(৯) নিরুজ্ঝমানুপ্পন্নৰারো

৯৮. (ক) যং চিত্তং নিরুজ্ঝমানং তং চিত্তং উপ্পন্নন্তি? আমন্তা.

(খ) যং ৰা পন চিত্তং উপ্পন্নং তং চিত্তং নিরুজ্ঝমানন্তি?

উপ্পাদক্খণে চিত্তং উপ্পন্নং, নো চ তং চিত্তং নিরুজ্ঝমানং. ভঙ্গক্খণে চিত্তং উপ্পন্নঞ্চেৰ নিরুজ্ঝমানঞ্চ.

(ক) যং চিত্তং ন নিরুজ্ঝমানং তং চিত্তং ন উপ্পন্নন্তি?

উপ্পাদক্খণে চিত্তং ন নিরুজ্ঝমানং, নো চ তং চিত্তং ন উপ্পন্নং. অতীতানাগতং চিত্তং ন চেৰ নিরুজ্ঝমানং ন চ উপ্পন্নং.

(খ) যং ৰা পন চিত্তং ন উপ্পন্নং তং চিত্তং ন নিরুজ্ঝমানন্তি? আমন্তা.