্ঞাৰেপুল্লায সংৰত্তন্তীতি ইদং পঞ্ঞাৰেপুল্লং.

মহাপঞ্ঞতায সংৰত্তন্তীতি. ‘‘কতমা মহাপঞ্ঞা? মহন্তে অত্থে পরিগ্গণ্হাতীতি মহাপঞ্ঞা, মহন্তে ধম্মে…পে… মহন্তা নিরুত্তিযো, মহন্তানি পটিভানানি, মহন্তে সীলক্খন্ধে, মহন্তে সমাধিপঞ্ঞাৰিমুত্তিৰিমুত্তিঞাণদস্সনক্খন্ধে, মহন্তানি ঠানাট্ঠানানি, মহন্তা ৰিহারসমাপত্তিযো, মহন্তানি অরিযসচ্চানি, মহন্তে সতিপট্ঠানে, সম্মপ্পধানে, ইদ্ধিপাদে, মহন্তানি ইন্দ্রিযানি, মহন্তানি বলানি, মহন্তে বোজ্ঝঙ্গে, মহন্তে অরিযমগ্গে, মহন্তানি সামঞ্ঞফলানি, মহাভিঞ্ঞাযো, মহন্তং পরমত্থং নিব্বানং পরিগ্গণ্হাতীতি মহাপঞ্ঞা, মহাপঞ্ঞতায সংৰত্তন্তীতি অযং মহাপঞ্ঞা.

পুথুপঞ্ঞতায সংৰত্তন্তীতি. ‘‘কতমা পুথুপঞ্ঞা? পুথু নানাক্খন্ধেসু ঞাণং পৰত্ততীতি পুথুপঞ্ঞা. পুথু নানাধাতূসু, পুথু নানাআযতনেসু, পুথু নানাপটিচ্চসমুপ্পাদেসু, পুথু নানাসুঞ্ঞতমনুপলব্ভেসু, পুথু নানাঅত্থেসু, ধম্মেসু, নিরুত্তীসু, পটিভানেসু, পুথু নানাসীলক্খন্ধেসু, সমাধিপঞ্ঞাৰিমুত্তিৰিমুত্তিঞাণদস্সনক্খন্ধেসু, পুথু নানাঠানাট্ঠানেসু, পুথু নানাৰিহারসমাপত্তীসু, পুথু নানাঅরিযসচ্চেসু, পুথু নানাসতিপট্ঠানেসু, সম্মপ্পধানেসু, ইদ্ধিপাদেসু, ইন্দ্রিযেসু, বলেসু, বোজ্ঝঙ্গেসু, পুথু নানাঅরিযমগ্গেসু, পুথু নানাসামঞ্ঞফলেসু, পুথু নানাঅভিঞ্ঞাসু ঞাণং পৰত্ততীতি পুথুপঞ্ঞা. পুথু নানাজনসাধারণে ধম্মে সমতিক্কম্ম পরমত্থে নিব্বানে ঞাণং পৰত্ততীতি পুথুপঞ্ঞা. পুথুপঞ্ঞতায সংৰত্তন্তীতি অযং পুথুপঞ্ঞা.

ৰিপুলপঞ্ঞতায সংৰত্তন্তীতি. ‘‘কতমা ৰিপুলপঞ্ঞা? ৰিপুলে অত্থে পরিগণ্হাতীতি ৰিপুলপঞ্ঞা…পে… ৰিপুলং পরমত্থং নিব্বানং পরিগণ্হাতীতি ৰিপুলপঞ্ঞা, ৰিপুলপঞ্ঞতায সংৰত্তন্তীতি অযং ৰিপুলপঞ্ঞা.

গম্ভীরপঞ্ঞতায সংৰত্তন্তীতি. ‘‘কতমা গম্ভীরপঞ্ঞা? গম্ভীরেসু খন্ধেসু ঞাণং পৰত্ততীতি গম্ভীরপঞ্ঞা. পুথুপঞ্ঞাসদিসো ৰিত্থারো. গম্ভীরে পরমত্থে নিব্বানে ঞাণং পৰত্ততীতি গম্ভীরপঞ্ঞা, গম্ভীরপঞ্ঞতায সংৰত্তন্তীতি অযং গম্ভীরপঞ্ঞা.

অসামন্তপঞ্ঞতায সংৰত্তন্তীতি. ‘‘কতমা অসামন্তপঞ্ঞা? যস্স পুগ্গলস্স অত্থৰৰত্থানতো অত্থপটিসম্ভিদা অধিগতা হোতি সচ্ছিকতা ফস্সিতা পঞ্ঞায. ধম্মনিরুত্তিপটিভানৰৰত্থানতো পটিভানপটিসম্ভিদা অধিগতা হোতি সচ্ছিকতা ফস্সিতা পঞ্ঞায, তস্স অত্থে চ ধম্মে চ নিরুত্তিযা চ পটিভানে চ ন অঞ্ঞো কোচি সক্কোতি অভিসম্ভৰিতুং, অনভিসম্ভৰনীযো চ সো অঞ্ঞেহীতি অসামন্তপঞ্ঞো.

পুথুজ্জনকল্যাণকস্স পঞ্ঞা অট্ঠমকস্স পঞ্ঞায দূরে ৰিদূরে সুৰিদূরে ন সন্তিকে ন সামন্তা, পুথুজ্জনকল্যাণকং উপাদায অট্ঠমকো অসামন্তপঞ্ঞো. অট্ঠমকস্স পঞ্ঞা সোতাপন্নস্স পঞ্ঞায দূরে…পে… অট্ঠমকং উপাদায সোতাপন্নো অসামন্তপঞ্ঞো. সোতাপন্নস্স পঞ্ঞা সকদাগামিস্স পঞ্ঞায. সকদাগামিস্স পঞ্ঞা অনাগামিস্স পঞ্ঞায. অনাগামিস্স পঞ্ঞা অরহতো পঞ্ঞায. অরহতো পঞ্ঞা পচ্চেকবুদ্ধস্স পঞ্ঞায দূরে ৰিদূরে সুৰিদূরে ন সন্তিকে ন সামন্তা, অরহন্তং উপাদায পচ্চেকবুদ্ধো অসামন্তপঞ্ঞো. পচ্চেকবুদ্ধঞ্চ সদেৰকঞ্চ লোকং উপাদায তথাগতো অরহং সম্মাসম্বুদ্ধো অগ্গো অসামন্তপঞ্ঞো.

পঞ্ঞাপভেদকুসলো পভিন্নঞাণো…পে… তে পঞ্হং অভিসঙ্খরিত্ৰা অভিসঙ্খরিত্ৰা তথাগতং উপসঙ্কমিত্ৰা পুচ্ছন্তি গূল়্হানি চ পটিচ্ছন্নানি চ, কথিতা ৰিসজ্জিতা চ তে পঞ্হা ভগৰতা হোন্তি নিদ্দিট্ঠকারণা, উপক্খিত্তকা চ তে ভগৰতা সম্পজ্জন্তি. অথ খো ভগৰা তত্থ অতিরোচতি যদিদং পঞ্ঞাযাতি অগ্গো অসামন্তপঞ্ঞো, অসামন্তপঞ্ঞতায সংৰত্তন্তীতি অযং অসামন্তপঞ্ঞা.

ভূরিপঞ্ঞতায সংৰত্তন্তীতি. ‘‘কতমা ভূরিপঞ্ঞা? রাগং অভিভুয্যতীতি ভূরিপঞ্ঞা, অভিভৰিতাতি ভূরিপঞ্ঞা. দোসং, মোহং, কোধং, উপনাহং, মক্খং, পলাসং, ইস্সং, মচ্ছরিযং, মাযং, সাঠেয্যং, থম্ভং, সারম্ভং, মানং, অতিমানং, মদং, পমাদং, সব্বে কিলেসে, সব্বে দুচ্চরিতে, সব্বে অভিসঙ্খারে, সব্বে ভৰগামিকম্মে অভিভুয্যতীতি ভূরিপঞ্ঞা, অভিভৰিতাতি ভূরিপঞ্ঞা. রাগো অরি, তং অরিং মদ্দনিপঞ্ঞাতি ভূরিপঞ্ঞা, দোসো, মোহো…পে… সব্বে ভৰগামিকম্মা অরি, তং অরিং মদ্দনিপঞ্ঞাতি ভূরিপঞ্ঞা. ভূরি ৰুচ্চতি পথৰী, তায পথৰিসমায ৰিত্থতায ৰিপুলায পঞ্ঞায সমন্নাগতোতি ভূরিপঞ্ঞো. অপিচ পঞ্ঞায এতং অধিৰচনং ভূরি মেধা পরিণাযিকাতি, ভূরিপঞ্ঞতায সংৰত্তন্তীতি অযং ভূরিপঞ্ঞা.

পঞ্ঞাবাহুল্লায সংৰত্তন্তীতি. ‘‘কতমং পঞ্ঞাবাহুল্লং? ইধেকচ্চো পঞ্ঞাগরুকো হোতি পঞ্ঞাচরিতো পঞ্ঞাসযো পঞ্ঞাধিমুত্তো পঞ্ঞাধজো পঞ্ঞাকেতু পঞ্ঞাধিপতেয্যো ৰিচযবহুলো পৰিচযবহুলো ওক্খাযনবহুলো সমোক্খাযনবহুলো সম্পেক্খাযনধম্মো ৰিভূতৰিহারী তচ্চরিতো তগ্গরুকো তব্বহুলো তন্নিন্নো তপ্পোণো তপ্পব্ভারো তদধিমুত্তো তদাধিপতেয্যো, যথা গণগরুকো ৰুচ্চতি গণবাহুলিকোতি, চীৰরগরুকো পত্তগরুকো সেনাসনগরুকো ৰুচ্চতি সেনাসনবাহুলিকোতি, এৰমেৰং ইধেকচ্চো পঞ্ঞাগরুকো হোতি পঞ্ঞাচরিতো…পে… তদাধিপতেয্যো, পঞ্ঞাবাহুল্লায সংৰত্তন্তীতি ইদং পঞ্ঞাবাহুল্লং.

সীঘপঞ্ঞতায সংৰত্তন্তীতি. ‘‘কতমা সীঘপঞ্ঞা? সীঘং সীঘং সীলানি পরিপূরেতীতি সীঘপঞ্ঞা. সীঘং সীঘং ইন্দ্রিযসংৰরং, ভোজনে মত্তঞ্ঞুতং, জাগরিযানুযোগং, সীলক্খন্ধং, সমাধি-পঞ্ঞা-ৰিমুত্তি-ৰিমুত্তিঞাণদস্সনক্খন্ধং পরিপূরেতীতি সীঘপঞ্ঞা. সীঘং সীঘং ঠানাট্ঠানানি পটিৰিজ্ঝতি. ৰিহারসমাপত্তিযো পরিপূরেতি. অরিযসচ্চানি পটিৰিজ্ঝতি. সতিপট্ঠানে ভাৰেতি. সম্মপ্পধানে ইদ্ধিপাদে ইন্দ্রিযানি বলানি বোজ্ঝঙ্গে অরিযমগ্গং ভাৰেতীতি সীঘপঞ্ঞা. সীঘং সীঘং সামঞ্ঞফলানি সচ্ছিকরোতীতি সীঘপঞ্ঞা. সীঘং সীঘং অভিঞ্ঞাযো পটিৰিজ্ঝতীতি সীঘপঞ্ঞা. সীঘং সীঘং পরমত্থং নিব্বানং সচ্ছিকরোতীতি সীঘপঞ্ঞা, সীঘপঞ্ঞতায সংৰত্তন্তীতি অযং সীঘপঞ্ঞা.

লহুপঞ্ঞতায সংৰত্তন্তীতি. ‘‘কতমা লহুপঞ্ঞা? লহুং লহুং সীলানি পরিপূরেতীতি লহুপঞ্ঞা…পে… লহুপঞ্ঞতায সংৰত্তন্তীতি অযং লহুপঞ্ঞা.

হাসপঞ্ঞতায সংৰত্তন্তীতি. ‘‘কতমা হাসপঞ্ঞা? ইধেকচ্চো ৰেদবহুলো তুট্ঠিবহুলো হাসবহুলো পামোজ্জবহুলো সীলানি পরিপূরেতীতি হাসপঞ্ঞা…পে… পরমত্থং নিব্বানং সচ্ছিকরোতীতি হাসপঞ্ঞা, হাসপঞ্ঞতায সংৰত্তন্তীতি অযং হাসপঞ্ঞা.

জৰনপঞ্ঞতায সংৰত্তন্তীতি. ‘‘কতমা জৰনপঞ্ঞা? যং কিঞ্চি রূপং অতীতানাগতপচ্চুপ্পন্নং, যা কাচি ৰেদনা, যা কাচি সঞ্ঞা, যে কেচি সঙ্খারা, যংকিঞ্চি ৰিঞ্ঞাণং অতীতানাগতপচ্চুপ্পন্নং অজ্ঝত্তং ৰা বহিদ্ধা ৰা ওল়ারিকং ৰা সুখুমং ৰা হীনং ৰা পণীতং ৰা যং দূরে সন্তিকে ৰা, সব্বং ৰিঞ্ঞাণং অনিচ্চতো খিপ্পং জৰতীতি জৰনপঞ্ঞা, দুক্খতো, অনত্ততো খিপ্পং জৰতীতি জৰনপঞ্ঞা. চক্খুং…পে… জরামরণং অতীতানাগতপচ্চুপ্পন্নং অনিচ্চতো, দুক্খতো, অনত্ততো খিপ্পং জৰতীতি জৰনপঞ্ঞা. রূপং অতীতানাগতপচ্চুপ্পন্নং অনিচ্চং খযট্ঠেন, দুক্খং ভযট্ঠেন, অনত্তা অসারকট্ঠেনাতি তুলযিত্ৰা তীরযিত্ৰা ৰিভাৰযিত্ৰা ৰিভূতং কত্ৰা রূপনিরোধে নিব্বানে খিপ্পং জৰতীতি জৰনপঞ্ঞা…পে… জরামরণনিরোধে নিব্বানে খিপ্পং জৰতীতি জৰনপঞ্ঞা. রূপং…পে… জরামরণং অতীতানাগতপচ্চুপ্পন্নং খযধম্মং ৰযধম্মং ৰিরাগধম্মং নিরোধধম্মন্তি তুলযিত্ৰা তীরযিত্ৰা ৰিভাৰযিত্ৰা ৰিভূতং কত্ৰা জরামরণনিরোধে নিব্বানে খিপ্পং জৰতীতি জৰনপঞ্ঞা, জৰনপঞ্ঞতায সংৰত্তন্তীতি অযং জৰনপঞ্ঞা.

তিক্খপঞ্ঞতায সংৰত্তন্তীতি. ‘‘কতমা তিক্খপঞ্ঞা? খিপ্পং কিলেসে ছিন্দতীতি তিক্খপঞ্ঞা. উপ্পন্নং কামৰিতক্কং, ৰ্যাপাদৰিতক্কং, ৰিহিংসাৰিতক্কং উপ্পন্নুপ্পন্নে পাপকে অকুসলে ধম্মে নাধিৰাসেতি পজহতি ৰিনোদেতি ব্যন্তীকরোতি অনভাৰং গমেতীতি তিক্খপঞ্ঞা. উপ্পন্নং রাগং, দোসং, মোহং…পে… সব্বে ভৰগামিকম্মে নাধিৰাসেতি পজহতি ৰিনোদেতি ব্যন্তীকরোতি অনভাৰং গমেতীতি তিক্খপঞ্ঞা. একস্মিং আসনে চত্তারো অরিযমগ্গা চত্তারি সামঞ্ঞফলানি চতস্সো পটিসম্ভিদাযো ছ অভিঞ্ঞাযো অধিগতা হোন্তি সচ্ছিকতা ফস্সিতা পঞ্ঞাযাতি তিক্খপঞ্ঞা, তিক্খপঞ্ঞতায সংৰত্তন্তীতি অযং তিক্খপঞ্ঞা.

নিব্বেধিকপঞ্ঞতায সংৰত্তন্তীতি. ‘‘কতমা নিব্বেধিকপঞ্ঞা? ইধেকচ্চো সব্বসঙ্খারেসু উব্বেগবহুলো হোতি উত্তাসবহুলো উক্কণ্ঠনবহুলো অরতিবহুলো অনভিরতিবহুলো বহিমুখো ন রমতি সব্বসঙ্খারেসু, অনিব্বিদ্ধপুব্বং অপ্পদালিতপুব্বং লোভক্খন্ধং নিব্বিজ্ঝতি পদালেতীতি নিব্বেধিকপঞ্ঞা, অনিব্বিদ্ধপুব্বং অপ্পদালিতপুব্বং দোসক্খন্ধং, মোহক্খন্ধং, কোধং, উপনাহং…পে… সব্বে ভৰগামিকম্মে নিব্বিজ্ঝতি পদালেতীতি নিব্বেধিকপঞ্ঞা, নিব্বেধিকপঞ্ঞতায সংৰত্তন্তীতি অযং নিব্বেধিকপঞ্ঞা’’.

এৰং পটিসম্ভিদামগ্গে ৰুত্তনযেনেৰেত্থ অত্থো ৰেদিতব্বো. কেৰলঞ্হি তত্থ বহুৰচনং, ইধ একৰচনন্তি অযমেৰ ৰিসেসো. সেসং তাদিসমেৰাতি. ইমা চ পন সোল়স মহাপঞ্ঞা লোকিযলোকুত্তরমিস্সকাৰ কথিতা.

কাযগতাসতিৰগ্গৰণ্ণনা.