১০. দুতিযপমাদাদিৰগ্গৰণ্ণনা

৯৮. দসমে অজ্ঝত্তিকন্তি নিযকজ্ঝত্তৰসেন অজ্ঝত্তিকং. অঙ্গন্তি কারণং. ইতি করিত্ৰাতি এৰং কত্ৰা. ইদং ৰুত্তং হোতি – ভিক্খৰে, অজ্ঝত্তং পচ্চত্তং অত্তনো সন্তানে সমুট্ঠিতং কারণন্তি কত্ৰা ন অঞ্ঞং একং কারণম্পি সমনুপস্সামীতি.

১১০-১১৪. বাহিরন্তি অজ্ঝত্তসন্তানতো বহি ভৰং. সদ্ধম্মস্সাতি সুদ্ধম্মস্স, সাসনস্সাতি অত্থো. সম্মোসাযাতি ৰিনাসায. অন্তরধানাযাতি অপঞ্ঞাণত্থায.

১১৫. ঠিতিযাতি চিরট্ঠিতত্থং. অসম্মোসায অনন্তরধানাযাতি ৰুত্তপটিপক্খনযেনেৰ ৰেদিতব্বং. সেসমেত্থ চতুক্কোটিকে ৰুত্তনযমেৰ.

১৩০. ইতো পরেসু অধম্মং ধম্মোতি দীপেন্তীতিআদীসু সুত্তন্তপরিযাযেন তাৰ দস কুসলকম্মপথা ধম্মো, দস অকুসলকম্মপথা অধম্মো. তথা চত্তারো সতিপট্ঠানা চত্তারো সম্মপ্পধানা চত্তারো ইদ্ধিপাদা পঞ্চিন্দ্রিযানি পঞ্চ বলানি সত্ত বোজ্ঝঙ্গা অরিযো অট্ঠঙ্গিকো মগ্গোতি সত্ততিংস বোধিপক্খিযধম্মা ধম্মো নাম; তযো সতিপট্ঠানা তযো সম্মপ্পধানা তযো ইদ্ধিপাদা ছ ইন্দ্রিযানি ছ বলানি অট্ঠ বোজ্ঝঙ্গা নৰঙ্গিকো মগ্গোতি চ চত্তারো উপাদানা পঞ্চ নীৰরণানি সত্ত অনুসযা অট্ঠ মিচ্ছত্তানি চ অযং অধম্মো.

তত্থ যংকিঞ্চি একং অধম্মকোট্ঠাসং গহেত্ৰা ‘‘ইমং অধম্মং ধম্মোতি করিস্সাম, এৰং অম্হাকং আচরিযকুলং নিয্যানিকং ভৰিস্সতি, মযং চ লোকে পাকটা ভৰিস্সামা’’তি তং অধম্মং ‘‘ধম্মো অয’’ন্তি কথযন্তা অধম্মং ধম্মোতি দীপেন্তি নাম. তথেৰ ধম্মকোট্ঠাসেসু একং গহেত্ৰা ‘‘অযং অধম্মো’’তি কথেন্তা ধম্মং অধম্মোতি দীপেন্তি নাম. ৰিনযপরিযাযেন পন ভূতেন ৰত্থুনা চোদেত্ৰা সারেত্ৰা যথাপটিঞ্ঞায কত্তব্বং কম্মং ধম্মো নাম, অভূতেন ৰত্থুনা অচোদেত্ৰা অসারেত্ৰা অপটিঞ্ঞায কত্তব্বং কম্মং অধম্মো নাম.

সুত্তন্তপরিযাযেন রাগৰিনযো দোসৰিনযো মোহৰিনযো সংৰরো পহানং পটিসঙ্খাতি অযং ৰিনযো নাম, রাগাদীনং অৰিনযো অসংৰরো অপ্পহানং অপটিসঙ্খাতি অযং অৰিনযো নাম. ৰিনযপরিযাযেন ৰত্থুসম্পত্তি, ঞত্তিসম্পত্তি, অনুস্সাৰনসম্পত্তি, সীমাসম্পত্তি, পরিসসম্পত্তীতি অযং ৰিনযো নাম. ৰত্থুৰিপত্তি, ঞত্তিৰিপত্তি, অনুস্সাৰনৰিপত্তি, সীমাৰিপত্তি পরিসৰিপত্তীতি অযং অৰিনযো নাম.

সুত্তন্তপরিযাযেন চত্তারো সতিপট্ঠানা চত্তারো সম্মপ্পধানা…পে… অরিযো অট্ঠঙ্গিকো মগ্গোতি ইদং ভাসিতং লপিতং তথাগতেন; তযো সতিপট্ঠানা তযো সম্মপ্পধানা তযো ইদ্ধিপাদা ছ ইন্দ্রিযানি ছ বলানি অট্ঠ বোজ্ঝঙ্গা নৰঙ্গিকো মগ্গোতি ইদং অভাসিতং অলপিতং তথাগতেন. ৰিনযপরিযাযেন চত্তারো পারাজিকা তেরস সঙ্ঘাদিসেসা দ্ৰে অনিযতা তিংস নিস্সগ্গিযা পাচিত্তিযাতি ইদং ভাসিতং লপিতং তথাগতেন; তযো পারাজিকা চুদ্দস সঙ্ঘাদিসেসা তযো অনিযতা একতিংস নিস্সগ্গিযা পাচিত্তিযাতি ইদং অভাসিতং অলপিতং তথাগতেন.

সুত্তন্তপরিযাযেন দেৰসিকং ফলসমাপত্তিসমাপজ্জনং মহাকরুণাসমাপত্তিসমাপজ্জনং বুদ্ধচক্খুনা লোকৰোলোকনং অট্ঠুপ্পত্তিৰসেন সুত্তন্তদেসনা জাতককথাতি ইদং আচিণ্ণং, ন দেৰসিকং ফলসমাপত্তিসমাপজ্জনং…পে… ন জাতককথাতি ইদং অনাচিণ্ণং. ৰিনযপরিযাযেন নিমন্তিতস্স ৰস্সাৰাসং ৰসিত্ৰা অপলোকেত্ৰা চারিকাপক্কমনং পৰারেত্ৰা চারিকাপক্কমনং, আগন্তুকেহি সদ্ধিং পঠমং পটিসন্থারকরণন্তি ইদং আচিণ্ণং, তস্সেৰ আচিণ্ণস্স অকরণং অনাচিণ্ণং নাম.

সুত্তন্তপরিযাযেন চত্তারো সতিপট্ঠানা…পে… অট্ঠঙ্গিকো মগ্গোতি ইদং পঞ্ঞত্তং নাম; তযো সতিপট্ঠানা…পে… নৰঙ্গিকো মগ্গোতি ইদং অপঞ্ঞত্তং নাম. ৰিনযপরিযাযেন চত্তারো পারাজিকা…পে… তিংসনিস্সগ্গিযা পাচিত্তিযাতি ইদং পঞ্ঞত্তং নাম; তযো পারাজিকা…পে… একতিংস নিস্সগ্গিযা পাচিত্তিযাতি ইদং অপঞ্ঞত্তং নাম.

যং পনেতং সব্বসুত্তানং পরিযোসানে তেচিমং সদ্ধম্মং অন্তরধাপেন্তীতি ৰুত্তং, তত্থ পঞ্চ অন্তরধানানি নাম অধিগমঅন্তরধানং, পটিপত্তিঅন্তরধানং, পরিযত্তিঅন্তরধানং, লিঙ্গঅন্তরধানং, ধাতুঅন্তরধানন্তি. তত্থ অধিগমোতি চত্তারো মগ্গা, চত্তারি ফলানি, চতস্সো পটিসম্ভিদা, তিস্সো ৰিজ্জা, ছ অভিঞ্ঞাতি. সো পরিহাযমানো পটিসম্ভিদাতো পট্ঠায পরিহাযতি. বুদ্ধানং হি পরিনিব্বানতো ৰস্সসহস্সমেৰ পটিসম্ভিদা নিব্বত্তেতুং সক্কোন্তি, ততো পরং ছ অভিঞ্ঞা, ততো তাপি নিব্বত্তেতুং অসক্কোন্তা তিস্সো ৰিজ্জা নিব্বত্তেন্তি. গচ্ছন্তে গচ্ছন্তে কালে তাপি নিব্বত্তেতুং অসক্কোন্তা সুক্খৰিপস্সকা হোন্তি. এতেনেৰ উপাযেন অনাগামিনো সকদাগামিনো সোতাপন্নাতি. তেসু ধরন্তেসু অধিগমো অনন্তরহিতো নাম ন হোতি. পচ্ছিমকস্স পন সোতাপন্নস্স জীৰিতক্খযেন অধিগমো অন্তরহিতো নাম হোতি. ইদং অধিগমঅন্তরধানং নাম.

পটিপত্তিঅন্তরধানং নাম ঝানৰিপস্সনামগ্গফলানি নিব্বত্তেতুং অসক্কোন্তা চতুপারিসুদ্ধিসীলমত্তং রক্খন্তি. গচ্ছন্তে গচ্ছন্তে কালে ‘‘সীলং পরিপুণ্ণং কত্ৰা রক্খাম, পধানঞ্চ অনুযুঞ্জাম, ন চ মগ্গং ৰা ফলং ৰা সচ্ছিকাতুং সক্কোম, নত্থি ইদানি অরিযধম্মপটিৰেধো’’তি ৰোসানং আপজ্জিত্ৰা কোসজ্জবহুলা অঞ্ঞমঞ্ঞং ন চোদেন্তি ন সারেন্তি অকুক্কুচ্চকা হোন্তি, ততো পট্ঠায খুদ্দানুখুদ্দকানি মদ্দন্তি. গচ্ছন্তে গচ্ছন্তে কালে পাচিত্তিযথুল্লচ্চযানি আপজ্জন্তি, ততো গরুকাপত্তিং. পারাজিকমত্তমেৰ তিট্ঠতি. চত্তারি পারাজিকানি রক্খন্তানং ভিক্খূনং সতেপি সহস্সেপি ধরমানে পটিপত্তি অনন্তরহিতা নাম ন হোতি. পচ্ছিমকস্স পন ভিক্খুনো সীলভেদেন ৰা জীৰিতক্খযেন ৰা অন্তরহিতা হোতীতি ইদং পটিপত্তিঅন্তরধানং নাম.

পরিযত্তীতি তেপিটকং বুদ্ধৰচনং সাট্ঠকথা পাল়ি. যাৰ সা তিট্ঠতি, তাৰ পরিযত্তি পরিপুণ্ণা নাম হোতি. গচ্ছন্তে গচ্ছন্তে কালে রাজযুৰরাজানো অধম্মিকা হোন্তি, তেসু অধম্মিকেসু রাজামচ্চাদযো অধম্মিকা হোন্তি, ততো রট্ঠজনপদৰাসিনোতি. এতেসং অধম্মিকতায দেৰো ন সম্মা ৰস্সতি, ততো সস্সানি ন সম্পজ্জন্তি. তেসু অসম্পজ্জন্তেসু পচ্চযদাযকা ভিক্খুসঙ্ঘস্স পচ্চযে দাতুং ন সক্কোন্তি, ভিক্খূ পচ্চযেহি কিলমন্তা অন্তেৰাসিকে সঙ্গহেতুং ন সক্কোন্তি. গচ্ছন্তে গচ্ছন্তে কালে পরিযত্তি পরিহাযতি, অত্থৰসেন ধারেতুং ন সক্কোন্তি, পাল়িৰসেনেৰ ধারেন্তি. ততো গচ্ছন্তে গচ্ছন্তে কালে পাল়িম্পি সকলং ধারেতুং ন সক্কোন্তি, পঠমং অভিধম্মপিটকং পরিহাযতি. পরিহাযমানং মত্থকতো পট্ঠায পরিহাযতি. পঠমমেৰ হি পট্ঠানমহাপকরণং পরিহাযতি, তস্মিং পরিহীনে যমকং, কথাৰত্থু, পুগ্গলপঞ্ঞত্তি, ধাতুকথা, ৰিভঙ্গো, ধম্মসঙ্গহোতি.

এৰং অভিধম্মপিটকে পরিহীনে মত্থকতো পট্ঠায সুত্তন্তপিটকং পরিহাযতি. পঠমঞ্হি অঙ্গুত্তরনিকাযো পরিহাযতি, তস্মিম্পি পঠমং একাদসকনিপাতো, ততো দসকনিপাতো…পে… ততো এককনিপাতোতি. এৰং অঙ্গুত্তরে পরিহীনে মত্থকতো পট্ঠায সংযুত্তনিকাযো পরিহাযতি. পঠমং হি মহাৰগ্গো পরিহাযতি, ততো সল়াযতনৰগ্গো, খন্ধৰগ্গো, নিদানৰগ্গো, সগাথাৰগ্গোতি. এৰং সংযুত্তনিকাযে পরিহীনে মত্থকতো পট্ঠায মজ্ঝিমনিকাযো পরিহাযতি. পঠমং হি উপরিপণ্ণাসকো পরিহাযতি, ততো মজ্ঝিমপণ্ণাসকো, ততো মূলপণ্ণাসকোতি. এৰং মজ্ঝিমনিকাযে পরিহীনে মত্থকতো পট্ঠায দীঘনিকাযো পরিহাযতি. পঠমঞ্হি পাথিকৰগ্গো পরিহাযতি, ততো মহাৰগ্গো, ততো সীলক্খন্ধৰগ্গোতি. এৰং দীঘনিকাযে পরিহীনে সুত্তন্তপিটকং পরিহীনং নাম হোতি. ৰিনযপিটকেন সদ্ধিং জাতকমেৰ ধারেন্তি. ৰিনযপিটকং লজ্জিনোৰ ধারেন্তি, লাভকামা পন ‘‘সুত্তন্তে কথিতেপি সল্লক্খেন্তা নত্থী’’তি জাতকমেৰ ধারেন্তি. গচ্ছন্তে গচ্ছন্তে কালে জাতকম্পি ধারেতুং ন সক্কোন্তি. অথ তেসং পঠমং ৰেস্সন্তরজাতকং পরিহাযতি, ততো পটিলোমক্কমেন পুণ্ণকজাতকং, মহানারদজাতকন্তি পরিযোসানে অপণ্ণকজাতকং পরিহাযতি. এৰং জাতকে পরিহীনে ৰিনযপিটকমেৰ ধারেন্তি.

গচ্ছন্তে গচ্ছন্তে কালে ৰিনযপিটকম্পি মত্থকতো পট্ঠায পরিহাযতি. পঠমঞ্হি পরিৰারো পরিহাযতি, ততো খন্ধকো, ভিক্খুনীৰিভঙ্গো, মহাৰিভঙ্গোতি অনুক্কমেন উপোসথক্খন্ধকমত্তমেৰ ধারেন্তি. তদাপি পরিযত্তি অন্তরহিতা ন হোতি. যাৰ পন মনুস্সেসু চাতুপ্পদিকগাথাপি পৰত্ততি, তাৰ পরিযত্তি অনন্তরহিতাৰ হোতি. যদা সদ্ধো পসন্নো রাজা হত্থিক্খন্ধে সুৰণ্ণচঙ্কোটকম্হি সহস্সত্থৰিকং ঠপাপেত্ৰা ‘‘বুদ্ধেহি কথিতং চাতুপ্পদিকগাথং জানন্তো ইমং সহস্সং গণ্হতূ’’তি নগরে ভেরিং চরাপেত্ৰা গণ্হনকং অলভিত্ৰা ‘‘একৰারং চরাপিতে নাম সুণন্তাপি হোন্তি অস্সুণন্তাপী’’তি যাৰততিযং চরাপেত্ৰা গণ্হনকং অলভিত্ৰা রাজপুরিসা তং সহস্সত্থৰিকং পুন রাজকুলং পৰেসেন্তি, তদা পরিযত্তি অন্তরহিতা নাম হোতি. ইদং পরিযত্তিঅন্তরধানং নাম.

গচ্ছন্তে গচ্ছন্তে কালে চীৰরগ্গহণং পত্তগ্গহণং সম্মিঞ্জনপসারণং আলোকিতৰিলোকিতং ন পাসাদিকং হোতি. নিগণ্ঠসমণা ৰিয অলাবুপত্তং ভিক্খূ পত্তং অগ্গবাহায পক্খিপিত্ৰা আদায ৰিচরন্তি, এত্তাৰতাপি লিঙ্গং অনন্তরহিতমেৰ হোতি. গচ্ছন্তে গচ্ছন্তে পন কালে অগ্গবাহতো ওতারেত্ৰা হত্থেন ৰা সিক্কায ৰা ওলম্বিত্ৰা ৰিচরন্তি, চীৰরম্পি রজনসারুপ্পং অকত্ৰা ওট্ঠট্ঠিৰণ্ণং কত্ৰা ৰিচরন্তি. গচ্ছন্তে গচ্ছন্তে কালে রজনম্পি ন হোতি দসচ্ছিন্দনম্পি ওৰট্টিকৰিজ্ঝনম্পি, কপ্পমত্তং কত্ৰা ৰল়ঞ্জেন্তি. পুন ওৰট্টিকং ৰিজ্ঝিত্ৰা কপ্পং ন করোন্তি. ততো উভযম্পি অকত্ৰা দসা ছেত্ৰা পরিব্বাজকা ৰিয চরন্তি. গচ্ছন্তে গচ্ছন্তে কালে ‘‘কো ইমিনা অম্হাকং অত্থো’’তি খুদ্দকং কাসাৰখণ্ডং হত্থে ৰা গীৰায ৰা বন্ধন্তি, কেসেসু ৰা অল্লীযাপেন্তি, দারভরণং ৰা করোন্তা কসিত্ৰা ৰপিত্ৰা জীৰিকং কপ্পেত্ৰা ৰিচরন্তি. তদা দক্খিণং দেন্তা সঙ্ঘং উদ্দিস্স এতেসং দেন্তি. ইদং সন্ধায ভগৰতা ৰুত্তং – ‘‘ভৰিস্সন্তি খো, পনানন্দ, অনাগতমদ্ধানং গোত্রভুনো কাসাৰকণ্ঠা দুস্সীলা পাপধম্মা, তেসু দুস্সীলেসু সঙ্ঘং উদ্দিস্স দানং দস্সন্তি, তদাপাহং, আনন্দ, সঙ্ঘগতং দক্খিণং অসঙ্খেয্যং অপ্পমেয্যং ৰদামী’’তি (ম. নি. ৩.৩৮০). ততো গচ্ছন্তে কালে নানাৰিধানি কম্মানি করোন্তা ‘‘পপঞ্চো এস, কিং ইমিনা অম্হাক’’ন্তি কাসাৰখণ্ডং ছিন্দিত্ৰা অরঞ্ঞে খিপন্তি. এতস্মিং কালে লিঙ্গং অন্তরহিতং নাম হোতি. কস্সপদসবলস্স কির কালতো পট্ঠায যোনকানং সেতৰত্থং পারুপিত্ৰা চরণং চারিত্তং জাতন্তি. ইদং লিঙ্গঅন্তরধানং নাম.

ধাতুঅন্তরধানং পন এৰং ৰেদিতব্বং – তীণি পরিনিব্বানানি, কিলেসপরিনিব্বানং – খন্ধপরিনিব্বানং, ধাতুপরিনিব্বানন্তি. তত্থ কিলেসপরিনিব্বানং বোধিপল্লঙ্কে অহোসি, খন্ধপরিনিব্বানং কুসিনারাযং, ধাতুপরিনিব্বানং অনাগতে ভৰিস্সতি. কথং? ততো তত্থ তত্থ সক্কারসম্মানং অলভমানা ধাতুযো বুদ্ধানং অধিট্ঠানবলেন সক্কারসম্মানলভনকট্ঠানং গচ্ছন্তি. গচ্ছন্তে গচ্ছন্তে কালে সব্বট্ঠানেসু সক্কারসম্মানো ন হোতি. সাসনস্স হি ওসক্কনকালে ইমস্মিং তম্বপণ্ণিদীপে সব্বা ধাতুযো সন্নিপতিত্ৰা মহাচেতিযং, ততো নাগদীপে রাজাযতনচেতিযং, ততো বোধিপল্লঙ্কং গমিস্সন্তি. নাগভৰনতোপি দেৰলোকতোপি ব্রহ্মলোকতোপি ধাতুযো মহাবোধিপল্লঙ্কমেৰ গমিস্সন্তি. সাসপমত্তাপি ধাতু অন্তরা ন নস্সিস্সতি. সব্বা ধাতুযো মহাবোধিমণ্ডে সন্নিপতিত্ৰা বুদ্ধরূপং গহেত্ৰা বোধিমণ্ডে পল্লঙ্কেন নিসিন্নবুদ্ধসরীরসিরিং দস্সেন্তি. দ্ৰত্তিংস মহাপুরিসলক্খণানি অসীতি অনুব্যঞ্জনানি ব্যামপ্পভাতি সব্বং পরিপুণ্ণমেৰ হোতি. ততো যমকপাটিহারিযদিৰসে ৰিয পাটিহারিযং কত্ৰা দস্সেন্তি. তদা মনুস্সভূতসত্তো নাম তত্থ গতো নত্থি, দসসহস্সচক্কৰাল়ে পন দেৰতা সব্বাৰ সন্নিপতিত্ৰা ‘‘অজ্জ দসবলো পরিনিব্বাযতি, ইতোদানি পট্ঠায অন্ধকারং ভৰিস্সতী’’তি পরিদেৰন্তি. অথ ধাতুসরীরতো তেজো সমুট্ঠায তং সরীরং অপণ্ণত্তিকভাৰং গমেতি. ধাতুসরীরতো সমুট্ঠিতা জালা যাৰ ব্রহ্মলোকা উগ্গচ্ছিস্সতি, সাসপমত্তায সেসাযপি ধাতুযা সতি একজালাৰ ভৰিস্সতি. ধাতূসু পরিযাদানং গতাসু পচ্ছিজ্জিস্সতি. এৰং মহন্তং আনুভাৰং দস্সেত্ৰা ধাতুযো অন্তরধাযন্তি. তদা সন্নিপতিতা দেৰসঙ্ঘা বুদ্ধানং পরিনিব্বুতদিৰসে ৰিয দিব্বগন্ধমালাতূরিযাদীহি সক্কারং কত্ৰা তিক্খত্তুং পদক্খিণং কত্ৰা ৰন্দিত্ৰা ‘‘অনাগতে উপ্পজ্জনকং বুদ্ধং পস্সিতুং লভিস্সাম ভগৰা’’তি ৰত্ৰা সকসকট্ঠানমেৰ গচ্ছন্তি. ইদং ধাতুঅন্তরধানং নাম.

ইমস্স পঞ্চৰিধস্স অন্তরধানস্স পরিযত্তিঅন্তরধানমেৰ মূলং. পরিযত্তিযা হি অন্তরহিতায পটিপত্তি অন্তরধাযতি, পরিযত্তিযা ঠিতায পটিপত্তি পতিট্ঠাতি. তেনেৰ ইমস্মিং দীপে চণ্ডালতিস্সমহাভযে সক্কো দেৰরাজা মহাউল়ুম্পং মাপেত্ৰা ভিক্খূনং আরোচাপেসি ‘‘মহন্তং ভযং ভৰিস্সতি, ন সম্মা দেৰো ৰস্সিস্সতি, ভিক্খূ পচ্চযেহি কিলমন্তা পরিযত্তিং সন্ধারেতুং ন সক্খিস্সন্তি, পরতীরং গন্ত্ৰা অয্যেহি জীৰিতং রক্খিতুং ৰট্টতি. ইমং মহাউল়ুম্পং আরুয্হ গচ্ছথ, ভন্তে. যেসং এত্থ নিসজ্জট্ঠানং নপ্পহোতি, তে কট্ঠখণ্ডেপি উরং ঠপেত্ৰা গচ্ছন্তু, সব্বেসম্পি ভযং ন ভৰিস্সতী’’তি. তদা সমুদ্দতীরং পত্ৰা সট্ঠি ভিক্খূ কতিকং কত্ৰা ‘‘অম্হাকং এত্থ গমনকিচ্চং নত্থি, মযং ইধেৰ হুত্ৰা তেপিটকং রক্খিস্সামা’’তি ততো নিৰত্তিত্ৰা দক্খিণমলযজনপদং গন্ত্ৰা কন্দমূলপণ্ণেহি জীৰিকং কপ্পেন্তা ৰসিংসু. কাযে ৰহন্তে নিসীদিত্ৰা সজ্ঝাযং করোন্তি, অৰহন্তে ৰালিকং উস্সারেত্ৰা পরিৰারেত্ৰা সীসানি একট্ঠানে কত্ৰা পরিযত্তিং সম্মসন্তি. ইমিনা নিযামেন দ্ৰাদস সংৰচ্ছরানি সাট্ঠকথং তেপিটকং পরিপুণ্ণং কত্ৰা ধারযিংসু.

ভযে ৰূপসন্তে সত্তসতা ভিক্খূ অত্তনো গতট্ঠানে সাট্ঠকথে তেপিটকে একক্খরম্পি একব্যঞ্জনম্পি অনাসেত্ৰা ইমমেৰ দীপমাগম্ম কল্লগামজনপদে মণ্ডলারামৰিহারং পৰিসিংসু. থেরানং আগমনপ্পৰত্তিং সুত্ৰা ইমস্মিং দীপে ওহীনা সট্ঠি ভিক্খূ ‘‘থেরে পস্সিস্সামা’’তি গন্ত্ৰা থেরেহি সদ্ধিং তেপিটকং সোধেন্তা একক্খরম্পি একব্যঞ্জনম্পি অসমেন্তং নাম ন পস্সিংসু. তস্মিং ঠানে থেরানং অযং কথা উদপাদি ‘‘পরিযত্তি নু খো সাসনস্স মূলং, উদাহু পটিপত্তী’’তি. পংসুকূলিকত্থেরা ‘‘পটিপত্তিমূল’’ন্তি আহংসু, ধম্মকথিকা ‘‘পরিযত্তী’’তি. অথ নে থেরা ‘‘তুম্হাকং দ্ৰিন্নম্পি জনানং ৰচনমত্তেনেৰ ন করোম, জিনভাসিতং সুত্তং আহরথা’’তি আহংসু. সুত্তং আহরিতুং ন ভারোতি ‘‘ইমে চ, সুভদ্দ, ভিক্খূ সম্মা ৰিহরেয্যুং, অসুঞ্ঞো লোকো অরহন্তেহি অস্সাতি (দী. নি. ২.২১৪). পটিপত্তিমূলকং, মহারাজ, সত্থুসাসনং পটিপত্তিসারকং. পটিপত্তিযা ধরন্তায তিট্ঠতী’’তি (মি. প. ৪.১.৭) সুত্তং আহরিংসু. ইমং সুত্তং সুত্ৰা ধম্মকথিকা অত্তনো ৰাদঠপনত্থায ইমং সুত্তং আহরিংসু –

‘‘যাৰ তিট্ঠন্তি সুত্তন্তা, ৰিনযো যাৰ দিপ্পতি;

তাৰ দক্খন্তি আলোকং, সূরিযে অব্ভুট্ঠিতে যথা.

‘‘সুত্তন্তেসু অসন্তেসু, পমুট্ঠে ৰিনযম্হি চ;

তমো ভৰিস্সতি লোকে, সূরিযে অত্থঙ্গতে যথা.

‘‘সুত্তন্তে রক্খিতে সন্তে, পটিপত্তি হোতি রক্খিতা;

পটিপত্তিযং ঠিতো ধীরো, যোগক্খেমা ন ধংসতী’’তি.

ইমস্মিং সুত্তে আহটে পংসুকূলিকত্থেরা তুণ্হী অহেসুং, ধম্মকথিকত্থেরানংযেৰ ৰচনং পুরতো অহোসি. যথা হি গৰসতস্স ৰা গৰসহস্সস্স ৰা অন্তরে পৰেণিপালিকায ধেনুযা অসতি সো ৰংসো সা পৰেণি ন ঘটীযতি, এৰমেৰং আরদ্ধৰিপস্সকানং ভিক্খূনং সতেপি সহস্সেপি সংৰিজ্জমানে পরিযত্তিযা অসতি অরিযমগ্গপটিৰেধো নাম ন হোতি. যথা চ নিধিকুম্ভিযা জাননত্থায পাসাণপিট্ঠে অক্খরেসু ঠপিতেসু যাৰ অক্খরানি ধরন্তি, তাৰ নিধিকুম্ভি নট্ঠা নাম ন হোতি. এৰমেৰং পরিযত্তিযা ধরমানায সাসনং অন্তরহিতং নাম ন হোতীতি.

দুতিযপমাদাদিৰগ্গৰণ্ণনা.