(৬) অতীতানাগতৰারো

(ক) অনুলোমপুগ্গলো

২১৯. (ক) যস্স কুসলা ধম্মা উপ্পজ্জিত্থ তস্স অকুসলা ধম্মা নিরুজ্ঝিস্সন্তীতি?

অগ্গমগ্গসমঙ্গীনং অরহন্তানং যস্স চিত্তস্স অনন্তরা অগ্গমগ্গং পটিলভিস্সন্তি তেসং কুসলা ধম্মা উপ্পজ্জিত্থ, নো চ তেসং অকুসলা ধম্মা নিরুজ্ঝিস্সন্তি. ইতরেসং তেসং কুসলা চ ধম্মা উপ্পজ্জিত্থ অকুসলা চ ধম্মা নিরুজ্ঝিস্সন্তি.

(খ) যস্স ৰা পন অকুসলা ধম্মা নিরুজ্ঝিস্সন্তি তস্স কুসলা ধম্মা উপ্পজ্জিত্থাতি? আমন্তা.

(ক) যস্স কুসলা ধম্মা উপ্পজ্জিত্থ তস্স অব্যাকতা ধম্মা নিরুজ্ঝিস্সন্তীতি?

পচ্ছিমচিত্তস্স ভঙ্গক্খণে তেসং কুসলা ধম্মা উপ্পজ্জিত্থ, নো চ তেসং অব্যাকতা ধম্মা নিরুজ্ঝিস্সন্তি. ইতরেসং তেসং কুসলা চ ধম্মা উপ্পজ্জিত্থ অব্যাকতা চ ধম্মা নিরুজ্ঝিস্সন্তি.

(খ) যস্স ৰা পন অব্যাকতা ধম্মা নিরুজ্ঝিস্সন্তি তস্স কুসলা ধম্মা উপ্পজ্জিত্থাতি? আমন্তা.

২২০. (ক) যস্স অকুসলা ধম্মা উপ্পজ্জিত্থ তস্স অব্যাকতা ধম্মা নিরুজ্ঝিস্সন্তীতি?

পচ্ছিমচিত্তস্স ভঙ্গক্খণে তেসং অকুসলা ধম্মা উপ্পজ্জিত্থ, নো চ তেসং অব্যাকতা ধম্মা নিরুজ্ঝিস্সন্তি. ইতরেসং তেসং অকুসলা চ ধম্মা উপ্পজ্জিত্থ অব্যাকতা চ ধম্মা নিরুজ্ঝিস্সন্তি.

(খ) যস্স ৰা পন অব্যাকতা ধম্মা নিরুজ্ঝিস্সন্তি তস্স অকুসলা ধম্মা উপ্পজ্জিত্থাতি? আমন্তা.

(খ) অনুলোমওকাসো

২২১. যত্থ কুসলা ধম্মা উপ্পজ্জিত্থ তত্থ অকুসলা ধম্মা নিরুজ্ঝিস্সন্তীতি?…পে….

(গ) অনুলোমপুগ্গলোকাসা

২২২. (ক) যস্স যত্থ কুসলা ধম্মা উপ্পজ্জিত্থ তস্স তত্থ অকুসলা ধম্মা নিরুজ্ঝিস্সন্তীতি?

অগ্গমগ্গসমঙ্গীনং অরহন্তানং যস্স চিত্তস্স অনন্তরা অগ্গমগ্গং পটিলভিস্সন্তি তেসং তত্থ কুসলা ধম্মা উপ্পজ্জিত্থ, নো চ তেসং তত্থ অকুসলা ধম্মা নিরুজ্ঝিস্সন্তি. ইতরেসং চতুৰোকারানং পঞ্চৰোকারানং তেসং তত্থ কুসলা চ ধম্মা উপ্পজ্জিত্থ অকুসলা চ ধম্মা নিরুজ্ঝিস্সন্তি.

(খ) যস্স ৰা পন যত্থ অকুসলা ধম্মা নিরুজ্ঝিস্সন্তি তস্স তত্থ কুসলা ধম্মা উপ্পজ্জিত্থাতি?

সুদ্ধাৰাসানং দুতিযে চিত্তে ৰত্তমানে তেসং তত্থ অকুসলা ধম্মা নিরুজ্ঝিস্সন্তি, নো চ তেসং তত্থ কুসলা ধম্মা উপ্পজ্জিত্থ. ইতরেসং চতুৰোকারানং পঞ্চৰোকারানং তেসং তত্থ অকুসলা চ ধম্মা নিরুজ্ঝিস্সন্তি কুসলা চ ধম্মা উপ্পজ্জিত্থ.

(ক) যস্স যত্থ কুসলা ধম্মা উপ্পজ্জিত্থ তস্স তত্থ অব্যাকতা ধম্মা নিরুজ্ঝিস্সন্তীতি?

পচ্ছিমচিত্তস্স ভঙ্গক্খণে তেসং তত্থ কুসলা ধম্মা উপ্পজ্জিত্থ, নো চ তেসং তত্থ অব্যাকতা ধম্মা নিরুজ্ঝিস্সন্তি. ইতরেসং চতুৰোকারানং পঞ্চৰোকারানং তেসং তত্থ কুসলা চ ধম্মা উপ্পজ্জিত্থ অব্যাকতা চ ধম্মা নিরুজ্ঝিস্সন্তি.

(খ) যস্স ৰা পন যত্থ অব্যাকতা ধম্মা নিরুজ্ঝিস্সন্তি তস্স তত্থ কুসলা ধম্মা উপ্পজ্জিত্থাতি?

সুদ্ধাৰাসানং দুতিযে চিত্তে ৰত্তমানে অসঞ্ঞসত্তানং তেসং তত্থ অব্যাকতা ধম্মা নিরুজ্ঝিস্সন্তি, নো চ তেসং তত্থ কুসলা ধম্মা উপ্পজ্জিত্থ. ইতরেসং চতুৰোকারানং পঞ্চৰোকারানং তেসং তত্থ অব্যাকতা চ ধম্মা নিরুজ্ঝিস্সন্তি কুসলা চ ধম্মা উপ্পজ্জিত্থ.

২২৩. (ক) যস্স যত্থ অকুসলা ধম্মা উপ্পজ্জিত্থ তস্স তত্থ অব্যাকতা ধম্মা নিরুজ্ঝিস্সন্তীতি?

পচ্ছিমচিত্তস্স ভঙ্গক্খণে তেসং তত্থ অকুসলা ধম্মা উপ্পজ্জিত্থ, নো চ তেসং তত্থ অব্যাকতা ধম্মা নিরুজ্ঝিস্সন্তি. ইতরেসং চতুৰোকারানং পঞ্চৰোকারানং তেসং তত্থ অকুসলা চ ধম্মা উপ্পজ্জিত্থ অব্যাকতা চ ধম্মা নিরুজ্ঝিস্সন্তি.

(খ) যস্স ৰা পন যত্থ অব্যাকতা ধম্মা নিরুজ্ঝিস্সন্তি তস্স তত্থ অকুসলা ধম্মা উপ্পজ্জিত্থাতি?

সুদ্ধাৰাসানং দুতিযে চিত্তে ৰত্তমানে অসঞ্ঞসত্তানং তেসং তত্থ অব্যাকতা ধম্মা নিরুজ্ঝিস্সন্তি, নো চ তেসং তত্থ অকুসলা ধম্মা উপ্পজ্জিত্থ. ইতরেসং চতুৰোকারানং পঞ্চৰোকারানং তেসং তত্থ অব্যাকতা চ ধম্মা নিরুজ্ঝিস্সন্তি অকুসলা চ ধম্মা উপ্পজ্জিত্থ.

(ঘ) পচ্চনীকপুগ্গলো

২২৪. (ক) যস্স কুসলা ধম্মা ন উপ্পজ্জিত্থ তস্স অকুসলা ধম্মা ন নিরুজ্ঝিস্সন্তীতি? নত্থি.

(খ) যস্স ৰা পন অকুসলা ধম্মা ন নিরুজ্ঝিস্সন্তি তস্স কুসলা ধম্মা ন উপ্পজ্জিত্থাতি? উপ্পজ্জিত্থ.

(ক) যস্স কুসলা ধম্মা ন উপ্পজ্জিত্থ তস্স অব্যাকতা ধম্মা ন নিরুজ্ঝিস্সন্তীতি? নত্থি.

(খ) যস্স ৰা পন অব্যাকতা ধম্মা ন নিরুজ্ঝিস্সন্তি তস্স কুসলা ধম্মা ন উপ্পজ্জিত্থাতি? উপ্পজ্জিত্থ.

২২৫. (ক) যস্স অকুসলা ধম্মা ন উপ্পজ্জিত্থ তস্স অব্যাকতা ধম্মা ন নিরুজ্ঝিস্সন্তীতি? নত্থি.

(খ) যস্স ৰা পন অব্যাকতা ধম্মা ন নিরুজ্ঝিস্সন্তি তস্স অকুসলা ধম্মা ন উপ্পজ্জিত্থাতি? উপ্পজ্জিত্থ.

(ঙ) পচ্চনীকওকাসো

২২৬. যত্থ কুসলা ধম্মা ন উপ্পজ্জিত্থ তত্থ অকুসলা ধম্মা ন নিরুজ্ঝিস্সন্তীতি?…পে….

(চ) পচ্চনীকপুগ্গলোকাসা

২২৭. (ক) যস্স যত্থ কুসলা ধম্মা ন উপ্পজ্জিত্থ তস্স তত্থ অকুসলা ধম্মা ন নিরুজ্ঝিস্সন্তীতি?

সুদ্ধাৰাসানং দুতিযে চিত্তে ৰত্তমানে তেসং তত্থ কুসলা ধম্মা ন উপ্পজ্জিত্থ, নো চ তেসং তত্থ অকুসলা ধম্মা ন নিরুজ্ঝিস্সন্তি. অসঞ্ঞসত্তানং তেসং তত্থ কুসলা চ ধম্মা ন উপ্পজ্জিত্থ অকুসলা চ ধম্মা ন নিরুজ্ঝিস্সন্তি.

(খ) যস্স ৰা পন যত্থ অকুসলা ধম্মা ন নিরুজ্ঝিস্সন্তি তস্স তত্থ কুসলা ধম্মা ন উপ্পজ্জিত্থাতি?

অগ্গমগ্গসমঙ্গীনং অরহন্তানং যস্স চিত্তস্স অনন্তরা অগ্গমগ্গং পটিলভিস্সন্তি তেসং তত্থ অকুসলা ধম্মা ন নিরুজ্ঝিস্সন্তি, নো চ তেসং তত্থ কুসলা ধম্মা ন উপ্পজ্জিত্থ. অসঞ্ঞসত্তানং তেসং তত্থ অকুসলা চ ধম্মা ন নিরুজ্ঝিস্সন্তি কুসলা চ ধম্মা ন উপ্পজ্জিত্থ.

(ক) যস্স যত্থ কুসলা ধম্মা ন উপ্পজ্জিত্থ তস্স তত্থ অব্যাকতা ধম্মা ন নিরুজ্ঝিস্সন্তীতি? নিরুজ্ঝিস্সন্তি.

(খ) যস্স ৰা পন যত্থ অব্যাকতা ধম্মা ন নিরুজ্ঝিস্সন্তি তস্স তত্থ কুসলা ধম্মা ন উপ্পজ্জিত্থাতি? উপ্পজ্জিত্থ.

২২৮. (ক) যস্স যত্থ অকুসলা ধম্মা ন উপ্পজ্জিত্থ তস্স তত্থ অব্যাকতা ধম্মা ন নিরুজ্ঝিস্সন্তীতি? নিরুজ্ঝিস্সন্তি.

(খ) যস্স ৰা পন যত্থ অব্যাকতা ধম্মা ন নিরুজ্ঝিস্সন্তি তস্স তত্থ অকুসলা ধম্মা ন উপ্পজ্জিত্থাতি? উপ্পজ্জিত্থ.

উপ্পাদনিরোধৰারো.

পৰত্তিৰারো নিট্ঠিতো.