(১) পচ্চুপ্পন্নৰারো
(ক) অনুলোমপুগ্গলো
৭৯. (ক) যস্স কাযসঙ্খারো নিরুজ্ঝতি তস্স ৰচীসঙ্খারো নিরুজ্ঝতীতি?
ৰিনা ৰিতক্কৰিচারেহি অস্সাসপস্সাসানং ভঙ্গক্খণে তেসং কাযসঙ্খারো নিরুজ্ঝতি, নো চ তেসং ৰচীসঙ্খারো নিরুজ্ঝতি. পঠমজ্ঝানং সমাপন্নানং কামাৰচরানং অস্সাসপস্সাসানং ভঙ্গক্খণে তেসং কাযসঙ্খারো চ নিরুজ্ঝতি ৰচীসঙ্খারো চ নিরুজ্ঝতি.
(খ) যস্স ৰা পন ৰচীসঙ্খারো নিরুজ্ঝতি তস্স কাযসঙ্খারো নিরুজ্ঝতীতি?
ৰিনা অস্সাসপস্সাসেহি ৰিতক্কৰিচারানং ভঙ্গক্খণে তেসং ৰচীসঙ্খারো নিরুজ্ঝতি, নো চ তেসং কাযসঙ্খারো নিরুজ্ঝতি. পঠমজ্ঝানং সমাপন্নানং কামাৰচরানং অস্সাসপস্সাসানং ভঙ্গক্খণে তেসং ৰচীসঙ্খারো চ নিরুজ্ঝতি কাযসঙ্খারো চ নিরুজ্ঝতি.
(ক) যস্স কাযসঙ্খারো নিরুজ্ঝতি তস্স চিত্তসঙ্খারো নিরুজ্ঝতীতি? আমন্তা.
(খ) যস্স ৰা পন চিত্তসঙ্খারো নিরুজ্ঝতি তস্স কাযসঙ্খারো নিরুজ্ঝতীতি?
ৰিনা অস্সাসপস্সাসেহি চিত্তস্স ভঙ্গক্খণে তেসং চিত্তসঙ্খারো নিরুজ্ঝতি, নো চ তেসং কাযসঙ্খারো নিরুজ্ঝতি. অস্সাসপস্সাসানং ভঙ্গক্খণে তেসং চিত্তসঙ্খারো চ নিরুজ্ঝতি কাযসঙ্খারো চ নিরুজ্ঝতি.
৮০. (ক) যস্স ৰচীসঙ্খারো নিরুজ্ঝতি তস্স চিত্তসঙ্খারো নিরুজ্ঝতীতি? আমন্তা.
(খ) যস্স ৰা পন চিত্তসঙ্খারো নিরুজ্ঝতি তস্স ৰচীসঙ্খারো নিরুজ্ঝতীতি?
ৰিনা ৰিতক্কৰিচারেহি চিত্তস্স ভঙ্গক্খণে তেসং চিত্তসঙ্খারো নিরুজ্ঝতি, নো চ তেসং ৰচীসঙ্খারো নিরুজ্ঝতি. ৰিতক্কৰিচারানং ভঙ্গক্খণে তেসং চিত্তসঙ্খারো চ নিরুজ্ঝতি ৰচীসঙ্খারো চ নিরুজ্ঝতি.
(খ) অনুলোমওকাসো
৮১. যত্থ কাযসঙ্খারো নিরুজ্ঝতি তত্থ ৰচীসঙ্খারো নিরুজ্ঝতীতি?…পে….
(গ) অনুলোমপুগ্গলোকাসা
৮২. যস্স যত্থ কাযসঙ্খারো নিরুজ্ঝতি তস্স তত্থ ৰচীসঙ্খারো নিরুজ্ঝতীতি?…পে…. (যস্সকম্পি যস্সযত্থকম্পি সদিসং.)
(ঘ) পচ্চনীকপুগ্গলো
৮৩. (ক) যস্স কাযসঙ্খারো ন নিরুজ্ঝতি তস্স ৰচীসঙ্খারো ন নিরুজ্ঝতীতি?
ৰিনা অস্সাসপস্সাসেহি ৰিতক্কৰিচারানং ভঙ্গক্খণে তেসং কাযসঙ্খারো ন নিরুজ্ঝতি, নো চ তেসং ৰচীসঙ্খারো ন নিরুজ্ঝতি. সব্বেসং চিত্তস্স উপ্পাদক্খণে ৰিনা অস্সাসপস্সাসেহি অৰিতক্কঅৰিচারচিত্তস্স ভঙ্গক্খণে নিরোধসমাপন্নানং অসঞ্ঞসত্তানং তেসং কাযসঙ্খারো চ ন নিরুজ্ঝতি ৰচীসঙ্খারো চ ন নিরুজ্ঝতি.
(খ) যস্স ৰা পন ৰচীসঙ্খারো ন নিরুজ্ঝতি তস্স কাযসঙ্খারো ন নিরুজ্ঝতীতি?
ৰিনা ৰিতক্কৰিচারেহি অস্সাসপস্সাসানং ভঙ্গক্খণে তেসং ৰচীসঙ্খারো ন নিরুজ্ঝতি, নো চ তেসং কাযসঙ্খারো ন নিরুজ্ঝতি. সব্বেসং চিত্তস্স উপ্পাদক্খণে ৰিনা অস্সাসপস্সাসেহি অৰিতক্কঅৰিচারচিত্তস্স ভঙ্গক্খণে নিরোধসমাপন্নানং অসঞ্ঞসত্তানং তেসং ৰচীসঙ্খারো চ ন নিরুজ্ঝতি কাযসঙ্খারো চ ন নিরুজ্ঝতি.
(ক) যস্স কাযসঙ্খারো ন নিরুজ্ঝতি তস্স চিত্তসঙ্খারো ন নিরুজ্ঝতীতি?
ৰিনা অস্সাসপস্সাসেহি চিত্তস্স ভঙ্গক্খণে তেসং কাযসঙ্খারো ন নিরুজ্ঝতি, নো চ তেসং চিত্তসঙ্খারো ন নিরুজ্ঝতি. সব্বেসং চিত্তস্স উপ্পাদক্খণে নিরোধসমাপন্নানং অসঞ্ঞসত্তানং তেসং কাযসঙ্খারো চ ন নিরুজ্ঝতি চিত্তসঙ্খারো চ ন নিরুজ্ঝতি.
(খ) যস্স ৰা পন…পে…? আমন্তা.
৮৪. (ক) যস্স ৰচীসঙ্খারো ন নিরুজ্ঝতি তস্স চিত্তসঙ্খারো ন নিরুজ্ঝতীতি?
ৰিনা ৰিতক্কৰিচারেহি চিত্তস্স ভঙ্গক্খণে তেসং ৰচীসঙ্খারো ন নিরুজ্ঝতি, নো চ তেসং চিত্তসঙ্খারো ন নিরুজ্ঝতি. সব্বেসং চিত্তস্স উপ্পাদক্খণে নিরোধসমাপন্নানং অসঞ্ঞসত্তানং তেসং ৰচীসঙ্খারো চ ন নিরুজ্ঝতি চিত্তসঙ্খারো চ ন নিরুজ্ঝতি.
(খ) যস্স ৰা পন…পে…? আমন্তা.
(ঙ) পচ্চনীকওকাসা
৮৫. যত্থ কাযসঙ্খারো ন নিরুজ্ঝতি…পে….
(চ) পচ্চনীকপুগ্গলোকাসা
৮৬. যস্স যত্থ কাযসঙ্খারো ন নিরুজ্ঝতি তস্স তত্থ ৰচীসঙ্খারো ন নিরুজ্ঝতীতি?
ৰিনা অস্সাসপস্সাসেহি ৰিতক্কৰিচারানং ভঙ্গক্খণে তেসং তত্থ কাযসঙ্খারো ন নিরুজ্ঝতি, নো চ তেসং তত্থ ৰচীসঙ্খারো ন নিরুজ্ঝতি. সব্বেসং চিত্তস্স উপ্পাদক্খণে ৰিনা অস্সাসপস্সাসেহি অৰিতক্কঅৰিচারচিত্তস্স ভঙ্গক্খণে অসঞ্ঞসত্তানং তেসং তত্থ কাযসঙ্খারো চ ন নিরুজ্ঝতি ৰচীসঙ্খারো চ ন নিরুজ্ঝতি.
যস্স ৰা পন যত্থ ৰচীসঙ্খারো ন নিরুজ্ঝতি…পে….
(যস্সকম্পি যস্সযত্থকম্পি সদিসং ৰিত্থারেতব্বং, যস্সযত্থকে নিরোধসমাপন্নানন্তি ন কাতব্বং.)