পাতিমোক্খসংৰরসীলৰণ্ণনা

১৪. তত্রাতি তেসু পাতিমোক্খসংৰরাদীসু. আদিতো পট্ঠাযাতি ‘‘ইধ ভিক্খূ’’তিআদিনা (ৰিভ. ৫০৮; দী. নি. ১.১৯৪) আগতদেসনায আদিতো পভুতি. ৰিনিচ্ছযকথাতি তত্থ সংসযৰিধমনেন ৰিনিচ্ছযাৰহা কথা. পঠমস্স অত্থস্স সব্বসাধারণত্তা অসাধারণং পব্বজিতাৰেণিকং পরিযাযং দস্সেন্তো ‘‘ছিন্নভিন্নপটধরাদিতায ৰা’’তি আহ. এৰং হিস্স পরিপুণ্ণপাতিমোক্খসংৰরযোগ্যতা দস্সিতা হোতি. ভিন্নপটধরাদিভাৰো চ নাম দলিদ্দস্সাপি নিগ্গহিতস্স হোতীতি ততো ৰিসেসেতুং ‘‘সদ্ধাপব্বজিতো’’তি ৰত্ৰা পটিপত্তিযা যোগ্যভাৰদস্সনত্থং ‘‘কুলপুত্তো’’তি ৰুত্তং. আচারকুলপুত্তো ৰা হি পটিপজ্জিতুং সক্কোতি জাতিকুলপুত্তো ৰা. সিক্খাপদসীলন্তি চারিত্তৰারিত্তপ্পভেদং সিক্খাপদৰসেন পঞ্ঞত্তং সীলং. যোতি অনিযমনিদ্দেসো যো কোচি পুগ্গলো. নন্তি ৰিনযপরিযাপন্নং সীলং. তন্তি পুগ্গলং. মোক্খেতি সহকারিকারণভাৰতো. অপাযে ভৰানি আপাযিকানি. আদি-সদ্দেন তদঞ্ঞং সব্বসংসারদুক্খং সঙ্গণ্হাতি. সংৰরণং কাযৰচীদ্ৰারানং পিদহনং. যেন তে সংৰুতা পিহিতা হোন্তি, সো সংৰরো. যস্মা পন সো সত্তন্নং আপত্তিক্খন্ধানং অৰীতিক্কমো ৰীতিক্কমপটিপক্খোতি কত্ৰা, তস্মা ৰুত্তং ‘‘কাযিকৰাচসিকস্স অৰীতিক্কমস্সেতং নাম’’ন্তি. পাতিমোক্খসংৰরেন সংৰুতোতি পাতিমোক্খসংৰরেন পিহিতকাযৰচীদ্ৰারো. তথাভূতো চ যস্মা তং উপেতো তেন চ সমঙ্গী নাম হোতি, তস্মা ৰুত্তং ‘‘উপগতো সমন্নাগতোতি অত্থো’’তি.

অপরো নযো – কিলেসানং বলৰভাৰতো, পাপকিরিযায সুকরভাৰতো, পুঞ্ঞকিরিযায চ দুক্করভাৰতো বহুক্খত্তুং অপাযেসু পতনসীলোতি পাতী, পুথুজ্জনো. অনিচ্চতায ৰা ভৰাদীসু কম্মৰেগক্খিত্তো ঘটিযন্তং ৰিয অনৰট্ঠানেন পরিব্ভমনতো গমনসীলোতি পাতী, মরণৰসেন ৰা তম্হি তম্হি সত্তনিকাযে অত্তভাৰস্স পাতনসীলোতি পাতী, সত্তসন্তানো, চিত্তমেৰ ৰা. তং পাতিনং সংসারদুক্খতো মোক্খেতীতি পাতিমোক্খং. চিত্তস্স হি ৰিমোক্খেন সত্তো ‘‘ৰিমুত্তো’’তি ৰুচ্চতি. ৰুত্তং হি ‘‘চিত্তৰোদানা ৰিসুজ্ঝন্তী’’তি, ‘‘অনুপাদায আসৰেহি চিত্তং ৰিমুত্ত’’ন্তি (মহাৰ. ২৮) চ. অথ ৰা অৰিজ্জাদিনা হেতুনা সংসারে পততি গচ্ছতি পৰত্ততীতি পাতী, ‘‘অৰিজ্জানীৰরণানং সত্তানং তণ্হাসংযোজনানং সন্ধাৰতং সংসরত’’ন্তি (সং. নি. ২.১২৪) হি ৰুত্তং. তস্স পাতিনো সত্তস্স তণ্হাদিসংকিলেসত্তযতো মোক্খো এতেনাতি পাতিমোক্খং. ‘‘কণ্ঠেকাল়ো’’তিআদীনং ৰিযস্স সমাসসিদ্ধি ৰেদিতব্বা. অথ ৰা পাতেতি ৰিনিপাতেতি দুক্খেতি পাতি, চিত্তং. ৰুত্তং হি ‘‘চিত্তেন নীযতি লোকো, চিত্তেন পরিকস্সতী’’তি (সং. নি. ১.৬২). তস্স পাতিনো মোক্খো এতেনাতি পাতিমোক্খং, পততি ৰা এতেন অপাযদুক্খে, সংসারদুক্খে চাতি পাতী, তণ্হাদিসংকিলেসো. ৰুত্তং হি ‘‘তণ্হা জনেতি পুরিসং (সং. নি. ১.৫৫-৫৭), তণ্হাদুতিযো পুরিসো’’তি (ইতিৰু. ১৫, ১০৫; অ. নি. ৪.৯; মহানি. ১৯১; চূল়নি. পারাযনানুগীতিগাথানিদ্দেস) চ আদি. ততো পাতিতো মোক্খোতি পাতিমোক্খং. অথ ৰা পততি এত্থাতি পাতীনি, ছ অজ্ঝত্তিকবাহিরানি আযতনানি. ৰুত্তং হি ‘‘ছসু লোকো সমুপ্পন্নো, ছসু কুব্বতি সন্থৰ’’ন্তি (সং. নি. ১.৭০; সু. নি. ১৭১). ততো ছঅজ্ঝত্তিকবাহিরাযতনসঙ্খাততো পাতিতো মোক্খোতি পাতিমোক্খং. অথ ৰা পাতো ৰিনিপাতো অস্স অত্থীতি পাতী, সংসারো. ততো মোক্খোতি পাতিমোক্খং, অথ ৰা সব্বলোকাধিপতিভাৰতো ধম্মিস্সরো ভগৰা ‘‘পতী’’তি ৰুচ্চতি. মুচ্চতি এতেনাতি মোক্খো, পতিনো মোক্খো তেন পঞ্ঞত্তত্তাতি পতিমোক্খো, পতিমোক্খো এৰ পাতিমোক্খং. সব্বগুণানং ৰা মূলভাৰতো উত্তমট্ঠেন পতি চ সো যথাৰুত্তেনত্থেন মোক্খো চাতি পতিমোক্খো, পতিমোক্খো এৰ পাতিমোক্খং. তথা হি ৰুত্তং ‘‘পাতিমোক্খন্তি মুখমেতং পমুখমেত’’ন্তি (মহাৰ. ১৩৫) ৰিত্থারো.

অথ ৰা প-ইতি পকারে, অতী-তি অচ্চন্তত্থে নিপাতো, তস্মা পকারেহি অচ্চন্তং মোক্খেতীতি পাতিমোক্খং. ইদং হি সীলং সযং তদঙ্গৰসেন, সমাধিসহিতং পঞ্ঞাসহিতঞ্চ ৰিক্খম্ভনৰসেন, সমুচ্ছেদৰসেন চ অচ্চন্তং মোক্খেতি মোচেতীতি পাতিমোক্খং, পতি পতি মোক্খোতি ৰা পতিমোক্খো, তম্হা তম্হা ৰীতিক্কমদোসতো পচ্চেকং মোক্খোতি অত্থো, পতিমোক্খো এৰ পাতিমোক্খং. মোক্খোতি ৰা নিব্বানং, তস্স মোক্খস্স পটিবিম্বভূতোতি পতিমোক্খো. সীলসংৰরো হি সূরিযস্স অরুণুগ্গমনং ৰিয নিব্বানস্স উদযভূতো তপ্পটিভাগো ৰিয যথারহং কিলেসনিব্বাপনতো, পতিমোক্খোযেৰ পাতিমোক্খং. অথ ৰা মোক্খং পতি ৰত্ততি, মোক্খাভিমুখন্তি ৰা পতিমোক্খং, পতিমোক্খমেৰ পাতিমোক্খন্তি এৰমেত্থ পাতিমোক্খ-সদ্দস্স অত্থো ৰেদিতব্বো. ইরিযতীতি অত্তভাৰং পৰত্তেতি. ‘‘ৰিহরতী’’তি ইমিনা পাতিমোক্খসংৰরসীলে ঠিতস্স ভিক্খুনো ইরিযাপথৰিহারো দস্সিতো. পাল়িযন্তি ঝানৰিভঙ্গপাল়িযং (ৰিভ. ৫০৮ আদযো).

তত্থ কামং সমণচারং, সমণগোচরঞ্চ দস্সেতুং ‘‘আচারগোচরসম্পন্নো’’তি ৰুত্তং, যথা পন মগ্গং আচিক্খন্তো ‘‘ৰামং মুঞ্চ, দক্খিণং গণ্হা’’তি ৰজ্জেতব্বপুব্বকং গহেতব্বং ৰদেয্য, যথা ৰা সসীসন্হানেন পহীনসেদমলজল্লিকস্স মালাগন্ধৰিলেপনাদিৰিভূসনসংৰিধানং যুত্তরূপং, এৰং পহীনপাপধম্মস্স কল্যাণধম্মসমাযোগো যুত্তরূপোতি ‘‘অত্থি আচারো, অত্থি অনাচারো’’তি দ্ৰযং উদ্দিসিত্ৰা অনাচারং তাৰ ৰিভজিতুং ‘‘তত্থ কতমো অনাচারো’’তিআদি ৰুত্তং. তত্থ কাযিকো ৰীতিক্কমোতি তিৰিধং কাযদুচ্চরিতং. ৰাচসিকো ৰীতিক্কমোতি চতুব্বিধং ৰচীদুচ্চরিতং. কাযিকৰাচসিকোতি তদুভযং.

এৰং আজীৰট্ঠমকসীলস্স ৰীতিক্কমো দস্সিতো. ইদানি মানসং অনাচারং দস্সেতুং ‘‘সব্বম্পি দুস্সীল্যং অনাচারো’’তি ৰত্ৰা তত্থ একচ্চিযং দস্সেন্তো ‘‘ইধেকচ্চো ৰেল়ুদানেন ৰা’’তিআদিমাহ. তত্থ ৰেল়ুদানেনাতি পচ্চযুপ্পাদনত্থেন ৰেল়ুদানেন. পত্তদানাদীসুপি এসেৰ নযো. ৰেল়ূতি মনুস্সানং পযোজনাৰহো যো কোচি ৰেল়ুদণ্ডো. পত্তং গন্ধিকাদীনং গন্ধপলিৰেঠনাদিঅত্থং ৰা, তালনাল়িকেরাদিপত্তং ৰা. পুপ্ফং যং কিঞ্চি মনুস্সানং পযোজনাৰহং. তথা ফলং. সিনানং সিরীসচুণ্ণাদিন্হানিযচুণ্ণং. মত্তিকাপি এত্থেৰ সঙ্গহং গচ্ছতি. দন্তকট্ঠং যং কিঞ্চি মুখসোধনত্থং দন্তপোনং. চাটুকম্যতা অত্তানং দাসং ৰিয নীচট্ঠানে ঠপেত্ৰা পরস্স খলিতৰচনং সণ্ঠপেত্ৰা পিযকামতায পগ্গয্হৰচনং. মুগ্গসূপ্যতাতি মুগ্গসূপসমতা সচ্চালিকেন জীৰিতকপ্পনং. যথা হি মুগ্গসূপে পচ্চন্তে বহূ মুগ্গা পচ্চন্তি, কতিপযা ন পচ্চন্তি, এৰং সচ্চালিকেন জীৰিতকপ্পনে বহু অলিকং হোতি, অপ্পকং সচ্চন্তি. পরিভটতীতি পরিভটো, পরেসং দারকে পরিহরন্তো. পরিভটস্স কম্মং পারিভট্যং, সা এৰ পারিভট্যতা, অলঙ্করণাদিনা কুলদারকপরিহরণস্সেতং নামং. তেসং তেসং গিহীনং গামন্তরদেসন্তরাদীসু সাসনপটিসাসনহরণং জঙ্ঘপেসনিকং. অঞ্ঞতরঞ্ঞতরেনাতি এতেসং ৰা ৰেল়ুদানাদীনং ৰেজ্জকম্মভণ্ডাগারিককম্মপিণ্ডপটিপিণ্ডকম্মসঙ্ঘুপ্পাদচেতিযুপ্পাদপট্ঠপনাদীনং ৰা মিচ্ছাজীৰেন জীৰিতকপ্পনককম্মানং যেন কেনচি. বুদ্ধপটিকুট্ঠেনাতি বুদ্ধেহি গরহিতেন পটিসিদ্ধেন. মিচ্ছাজীৰেনাতি ন সম্মাআজীৰেন. অযং ৰুচ্চতি অনাচারোতি অযং সব্বোপি ‘‘অনাচারো’’তি কথীযতি. আচারনিদ্দেসো ৰুত্তপটিপক্খনযেনেৰ ৰেদিতব্বো.

গোচরনিদ্দেসেপি পঠমং অগোচরস্স ৰচনে কারণং হেট্ঠা ৰুত্তনযেনেৰ ৰেদিতব্বং. গোচরোতি পিণ্ডপাতাদীনং অত্থায উপসঙ্কমিতুং যুত্তট্ঠানং. অযুত্তট্ঠানং অগোচরো. ৰেসিযা গোচরো অস্সাতি ৰেসিযাগোচরো, মিত্তসন্থৰৰসেন উপসঙ্কমিতব্বট্ঠানন্তি অত্থো. ৰেসিযা নাম রূপূপজীৰিনিযো, তা মিত্তসন্থৰৰসেন ন উপসঙ্কমিতব্বা, সমণভাৰস্স অন্তরাযকরত্তা, পরিসুদ্ধাসযস্সাপি গরহহেতুতো, তস্মা দক্খিণাদানৰসেন সতিং উপট্ঠপেত্ৰাৰ উপসঙ্কমিতব্বা. ৰিধৰা ৰুচ্চন্তি মতপতিকা, পৰুত্থপতিকা ৰা. থুল্লকুমারিকাতি মহল্লিকা অনিৰিট্ঠকুমারিযো, পণ্ডকাতি নপুংসকা. তে হি উস্সন্নকিলেসা অৰূপসন্তপরিল়াহা লোকামিসসন্নিস্সিতকথাবহুলা, তস্মা ন উপসঙ্কমিতব্বা. ভিক্খুনিযো নাম উস্সন্নব্রহ্মচরিযা. তথা ভিক্খূপি. তেসং অঞ্ঞমঞ্ঞং ৰিসভাগৰত্থুভাৰতো সন্থৰৰসেন উপসঙ্কমনে কতিপাহেনেৰ ব্রহ্মচরিযন্তরাযো সিযা, তস্মা ন উপসঙ্কমিতব্বা. গিলানপুচ্ছনাদিৰসেন উপসঙ্কমনে সতোকারিনা ভৰিতব্বং. পানাগারন্তি সুরাপানঘরং. তং সোণ্ডজনেহি অৰিৰিত্তং হোতি. তত্থ তেহি সোণ্ডতাদিৰসেন ন উপসঙ্কমিতব্বং ব্রহ্মচরিযন্তরাযকরত্তা. সংসট্ঠো ৰিহরতি রাজূহীতিআদীসু রাজানো নাম যে রজ্জমনুসাসন্তি. রাজমহামত্তা রাজিস্সরিযসদিসায ইস্সরিযমত্তায সমন্নাগতা. তিত্থিযাতি ৰিপরীতদস্সনা বাহিরকপরিব্বাজকা. তিত্থিযসাৰকাতি তেসু দল়্হভত্তা পচ্চযদাযকা. অননুলোমিকেন সংসগ্গেনাতি তিস্সন্নং সিক্খানং অননুলোমিকেন পচ্চনীকভূতেন সংসগ্গেন সংসট্ঠো ৰিহরতি, যেন ব্রহ্মচরিযন্তরাযং ৰা সল্লেখপরিহানিং ৰা পাপুণাতি.

ইদানি অপরেনপি পরিযাযেন অগোচরং দস্সেতুং ‘‘যানি ৰা পন তানী’’তিআদি ৰুত্তং. তত্থ অস্সদ্ধানীতি বুদ্ধাদীসু সদ্ধাৰিরহিতানি. ততো এৰ অপ্পসন্নানি, কম্মকম্মফলসদ্ধায ৰা অভাৰেন অস্সদ্ধানি. রতনত্তযপ্পসাদাভাৰেন অপ্পসন্নানি. অক্কোসকপরিভাসকানীতি অক্কোসৰত্থূহি অক্কোসকানি চেৰ ভযদস্সনেন সন্তজ্জনকানি চ. অত্থং ন ইচ্ছন্তি অনত্থমেৰ ইচ্ছন্তীতি অনত্থকামানি. হিতং ন ইচ্ছন্তি অহিতমেৰ ইচ্ছন্তীতি অহিতকামানি. ফাসু ন ইচ্ছন্তি অফাসুংযেৰ ইচ্ছন্তীতি অফাসুককামানি. যোগক্খেমং নিব্ভযং ন ইচ্ছন্তি, অযোগক্খেমমেৰ ইচ্ছন্তীতি অযোগক্খেমকামানি. ভিক্খূনন্তি এত্থ সামণেরানম্পি সঙ্গহো. ভিক্খুনীনন্তি এত্থ সিক্খমানসামণেরীনং. সব্বেসং হি সাসনিকানং অনত্থকামতাদীপনপদমিদং ৰচনং. তথারূপানি কুলানীতি তাদিসানি খত্তিযকুলাদীনি. সেৰতীতি নিস্সায জীৰতি. ভজতীতি উপসঙ্কমতি. পযিরুপাসতীতি পুনপ্পুনং উপগচ্ছতি. অযং ৰুচ্চতীতি অযং ৰেসিযাদিকো, রাজাদিকো, অস্সদ্ধকুলাদিকো চ তং তং সেৰন্তস্স তিপ্পকারোপি অযুত্তো গোচরোতি অগোচরো. এত্থ হি ৰেসিযাদিকো পঞ্চকামগুণনিস্সযতো অগোচরো. যথাহ ‘‘কো চ, ভিক্খৰে, ভিক্খুনো অগোচরো পরৰিসযো? যদিদং পঞ্চ কামগুণা’’তি (সং. নি. ৫.৩৭২). রাজাদিকো সমণধম্মস্স অনুপনিস্সযতো, লাভসক্কারাসনিৰিচক্কনিপ্পোথনদিট্ঠিৰিপত্তিহেতুতো চ. অস্সদ্ধকুলাদিকো সদ্ধাহানিচিত্তসন্তাসাৰহতো অগোচরো.

গোচরনিদ্দেসে ‘‘ন ৰেসিযাগোচরো’’তিআদীনি ৰুত্তপটিপক্খৰসেন ৰেদিতব্বানি. ওপানভূতানীতি উদপানভূতানি ভিক্খুসঙ্ঘস্স, ভিক্খুনীসঙ্ঘস্স চ চতুমহাপথে খতপোক্খরণী ৰিয যথাসুখং ওগাহনক্খমানি. কাসাৰপজ্জোতানীতি ভিক্খূনং, ভিক্খুনীনঞ্চ নিৰত্থপারুতকাসাৰানংযেৰ পভাহি একোভাসানি. ইসিৰাতপটিৰাতানীতি গেহং পৰিসন্তানং, নিক্খমন্তানঞ্চ ভিক্খুভিক্খুনীসঙ্খাতানং ইসীনং চীৰরৰাতেন চেৰ সমিঞ্জনপসারণাদিজনিতসরীরৰাতেন চ পটিৰাতানি পৰাযিতানি ৰিনিদ্ধুতকিব্বিসানি ৰা.

ইদানি নিদ্দেসে আগতনযেনাপি আচারগোচরে দস্সেতুং ‘‘অপিচা’’তিআদি আরদ্ধং. এত্থাতি এতস্মিং পাতিমোক্খসীলনিদ্দেসে. ইমিনাপি নযেনাতি ইদানি ৰুচ্চমানৰিধিনাপি. সঙ্ঘগতোতি সঙ্ঘসন্নিপাতং গতো. অচিত্তীকারকতোতি অকতচিত্তীকারো, অকতগারৰোতি অত্থো. ঘট্টযন্তোতি সরীরেন, চীৰরেন ৰা ঘংসন্তো. পুরতোপি তিট্ঠতি অচিত্তীকারকতোতি সম্বন্ধিতব্বং. ঠিতকোপীতি উপরি তিট্ঠন্তো ৰিয আসন্নতরট্ঠানে ঠিতকোপি ভণতি. বাহাৰিক্খেপকোতি বাহুং ৰিক্খিপন্তো. অনুপাহনানন্তি অনাদরে সামিৰচনং. সউপাহনোতি উপাহনারুল়্হো. থেরে ভিক্খূ অনুপখজ্জাতি থেরানং ভিক্খূনং ঠিতট্ঠানং অনুপৰিসিত্ৰা তেসং আসন্নতরট্ঠানং উপগন্ত্ৰা. কট্ঠং পক্খিপতি অগ্গিকুণ্ডে. ৰোক্কম্মাতি পস্সতো অতিক্কমিত্ৰা. গূল়্হানি সভাৰতো পটিচ্ছন্নানি সাণিপাকারাদিনা পটিচ্ছাদিতানি. অনাপুচ্ছাতি অনাপুচ্ছিত্ৰা. অস্সাতি অনাচারস্স.

অপিচ ভিক্খূতিআদি সব্বস্সেৰ ভিক্খুনো আচারদস্সনৰসেন পৰত্তং অট্ঠকথাৰচনং, ন নিদ্দেসপাল়ি. সদ্ধাসীলসুতচাগাদিগুণহেতুকো গরুভাৰো গরুকরণং ৰা গারৰো, সহ গারৰেনাতি সগারৰো. গরুট্ঠানিযেসু গারৰসারজ্জাদিৰসেন পটিস্সাযনা পতিস্সা, সপ্পতিস্সৰপটিপত্তি. সহ পতিস্সাযাতি সপ্পতিস্সো. সৰিসেসং হিরিমনতায, ওত্তপ্পিভাৰেন চ হিরোত্তপ্পসম্পন্নো. সেখিযধম্মপারিপূরিৰসেন সুনিৰত্থো সুপারুতো. পাসাদিকেনাতি পসাদাৰহেন, ইত্থম্ভূতলক্খণে চেতং করণৰচনং. এসেৰ নযো ইতো পরেসুপি ছসু পদেসু. অভিক্কন্তেনাতি অভিক্কমেন. ইরিযাপথসম্পন্নোতি সম্পন্নইরিযাপথো. তেন সেসইরিযাপথানম্পি পাসাদিকতমাহ. ইন্দ্রিযেসু গুত্তদ্ৰারোতি চক্খুন্দ্রিযাদীসু ছসু দ্ৰারেসু সুসংৰিহিতারক্খো. ভোজনে মত্তঞ্ঞূতি পরিভুঞ্জিতব্বতো ভোজনসঞ্ঞিতে চতুব্বিধেপি পচ্চযে পরিযেসনপটিগ্গহণপরিভোগাদিৰসেন সব্বসো পমাণঞ্ঞূ. জাগরিযমনুযুত্তোতি পুব্বরত্তাপররত্তং ভাৰনামনসিকারসঙ্খাতং জাগরিযং সাতচ্চকারিতাৰসেন অনু অনু যুত্তো তত্থ যুত্তপযুত্তো. সতিসম্পজঞ্ঞেন সমন্নাগতোতিআদি যথাৰুত্তস্স আচারস্স সম্ভারদস্সনং. তত্থ অপ্পিচ্ছোতি নিইচ্ছো. সন্তুট্ঠোতি যথালাভাদিৰসেন সন্তোসেন তুট্ঠো. সক্কচ্চকারীতি আদরকারী. গরুচিত্তীকারবহুলোতি গরুট্ঠানিযেসু গরুকরণবহুলো. অযং ৰুচ্চতি আচারোতি অযং সগারৰতাদি অত্থকামেহি আচরিতব্বতো আচারো.

সীলাদীনং গুণানং উপনিস্সযভূতো উপনিস্সযগোচরো. সতিসঙ্খাতো চিত্তস্স আরক্খভূতো এৰ গোচরো আরক্খগোচরো. কম্মট্ঠানসঙ্খাতো চিত্তস্স উপনিবন্ধনট্ঠানভূতো গোচরো উপনিবন্ধগোচরো. অপ্পিচ্ছতাদীহি দসহি ৰিৰট্টনিস্সিতায কথায ৰত্থুভূতেহি গুণেহি সমন্নাগতো দসকথাৰত্থুগুণসমন্নাগতো. ততো এৰ কল্যাণো সুন্দরো মিত্তোতি কল্যাণমিত্তো. তস্স লক্খণং পরতো আগমিস্সতি. অস্সুতং সুত্তগেয্যাদিং. সুণাতীতি সুতমযং ঞাণং উপ্পাদেতি. সুতং পরিযোদাপেতীতি তমেৰ যথাসুতং অৰিসদতায অপরিযোদাতং পুনপ্পুনং পরিপুচ্ছনাদিনা ৰিসোধেতি নিজ্জটং নিগুম্বং করোতি. তত্থ চ যে কঙ্খট্ঠানিযা ধম্মা, তেসু সংসযং ছিন্দন্তো কঙ্খং ৰিতরতি. কম্মকম্মফলেসু, রতনত্তযে চ সম্মাদিট্ঠিযা উজুকরণেন দিট্ঠিং উজুং করোতি. ততো এৰ চ দুৰিধাযপি সদ্ধাসম্পদায চিত্তং পসাদেতি. অথ ৰা যথাসুতং ধম্মং পরিযোদপেত্ৰা তত্থাগতে রূপারূপধম্মে পরিগ্গহেত্ৰা সপচ্চযং নামরূপং পরিগ্গণ্হন্তো সত্তদিট্ঠিৰঙ্কৰিধমনেন দিট্ঠিং উজুং করোতি. ধম্মানং পচ্চযপচ্চযুপ্পন্নতামত্তদস্সনেন তীসুপি অদ্ধাসু কঙ্খং ৰিতরতি. ততো পরং চ উদযব্বযঞাণাদিৰসেন ৰিপস্সনং ৰড্ঢেত্ৰা অরিযভূমিং ওক্কমন্তো অৰেচ্চপসাদেন রতনত্তযে চিত্তং পসাদেতি. তথাভূতোৰ তস্স কল্যাণমিত্তস্স অনুসিক্খনেন সদ্ধাদীহি গুণেহি ন হাযতি, অঞ্ঞদত্থু ৰড্ঢতেৰ. তেনাহ ‘‘যস্স ৰা’’তিআদি.

অন্তরঘরন্তি অন্তরে অন্তরে ঘরানি এত্থ, তং এতস্সাতি ৰা ‘‘অন্তরঘর’’ন্তি লদ্ধনামং গোচরগামং পৰিট্ঠো. তত্থ ঘরে ঘরে ভিক্খাপরিযেসনায ৰীথিং পটিপন্নো. ওক্খিত্তচক্খূতি হেট্ঠাখিত্তচক্খু. কিত্তকেন পন ওক্খিত্তচক্খু হোতীতি আহ ‘‘যুগমত্তদস্সাৰী’’তি. সুসংৰুতোতি সংযতো. যথা পনেত্থ সুসংৰুতো নাম হোতি, তং দস্সেতুং ‘‘ন হত্থিং ওলোকেন্তো’’তিআদি ৰুত্তং.

যত্থাতি যেসু সতিপট্ঠানেসু. চিত্তং ভাৰনাচিত্তং. উপনিবন্ধতীতি উপনেত্ৰা নিবন্ধতি. ৰুত্তঞ্হেতং –

‘‘যথা থম্ভে নিবন্ধেয্য, ৰচ্ছং দমং নরো ইধ;

বন্ধেয্যেৰং সকং চিত্তং, সতিযারম্মণে দল়্হ’’ন্তি. (ৰিসুদ্ধি. ১.২১৭; দী. নি. অট্ঠ. ২.৩৭৪; ম. নি. অট্ঠ. ১.১০৭; পারা. অট্ঠ. ২.১৬৫; পটি. ম. অট্ঠ. ২.১.১৬৩);

সতিপট্ঠানানং উপনিবন্ধগোচরভাৰং দস্সেতুং ‘‘ৰুত্তঞ্হেত’’ন্তিআদি ৰুত্তং. তত্থ সকো পেত্তিকো ৰিসযোতি অত্তনো পিতু সম্মাসম্বুদ্ধস্স সন্তকো, তেন দিট্ঠো দস্সিতো চ ৰিসযো.

অণুপ্পমাণেসূতি পরমাণুপ্পমাণেসু. অসঞ্চিচ্চআপন্নসেখিযঅকুসলচিত্তুপ্পাদাদিভেদেসূতি অসঞ্চিচ্চ আপন্নসেখিযেসু অকুসলচিত্তুপ্পাদাদিভেদেসূতি এৰং অসঞ্চিচ্চগ্গহণং সেখিযৰিসেসনং দট্ঠব্বং. সেখিযগ্গহণেন চেত্থ ৰত্তক্খন্ধকাদীসু (চূল়ৰ. ৩৫৬ আদযো) আগতৰত্তাদীনম্পি গহণং. তেপি হি সিক্খিতব্বট্ঠেন ‘‘সেখিযা’’তি ইচ্ছিতা. তথা হি মাতিকাযং পারাজিকাদীনং ৰিয সেখিযানং পরিচ্ছেদো ন কতো. এৰঞ্চ কত্ৰা ‘‘অসঞ্চিচ্চ আপন্নসেখিযা’’তি অসঞ্চিচ্চগ্গহণং সমত্থিতং হোতি. ন হি মাতিকাযং আগতেসু পঞ্চসত্ততিযা সেখিযেসু নোসঞ্ঞাৰিমোক্খো নাম অত্থি, অসঞ্চিচ্চগ্গহণেনেৰ চেত্থ অসতিঅজাননানম্পি সঙ্গহো কতো. কেচি পনেত্থ অসিঞ্চিচ্চ আপন্নগ্গহণেন অচিত্তকাপত্তিযো গহিতাতি ৰদন্তি, তং তেসং মতিমত্তং, গরুকাপত্তীসুপি কাসঞ্চি অচিত্তকভাৰসব্ভাৰতো, অধিট্ঠানাৰিকম্মস্স, দেসনাৰিকম্মস্সেৰ ৰা সব্বলহুকস্স ৰজ্জস্স ইধাধিপ্পেতত্তা. তেনাহ ‘‘যানি তানি ৰজ্জানি অপ্পমত্তকানি ওরমত্তকানি লহুকানি লহুসম্মতানী’’তিআদি. আদিসদ্দেন পাতিমোক্খসংৰরৰিসুদ্ধত্থং অনতিক্কমনীযানং অনাপত্তিগমনীযানং সঙ্গহো দট্ঠব্বো. ভযদস্সনসীলোতি পরমাণুমত্তং ৰজ্জং অট্ঠসট্ঠিযোজনসতসহস্সুব্বেধসিনেরুপব্বতসদিসং কত্ৰা দস্সনসভাৰো, সব্বলহুকং ৰা দুব্ভাসিতমত্তং পারাজিকসদিসং কত্ৰা দস্সনসভাৰো. যং কিঞ্চীতি মূলপঞ্ঞত্তিঅনুপঞ্ঞত্তিসব্বত্থপঞ্ঞত্তিপদেসপঞ্ঞত্তিআদিভেদং যং কিঞ্চি সিক্খিতব্বং পটিপজ্জিতব্বং পূরেতব্বং সীলং. সম্মা আদাযাতি সম্মদেৰ সক্কচ্চং, সব্বসো চ আদিযিত্ৰা. অযং পন আচারগোচরসম্পদা কিং পাতিমোক্খসীলে পরিযাপন্না, উদাহু অপরিযাপন্নাতি? পরিযাপন্না. যদি এৰং কস্মা পুন ৰুত্তাতি চোদনং সন্ধাযাহ ‘‘এত্থ চা’’তিআদি.