২. পরিহানিকথা

১. ৰাদযুত্তিপরিহানি

২৩৯. পরিহাযতি অরহা অরহত্তাতি? আমন্তা. সব্বত্থ অরহা অরহত্তা পরিহাযতীতি? ন হেৰং ৰত্তব্বে…পে… সব্বত্থ অরহা অরহত্তা পরিহাযতীতি? আমন্তা. সব্বত্থ অরহতো পরিহানীতি? ন হেৰং ৰত্তব্বে…পে….

পরিহাযতি অরহা অরহত্তাতি? আমন্তা. সব্বদা অরহা অরহত্তা পরিহাযতীতি? ন হেৰং ৰত্তব্বে…পে… সব্বদা অরহা অরহত্তা পরিহাযতীতি? আমন্তা. সব্বদা অরহতো পরিহানীতি? ন হেৰং ৰত্তব্বে…পে….

পরিহাযতি অরহা অরহত্তাতি? আমন্তা. সব্বেৰ অরহন্তো অরহত্তা পরিহাযন্তীতি? ন হেৰং ৰত্তব্বে…পে… সব্বেৰ অরহন্তো অরহত্তা পরিহাযন্তীতি? আমন্তা. সব্বেসংযেৰ অরহন্তানং পরিহানীতি? ন হেৰং ৰত্তব্বে…পে….

পরিহাযতি অরহা অরহত্তাতি? আমন্তা. অরহা অরহত্তা পরিহাযমানো চতূহি ফলেহি পরিহাযতীতি? ন হেৰং ৰত্তব্বে…পে….

চতূহি সতসহস্সেহি সেট্ঠী সেট্ঠিত্তং কারেন্তো সতসহস্সে পরিহীনে সেট্ঠিত্তা পরিহীনো হোতীতি? আমন্তা. সব্বসাপতেয্যা পরিহীনো হোতীতি? ন হেৰং ৰত্তব্বে…পে….

চতূহি সতসহস্সেহি সেট্ঠী সেট্ঠিত্তং কারেন্তো সতসহস্সে পরিহীনে ভব্বো সব্বসাপতেয্যা পরিহাযিতুন্তি? আমন্তা. অরহা অরহত্তা পরিহাযমানো ভব্বো চতূহি ফলেহি পরিহাযিতুন্তি? ন হেৰং ৰত্তব্বে…পে….

২. অরিযপুগ্গলসংসন্দনপরিহানি

২৪০. পরিহাযতি অরহা অরহত্তাতি? আমন্তা. পরিহাযতি সোতাপন্নো সোতাপত্তিফলাতি? ন হেৰং ৰত্তব্বে…পে….

পরিহাযতি অরহা অরহত্তাতি? আমন্তা. পরিহাযতি সকদাগামী সকদাগামিফলাতি? ন হেৰং ৰত্তব্বে…পে….

পরিহাযতি অরহা অরহত্তাতি? আমন্তা. পরিহাযতি অনাগামী অনাগামিফলাতি? ন হেৰং ৰত্তব্বে…পে….

পরিহাযতি অনাগামী অনাগামিফলাতি? আমন্তা. পরিহাযতি সোতাপন্নো সোতাপত্তিফলাতি? ন হেৰং ৰত্তব্বে…পে….

পরিহাযতি অনাগামী অনাগামিফলাতি? আমন্তা. পরিহাযতি সকদাগামী সকদাগামিফলাতি? ন হেৰং ৰত্তব্বে…পে….

পরিহাযতি সকদাগামী সকদাগামিফলাতি? আমন্তা. পরিহাযতি সোতাপন্নো সোতাপত্তিফলাতি? ন হেৰং ৰত্তব্বে…পে….

ন পরিহাযতি সোতাপন্নো সোতাপত্তিফলাতি? আমন্তা. ন পরিহাযতি অরহা অরহত্তাতি? ন হেৰং ৰত্তব্বে…পে….

ন পরিহাযতি সকদাগামী সকদাগামিফলাতি? আমন্তা. ন পরিহাযতি অরহা অরহত্তাতি? ন হেৰং ৰত্তব্বে…পে….

ন পরিহাযতি অনাগামী অনাগামিফলাতি? আমন্তা. ন পরিহাযতি অরহা অরহত্তাতি? ন হেৰং ৰত্তব্বে…পে….

ন পরিহাযতি সোতাপন্নো সোতাপত্তিফলাতি? আমন্তা. ন পরিহাযতি অনাগামী অনাগামিফলাতি? ন হেৰং ৰত্তব্বে…পে….

ন পরিহাযতি সকদাগামী সকদাগামিফলাতি? আমন্তা. ন পরিহাযতি অনাগামী অনাগামিফলাতি? ন হেৰং ৰত্তব্বে…পে….

ন পরিহাযতি সোতাপন্নো সোতাপত্তিফলাতি? আমন্তা. ন পরিহাযতি সকদাগামী সকদাগামিফলাতি? ন হেৰং ৰত্তব্বে…পে….

২৪১. পরিহাযতি অরহা অরহত্তাতি? আমন্তা. অরহা অরহত্তা পরিহাযমানো কত্থ সণ্ঠাতীতি? অনাগামিফলেতি. অনাগামী অনাগামিফলা পরিহাযমানো কত্থ সণ্ঠাতীতি? সকদাগামিফলেতি. সকদাগামী সকদাগামিফলা পরিহাযমানো কত্থ সণ্ঠাতীতি? সোতাপত্তিফলেতি. সোতাপন্নো সোতাপত্তিফলা পরিহাযমানো পুথুজ্জনভূমিযং সণ্ঠাতীতি? ন হেৰং ৰত্তব্বে.

আজানাহি নিগ্গহং. হঞ্চি অরহা অরহত্তা পরিহাযমানো অনাগামিফলে সণ্ঠাতি, অনাগামী অনাগামিফলা পরিহাযমানো সকদাগামিফলে সণ্ঠাতি, সকদাগামী সকদাগামিফলা পরিহাযমানো সোতাপত্তিফলে সণ্ঠাতি; তেন ৰত রে ৰত্তব্বে – ‘‘সোতাপন্নো সোতাপত্তিফলা পরিহাযমানো পুথুজ্জনভূমিযং সণ্ঠাতী’’তি.

অরহা অরহত্তা পরিহাযমানো সোতাপত্তিফলে সণ্ঠাতীতি? আমন্তা. সোতাপত্তিফলস্স অনন্তরা অরহত্তংযেৰ সচ্ছিকরোতীতি? ন হেৰং ৰত্তব্বে…পে….

২৪২. পরিহাযতি অরহা অরহত্তাতি? আমন্তা. পরিহাযতি সোতাপন্নো সোতাপত্তিফলাতি? ন হেৰং ৰত্তব্বে…পে… কস্স বহুতরা কিলেসা পহীনা অরহতো ৰা সোতাপন্নস্স ৰাতি? অরহতো. হঞ্চি অরহতো বহুতরা কিলেসা পহীনা, পরিহাযতি অরহা অরহত্তা; তেন ৰত রে ৰত্তব্বে – ‘‘পরিহাযতি সোতাপন্নো সোতাপত্তিফলা’’তি.

পরিহাযতি অরহা অরহত্তাতি? আমন্তা. পরিহাযতি সকদাগামী সকদাগামিফলাতি? ন হেৰং ৰত্তব্বে…পে… কস্স বহুতরা কিলেসা পহীনা অরহতো ৰা সকদাগামিস্স ৰাতি? অরহতো. হঞ্চি অরহতো বহুতরা কিলেসা পহীনা, পরিহাযতি অরহা অরহত্তা; তেন ৰত রে ৰত্তব্বে – ‘‘পরিহাযতি সকদাগামী সকদাগামিফলা’’তি.

পরিহাযতি অরহা অরহত্তাতি? আমন্তা. পরিহাযতি অনাগামী অনাগামিফলাতি? ন হেৰং ৰত্তব্বে…পে… কস্স বহুতরা কিলেসা পহীনা অরহতো ৰা অনাগামিস্স ৰাতি? অরহতো. হঞ্চি অরহতো বহুতরা কিলেসা পহীনা, পরিহাযতি অরহা অরহত্তা; তেন ৰত রে ৰত্তব্বে – ‘‘পরিহাযতি অনাগামী অনাগামিফলা’’তি.

পরিহাযতি অনাগামী অনাগামিফলাতি? আমন্তা. পরিহাযতি সোতাপন্নো সোতাপত্তিফলাতি? ন হেৰং ৰত্তব্বে…পে… কস্স বহুতরা কিলেসা পহীনা অনাগামিস্স ৰা সোতাপন্নস্স ৰাতি? অনাগামিস্স. হঞ্চি অনাগামিস্স বহুতরা কিলেসা পহীনা, পরিহাযতি অনাগামী অনাগামিফলা; তেন ৰত রে ৰত্তব্বে – ‘‘পরিহাযতি সোতাপন্নো সোতাপত্তিফলা’’তি.

২৪৩. পরিহাযতি অনাগামী অনাগামিফলাতি? আমন্তা. পরিহাযতি সকদাগামী সকদাগামিফলাতি? ন হেৰং ৰত্তব্বে…পে… কস্স বহুতরা কিলেসা পহীনা অনাগামিস্স ৰা সকদাগামিস্স ৰাতি? অনাগামিস্স. হঞ্চি অনাগামিস্স বহুতরা কিলেসা পহীনা, পরিহাযতি অনাগামী অনাগামিফলা; তেন ৰত রে ৰত্তব্বে – ‘‘পরিহাযতি সকদাগামী সকদাগামিফলা’’তি.

পরিহাযতি সকদাগামী সকদাগামিফলাতি? আমন্তা. পরিহাযতি সোতাপন্নো সোতাপত্তিফলাতি? ন হেৰং ৰত্তব্বে…পে… কস্স বহুতরা কিলেসা পহীনা সকদাগামিস্স ৰা সোতাপন্নস্স ৰাতি? সকদাগামিস্স. হঞ্চি সকদাগামিস্স বহুতরা কিলেসা পহীনা, পরিহাযতি সকদাগামী সকদাগামিফলা; তেন ৰত রে ৰত্তব্বে – ‘‘পরিহাযতি সোতাপন্নো সোতাপত্তিফলা’’তি.

২৪৪. পরিহাযতি অরহা অরহত্তাতি? আমন্তা. পরিহাযতি সোতাপন্নো সোতাপত্তিফলাতি? ন হেৰং ৰত্তব্বে…পে… কস্স অধিমত্তা মগ্গভাৰনা অরহতো ৰা সোতাপন্নস্স ৰাতি? অরহতো. হঞ্চি অরহতো অধিমত্তা মগ্গভাৰনা, পরিহাযতি অরহা অরহত্তা; তেন ৰত রে ৰত্তব্বে – ‘‘পরিহাযতি সোতাপন্নো সোতাপত্তিফলা’’তি.

পরিহাযতি অরহা অরহত্তাতি? আমন্তা. পরিহাযতি সোতাপন্নো সোতাপত্তিফলাতি? ন হেৰং ৰত্তব্বে…পে… কস্স অধিমত্তা সতিপট্ঠানভাৰনা…পে… সম্মপ্পধানভাৰনা… ইদ্ধিপাদভাৰনা… ইন্দ্রিযভাৰনা … বলভাৰনা… বোজ্ঝঙ্গভাৰনা অরহতো ৰা সোতাপন্নস্স ৰাতি? অরহতো. হঞ্চি অরহতো অধিমত্তা বোজ্ঝঙ্গভাৰনা, পরিহাযতি অরহা অরহত্তা; তেন ৰত রে ৰত্তব্বে – ‘‘পরিহাযতি সোতাপন্নো সোতাপত্তিফলা’’তি.

পরিহাযতি অরহা অরহত্তাতি? আমন্তা. পরিহাযতি সকদাগামী সকদাগামিফলাতি? ন হেৰং ৰত্তব্বে…পে… কস্স অধিমত্তা মগ্গভাৰনা…পে… বোজ্ঝঙ্গভাৰনা অরহতো ৰা সকদাগামিস্স ৰাতি? অরহতো. হঞ্চি অরহতো অধিমত্তা বোজ্ঝঙ্গভাৰনা, পরিহাযতি অরহা অরহত্তা; তেন ৰত রে ৰত্তব্বে – ‘‘পরিহাযতি সকদাগামী সকদাগামিফলা’’তি.

পরিহাযতি অরহা অরহত্তাতি? আমন্তা. পরিহাযতি অনাগামী অনাগামিফলাতি? ন হেৰং ৰত্তব্বে…পে… কস্স অধিমত্তা মগ্গভাৰনা…পে… বোজ্ঝঙ্গভাৰনা অরহতো ৰা অনাগামিস্স ৰাতি? অরহতো. হঞ্চি অরহতো অধিমত্তা বোজ্ঝঙ্গভাৰনা, পরিহাযতি অরহা অরহত্তা; তেন ৰত রে ৰত্তব্বে – ‘‘পরিহাযতি অনাগামী অনাগামিফলা’’তি.

২৪৫. পরিহাযতি অনাগামী অনাগামিফলাতি? আমন্তা. পরিহাযতি সোতাপন্নো সোতাপত্তিফলাতি? ন হেৰং ৰত্তব্বে…পে… কস্স অধিমত্তা মগ্গভাৰনা…পে… বোজ্ঝঙ্গভাৰনা অনাগামিস্স ৰা সোতাপন্নস্স ৰাতি? অনাগামিস্স. হঞ্চি অনাগামিস্স অধিমত্তা বোজ্ঝঙ্গভাৰনা, পরিহাযতি অনাগামী অনাগামিফলা; তেন ৰত রে ৰত্তব্বে – ‘‘পরিহাযতি সোতাপন্নো সোতাপত্তিফলা’’তি.

পরিহাযতি অনাগামী অনাগামিফলাতি? আমন্তা. পরিহাযতি সকদাগামী সকদাগামিফলাতি? ন হেৰং ৰত্তব্বে…পে… কস্স অধিমত্তা মগ্গভাৰনা…পে… বোজ্ঝঙ্গভাৰনা অনাগামিস্স ৰা সকদাগামিস্স ৰাতি? অনাগামিস্স. হঞ্চি অনাগামিস্স অধিমত্তা বোজ্ঝঙ্গভাৰনা, পরিহাযতি অনাগামী অনাগামিফলা; তেন ৰত রে ৰত্তব্বে – ‘‘পরিহাযতি সকদাগামী সকদাগামিফলা’’তি.

২৪৬. পরিহাযতি সকদাগামী সকদাগামিফলাতি? আমন্তা. পরিহাযতি সোতাপন্নো সোতাপত্তিফলাতি? ন হেৰং ৰত্তব্বে…পে… কস্স অধিমত্তা মগ্গভাৰনা…পে… বোজ্ঝঙ্গভাৰনা সকদাগামিস্স ৰা সোতাপন্নস্স ৰাতি? সকদাগামিস্স. হঞ্চি সকদাগামিস্স অধিমত্তা বোজ্ঝঙ্গভাৰনা, পরিহাযতি সকদাগামী সকদাগামিফলা; তেন ৰত রে ৰত্তব্বে – ‘‘পরিহাযতি সোতাপন্নো সোতাপত্তিফলা’’তি…পে….

২৪৭. অরহতা দুক্খং দিট্ঠং, পরিহাযতি অরহা অরহত্তাতি? আমন্তা. সোতাপন্নেন দুক্খং দিট্ঠং, পরিহাযতি সোতাপন্নো সোতাপত্তিফলাতি? ন হেৰং ৰত্তব্বে…পে….

অরহতা সমুদযো দিট্ঠো, পরিহাযতি অরহা অরহত্তাতি? আমন্তা. সোতাপন্নেন সমুদযো দিট্ঠো, পরিহাযতি সোতাপন্নো সোতাপত্তিফলাতি? ন হেৰং ৰত্তব্বে…পে….

অরহতা নিরোধো দিট্ঠো, পরিহাযতি অরহা অরহত্তাতি? আমন্তা. সোতাপন্নেন নিরোধো দিট্ঠো, পরিহাযতি সোতাপন্নো সোতাপত্তিফলাতি? ন হেৰং ৰত্তব্বে…পে….

অরহতা মগ্গো দিট্ঠো, পরিহাযতি অরহা অরহত্তাতি? আমন্তা. সোতাপন্নেন মগ্গো দিট্ঠো, পরিহাযতি সোতাপন্নো সোতাপত্তিফলাতি? ন হেৰং ৰত্তব্বে…পে….

অরহতা চত্তারি সচ্চানি দিট্ঠানি, পরিহাযতি অরহা অরহত্তাতি? আমন্তা. সোতাপন্নেন চত্তারি সচ্চানি দিট্ঠানি, পরিহাযতি সোতাপন্নো সোতাপত্তিফলাতি? ন হেৰং ৰত্তব্বে…পে….

অরহতা দুক্খং দিট্ঠং, পরিহাযতি অরহা অরহত্তাতি? আমন্তা. সকদাগামিনা দুক্খং দিট্ঠং, পরিহাযতি সকদাগামী সকদাগামিফলাতি? ন হেৰং ৰত্তব্বে…পে….

অরহতা সমুদযো দিট্ঠো…পে… নিরোধো দিট্ঠো…পে… মগ্গো দিট্ঠো…পে… চত্তারি সচ্চানি দিট্ঠানি, পরিহাযতি অরহা অরহত্তাতি? আমন্তা. সকদাগামিনা চত্তারি সচ্চানি দিট্ঠানি, পরিহাযতি সকদাগামী সকদাগামিফলাতি? ন হেৰং ৰত্তব্বে…পে….

অরহতা দুক্খং দিট্ঠং, পরিহাযতি অরহা অরহত্তাতি? আমন্তা. অনাগামিনা দুক্খং দিট্ঠং, পরিহাযতি অনাগামী অনাগামিফলাতি? ন হেৰং ৰত্তব্বে…পে….

অরহতা সমুদযো দিট্ঠো…পে… নিরোধো দিট্ঠো…পে… মগ্গো দিট্ঠো…পে… চত্তারি সচ্চানি দিট্ঠানি, পরিহাযতি অরহা অরহত্তাতি? আমন্তা. অনাগামিনা চত্তারি সচ্চানি দিট্ঠানি, পরিহাযতি অনাগামী অনাগামিফলাতি? ন হেৰং ৰত্তব্বে…পে….

২৪৮. অনাগামিনা দুক্খং দিট্ঠং, পরিহাযতি অনাগামী অনাগামিফলাতি? আমন্তা. সোতাপন্নেন দুক্খং দিট্ঠং, পরিহাযতি সোতাপন্নো সোতাপত্তিফলাতি? ন হেৰং ৰত্তব্বে…পে….

অনাগামিনা সমুদযো দিট্ঠো…পে… নিরোধো দিট্ঠো…পে… মগ্গো দিট্ঠো…পে… চত্তারি সচ্চানি দিট্ঠানি, পরিহাযতি অনাগামী অনাগামিফলাতি? আমন্তা. সোতাপন্নেন চত্তারি সচ্চানি দিট্ঠানি, পরিহাযতি সোতাপন্নো সোতাপত্তিফলাতি? ন হেৰং ৰত্তব্বে…পে….

অনাগামিনা দুক্খং দিট্ঠং, পরিহাযতি অনাগামী অনাগামিফলাতি? আমন্তা. সকদাগামিনা দুক্খং দিট্ঠং, পরিহাযতি সকদাগামী সকদাগামিফলাতি? ন হেৰং ৰত্তব্বে…পে….

অনাগামিনা সমুদযো দিট্ঠো…পে… নিরোধো দিট্ঠো…পে… মগ্গো দিট্ঠো…পে… চত্তারি সচ্চানি দিট্ঠানি, পরিহাযতি অনাগামী অনাগামিফলাতি? আমন্তা. সকদাগামিনা চত্তারি সচ্চানি দিট্ঠানি, পরিহাযতি সকদাগামী সকদাগামিফলাতি? ন হেৰং ৰত্তব্বে…পে….

২৪৯. সকদাগামিনা দুক্খং দিট্ঠং, পরিহাযতি সকদাগামী সকদাগামিফলাতি? আমন্তা. সোতাপন্নেন দুক্খং দিট্ঠং, পরিহাযতি সোতাপন্নো সোতাপত্তিফলাতি? ন হেৰং ৰত্তব্বে…পে….

সকদাগামিনা সমুদযো দিট্ঠো…পে… নিরোধো দিট্ঠো…পে… মগ্গো দিট্ঠো…পে… চত্তারি সচ্চানি দিট্ঠানি, পরিহাযতি সকদাগামী সকদাগামিফলাতি? আমন্তা. সোতাপন্নেন চত্তারি সচ্চানি দিট্ঠানি, পরিহাযতি সোতাপন্নো সোতাপত্তিফলাতি? ন হেৰং ৰত্তব্বে…পে….

২৫০. সোতাপন্নেন দুক্খং দিট্ঠং, ন পরিহাযতি সোতাপন্নো সোতাপত্তিফলাতি? আমন্তা. অরহতা দুক্খং দিট্ঠং, ন পরিহাযতি অরহা অরহত্তাতি? ন হেৰং ৰত্তব্বে…পে….

সোতাপন্নেন সমুদযো দিট্ঠো…পে… নিরোধো দিট্ঠো…পে… মগ্গো দিট্ঠো…পে… চত্তারি সচ্চানি দিট্ঠানি, ন পরিহাযতি সোতাপন্নো সোতাপত্তিফলাতি? আমন্তা. অরহতা চত্তারি সচ্চানি দিট্ঠানি, ন পরিহাযতি অরহা অরহত্তাতি? ন হেৰং ৰত্তব্বে…পে….

সকদাগামিনা দুক্খং দিট্ঠং…পে… চত্তারি সচ্চানি দিট্ঠানি, ন পরিহাযতি সকদাগামী সকদাগামিফলাতি? আমন্তা. অরহতা চত্তারি সচ্চানি দিট্ঠানি, ন পরিহাযতি অরহা অরহত্তাতি? ন হেৰং ৰত্তব্বে…পে….

অনাগামিনা দুক্খং দিট্ঠং…পে… চত্তারি সচ্চানি দিট্ঠানি, ন পরিহাযতি অনাগামী অনাগামিফলাতি? আমন্তা. অরহতা চত্তারি সচ্চানি দিট্ঠানি, ন পরিহাযতি অরহা অরহত্তাতি? ন হেৰং ৰত্তব্বে…পে….

সোতাপন্নেন দুক্খং দিট্ঠং…পে… চত্তারি সচ্চানি দিট্ঠানি, ন পরিহাযতি সোতাপন্নো সোতাপত্তিফলাতি? আমন্তা.

অনাগামিনা দুক্খং দিট্ঠং…পে… চত্তারি সচ্চানি দিট্ঠানি, ন পরিহাযতি অনাগামী অনাগামিফলাতি? ন হেৰং ৰত্তব্বে…পে….

সকদাগামিনা দুক্খং দিট্ঠং…পে… চত্তারি সচ্চানি দিট্ঠানি, ন পরিহাযতি সকদাগামী সকদাগামিফলাতি? আমন্তা. অনাগামিনা দুক্খং দিট্ঠং…পে… চত্তারি সচ্চানি দিট্ঠানি, ন পরিহাযতি অনাগামী অনাগামিফলাতি? ন হেৰং ৰত্তব্বে…পে….

সোতাপন্নেন দুক্খং দিট্ঠং…পে… চত্তারি সচ্চানি দিট্ঠানি, ন পরিহাযতি সোতাপন্নো সোতাপত্তিফলাতি? আমন্তা. সকদাগামিনা দুক্খং দিট্ঠং…পে… চত্তারি সচ্চানি দিট্ঠানি, ন পরিহাযতি সকদাগামী সকদাগামিফলাতি? ন হেৰং ৰত্তব্বে…পে….

২৫১. অরহতো রাগো পহীনো, পরিহাযতি অরহা অরহত্তাতি? আমন্তা. সোতাপন্নস্স সক্কাযদিট্ঠি পহীনা, পরিহাযতি সোতাপন্নো সোতাপত্তিফলাতি? ন হেৰং ৰত্তব্বে…পে….

অরহতো রাগো পহীনো, পরিহাযতি অরহা অরহত্তাতি? আমন্তা. সোতাপন্নস্স ৰিচিকিচ্ছা পহীনা…পে… সীলব্বতপরামাসো পহীনো…পে… অপাযগমনীযো রাগো পহীনো …পে… অপাযগমনীযো দোসো পহীনো…পে… অপাযগমনীযো মোহো পহীনো, পরিহাযতি সোতাপন্নো সোতাপত্তিফলাতি? ন হেৰং ৰত্তব্বে…পে….

অরহতো দোসো পহীনো…পে… মোহো পহীনো… মানো পহীনো… দিট্ঠি পহীনা… ৰিচিকিচ্ছা পহীনা… থিনং [থীনং (সী. স্যা. কং. পী.)] পহীনং… উদ্ধচ্চং পহীনং… অহিরিকং পহীনং…পে… অনোত্তপ্পং পহীনং, পরিহাযতি অরহা অরহত্তাতি? আমন্তা. সোতাপন্নস্স সক্কাযদিট্ঠি পহীনা, পরিহাযতি সোতাপন্নো সোতাপত্তিফলাতি? ন হেৰং ৰত্তব্বে…পে….

অরহতো অনোত্তপ্পং পহীনং, পরিহাযতি অরহা অরহত্তাতি? আমন্তা. সোতাপন্নস্স ৰিচিকিচ্ছা পহীনা…পে… সীলব্বতপরামাসো পহীনো…পে… অপাযগমনীযো রাগো পহীনো…পে… অপাযগমনীযো দোসো পহীনো…পে… অপাযগমনীযো মোহো পহীনো, পরিহাযতি সোতাপন্নো সোতাপত্তিফলাতি? ন হেৰং ৰত্তব্বে…পে….

অরহতো রাগো পহীনো, পরিহাযতি অরহা অরহত্তাতি? আমন্তা. সকদাগামিস্স সক্কাযদিট্ঠি পহীনা, পরিহাযতি সকদাগামী সকদাগামিফলাতি? ন হেৰং ৰত্তব্বে.

অরহতো রাগো পহীনো, পরিহাযতি অরহা অরহত্তাতি? আমন্তা. সকদাগামিস্স ৰিচিকিচ্ছা পহীনা…পে… সীলব্বতপরামাসো পহীনো…পে… ওল়ারিকো কামরাগো পহীনো… ওল়ারিকো ব্যাপাদো পহীনো, পরিহাযতি সকদাগামী সকদাগামিফলাতি? ন হেৰং ৰত্তব্বে…পে….

অরহতো দোসো পহীনো…পে… অনোত্তপ্পং পহীনং, পরিহাযতি অরহা অরহত্তাতি? আমন্তা. সকদাগামিস্স সক্কাযদিট্ঠি পহীনা…পে… ওল়ারিকো ব্যাপাদো পহীনো, পরিহাযতি সকদাগামী সকদাগামিফলাতি? ন হেৰং ৰত্তব্বে.

অরহতো রাগো পহীনো, পরিহাযতি অরহা অরহত্তাতি? আমন্তা. অনাগামিস্স সক্কাযদিট্ঠি পহীনা, পরিহাযতি অনাগামী অনাগামিফলাতি? ন হেৰং ৰত্তব্বে…পে….

অরহতো রাগো পহীনো, পরিহাযতি অরহা অরহত্তাতি? আমন্তা. অনাগামিস্স ৰিচিকিচ্ছা পহীনা…পে… সীলব্বতপরামাসো পহীনো… অণুসহগতো কামরাগো পহীনো… অণুসহগতো ব্যাপাদো পহীনো, পরিহাযতি অনাগামী অনাগামিফলাতি? ন হেৰং ৰত্তব্বে.

অরহতো দোসো পহীনো…পে… অনোত্তপ্পং পহীনং, পরিহাযতি অরহা অরহত্তাতি? আমন্তা. অনাগামিস্স সক্কাযদিট্ঠি পহীনা…পে… অণুসহগতো ব্যাপাদো পহীনো, পরিহাযতি অনাগামী অনাগামিফলাতি? ন হেৰং ৰত্তব্বে.

২৫২. অনাগামিস্স সক্কাযদিট্ঠি পহীনা, পরিহাযতি অনাগামী অনাগামিফলাতি? আমন্তা. সোতাপন্নস্স সক্কাযদিট্ঠি পহীনা, পরিহাযতি সোতাপন্নো সোতাপত্তিফলাতি? ন হেৰং ৰত্তব্বে.

অনাগামিস্স সক্কাযদিট্ঠি পহীনা, পরিহাযতি অনাগামী অনাগামিফলাতি? আমন্তা. সোতাপন্নস্স ৰিচিকিচ্ছা পহীনা…পে… অপাযগমনীযো মোহো পহীনো, পরিহাযতি সোতাপন্নো সোতাপত্তিফলাতি? ন হেৰং ৰত্তব্বে.

অনাগামিস্স ৰিচিকিচ্ছা পহীনা…পে… অণুসহগতো ব্যাপাদো পহীনো, পরিহাযতি অনাগামী অনাগামিফলাতি? আমন্তা. সোতাপন্নস্স সক্কাযদিট্ঠি পহীনা…পে… অপাযগমনীযো মোহো পহীনো, পরিহাযতি সোতাপন্নো সোতাপত্তিফলাতি? ন হেৰং ৰত্তব্বে.

অনাগামিস্স সক্কাযদিট্ঠি পহীনা, পরিহাযতি অনাগামী অনাগামিফলাতি? আমন্তা. সকদাগামিস্স সক্কাযদিট্ঠি পহীনা, পরিহাযতি সকদাগামী সকদাগামিফলাতি? ন হেৰং ৰত্তব্বে.

অনাগামিস্স সক্কাযদিট্ঠি পহীনা, পরিহাযতি অনাগামী অনাগামিফলাতি? আমন্তা. সকদাগামিস্স ৰিচিকিচ্ছা পহীনা…পে… সীলব্বতপরামাসো পহীনো… ওল়ারিকো কামরাগো পহীনো… ওল়ারিকো ব্যাপাদো পহীনো, পরিহাযতি সকদাগামী সকদাগামিফলাতি? ন হেৰং ৰত্তব্বে.

অনাগামিস্স ৰিচিকিচ্ছা পহীনা…পে… অণুসহগতো ব্যাপাদো পহীনো, পরিহাযতি অনাগামী অনাগামিফলাতি? আমন্তা. সকদাগামিস্স সক্কাযদিট্ঠি পহীনা…পে… ওল়ারিকো ব্যাপাদো পহীনো, পরিহাযতি সকদাগামী সকদাগামিফলাতি? ন হেৰং ৰত্তব্বে.

২৫৩. সকদাগামিস্স সক্কাযদিট্ঠি পহীনা, পরিহাযতি সকদাগামী সকদাগামিফলাতি? আমন্তা. সোতাপন্নস্স সক্কাযদিট্ঠি পহীনা, পরিহাযতি সোতাপন্নো সোতাপত্তিফলাতি? ন হেৰং ৰত্তব্বে.

সকদাগামিস্স সক্কাযদিট্ঠি পহীনা, পরিহাযতি সকদাগামী সকদাগামিফলাতি? আমন্তা. সোতাপন্নস্স ৰিচিকিচ্ছা পহীনা…পে… অপাযগমনীযো মোহো পহীনো, পরিহাযতি সোতাপন্নো সোতাপত্তিফলাতি? ন হেৰং ৰত্তব্বে.

সকদাগামিস্স ৰিচিকিচ্ছা পহীনা…পে… ওল়ারিকো কামরাগো পহীনো… ওল়ারিকো ব্যাপাদো পহীনো, পরিহাযতি সকদাগামী সকদাগামিফলাতি? আমন্তা. সোতাপন্নস্স সক্কাযদিট্ঠি পহীনা…পে… অপাযগমনীযো মোহো পহীনো, পরিহাযতি সোতাপন্নো সোতাপত্তিফলাতি? ন হেৰং ৰত্তব্বে.

২৫৪. সোতাপন্নস্স সক্কাযদিট্ঠি পহীনা, ন পরিহাযতি সোতাপন্নো সোতাপত্তিফলাতি? আমন্তা. অরহতো রাগো পহীনো, ন পরিহাযতি অরহা অরহত্তাতি? ন হেৰং ৰত্তব্বে.

সোতাপন্নস্স সক্কাযদিট্ঠি পহীনা, ন পরিহাযতি সোতাপন্নো সোতাপত্তিফলাতি? আমন্তা. অরহতো দোসো পহীনো…পে… অনোত্তপ্পং পহীনং, ন পরিহাযতি অরহা অরহত্তাতি? ন হেৰং ৰত্তব্বে.

সোতাপন্নস্স ৰিচিকিচ্ছা পহীনা…পে… অপাযগমনীযো মোহো পহীনো, ন পরিহাযতি সোতাপন্নো সোতাপত্তিফলাতি? আমন্তা. অরহতো রাগো পহীনো…পে… অনোত্তপ্পং পহীনং, ন পরিহাযতি অরহা অরহত্তাতি? ন হেৰং ৰত্তব্বে.

২৫৫. সকদাগামিস্স সক্কাযদিট্ঠি পহীনা, ন পরিহাযতি সকদাগামী সকদাগামিফলাতি? আমন্তা. অরহতো রাগো পহীনো…পে… অনোত্তপ্পং পহীনং, ন পরিহাযতি অরহা অরহত্তাতি? ন হেৰং ৰত্তব্বে.

সকদাগামিস্স ৰিচিকিচ্ছা পহীনা…পে… ওল়ারিকো ব্যাপাদো পহীনো, ন পরিহাযতি সকদাগামী সকদাগামিফলাতি? আমন্তা. অরহতো রাগো পহীনো…পে… অনোত্তপ্পং পহীনং, ন পরিহাযতি অরহা অরহত্তাতি? ন হেৰং ৰত্তব্বে.

২৫৬. অনাগামিস্স সক্কাযদিট্ঠি পহীনা, ন পরিহাযতি অনাগামী অনাগামিফলাতি? আমন্তা. অরহতো রাগো পহীনো…পে… অনোত্তপ্পং পহীনং, ন পরিহাযতি অরহা অরহত্তাতি? ন হেৰং ৰত্তব্বে.

অনাগামিস্স ৰিচিকিচ্ছা পহীনা…পে… অণুসহগতো ব্যাপাদো পহীনো, ন পরিহাযতি অনাগামী অনাগামিফলাতি? আমন্তা. অরহতো রাগো পহীনো…পে… অনোত্তপ্পং পহীনং, ন পরিহাযতি অরহা অরহত্তাতি? ন হেৰং ৰত্তব্বে.

২৫৭. সোতাপন্নস্স সক্কাযদিট্ঠি পহীনা, ন পরিহাযতি সোতাপন্নো সোতাপত্তিফলাতি? আমন্তা. অনাগামিস্স সক্কাযদিট্ঠি পহীনা… অণুসহগতো ব্যাপাদো পহীনো, ন পরিহাযতি অনাগামী অনাগামিফলাতি? ন হেৰং ৰত্তব্বে.

সোতাপন্নস্স ৰিচিকিচ্ছা পহীনা…পে… অপাযগমনীযো মোহো পহীনো, ন পরিহাযতি সোতাপন্নো সোতাপত্তিফলাতি? আমন্তা. অনাগামিস্স সক্কাযদিট্ঠি পহীনা…পে… অণুসহগতো ব্যাপাদো পহীনো, ন পরিহাযতি অনাগামী অনাগামিফলাতি? ন হেৰং ৰত্তব্বে.

২৫৮. সকদাগামিস্স সক্কাযদিট্ঠি পহীনা, ন পরিহাযতি সকদাগামী সকদাগামিফলাতি? আমন্তা. অনাগামিস্স সক্কাযদিট্ঠি পহীনা…পে… অণুসহগতো ব্যাপাদো পহীনো, ন পরিহাযতি অনাগামী অনাগামিফলাতি? ন হেৰং ৰত্তব্বে.

সকদাগামিস্স ৰিচিকিচ্ছা পহীনা…পে… ওল়ারিকো ব্যাপাদো পহীনো, ন পরিহাযতি সকদাগামী সকদাগামিফলাতি? আমন্তা. অনাগামিস্স সক্কাযদিট্ঠি পহীনা…পে… অণুসহগতো ব্যাপাদো পহীনো, ন পরিহাযতি অনাগামী অনাগামিফলাতি? ন হেৰং ৰত্তব্বে.

২৫৯. সোতাপন্নস্স সক্কাযদিট্ঠি পহীনা, ন পরিহাযতি সোতাপন্নো সোতাপত্তিফলাতি? আমন্তা. সকদাগামিস্স সক্কাযদিট্ঠি পহীনা…পে… ওল়ারিকো ব্যাপাদো পহীনো, ন পরিহাযতি সকদাগামী সকদাগামিফলাতি? ন হেৰং ৰত্তব্বে.

সোতাপন্নস্স ৰিচিকিচ্ছা পহীনা…পে… অপাযগমনীযো মোহো পহীনো, ন পরিহাযতি সোতাপন্নো সোতাপত্তিফলাতি? আমন্তা. সকদাগামিস্স সক্কাযদিট্ঠি পহীনা…পে… ওল়ারিকো ব্যাপাদো পহীনো, ন পরিহাযতি সকদাগামী সকদাগামিফলাতি? ন হেৰং ৰত্তব্বে.

২৬০. পরিহাযতি অরহা অরহত্তাতি? আমন্তা. ননু অরহতো রাগো পহীনো উচ্ছিন্নমূলো তালাৰত্থুকতো অনভাৰঙ্কতো [অনভাৰকতো (সী.)] আযতিং অনুপ্পাদধম্মোতি? আমন্তা. হঞ্চি অরহতো রাগো পহীনো উচ্ছিন্নমূলো তালাৰত্থুকতো অনভাৰঙ্কতো আযতিং অনুপ্পাদধম্মো, নো চ ৰত রে [নো ৰত রে (স্যা. পী.) এৰমুপরিপি] ৰত্তব্বে – ‘‘পরিহাযতি অরহা অরহত্তা’’তি.

পরিহাযতি অরহা অরহত্তাতি? আমন্তা. ননু অরহতো দোসো পহীনো…পে… মোহো পহীনো… মানো পহীনো… দিট্ঠি পহীনা… ৰিচিকিচ্ছা পহীনা… থিনং পহীনং… উদ্ধচ্চং পহীনং… অহিরিকং পহীনং… অনোত্তপ্পং পহীনং উচ্ছিন্নমূলং তালাৰত্থুকতং অনভাৰঙ্কতং আযতিং অনুপ্পাদধম্মন্তি? আমন্তা. হঞ্চি অরহতো অনোত্তপ্পং পহীনং উচ্ছিন্নমূলং তালাৰত্থুকতং অনভাৰঙ্কতং আযতিং অনুপ্পাদধম্মং, নো চ ৰত রে ৰত্তব্বে – ‘‘পরিহাযতি অরহা অরহত্তা’’তি.

পরিহাযতি অরহা অরহত্তাতি? আমন্তা. ননু অরহতো রাগপ্পহানায মগ্গো ভাৰিতোতি? আমন্তা. হঞ্চি অরহতো রাগপ্পহানায মগ্গো ভাৰিতো, নো চ ৰত রে ৰত্তব্বে – ‘‘পরিহাযতি অরহা অরহত্তা’’তি.

পরিহাযতি অরহা অরহত্তাতি? আমন্তা. ননু অরহতো রাগপ্পহানায সতিপট্ঠানা ভাৰিতা…পে… সম্মপ্পধানা ভাৰিতা… ইদ্ধিপাদা ভাৰিতা… ইন্দ্রিযা ভাৰিতা… বলা ভাৰিতা… বোজ্ঝঙ্গা ভাৰিতাতি? আমন্তা. হঞ্চি অরহতো রাগপ্পহানায বোজ্ঝঙ্গা ভাৰিতা, নো চ ৰত রে ৰত্তব্বে – ‘‘পরিহাযতি অরহা অরহত্তা’’তি.

পরিহাযতি অরহা অরহত্তাতি? আমন্তা. ননু অরহতো দোসপ্পহানায…পে… অনোত্তপ্পপহানায মগ্গো ভাৰিতো…পে… বোজ্ঝঙ্গা ভাৰিতাতি? আমন্তা. হঞ্চি অরহতো অনোত্তপ্পপহানায বোজ্ঝঙ্গা ভাৰিতা, নো চ ৰত রে ৰত্তব্বে – ‘‘পরিহাযতি অরহা অরহত্তা’’তি.

২৬১. পরিহাযতি অরহা অরহত্তাতি? আমন্তা. ননু অরহা ৰীতরাগো ৰীতদোসো ৰীতমোহো কতকরণীযো ওহিতভারো অনুপ্পত্তসদত্থো পরিক্খীণভৰসংযোজনো সম্মদঞ্ঞাৰিমুত্তো উক্খিত্তপলিঘো সঙ্কিণ্ণপরিখো অব্বূল়্হেসিকো নিরগ্গল়ো অরিযো পন্নদ্ধজো পন্নভারো ৰিসঞ্ঞুত্তো সুৰিজিতৰিজযো; দুক্খং তস্স পরিঞ্ঞাতং, সমুদযো পহীনো, নিরোধো সচ্ছিকতো, মগ্গো ভাৰিতো, অভিঞ্ঞেয্যং অভিঞ্ঞাতং, পরিঞ্ঞেয্যং পরিঞ্ঞাতং, পহাতব্বং পহীনং, ভাৰেতব্বং ভাৰিতং, সচ্ছিকাতব্বং সচ্ছিকতন্তি? আমন্তা. হঞ্চি অরহা ৰীতরাগো ৰীতদোসো ৰীতমোহো…পে… সচ্ছিকাতব্বং সচ্ছিকতং, নো চ ৰত রে ৰত্তব্বে – ‘‘পরিহাযতি অরহা অরহত্তা’’তি.

২৬২. পরিহাযতি অরহা অরহত্তাতি? ( ) [(আমন্তা) (ক.)] সমযৰিমুত্তো অরহা অরহত্তা পরিহাযতি, অসমযৰিমুত্তো অরহা অরহত্তা ন পরিহাযতীতি. সমযৰিমুত্তো অরহা অরহত্তা পরিহাযতীতি? আমন্তা. অসমযৰিমুত্তো অরহা অরহত্তা পরিহাযতীতি [ন পরিহাযতীতি (ক.)]? ন হেৰং ৰত্তব্বে.

অসমযৰিমুত্তো অরহা অরহত্তা ন পরিহাযতীতি? আমন্তা. সমযৰিমুত্তো অরহা অরহত্তা ন পরিহাযতীতি? ন হেৰং ৰত্তব্বে.

সমযৰিমুত্তস্স অরহতো রাগো পহীনো, পরিহাযতি সমযৰিমুত্তো অরহা অরহত্তাতি? আমন্তা. অসমযৰিমুত্তস্স অরহতো রাগো পহীনো, পরিহাযতি অসমযৰিমুত্তো অরহা অরহত্তাতি? ন হেৰং ৰত্তব্বে.

সমযৰিমুত্তস্স অরহতো দোসো পহীনো…পে… অনোত্তপ্পং পহীনং, পরিহাযতি সমযৰিমুত্তো অরহা অরহত্তাতি? আমন্তা. অসমযৰিমুত্তস্স অরহতো অনোত্তপ্পং পহীনং, পরিহাযতি অসমযৰিমুত্তো অরহা অরহত্তাতি? ন হেৰং ৰত্তব্বে.

সমযৰিমুত্তস্স অরহতো রাগপ্পহানায মগ্গো ভাৰিতো, পরিহাযতি সমযৰিমুত্তো অরহা অরহত্তাতি? আমন্তা. অসমযৰিমুত্তস্স অরহতো রাগপ্পহানায মগ্গো ভাৰিতো, পরিহাযতি অসমযৰিমুত্তো অরহা অরহত্তাতি? ন হেৰং ৰত্তব্বে.

সমযৰিমুত্তস্স অরহতো রাগপ্পহানায সতিপট্ঠানা ভাৰিতা…পে… সম্মপ্পধানা ভাৰিতা… ইদ্ধিপাদা ভাৰিতা… ইন্দ্রিযা ভাৰিতা… বলা ভাৰিতা… বোজ্ঝঙ্গা ভাৰিতা, পরিহাযতি সমযৰিমুত্তো অরহা অরহত্তাতি? আমন্তা. অসমযৰিমুত্তস্স অরহতো রাগপ্পহানায সতিপট্ঠানা ভাৰিতা…পে… বোজ্ঝঙ্গা ভাৰিতা, পরিহাযতি অসমযৰিমুত্তো অরহা অরহত্তাতি? ন হেৰং ৰত্তব্বে.

সমযৰিমুত্তস্স অরহতো দোসপ্পহানায…পে… অনোত্তপ্পপহানায মগ্গো ভাৰিতো…পে… বোজ্ঝঙ্গা ভাৰিতা, পরিহাযতি সমযৰিমুত্তো অরহা অরহত্তাতি? আমন্তা. অসমযৰিমুত্তস্স অরহতো অনোত্তপ্পপহানায মগ্গো ভাৰিতো…পে… বোজ্ঝঙ্গা ভাৰিতা, পরিহাযতি অসমযৰিমুত্তো অরহা অরহত্তাতি? ন হেৰং ৰত্তব্বে…পে….

সমযৰিমুত্তো অরহা ৰীতরাগো ৰীতদোসো ৰীতমোহো কতকরণীযো ওহিতভারো অনুপ্পত্তসদত্থো পরিক্খীণভৰসংযোজনো সম্মদঞ্ঞাৰিমুত্তো উক্খিত্তপলিঘো সঙ্কিণ্ণপরিখো অব্বূল়্হেসিকো নিরগ্গল়ো অরিযো পন্নদ্ধজো পন্নভারো ৰিসঞ্ঞুত্তো সুৰিজিতৰিজযো, দুক্খং তস্স পরিঞ্ঞাতং, সমুদযো পহীনো, নিরোধো সচ্ছিকতো, মগ্গো ভাৰিতো, অভিঞ্ঞেয্যং অভিঞ্ঞাতং, পরিঞ্ঞেয্যং পরিঞ্ঞাতং, পহাতব্বং পহীনং, ভাৰেতব্বং ভাৰিতং, সচ্ছিকাতব্বং সচ্ছিকতং, পরিহাযতি সমযৰিমুত্তো অরহা অরহত্তাতি? আমন্তা. অসমযৰিমুত্তো অরহা ৰীতরাগো ৰীতদোসো ৰীতমোহো…পে… সচ্ছিকাতব্বং সচ্ছিকতং, পরিহাযতি অসমযৰিমুত্তো অরহা অরহত্তাতি? ন হেৰং ৰত্তব্বে.

২৬৩. অসমযৰিমুত্তস্স অরহতো রাগো পহীনো, ন পরিহাযতি অসমযৰিমুত্তো অরহা অরহত্তাতি? আমন্তা. সমযৰিমুত্তস্স অরহতো রাগো পহীনো, ন পরিহাযতি সমযৰিমুত্তো অরহা অরহত্তাতি? ন হেৰং ৰত্তব্বে.

অসমযৰিমুত্তস্স অরহতো দোসো পহীনো…পে… অনোত্তপ্পং পহীনং, ন পরিহাযতি অসমযৰিমুত্তো অরহা অরহত্তাতি? আমন্তা. সমযৰিমুত্তস্স অরহতো অনোত্তপ্পং পহীনং, ন পরিহাযতি সমযৰিমুত্তো অরহা অরহত্তাতি? ন হেৰং ৰত্তব্বে.

অসমযৰিমুত্তস্স অরহতো রাগপ্পহানায মগ্গো ভাৰিতো…পে… বোজ্ঝঙ্গা ভাৰিতা, ন পরিহাযতি অসমযৰিমুত্তো অরহা অরহত্তাতি? আমন্তা. সমযৰিমুত্তস্স অরহতো রাগপ্পহানায মগ্গো ভাৰিতো…পে… বোজ্ঝঙ্গা ভাৰিতা, ন পরিহাযতি সমযৰিমুত্তো অরহা অরহত্তাতি? ন হেৰং ৰত্তব্বে.

অসমযৰিমুত্তস্স অরহতো দোসপ্পহানায…পে… অনোত্তপ্পপহানায মগ্গো ভাৰিতো…পে… বোজ্ঝঙ্গা ভাৰিতা, ন পরিহাযতি অসমযৰিমুত্তো অরহা অরহত্তাতি? আমন্তা. সমযৰিমুত্তস্স অরহতো অনোত্তপ্পপহানায মগ্গো ভাৰিতো…পে… বোজ্ঝঙ্গা ভাৰিতা, ন পরিহাযতি সমযৰিমুত্তো অরহা অরহত্তাতি? ন হেৰং ৰত্তব্বে.

অসমযৰিমুত্তো অরহা ৰীতরাগো ৰীতদোসো ৰীতমোহো…পে… সচ্ছিকাতব্বং সচ্ছিকতং, ন পরিহাযতি অসমযৰিমুত্তো অরহা অরহত্তাতি? আমন্তা. সমযৰিমুত্তো অরহা ৰীতরাগো ৰীতদোসো ৰীতমোহো…পে… সচ্ছিকাতব্বং সচ্ছিকতং, ন পরিহাযতি সমযৰিমুত্তো অরহা অরহত্তাতি? ন হেৰং ৰত্তব্বে…পে….

২৬৪. পরিহাযতি অরহা অরহত্তাতি? আমন্তা. সারিপুত্তো থেরো পরিহাযিত্থ অরহত্তাতি? ন হেৰং ৰত্তব্বে. মহামোগ্গল্লানো [মহামোগ্গলানো (ক.)] থেরো… মহাকস্সপো থেরো… মহাকচ্চাযনো [মহাকচ্চানো (ম. নি. ১.২০২ আদযো)] থেরো… মহাকোট্ঠিকো [মহাকোট্ঠিতো (সী. স্যা. কং. পী.)] থেরো… মহাপন্থকো থেরো পরিহাযিত্থ অরহত্তাতি? ন হেৰং ৰত্তব্বে.

সারিপুত্তো থেরো ন পরিহাযিত্থ অরহত্তাতি? আমন্তা. হঞ্চি সারিপুত্তো থেরো ন পরিহাযিত্থ অরহত্তা, নো চ ৰত রে ৰত্তব্বে – ‘‘পরিহাযতি অরহা অরহত্তা’’তি.

মহামোগ্গল্লানো থেরো… মহাকস্সপো থেরো… মহাকচ্চাযনো থেরো… মহাকোট্ঠিকো থেরো… মহাপন্থকো থেরো ন পরিহাযিত্থ অরহত্তাতি? আমন্তা. হঞ্চি মহাপন্থকো থেরো ন পরিহাযিত্থ অরহত্তা, নো চ ৰত রে ৰত্তব্বে – ‘‘পরিহাযতি অরহা অরহত্তা’’তি.

অরিযপুগ্গলসংসন্দনং.

৩. সুত্তসাধনপরিহানি

২৬৫. পরিহাযতি অরহা অরহত্তাতি? আমন্তা. ননু ৰুত্তং ভগৰতা –

‘‘উচ্চাৰচা হি পটিপদা [পটিপাদা (অট্ঠ.)], সমণেন পকাসিতা;

ন পারং দিগুণং যন্তি, নযিদং একগুণং মুত’’ন্তি [সু. নি. ৭১৯ সুত্তনিপাতে].

অত্থেৰ সুত্তন্তোতি? আমন্তা. তেন হি ন ৰত্তব্বং – ‘‘পরিহাযতি অরহা অরহত্তা’’তি.

পরিহাযতি অরহা অরহত্তাতি? আমন্তা. অত্থি ছিন্নস্স ছেদিযন্তি? ন হেৰং ৰত্তব্বে.

অত্থি ছিন্নস্স ছেদিযন্তি? আমন্তা. ননু ৰুত্তং ভগৰতা –

‘‘ৰীততণ্হো অনাদানো, কিচ্চং যস্স ন ৰিজ্জতি;

ছিন্নস্স ছেদিযং নত্থি, ওঘপাসো সমূহতো’’তি.

অত্থেৰ সুত্তন্তোতি? আমন্তা. তেন হি ন ৰত্তব্বং – ‘‘অত্থি ছিন্নস্স ছেদিয’’ন্তি.

২৬৬. পরিহাযতি অরহা অরহত্তাতি? আমন্তা. অত্থি কতস্স পতিচযোতি? ন হেৰং ৰত্তব্বে.

অত্থি কতস্স পতিচযোতি? আমন্তা. ননু ৰুত্তং ভগৰতা –

‘‘তস্স সম্মা ৰিমুত্তস্স, সন্তচিত্তস্স ভিক্খুনো;

কতস্স পতিচযো নত্থি, করণীযং ন ৰিজ্জতি.

‘‘সেলো যথা একগ্ঘনো, ৰাতেন ন সমীরতি;

এৰং রূপা রসা সদ্দা, গন্ধা ফস্সা চ কেৰলা.

‘‘ইট্ঠা ধম্মা অনিট্ঠা চ, নপ্পৰেধেন্তি তাদিনো;

ঠিতং চিত্তং ৰিপ্পমুত্তং, ৰযং চস্সানুপস্সতী’’তি [মহাৰ. ২৪৪; অ. নি. ৬.৫৫].

অত্থেৰ সুত্তন্তোতি? আমন্তা. তেন হি ন ৰত্তব্বং – ‘‘অত্থি কতস্স পতিচযো’’তি.

২৬৭. ন ৰত্তব্বং – ‘‘পরিহাযতি অরহা অরহত্তা’’তি? আমন্তা. ননু ৰুত্তং ভগৰতা – ‘‘পঞ্চিমে, ভিক্খৰে, ধম্মা সমযৰিমুত্তস্স ভিক্খুনো পরিহানায সংৰত্তন্তি. কতমে পঞ্চ? কম্মারামতা, ভস্সারামতা, নিদ্দারামতা, সঙ্গণিকারামতা, যথাৰিমুত্তং চিত্তং ন পচ্চৰেক্খতি. ইমে খো, ভিক্খৰে, পঞ্চ ধম্মা সমযৰিমুত্তস্স ভিক্খুনো পরিহানায সংৰত্তন্তী’’তি [অ. নি. ৫.১৪৯]. অত্থেৰ সুত্তন্তোতি? আমন্তা. তেন হি পরিহাযতি অরহা অরহত্তাতি.

অত্থি অরহতো কম্মারামতাতি? ন হেৰং ৰত্তব্বে.

অত্থি অরহতো কম্মারামতাতি? আমন্তা. অত্থি অরহতো রাগো কামরাগো কামরাগপরিযুট্ঠানং কামরাগসংযোজনং কামোঘো কামযোগো কামচ্ছন্দনীৰরণন্তি? ন হেৰং ৰত্তব্বে.

অত্থি অরহতো ভস্সারামতা, অত্থি অরহতো নিদ্দারামতা, অত্থি অরহতো সঙ্গণিকারামতাতি? ন হেৰং ৰত্তব্বে.

অত্থি অরহতো সঙ্গণিকারামতাতি? আমন্তা. অত্থি অরহতো রাগো কামরাগো কামরাগপরিযুট্ঠানং কামরাগসংযোজনং কামোঘো কামযোগো কামচ্ছন্দনীৰরণন্তি? ন হেৰং ৰত্তব্বে.

২৬৮. পরিহাযতি অরহা অরহত্তাতি? আমন্তা. অরহা অরহত্তা পরিহাযমানো কিং পরিযুট্ঠিতো পরিহাযতীতি? রাগপরিযুট্ঠিতো পরিহাযতীতি. পরিযুট্ঠানং কিং পটিচ্চ উপ্পজ্জতীতি? অনুসযং পটিচ্চ উপ্পজ্জতীতি. অত্থি অরহতো অনুসযাতি? ন হেৰং ৰত্তব্বে.

অত্থি অরহতো অনুসযাতি? আমন্তা. অত্থি অরহতো কামরাগানুসযো পটিঘানুসযো মানানুসযো দিট্ঠানুসযো ৰিচিকিচ্ছানুসযো ভৰরাগানুসযো অৰিজ্জানুসযোতি? ন হেৰং ৰত্তব্বে.

দোসপরিযুট্ঠিতো পরিহাযতীতি…পে… মোহপরিযুট্ঠিতো পরিহাযতীতি…. পরিযুট্ঠানং কিং পটিচ্চ উপ্পজ্জতীতি? অনুসযং পটিচ্চ উপ্পজ্জতীতি. অত্থি অরহতো অনুসযাতি? ন হেৰং ৰত্তব্বে…পে….

অত্থি অরহতো অনুসযাতি? আমন্তা. অত্থি অরহতো কামরাগানুসযো…পে… অৰিজ্জানুসযোতি? ন হেৰং ৰত্তব্বে.

পরিহাযতি অরহা অরহত্তাতি? আমন্তা. অরহতো অরহত্তা পরিহাযমানস্স কিং উপচযং গচ্ছতীতি? রাগো উপচযং গচ্ছতীতি. সক্কাযদিট্ঠি উপচযং গচ্ছতীতি, ৰিচিকিচ্ছা উপচযং গচ্ছতীতি, সীলব্বতপরামাসো উপচযং গচ্ছতীতি? ন হেৰং ৰত্তব্বে. দোসো উপচযং গচ্ছতীতি…পে… মোহো উপচযং গচ্ছতীতি, সক্কাযদিট্ঠি উপচযং গচ্ছতীতি, ৰিচিকিচ্ছা উপচযং গচ্ছতীতি, সীলব্বতপরামাসো উপচযং গচ্ছতীতি? ন হেৰং ৰত্তব্বে.

পরিহাযতি অরহা অরহত্তাতি? আমন্তা. অরহা আচিনতীতি? ন হেৰং ৰত্তব্বে. অরহা অপচিনতীতি? ন হেৰং ৰত্তব্বে. অরহা পজহতীতি? ন হেৰং ৰত্তব্বে. অরহা উপাদিযতীতি? ন হেৰং ৰত্তব্বে. অরহা ৰিসিনেতীতি? ন হেৰং ৰত্তব্বে. অরহা উস্সিনেতীতি? ন হেৰং ৰত্তব্বে. অরহা ৰিধূপেতীতি? ন হেৰং ৰত্তব্বে. অরহা সন্ধূপেতীতি? ন হেৰং ৰত্তব্বে.

ননু অরহা নেৰাচিনতি ন অপচিনতি অপচিনিত্ৰা ঠিতোতি? আমন্তা. হঞ্চি অরহা নেৰাচিনতি ন অপচিনতি অপচিনিত্ৰা ঠিতো, নো চ ৰত রে ৰত্তব্বে – ‘‘পরিহাযতি অরহা অরহত্তা’’তি.

ননু অরহা নেৰ পজহতি ন উপাদিযতি পজহিত্ৰা ঠিতোতি? আমন্তা. হঞ্চি অরহা নেৰ পজহতি ন উপাদিযতি পজহিত্ৰা ঠিতো, নো চ ৰত রে ৰত্তব্বে – ‘‘পরিহাযতি অরহা অরহত্তা’’তি.

ননু অরহা নেৰ ৰিসিনেতি ন উস্সিনেতি ৰিসিনিত্ৰা ঠিতোতি? আমন্তা. হঞ্চি অরহা নেৰ ৰিসিনেতি ন উস্সিনেতি ৰিসিনিত্ৰা ঠিতো, নো চ ৰত রে ৰত্তব্বে – ‘‘পরিহাযতি অরহা অরহত্তা’’তি.

ননু অরহা নেৰ ৰিধূপেতি ন সন্ধূপেতি ৰিধূপেত্ৰা ঠিতোতি? আমন্তা. হঞ্চি অরহা নেৰ ৰিধূপেতি ন সন্ধূপেতি ৰিধূপেত্ৰা ঠিতো, নো চ ৰত রে ৰত্তব্বে – ‘‘পরিহাযতি অরহা অরহত্তা’’তি.

পরিহানিকথা নিট্ঠিতা.