৪. যোনকরট্ঠসাসনৰংসকথামগ্গো

৪. ইদানি পন যোনকরট্ঠে সাসনস্সুপ্পত্তিং কথেস্সামি. ভগৰা হি ৰেনেয্যহিতাৰহো যোনকরট্ঠে মমসাসনং চিরকালং পভিট্ঠহিস্সতীতি আপেক্খিত্ৰা সদ্ধিং ভিক্খু সঙ্ঘেন দেসচারিকং আহিণ্ডন্তো লভুঞ্জং নাম নগরং অগমাসি. তদা একো নেসাদো হরিফলং দত্ৰা তং পরিভুঞ্জিত্ৰা হরিবীজে খিপিতে পথৰিযং অপতিত্ৰা আকাসেযেৰ পতিট্ঠাসি. তং দিস্ৰা সিতং পত্ৰাকাসি. তমত্থং দিস্ৰা আনন্দত্থেরো পুচ্ছি. অনাগতে খো আনন্দ ইমস্মিং ঠানে মম ধাতুচেতিযং পতিট্ঠহিস্সতি, সাসনং ৰিরূল়মাপজ্জিস্সতীতি ব্যাকাসি. ভগৰতা পন হরিফলস্স ভুঞ্জিতট্ঠানত্তাহরিভুঞ্জোতি তস্স রট্ঠস্স নামং অহোসি. দ্ৰিন্নং তাপসানং ঠপিতং জলসুত্তিকং পটিচ্চ যোনকানং ভাসায লভুঞ্জোতি নামং অহোসি.

তদা তত্থ মপিন্নায নাম একিস্সা মাতিকায সমীপে নিসিন্নো একো লৰকুলিকজেট্ঠকো অত্তনো পুত্তং সত্তৰস্সিকং ভগৰতো নিয্যাদেত্ৰা পব্বাজেসি. কম্মট্ঠানানুযোগৰসেন অচিরেনেৰ অরহত্তং পাপুণি. সত্তৰস্সি কস্সচ সামণেরস্স অরহত্তং সচ্ছিকতট্ঠানতং পটিচ্চ যোনকভাসায এতং ঠানং চঙ্গমঙ্ঘ ইতি ৰুচ্চতি. চিরকাল ৰসেন জঙ্গমঙ্ঘ ইতি ৰুচ্চতি. ততো পট্ঠাযযেৰ যোনকরট্ঠে সাসনং পতিট্ঠাতীতি.

ইদং যোনকরট্ঠে পঠমং সাসনস্স পতিট্ঠানং.

সাসনে পন পঞ্চতিংসাধিকে দ্ৰিৰস্সসতে সম্পত্তে মহারক্খিতত্থেরো যোনকরট্ঠং গন্ত্ৰা কম্বোজখেমাৰর হরিভুঞ্জাযুদ্ধযাদীসু অনেকেসু রট্ঠেসু সাসনং পতিট্ঠাপেতি. তানি হি সব্বানি রট্ঠানি সঙ্গহেত্ৰা দস্সেন্তেহি অট্ঠকথাচরিযেহি যোনকলোকন্তি ওকাসকালোকৰাচকেন সামঞ্ঞসদ্দেন ৰুত্তং. পকতি হেসা গন্থকারানং যেন কেনচাকারেন অত্থন্তরস্স ৰিঞ্ঞাপনাতি.

মহারক্খিতত্থেরো চ সদ্ধিং পঞ্চহি ভিক্খূহি পাটলিপুত্ততো অনিলপথমগ্গেন যোনকলোকং আগন্ত্ৰা কাল়কারামসুত্তেন যোনকে পসাদেসি. সত্ততিসহস্সাধিকপাণসতসহস্সং মগ্গফলালঙ্কারং অদাসি. সন্তিকে চস্স দসসহস্সানি পব্বজিংসু. এৰং সো তত্থসাসনং পতিট্ঠাপেসি. তথা চ ৰুত্তং অট্ঠকথাযং,–

যোনকরট্ঠং তদা গন্ত্ৰা, সো মহারক্খিতো ইসি;

কাল়কারামসুত্তেন, তে পসাদেসি যোনকেতি.

ততো পট্ঠায তেসং সিস্সপরম্পরা বহূ হোন্তি, গণনপথং ৰীতিৰত্তা.

ইদং যোনকরট্ঠে মহারক্খিতত্থেরাদযো পটিচ্চ

দুতিযং সাসনস্স পতিট্ঠানং.

যোনকরট্ঠে লকুন্ননগরে জিনচক্কে পঞ্চৰস্সসতে মণিমযং বুদ্ধপ্পটিমং মাপেত্ৰা ৰিসুকম্মদেৰপুত্তো নাগসেনত্থেরস্স অদাসি. নাগেসেনত্থেরো চ তস্মিং পটিমম্হি ধাতু আগন্ত্ৰা পতিট্ঠাতূতি অধিট্ঠাসি. অধিট্ঠানৰসেনেৰ সত্তধাতুযো আগন্ত্ৰা তত্থ পতিট্ঠহিত্ৰা পাটিহারিযং দস্সেসুন্তি রাজৰংসে ৰুত্তং.

তঞ্চ ৰচনং মম পরিনিব্বানতো পঞ্চৰস্সসতে অতিক্কন্তে এতে উপ্পজ্জিস্সন্তীতি মিলিন্দপঞ্হাযং ৰুত্তৰচনেন কালপরিমাণৰসেন চ সমেতি. যোনকরট্ঠে মিলিন্দরঞ্ঞো কালে জিনচক্কে পঞ্চৰস্সসতেযেৰ নাগসেনত্থেরং পটিস্স জিনচক্কং ৰিরূল়ং হুত্ৰা পতিট্ঠাসি.

ইদং যোনকরট্ঠে নাগসেনত্থেরং পটিচ্চ ততিযং

সাসনস্স পতিট্ঠানং.

কলিযুগে পঞ্চসট্ঠিৰস্সেলভুঞ্জনগরতো সঙ্কমিত্ৰা ক্যুঙ্গরনগরে মাপিকস্স বঞ্ঞাচোমঙ্গর নামকস্স রঞ্ঞো কালে মজ্ঝিমদেসতো কস্সপত্থেরো পঞ্চহি থেরেহি সদ্ধিং আগচ্ছি.

তদা সো রাজা ৰিহারং কত্ৰা তেসং অদাসি. সীহল়দীপতো চ ধাতুযো আনেত্ৰা একো থেরো আগচ্ছি. ধাতুতো পাটিহারিযং দিস্ৰা পসীদিত্ৰা লভুঞ্জচেতিয নিধানং অকাসি. তে চ থেরে পটিচ্চ যোনকরট্ঠে সাসন ৰংসো আগতো.

ইদং যোনকরট্ঠে চতুত্থং সাসনস্স পতিট্ঠানং.

কলিযুগে দ্ৰাসট্ঠাধিকে সত্তসতে সম্পত্থে চিনরট্ঠিন্দো রাজা অভিভৰিত্ৰা সকলম্পি যোনকরট্ঠং সঙ্খুব্ভিতং হোতি. তদা মহাধম্মগম্ভীরত্থেরো মহামেধঙ্করত্থে রোচাতি দ্ৰে থেরো যোনকরট্ঠতো সদ্ধিং বহূহি ভিক্খূহি সীহল়দীপং অগমংসু. তদা চ সীহল়দীপে দুব্ভিক্খভযেন অভিভূতো হুত্ৰা ততো স্যামরট্ঠে সোক্কতযনগরং পুন অগমংসু.

ততো পচ্ছা লকুন্ননগরং গন্ত্ৰা সাসনং পগ্গণ্হন্তানং লজ্জিপেসলানং ভিক্খূনং সন্তিকে পুন সিক্খং গণ্হিংসু. তে চ থেরো স্যামরট্ঠে যোনকরট্ঠে চ সব্বত্থ সাসনং পতিট্ঠাপেসুন্তি.

ইদং যোনকরট্ঠে পত্তলঙ্কে দ্ৰে থেরে পটিচ্চ পঞ্চমং

সাসনস্স পতিট্ঠানং.

কলিযুগে পঞ্চৰীসাধিকে অট্ঠৰস্সসতে সম্পত্তে সিরিসদ্ধম্মলোকপতিচক্কৰত্তিরাজা লভুঞ্জচেতিযং পুন মহন্তং কত্ৰা তস্স চেতিযস্স সমীপে চত্তারো ৰিহারে কারাপেত্ৰা মহামেধঙ্করত্থেরস্স সারিপুত্তত্থেরস্স চ অদাসি. তদাপি তে দ্ৰে থেরা সাসনং পরিসুদ্ধং কত্ৰা পতিট্ঠাপেসুন্তি.

ইদং যোনকরট্ঠে মহামেধঙ্করসারিপুত্তত্থেরে

পটিচ্চ ছট্ঠং সাসনস্স পতিট্ঠানং.

কলিযুগে তেচত্তালীসাধিকে নৰৰস্সসতে সম্পত্তে হংসাৰতীনগরে অনেকসেতিভিন্দো নাম রাজা যোনকরট্ঠং অভিভৰিত্ৰা অত্তনো হত্থগতং কত্ৰা বলি ভুঞ্জনত্থায জেট্ঠপুত্তস্স অনুরুদ্ধস্স নাম রাজকুমারস্স দত্ৰা বহূহি অমচ্চেহি সদ্ধিং তত্থ গন্ত্ৰা অনুরাজতাৰেন রজ্জং কারাপেসি. সাসনঞ্চ ৰিসোধাপেতুং সদ্ধম্মচক্কসামিত্থেরং তেন সদ্ধিং পহিণি.

অনেকসেতিভিন্নো কির রাজা যোনকরট্ঠং ৰিজযকালে পঠমং সাসনস্স পতিট্ঠানভূতমিদন্তি কত্ৰা তংরট্ঠৰাসিনো করমরানীতভাৰেন ন অগ্গহেসীতি.

যথাৰুত্তত্থেরৰংসেসু চ একো লকুন্ননগরে অরঞ্ঞৰাসী থেরো তত্থ নগরে অজ্জ অসুকস্মিং ঠানে একো মতোতি গিহীনং কথেত্ৰা যথাকথিতং ভূতং হুত্ৰা অযং অভিঞ্ঞালাভীতি পাকটো অহোসি.

তস্মিংযেৰ চ নগরে মহামঙ্গলো নাম থেরো অনেকসেতিভিন্দস্স রঞ্ঞো যুজ্ঝিতুং আগতকালে অনেকসেতিভিন্দো রাজা মং পক্কোসিস্সতি, সমানজাতিকং দূতং পেস্সেস্সতীতি পক্কোসিতকালতো পঠমমেৰৰদি. যথাৰুত্তনিযামেনেৰ পক্কোসনতো অযং অভিঞ্ঞা লাভীতি কিত্তি ঘোসো অহোসি.

তত্থ নগরে ঞাণৰিলাসত্থেরো সঙ্খ্যাপকাসকং নাম পকরণং অকাসি. তংল়ীকং পন পত্তলঙ্কত্থেরস্স ৰিহারে ৰসন্তো সিরিমঙ্গলোনাম থেরো অকাসি.

ৰিসুদ্ধিমগ্গদীপনিং পন সংঞ্ঞ্ৰত্তঅরঞ্ঞৰাসী উত্তরারামো নাম একো থেরো. মঙ্গলদীপনিং সিরিমঙ্গলত্থেরো. উপ্পাতসন্তিং অঞ্ঞতরো থেরো. তং কির উপ্পাতসন্তিং সজ্ঝাযিত্ৰা চীনরঞ্ঞো সেনং অজিনীতি. ইচ্চেৰং যোনকরট্ঠে অভিঞ্ঞালাভীনং গন্থকারানঞ্চ থেরানং আনুভাৰেন জিনসাসনং পরিসুদ্ধং হুত্ৰা পতিট্ঠাতি. এৰং হেতুফলসম্বন্ধৰসেন আদি অন্ত সম্বন্ধৰসেন চ যথাৰুত্তেহি তীহি নযেহি থেরপরম্পরা ঘট্টেত্ৰা গহেতব্বা.

ইতি সাসনৰংসে যোনকরট্ঠসাসনৰংসকথা

মগ্গো নাম চতুত্থো পরিচ্ছেদো.