১. অতীতাদিএকচ্চকথা

২৯৯. অতীতং অত্থীতি? একচ্চং অত্থি, একচ্চং নত্থীতি. একচ্চং নিরুদ্ধং, একচ্চং ন নিরুদ্ধং; একচ্চং ৰিগতং, একচ্চং অৰিগতং; একচ্চং অত্থঙ্গতং, একচ্চং ন অত্থঙ্গতং; একচ্চং অব্ভত্থঙ্গতং, একচ্চং ন অব্ভত্থঙ্গতন্তি? ন হেৰং ৰত্তব্বে…পে….

অতীতং একচ্চং অত্থি, একচ্চং নত্থীতি? আমন্তা. অতীতা অৰিপক্কৰিপাকা ধম্মা একচ্চে অত্থি, একচ্চে নত্থীতি? ন হেৰং ৰত্তব্বে…পে… অতীতং একচ্চং অত্থি, একচ্চং নত্থীতি? আমন্তা. অতীতা ৰিপক্কৰিপাকা ধম্মা একচ্চে অত্থি, একচ্চে নত্থীতি? ন হেৰং ৰত্তব্বে…পে… অতীতং একচ্চং অত্থি, একচ্চং নত্থীতি? আমন্তা. অতীতা অৰিপাকা ধম্মা একচ্চে অত্থি একচ্চে নত্থীতি? ন হেৰং ৰত্তব্বে…পে….

অতীতং একচ্চং অত্থি একচ্চং নত্থীতি? আমন্তা. কিং অত্থি কিং নত্থীতি? অতীতা অৰিপক্কৰিপাকা ধম্মা – তে অত্থি; অতীতা ৰিপক্কৰিপাকা ধম্মা – তে নত্থীতি. অতীতা অৰিপক্কৰিপাকা ধম্মা – তে অত্থীতি? আমন্তা. অতীতা ৰিপক্কৰিপাকা ধম্মা – তে অত্থীতি? ন হেৰং ৰত্তব্বে…পে… অতীতা অৰিপক্কৰিপাকা ধম্মা – তে অত্থীতি? আমন্তা. অতীতা অৰিপাকা ধম্মা – তে অত্থীতি [অতীতা অৰিপক্কৰিপাকা ধম্মা তে নত্থীতি (ক.)]? ন হেৰং ৰত্তব্বে…পে….

অতীতা ৰিপক্কৰিপাকা ধম্মা – তে নত্থীতি? আমন্তা. অতীতা অৰিপক্কৰিপাকা ধম্মা – তে নত্থীতি? ন হেৰং ৰত্তব্বে …পে….

অতীতা অৰিপাকা [ৰিপক্কৰিপাকা (স্যা.), অৰিপক্কৰিপাকা (ক.)] ধম্মা – তে নত্থীতি? আমন্তা. অতীতা অৰিপক্কৰিপাকা [অৰিপাকা (স্যা.)] ধম্মা – তে নত্থীতি? ন হেৰং ৰত্তব্বে…পে….

অতীতা অৰিপক্কৰিপাকা ধম্মা – তে অত্থীতি? আমন্তা. ননু অতীতা অৰিপক্কৰিপাকা ধম্মা নিরুদ্ধাতি? আমন্তা. হঞ্চি অতীতা অৰিপক্কৰিপাকা ধম্মা নিরুদ্ধা, নো চ ৰত রে ৰত্তব্বে – ‘‘অতীতা অৰিপক্কৰিপাকা ধম্মা – তে [ধম্মা নিরুদ্ধা তে (স্যা. ক.)] অত্থী’’তি.

অতীতা অৰিপক্কৰিপাকা ধম্মা নিরুদ্ধা – তে অত্থীতি? আমন্তা. অতীতা ৰিপক্কৰিপাকা ধম্মা নিরুদ্ধা – তে অত্থীতি? ন হেৰং ৰত্তব্বে…পে… অতীতা অৰিপক্কৰিপাকা ধম্মা নিরুদ্ধা – তে অত্থীতি? আমন্তা. অতীতা অৰিপাকা [অৰিপক্কৰিপাকা (সী. ক.)] ধম্মা নিরুদ্ধা – তে অত্থীতি? ন হেৰং ৰত্তব্বে…পে….

অতীতা ৰিপক্কৰিপাকা ধম্মা নিরুদ্ধা – তে নত্থীতি? আমন্তা. অতীতা অৰিপক্কৰিপাকা ধম্মা নিরুদ্ধা – তে নত্থীতি? ন হেৰং ৰত্তব্বে…পে….

অতীতা অৰিপাকা [ৰিপক্কৰিপাকা (স্যা.), অৰিপক্কৰিপাকা (ক.)] ধম্মা নিরুদ্ধা – তে নত্থীতি? আমন্তা. অতীতা অৰিপক্কৰিপাকা [অৰিপাকা (স্যা.)] ধম্মা নিরুদ্ধা – তে নত্থীতি? ন হেৰং ৰত্তব্বে…পে….

অতীতা অৰিপক্কৰিপাকা ধম্মা নিরুদ্ধা – তে অত্থীতি? আমন্তা. অতীতা ৰিপক্কৰিপাকা ধম্মা নিরুদ্ধা – তে নত্থীতি? আমন্তা. অতীতা একদেসং ৰিপক্কৰিপাকা ধম্মা একদেসং অৰিপক্কৰিপাকা ধম্মা নিরুদ্ধা – তে একচ্চে অত্থি একচ্চে নত্থীতি? ন হেৰং ৰত্তব্বে…পে….

ন ৰত্তব্বং – ‘‘অতীতা অৰিপক্কৰিপাকা ধম্মা – তে অত্থী’’তি? আমন্তা. ননু অতীতা অৰিপক্কৰিপাকা ধম্মা ৰিপচ্চিস্সন্তীতি? আমন্তা. হঞ্চি অতীতা অৰিপক্কৰিপাকা ধম্মা ৰিপচ্চিস্সন্তি, তেন ৰত রে ৰত্তব্বে – ‘‘অতীতা অৰিপক্কৰিপাকা ধম্মা – তে অত্থী’’তি.

অতীতা অৰিপক্কৰিপাকা ধম্মা ৰিপচ্চিস্সন্তীতি কত্ৰা তে অত্থীতি? আমন্তা. ৰিপচ্চিস্সন্তীতি কত্ৰা পচ্চুপ্পন্নাতি? ন হেৰং ৰত্তব্বে…পে… ৰিপচ্চিস্সন্তীতি কত্ৰা পচ্চুপ্পন্নাতি? আমন্তা. পচ্চুপ্পন্না ধম্মা নিরুজ্ঝিস্সন্তীতি কত্ৰা তে নত্থীতি? ন হেৰং ৰত্তব্বে…পে….