২. সুত্তাহরণকথা

২৮১. অনাগামিমগ্গেন সক্কাযদিট্ঠিং ৰিচিকিচ্ছং সীলব্বতপরামাসং জহতীতি? আমন্তা. ননু তিণ্ণং সংযোজনানং পহানা সোতাপত্তিফলং ৰুত্তং ভগৰতাতি? আমন্তা. হঞ্চি তিণ্ণং সংযোজনানং পহানা সোতাপত্তিফলং ৰুত্তং ভগৰতা, নো চ ৰত রে ৰত্তব্বে – ‘‘অনাগামিমগ্গেন সক্কাযদিট্ঠিং ৰিচিকিচ্ছং সীলব্বতপরামাসং জহতী’’তি. অনাগামিমগ্গেন ওল়ারিকং কামরাগং ওল়ারিকং ব্যাপাদং জহতীতি? ন হেৰং ৰত্তব্বে…পে….

অনাগামিমগ্গেন ওল়ারিকং কামরাগং ওল়ারিকং ব্যাপাদং জহতীতি? আমন্তা. ননু কামরাগব্যাপাদানং তনুভাৰা সকদাগামিফলং ৰুত্তং ভগৰতাতি? আমন্তা. হঞ্চি কামরাগব্যাপাদানং তনুভাৰা সকদাগামিফলং ৰুত্তং ভগৰতা, নো চ ৰত রে ৰত্তব্বে – ‘‘অনাগামিমগ্গেন ওল়ারিকং কামরাগং ওল়ারিকং ব্যাপাদং জহতী’’তি.

পুথুজ্জনো কামেসু ৰীতরাগো সহ ধম্মাভিসমযা অনাগামিফলে সণ্ঠাতীতি? আমন্তা. যে কেচি ধম্মং অভিসমেন্তি, সব্বে তে সহ ধম্মাভিসমযা অনাগামিফলে সণ্ঠহন্তীতি? ন হেৰং ৰত্তব্বে…পে….

ন ৰত্তব্বং – ‘‘জহতি পুথুজ্জনো কামরাগব্যাপাদ’’ন্তি? আমন্তা. ননু ৰুত্তং ভগৰতা –

‘‘অহেসুং তে [অহিংসকা (অ. নি. ৬.৫৪)] অতীতংসে, ছ সত্থারো যসস্সিনো;

নিরামগন্ধা করুণেধিমুত্তা [করুণাধিমুত্তা (সী. ক.)], কামসংযোজনাতিগা.

‘‘কামরাগং ৰিরাজেত্ৰা, ব্রহ্মলোকূপগা অহু;

অহেসুং সাৰকা তেসং, অনেকানি সতানিপি.

‘‘নিরামগন্ধা করুণেধিমুত্তা, কামসংযোজনাতিগা;

কামরাগং ৰিরাজেত্ৰা, ব্রহ্মলোকূপগা অহূ’’তি [অ. নি. ৬.৫৪].

অত্থেৰ সুত্তন্তোতি? আমন্তা. তেন হি জহতি পুথুজ্জনো কামরাগব্যাপাদন্তি.

জহতি পুথুজ্জনো কামরাগব্যাপাদন্তি? আমন্তা. ননু ৰুত্তং ভগৰতা – ‘‘সো হি নাম, ভিক্খৰে, সুনেত্তো সত্থা এৰং দীঘাযুকো সমানো এৰং চিরট্ঠিতিকো অপরিমুত্তো অহোসি জাতিযা জরায মরণেন সোকেহি পরিদেৰেহি দুক্খেহি দোমনস্সেহি উপাযাসেহি অপরিমুত্তো দুক্খস্মাতি ৰদামি. তং কিস্স হেতু? চতুন্নং ধম্মানং অননুবোধা অপ্পটিৰেধা. কতমেসং চতুন্নং? অরিযস্স সীলস্স অননুবোধা অপ্পটিৰেধা, অরিযস্স সমাধিস্স, অরিযায পঞ্ঞায, অরিযায ৰিমুত্তিযা অননুবোধা অপ্পটিৰেধা. তযিদং, ভিক্খৰে, অরিযং সীলং অনুবুদ্ধং পটিৰিদ্ধং, অরিযো সমাধি অনুবুদ্ধো পটিৰিদ্ধো, অরিযা পঞ্ঞা অনুবুদ্ধা পটিৰিদ্ধা, অরিযা ৰিমুত্তি অনুবুদ্ধা পটিৰিদ্ধা, উচ্ছিন্না ভৰতণ্হা, খীণা ভৰনেত্তি, নত্থি দানি পুনব্ভৰোতি.

‘‘সীলং সমাধি পঞ্ঞা চ, ৰিমুত্তি চ অনুত্তরা;

অনুবুদ্ধা ইমে ধম্মা, গোতমেন যসস্সিনা.

‘‘ইতি বুদ্ধো অভিঞ্ঞায, ধম্মমক্খাসি ভিক্খুনং;

দুক্খস্সন্তকরো সত্থা, চক্খুমা পরিনিব্বুতো’’তি [অ. নি. ৭.৬৬].

অত্থেৰ সুত্তন্তোতি? আমন্তা. তেন হি ন ৰত্তব্বং – ‘‘জহতি পুথুজ্জনো কামরাগব্যাপাদ’’ন্তি.

জহতিকথা নিট্ঠিতা.