১৬. সোল়সমৰগ্গো

(১৫৮) ৩. সুখানুপ্পদানকথা

৭৪৭. পরো পরস্স সুখং অনুপ্পদেতীতি? আমন্তা. পরো পরস্স দুক্খং অনুপ্পদেতীতি? ন হেৰং ৰত্তব্বে…পে… পরো পরস্স দুক্খং ন অনুপ্পদেতীতি? আমন্তা. পরো পরস্স সুখং ন অনুপ্পদেতীতি? ন হেৰং ৰত্তব্বে…পে… পরো পরস্স সুখং অনুপ্পদেতীতি? আমন্তা. পরো পরস্স অত্তনো সুখং অনুপ্পদেতি, অঞ্ঞেসং সুখং অনুপ্পদেতি, তস্স সুখং অনুপ্পদেতীতি? ন হেৰং ৰত্তব্বে…পে… পরো পরস্স নেৰত্তনো, ন অঞ্ঞেসং, ন তস্স সুখং অনুপ্পদেতীতি? আমন্তা. হঞ্চি পরো পরস্স নেৰত্তনো, ন অঞ্ঞেসং, ন তস্স সুখং অনুপ্পদেতি, নো চ ৰত রে ৰত্তব্বে – ‘‘পরো পরস্স সুখং অনুপ্পদেতী’’তি.

পরো পরস্স সুখং অনুপ্পদেতীতি? আমন্তা. অঞ্ঞো অঞ্ঞস্স কারকো, পরঙ্কতং সুখং দুক্খং অঞ্ঞো করোতি অঞ্ঞো পটিসংৰেদেতীতি? ন হেৰং ৰত্তব্বে…পে….

৭৪৮. ন ৰত্তব্বং – ‘‘পরো পরস্স সুখং অনুপ্পদেতী’’তি? আমন্তা. ননু আযস্মা উদাযী এতদৰোচ – ‘‘বহূনং ৰত নো ভগৰা দুক্খধম্মানং অপহত্তা, বহূনং ৰত নো ভগৰা সুখধম্মানং উপহত্তা, বহূনং ৰত নো ভগৰা অকুসলানং ধম্মানং অপহত্তা, বহূনং ৰত নো ভগৰা কুসলানং ধম্মানং উপহত্তা’’তি [ম. নি. ২.১৪৮ লটুকিকোপমে]! অত্থেৰ সুত্তন্তোতি? আমন্তা. তেন হি পরো পরস্স সুখং অনুপ্পদেতীতি.

সুখানুপ্পদানকথা নিট্ঠিতা.