(৩) অনাগতৰারো

(ক) অনুলোমপুগ্গলো

১৮৭. (ক) যস্স কুসলা ধম্মা উপ্পজ্জিস্সন্তি তস্স অকুসলা ধম্মা নিরুজ্ঝিস্সন্তীতি?

যস্স চিত্তস্স অনন্তরা অগ্গমগ্গং পটিলভিস্সন্তি তেসং কুসলা ধম্মা উপ্পজ্জিস্সন্তি, নো চ তেসং অকুসলা ধম্মা নিরুজ্ঝিস্সন্তি. ইতরেসং তেসং কুসলা চ ধম্মা উপ্পজ্জিস্সন্তি অকুসলা চ ধম্মা নিরুজ্ঝিস্সন্তি.

(খ) যস্স ৰা পন অকুসলা ধম্মা নিরুজ্ঝিস্সন্তি তস্স কুসলা ধম্মা উপ্পজ্জিস্সন্তীতি? আমন্তা.

(ক) যস্স কুসলা ধম্মা উপ্পজ্জিস্সন্তি তস্স অব্যাকতা ধম্মা নিরুজ্ঝিস্সন্তীতি? আমন্তা.

(খ) যস্স ৰা পন অব্যাকতা ধম্মা নিরুজ্ঝিস্সন্তি তস্স কুসলা ধম্মা উপ্পজ্জিস্সন্তীতি?

অগ্গমগ্গসমঙ্গীনং অরহন্তানং তেসং অব্যাকতা ধম্মা নিরুজ্ঝিস্সন্তি, নো চ তেসং কুসলা ধম্মা উপ্পজ্জিস্সন্তি. ইতরেসং তেসং অব্যাকতা চ ধম্মা নিরুজ্ঝিস্সন্তি কুসলা চ ধম্মা উপ্পজ্জিস্সন্তি.

১৮৮. (ক) যস্স অকুসলা ধম্মা উপ্পজ্জিস্সন্তি তস্স অব্যাকতা ধম্মা নিরুজ্ঝিস্সন্তীতি? আমন্তা.

(খ) যস্স ৰা পন অব্যাকতা ধম্মা নিরুজ্ঝিস্সন্তি তস্স অকুসলা ধম্মা উপ্পজ্জিস্সন্তীতি?

অগ্গমগ্গসমঙ্গীনং অরহন্তানং যস্স চিত্তস্স অনন্তরা অগ্গমগ্গং পটিলভিস্সন্তি তেসং অব্যাকতা ধম্মা নিরুজ্ঝিস্সন্তি, নো চ তেসং অকুসলা ধম্মা উপ্পজ্জিস্সন্তি. ইতরেসং তেসং অব্যাকতা চ ধম্মা নিরুজ্ঝিস্সন্তি অকুসলা চ ধম্মা উপ্পজ্জিস্সন্তি.

(খ) অনুলোমওকাসো

১৮৯. (ক) যত্থ কুসলা ধম্মা উপ্পজ্জিস্সন্তি তত্থ অকুসলা ধম্মা নিরুজ্ঝিস্সন্তীতি? আমন্তা.

(খ) যত্থ ৰা পন অকুসলা ধম্মা নিরুজ্ঝিস্সন্তি তত্থ কুসলা ধম্মা উপ্পজ্জিস্সন্তীতি? আমন্তা.

(ক) যত্থ কুসলা ধম্মা উপ্পজ্জিস্সন্তি তত্থ অব্যাকতা ধম্মা নিরুজ্ঝিস্সন্তীতি? আমন্তা.

(খ) যত্থ ৰা পন অব্যাকতা ধম্মা নিরুজ্ঝিস্সন্তি তত্থ কুসলা ধম্মা উপ্পজ্জিস্সন্তীতি?

অসঞ্ঞসত্তে তত্থ অব্যাকতা ধম্মা নিরুজ্ঝিস্সন্তি, নো চ তত্থ কুসলা ধম্মা উপ্পজ্জিস্সন্তি. চতুৰোকারে পঞ্চৰোকারে তত্থ অব্যাকতা চ ধম্মা নিরুজ্ঝিস্সন্তি কুসলা চ ধম্মা উপ্পজ্জিস্সন্তি.

১৯০. (ক) যত্থ অকুসলা ধম্মা উপ্পজ্জিস্সন্তি তত্থ অব্যাকতা ধম্মা নিরুজ্ঝিস্সন্তীতি? আমন্তা.

(খ) যত্থ ৰা পন অব্যাকতা ধম্মা নিরুজ্ঝিস্সন্তি তত্থ অকুসলা ধম্মা উপ্পজ্জিস্সন্তীতি?

অসঞ্ঞসত্তে তত্থ অব্যাকতা ধম্মা নিরুজ্ঝিস্সন্তি, নো চ তত্থ অকুসলা ধম্মা উপ্পজ্জিস্সন্তি. চতুৰোকারে পঞ্চৰোকারে তত্থ অব্যাকতা চ ধম্মা নিরুজ্ঝিস্সন্তি অকুসলা চ ধম্মা উপ্পজ্জিস্সন্তি.

(গ) অনুলোমপুগ্গলোকাসা

১৯১. (ক) যস্স যত্থ কুসলা ধম্মা উপ্পজ্জিস্সন্তি তস্স তত্থ অকুসলা ধম্মা নিরুজ্ঝিস্সন্তীতি?

যস্স চিত্তস্স অনন্তরা অগ্গমগ্গং পটিলভিস্সন্তি তেসং তত্থ কুসলা ধম্মা উপ্পজ্জিস্সন্তি, নো চ তেসং তত্থ অকুসলা ধম্মা নিরুজ্ঝিস্সন্তি. ইতরেসং চতুৰোকারানং পঞ্চৰোকারানং তেসং তত্থ কুসলা চ ধম্মা উপ্পজ্জিস্সন্তি অকুসলা চ ধম্মা নিরুজ্ঝিস্সন্তি.

(খ) যস্স ৰা পন যত্থ অকুসলা ধম্মা নিরুজ্ঝিস্সন্তি তস্স তত্থ কুসলা ধম্মা উপ্পজ্জিস্সন্তীতি? আমন্তা.

(ক) যস্স যত্থ কুসলা ধম্মা উপ্পজ্জিস্সন্তি তস্স তত্থ অব্যাকতা ধম্মা নিরুজ্ঝিস্সন্তীতি? আমন্তা.

(খ) যস্স ৰা পন যত্থ অব্যাকতা ধম্মা নিরুজ্ঝিস্সন্তি তস্স তত্থ কুসলা ধম্মা উপ্পজ্জিস্সন্তীতি?

অগ্গমগ্গসমঙ্গীনং অরহন্তানং অসঞ্ঞসত্তানং তেসং তত্থ অব্যাকতা ধম্মা নিরুজ্ঝিস্সন্তি, নো চ তেসং তত্থ কুসলা ধম্মা উপ্পজ্জিস্সন্তি. ইতরেসং চতুৰোকারানং পঞ্চৰোকারানং তেসং তত্থ অব্যাকতা চ ধম্মা নিরুজ্ঝিস্সন্তি কুসলা চ ধম্মা উপ্পজ্জিস্সন্তি.

১৯২. (ক) যস্স যত্থ অকুসলা ধম্মা উপ্পজ্জিস্সন্তি তস্স তত্থ অব্যাকতা ধম্মা নিরুজ্ঝিস্সন্তীতি? আমন্তা.

(খ) যস্স ৰা পন যত্থ অব্যাকতা ধম্মা নিরুজ্ঝিস্সন্তি তস্স তত্থ অকুসলা ধম্মা উপ্পজ্জিস্সন্তীতি?

অগ্গমগ্গসমঙ্গীনং অরহন্তানং যস্স চিত্তস্স অনন্তরা অগ্গমগ্গং পটিলভিস্সন্তি, অসঞ্ঞসত্তানং তেসং তত্থ অব্যাকতা ধম্মা নিরুজ্ঝিস্সন্তি, নো চ তেসং তত্থ কুসলা ধম্মা উপ্পজ্জিস্সন্তি. ইতরেসং চতুৰোকারানং পঞ্চৰোকারানং তেসং তত্থ অব্যাকতা চ ধম্মা নিরুজ্ঝিস্সন্তি অকুসলা চ ধম্মা উপ্পজ্জিস্সন্তি.

(ঘ) পচ্চনীকপুগ্গলো

১৯৩. (ক) যস্স কুসলা ধম্মা ন উপ্পজ্জিস্সন্তি তস্স অকুসলা ধম্মা ন নিরুজ্ঝিস্সন্তীতি? আমন্তা.

(খ) যস্স ৰা পন অকুসলা ধম্মা ন নিরুজ্ঝিস্সন্তি তস্স কুসলা ধম্মা ন উপ্পজ্জিস্সন্তীতি?

যস্স চিত্তস্স অনন্তরা অগ্গমগ্গং পটিলভিস্সন্তি তেসং অকুসলা ধম্মা ন নিরুজ্ঝিস্সন্তি, নো চ তেসং কুসলা ধম্মা ন উপ্পজ্জিস্সন্তি. অগ্গমগ্গসমঙ্গীনং অরহন্তানং তেসং অকুসলা চ ধম্মা ন নিরুজ্ঝিস্সন্তি কুসলা চ ধম্মা ন উপ্পজ্জিস্সন্তি.

(ক) যস্স কুসলা ধম্মা ন উপ্পজ্জিস্সন্তি তস্স অব্যাকতা ধম্মা ন নিরুজ্ঝিস্সন্তীতি?

অগ্গমগ্গসমঙ্গীনং অরহন্তানং তেসং কুসলা ধম্মা ন উপ্পজ্জিস্সন্তি, নো চ তেসং অব্যাকতা ধম্মা ন নিরুজ্ঝিস্সন্তি. পচ্ছিমচিত্তস্স ভঙ্গক্খণে তেসং কুসলা চ ধম্মা ন উপ্পজ্জিস্সন্তি অব্যাকতা চ ধম্মা ন নিরুজ্ঝিস্সন্তি.

(খ) যস্স ৰা পন অব্যাকতা ধম্মা ন নিরুজ্ঝিস্সন্তি তস্স কুসলা ধম্মা ন উপ্পজ্জিস্সন্তীতি? আমন্তা.

১৯৪. (ক) যস্স অকুসলা ধম্মা ন উপ্পজ্জিস্সন্তি তস্স অব্যাকতা ধম্মা ন নিরুজ্ঝিস্সন্তীতি?

অগ্গমগ্গসমঙ্গীনং অরহন্তানং যস্স চিত্তস্স অনন্তরা অগ্গমগ্গং পটিলভিস্সন্তি তেসং অকুসলা ধম্মা ন উপ্পজ্জিস্সন্তি, নো চ তেসং অব্যাকতা ধম্মা ন নিরুজ্ঝিস্সন্তি. পচ্ছিমচিত্তস্স ভঙ্গক্খণে তেসং অকুসলা চ ধম্মা ন উপ্পজ্জিস্সন্তি অব্যাকতা চ ধম্মা ন নিরুজ্ঝিস্সন্তি.

(খ) যস্স ৰা পন অব্যাকতা ধম্মা ন নিরুজ্ঝিস্সন্তি তস্স অকুসলা ধম্মা ন উপ্পজ্জিস্সন্তীতি? আমন্তা.

(ঙ) পচ্চনীকওকাসো

১৯৫. (ক) যত্থ কুসলা ধম্মা ন উপ্পজ্জিস্সন্তি তত্থ অকুসলা ধম্মা ন নিরুজ্ঝিস্সন্তীতি? আমন্তা.

(খ) যত্থ ৰা পন অকুসলা ধম্মা ন নিরুজ্ঝিস্সন্তি তত্থ কুসলা ধম্মা ন উপ্পজ্জিস্সন্তীতি? আমন্তা.

(ক) যত্থ কুসলা ধম্মা ন উপ্পজ্জিস্সন্তি তত্থ অব্যাকতা ধম্মা ন নিরুজ্ঝিস্সন্তীতি? নিরুজ্ঝিস্সন্তি.

(খ) যত্থ ৰা পন অব্যাকতা ধম্মা ন নিরুজ্ঝিস্সন্তি তত্থ কুসলা ধম্মা ন উপ্পজ্জিস্সন্তীতি? নত্থি.

১৯৬. (ক) যত্থ অকুসলা ধম্মা ন উপ্পজ্জিস্সন্তি তত্থ অব্যাকতা ধম্মা ন নিরুজ্ঝিস্সন্তীতি? নিরুজ্ঝিস্সন্তি.

(খ) যত্থ ৰা পন অব্যাকতা ধম্মা ন নিরুজ্ঝিস্সন্তি তত্থ অকুসলা ধম্মা ন উপ্পজ্জিস্সন্তীতি? নত্থি.

(চ) পচ্চনীকপুগ্গলোকাসা

১৯৭. (ক) যস্স যত্থ কুসলা ধম্মা ন উপ্পজ্জিস্সন্তি তস্স তত্থ অকুসলা ধম্মা ন নিরুজ্ঝিস্সন্তীতি? আমন্তা.

(খ) যস্স ৰা পন যত্থ অকুসলা ধম্মা ন নিরুজ্ঝিস্সন্তি তস্স তত্থ কুসলা ধম্মা ন উপ্পজ্জিস্সন্তীতি?

যস্স চিত্তস্স অনন্তরা অগ্গমগ্গং পটিলভিস্সন্তি তেসং তত্থ অকুসলা ধম্মা ন নিরুজ্ঝিস্সন্তি, নো চ তেসং তত্থ কুসলা ধম্মা ন উপ্পজ্জিস্সন্তি. অগ্গমগ্গসমঙ্গীনং অরহন্তানং অসঞ্ঞসত্তানং তেসং তত্থ অকুসলা চ ধম্মা ন নিরুজ্ঝিস্সন্তি কুসলা চ ধম্মা ন উপ্পজ্জিস্সন্তি.

(ক) যস্স যত্থ কুসলা ধম্মা ন উপ্পজ্জিস্সন্তি তস্স তত্থ অব্যাকতা ধম্মা ন নিরুজ্ঝিস্সন্তীতি?

অগ্গমগ্গসমঙ্গীনং অরহন্তানং অসঞ্ঞসত্তানং তেসং তত্থ কুসলা ধম্মা ন উপ্পজ্জিস্সন্তি, নো চ তেসং তত্থ অব্যাকতা ধম্মা ন নিরুজ্ঝিস্সন্তি. পচ্ছিমচিত্তস্স ভঙ্গক্খণে তেসং তত্থ কুসলা চ ধম্মা ন উপ্পজ্জিস্সন্তি অব্যাকতা চ ধম্মা ন নিরুজ্ঝিস্সন্তি.

(খ) যস্স ৰা পন যত্থ অব্যাকতা ধম্মা ন নিরুজ্ঝিস্সন্তি তস্স তত্থ কুসলা ধম্মা ন উপ্পজ্জিস্সন্তীতি? আমন্তা.

১৯৮. (ক) যস্স যত্থ অকুসলা ধম্মা ন উপ্পজ্জিস্সন্তি তস্স তত্থ অব্যাকতা ধম্মা ন নিরুজ্ঝিস্সন্তীতি?

অগ্গমগ্গসমঙ্গীনং অরহন্তানং যস্স চিত্তস্স অনন্তরা অগ্গমগ্গং পটিলভিস্সন্তি অসঞ্ঞসত্তানং তেসং তত্থ অকুসলা ধম্মা ন উপ্পজ্জিস্সন্তি, নো চ তেসং তত্থ অব্যাকতা ধম্মা ন নিরুজ্ঝিস্সন্তি. পচ্ছিমচিত্তস্স ভঙ্গক্খণে তেসং তত্থ অকুসলা চ ধম্মা ন উপ্পজ্জিস্সন্তি অব্যাকতা চ ধম্মা ন নিরুজ্ঝিস্সন্তি.

(খ) যস্স ৰা পন যত্থ অব্যাকতা ধম্মা ন নিরুজ্ঝিস্সন্তি তস্স তত্থ অকুসলা ধম্মা ন উপ্পজ্জিস্সন্তীতি? আমন্তা.