১. খন্ধো

২২৮. রূপক্খন্ধো কতিহি খন্ধেহি কতিহাযতনেহি কতিহি ধাতূহি সম্পযুত্তোতি? নত্থি. কতিহি ৰিপ্পযুত্তো? চতূহি খন্ধেহি একেনাযতনেন সত্তহি ধাতূহি ৰিপ্পযুত্তো; একেনাযতনেন একায ধাতুযা কেহিচি ৰিপ্পযুত্তো.

২২৯. ৰেদনাক্খন্ধো… সঞ্ঞাক্খন্ধো… সঙ্খারক্খন্ধো তীহি খন্ধেহি একেনাযতনেন সত্তহি ধাতূহি সম্পযুত্তো; একেনাযতনেন একায ধাতুযা কেহিচি সম্পযুত্তো. কতিহি ৰিপ্পযুত্তো? একেন খন্ধেন দসহাযতনেহি দসহি ধাতূহি ৰিপ্পযুত্তো; একেনাযতনেন একায ধাতুযা কেহিচি ৰিপ্পযুত্তো.

২৩০. ৰিঞ্ঞাণক্খন্ধো তীহি খন্ধেহি সম্পযুত্তো; একেনাযতনেন একায ধাতুযা কেহিচি সম্পযুত্তো. কতিহি ৰিপ্পযুত্তো? একেন খন্ধেন দসহাযতনেহি দসহি ধাতূহি ৰিপ্পযুত্তো; একেনাযতনেন একায ধাতুযা কেহিচি ৰিপ্পযুত্তো.