২. সীহল়দীপিকসাসনৰংসকথামগ্গো

২. ইদানি সীহল়দীপসাসনকথামগ্গং ৰত্তুং ওকাসো অনুপ্পত্তো, তস্মা তং ৰক্খামি.

সীহল়দীপঞ্হি সাসনস্স পতিট্ঠানভূতত্তা চেতিযগব্ভসদিসং হোতি. সম্মাসম্বুদ্ধো কির সীহল়দীপং ধরমানকালেপি তিক্খত্তুং অগমাসি. পঠমং যক্খানং দমনত্থং এককোৰ গন্ত্ৰা যক্খে দমেত্ৰা মযি পরিনিব্বুতে সীহল়দীপে সাসনং পতিট্ঠহিস্সতীতি তম্বপণ্ণিদীপে আরক্খং করোন্তো তিক্খত্তুং দীপং আৰিঞ্ছি. দুতিযং মাতুলভাগিনেয্যানং নাগরা জূনং দমনত্থায এককোৰ গন্ত্ৰা তে দমেত্ৰা অগমাসি. ততিযং পঞ্চভিক্খুসতপরিৰারো গন্ত্ৰা মহাচেতিযট্ঠানে চ থূপারামচেতিযট্ঠানে চ মহাবোধিপতিট্ঠিতট্ঠানে চ মহিযঙ্গণচেতিযট্ঠানে চ মুদিঙ্গণচেতিযট্ঠানে চ দীঘৰাপি চেতিযট্ঠানে চ কল্যাণিযচেতিযট্ঠানে চ নিরোধসমাপত্তিং সমাপজ্জিত্ৰা নিসীদি.

তদা চ পন সাসনং ওগাহেত্ৰান তাৰ তিট্ঠতি. পচ্ছা পন যথাৰুত্তত্থেরপরম্পরায সমভিনিৰিট্ঠেন মহামোগ্গলিপুত্ততিস্সত্থেরেন পেসিতো মহিন্দত্থেরো জিনচক্কে পঞ্চতিংসাধিকে দ্ৰিসতে সম্পত্তে দুতিযকত্তিকমাসে ইট্টিযেন উত্তিযেন সম্বুলেন ভদ্দসালেন চাতি এতেহি থেরেহি সদ্ধিং সীহল়দীপং অগমাসি. সোণুত্তরত্থেরাদযো জিনচক্কে পঞ্চতিংসাধিকে দ্ৰিসতে সম্পত্তে দুতিযকত্তিকমাসেযেৰ সাসনস্স পতিট্ঠাপনত্থায অত্তনো অত্তনো সম্পত্তভারভূতং তং তং ঠানং অগমংসু.

মহামহিন্দত্থেরো পন সত্তমাসানি আগমেত্ৰা জিনচক্কে ছত্তিংসাধিকে দ্ৰিসতে সম্পত্তে জেট্ঠমাসস্স পুণ্ণমিযং সীহল়দীপং সাসনস্স পতিট্ঠাপনত্থায অগমাসি. তেনেৰ তেসু নৰসু ঠানেসু সীহল়দীপং ছত্তিংসাধিকে দ্ৰিস তে অগমাসি. অঞ্ঞানি পন অট্ঠ ঠানানি পঞ্চতিংসাধিকদ্ৰিসতেযেৰ অগমাসীতি ৰিসুংৰ ৰত্থপেতব্বো.

কস্মা পন মহামহিন্দত্থেরো সত্তমাসানি আগমেত্ৰা সব্বপচ্ছা সীহল়দীপং গচ্ছতীতি. সীহল়দীপে মুটভিৰো নাম রাজা জরাদুব্বলো অহোতি, সাসনং পগ্গহেতুং অসমত্থো, তস্স পন পুত্তো দেৰানং পিয তিস্সো নাম রাজকুমারো দহরো সাসনং পগ্গহেতুং সমত্থো ভৰিস্সতি, সো চ দেৰানং ৰিযতিস্সো রজ্জং তাৰ লভতু ৰেদিস্সকগিরিনগরে মাতুযা সদ্ধিং ঞাতকে তাৰ পস্সামীতি অপেক্খিত্ৰা সত্তমাসানি আগমেত্ৰা ছত্তিংসাধিকদ্ৰিসতেযেৰ জিনচক্কে মহামহিন্দত্থেরো সীহল়দীপং গচ্ছতীতি ৰেদিতব্বং.

মহামহিন্দত্থেরো চ ইট্টিযাদীহি থেরেহি চতূহি ভাগিনেয্যেন সুমনসামণেরেন ভণ্ডুকেন নাম উপাসকে ন চাতি এতেহি সদ্ধিং ছত্তিংসাধিকে দ্ৰিসতে জিনচক্কে জেট্ঠমাসপুণ্ণমিযং সুৰণ্ণহংসা ৰিয জেট্ঠমাসে নভং উগ্গন্ত্ৰা আকাসমগ্গেন অনুরাধপুরস্স পুরত্থিমদিসাভাগে মিস্স কপব্বতকূটে পতিট্ঠাসি.

জেট্ঠমাসস্স চ পুণ্ণমিযং লঙ্কাদীপে জেট্ঠমূলনক্খত্তসভা হুত্ৰা মনুস্সা ছণং অকংসু. তেনেৰাহ সারত্থদীপনিযং নাম ৰিনযডীকাযং, জেট্ঠমাসস্স পুণ্ণমিযং জেট্ঠনক্খত্তং মূলনক্খত্তং ৰা হোতীতি. তত্থ চ পুণ্ণমিনক্খত্তং রাজমত্তন্তে পুণ্ণমিনক্খত্তৰিচারণনযেন ৰুত্তন্তি দট্ঠব্বং.

দেৰানং পিয তিস্সো চ রাজা নক্খত্তং নাম ঘোসাপেত্ৰা ছণং কারেথাতি অমচ্চে আণাপেত্ৰা চত্তালী সপুরিসসহস্সপরিৰারো নগরম্হা নিক্খমিত্ৰা যেন মিস্স কপব্বতো, তেন পাযাসি মিগৰং কীল়িতুকামো. অথ তস্মিং পব্বতে অধিৰত্থা একা দেৰতা মিগরূপেন রাজানং ফলোভেত্ৰা পক্কোসিত্ৰা থেরস্স অভিমুখং অকাসি.

থেরো রাজানং আগচ্ছন্তং দিস্ৰা মমংযেৰ রাজা পস্সতু মা ইতরেতি অধিট্ঠহিত্ৰা তিস্স তিস্স ইতো এহীতি আহ. রাজা তং সুত্ৰা চিন্তেসি, ইমস্মিং দীপে জাতো সকলোপি মনুস্সো মং তিস্সোতি নামং গহেত্ৰা আলপিতুং সমত্থো নাম নত্থি, অযং পন ভিন্নভিন্নপটধরো ভণ্ডুকাসাৰ ৰসনো মং নামেন আলপতি, কো নুখো অযং ভৰিস্সতি, মনুস্সো ৰা অমনুস্সো ৰাতি. থেরো আহ,–

সমণা মযং মহারাজ, ধম্মরাজস্স সাৰকা;

তৰেৰ অনুকম্পায, জম্বুদীপা ইধাগতাতি.

তদা চ দেৰানং পিযতিস্সো রাজা অসোকরঞ্ঞা পেসিতেন অভিসেকেন একমাসাভিসিত্তো অহোসি. ৰিসাখপুণ্ণমাযং হিস্স অভিসেকমকংসু. সো চ অসোকরঞ্ঞা পেসিতে ধম্মপণ্ণাকারে রতনত্তযগুণপ্পটিসংযুত্তং সাসনপ্পৰত্তিং অচিরসুতং অনুস্সরমানো তং থেরস্স সমণা মযং মহারাজ, ধম্মরাজস্স সাৰকাতি ৰচনং সুত্ৰা অয্যা নুখো আগতাতি তাৰদেৰ আৰুধং নিক্খিপিত্ৰা একমন্তং নিসীদি সম্মোদনীযং কথং কথযমানো. যথাহ,–

আৰুধং নিক্খিপিত্ৰান, একমন্তং উপাৰিসি;

নিসজ্জ রাজা সম্মোদি, বহুং অত্থূপসঞ্হিতন্তি.

সম্মোদনীযং কথঞ্চ কুরুমানেযেৰ তস্মিং তানিপি চত্তালীসপুরিসসহস্সানি আগন্ত্ৰা সম্পরিৰারেসুং. তদাথেরো ইতরেপি ছ জনে দস্সেসি. রাজা দিস্ৰা ইমে কদা আগতাতি আহ. মযা সদ্ধিংযেৰ মহারাজাতি. ইদানি পন জম্বুদীপে অঞ্ঞেপি এৰরূপা সমণা সন্তীতি. সন্তি মহারাজ এতরহিজম্বুদীপো কালাৰপজ্জোতো ইসিৰাতপটিৰাতো, তস্মিং–

তেৰিজ্জা ইদ্ধিপত্তা চ, চেতোপরিযকোৰিদা;

খীণাসৰা অরহন্তো, বহূ বুদ্ধস্স সাৰকাতি.

ভন্তে কেন আগতত্থাতি. নেৰ মহারাজ উদকেন, ন থলেনাতি. রাজা আকাসেন আগতাতি অঞ্ঞাসি. থেরো অত্থি নুখো রঞ্ঞো পস্সাৰেয্যত্তিকন্তি ৰীমংসনত্থায আসন্নং অম্বরুক্খং আরব্ভ পঞ্হং পুচ্ছি, –

কিন্নামো মহারাজ অযং রুক্খোতি. অম্বরুক্খো নাম ভন্তেতি. ইমং পন মহারাজ অম্বং মুঞ্চিত্ৰা অঞ্ঞো অম্বো অত্থি ৰা নত্থি ৰাতি. অত্থি ভন্তে অঞ্ঞেপি বহূ অম্বরুক্খাতি. ইমঞ্চ অম্বং তে চ অম্বে মুঞ্চিত্ৰা অত্থি নুখো মহারাজ অঞ্ঞে রুক্খাতি. অত্থি ভন্তে, তে পন ন অম্বরুক্খাতি. অঞ্ঞে চ অম্বে অনম্বে চ মুঞ্চিত্ৰা অত্থি পন অঞ্ঞো রুক্খোতি. অযমেৰ ভন্তে অম্ব রুক্খোতি. সাধু মহারাজ পণ্ডিতোসীতি.

অত্থি পন মহারাজ তে ঞাতকাতি. অত্থি ভন্তে বহূজনাতি. তে মুঞ্চিত্ৰা কেচি অঞ্ঞাতকাপি অত্থি মহারাজাতি. অঞ্ঞাতকা ভন্তে ঞাতকেহি বহুতরাতি. তৰঞাতকে চ অঞ্ঞাতকে চ মুঞ্চিত্ৰা অত্থঞ্ঞো কোচি মহারাজাতি. অহমেৰ ভন্তেতি. সাধু মহারাজ অত্তা নাম অত্তনো নেৰ ঞাতকো ন অঞ্ঞাতকোতি.

অথ থেরো পণ্ডিতো রাজা সক্খিস্সতি ধম্মং অঞ্ঞাতুন্তি চূল়হত্থিপদোপমসুত্তং কথেসি. কথাপরিযোসানে রাজা তীসু সরণেসু পতিট্ঠহি সদ্ধিং চত্তালীসায পাণসহস্সেহীতি. ততো পরং যং যং ৰত্তব্বং, তং তং সমন্তপাসাদিকাদীসু ৰুত্তনযেন ৰেদিতব্বং.

ইচ্চেৰং সীহল়দীপে সাসনানুগ্গহণ মহিন্দত্থেরতো আগতা সিস্সপরম্পরা বহূ হোন্তি, গণনপথং ৰীতি ৰত্তা. কথং. মহামহিন্দত্থেরস্স সিস্সো অরিট্ঠো নাম থেরো, তস্স সিস্সো তিস্সদত্তো, তস্স সিস্সো কাল়সুমনো, তস্স সিস্সো দীঘো, তস্স সিস্সো দীঘ সুমনো, তস্স সিস্সো কাল়সুমনো, তস্স সিস্সো নাগো, তস্স সিস্সো বুদ্ধরক্খিতো, তস্স সিস্সো তিস্সো, তস্স সিস্সো রেৰো, তস্স সিস্সো সুমনো, তস্স সিস্সো চূল়নাগো, তস্স সিস্সো ধম্মপালি এতা, তস্স সিস্সো খেমো, তস্স সিস্সো উপলিস্সো, তস্স সিস্সো ফুস্সদেৰো, তস্স সিস্সো সুমনো, তস্স সিস্সো মহাপদুমো, তস্স সিস্সো মহাসীৰো, তস্স সিস্সো উপালি, তস্স সিস্সো মহানাগো, তস্স সিস্সো অভযো, তস্স সিস্সো তিস্সো, তস্স সিস্সো সুমনো, তস্স সিস্সো চূল়াভযো, তস্স সিস্সো তিস্সো, তস্স সিস্সো চূল়দেৰো, তস্স সিস্সো সীৰোতি. অযং যাৰ পোত্থকারুল়সঙ্খাতা চতুত্থসঙ্গীতিকা, তাৰ থেরপরম্পরাতি দট্ঠব্বা.

ৰুত্তঞ্হেতং অট্ঠকথাযং,– যাৰজ্জভনা তেসংযেৰ অন্তেৰাসিকপরম্পরভূতায আচরিযপরম্পরায আভতন্তিতি ৰেদিতব্বন্তি.

এৰং তেসং সিস্সপরম্পরভূতা আচরিযপরম্পরা যাৰজ্জতনা সাসনে পাকটা হুত্ৰা আগচ্ছন্তীতি ৰেদিতব্ব.

সাসনে ৰিনযধরেহি নাম তিলক্খণসম্পন্নেহি ভৰিতব্বং. তীণি হি ৰিনযধরস্স লক্খণানি ইচ্ছি তব্বানি. কতমানি তীণি. সুত্তঞ্চস্স স্ৰাগতং হোতি সুপ্পৰত্তি সুৰিনিচ্ছিতং সুত্ততো অনুব্যঞ্জনতোতি ইদমেকং লক্খণং, ৰিনযে খো পন ঠিতো হোতি অসংহীরোতি ইদং দুতিযং, আচরিযপরম্পরা খো পনস্স সুগ্গহিতা হোতি সুমনসিকতা সুপধারিতাতি ইদং ততিযং.

তত্থ আচরিযপরম্পরা খো পনস্স সুগ্গহিতা হোতীতি থেরপরম্পরা ৰংসপরম্পরা চস্স সুট্ঠুগহিতা হোতি. সুমনসিকতাতি সুট্ঠু মনসিকতা, আৰজ্জিতমত্তে ঞজ্জলি তপ্পদীপো ৰিয হোতি.

সুপধারিতাতি সুট্ঠু উপধারিতা, পুব্বাপরানুসন্ধিতো অত্থতো কারণতো চ উপ ধারিতা. অত্তনো মতিং পহায আচরিযসুদ্ধিযা ৰত্তা হোতি, ময্হং আচরিযো অসুকাচরিযস্স সন্তিকে উগ্গণ্হি, সো অসুকস্সাতি এৰং সব্বং আচরিযপরম্পরং থের ৰাদঙ্গং আহরিত্ৰা যাৰ উপালিত্থেরো সম্মাসম্বুদ্ধস্স সন্তিকে উগ্গণ্হীতি পাপেত্ৰা ঠপেতি. ততোপি আহরিত্ৰা উপালিত্থেরো সম্মাসম্বুদ্ধস্স সন্তিকে উগ্গণ্হি, দাসকত্থেরো অত্তনো উপজ্ঝাযস্স উপালিত্থেরস্স, সোণকত্থেরো অত্তনো উপজ্ঝাযস্স দোসকত্থেরস্স, সিগ্গৰত্থেরো অত্তনো উপজ্ঝাযস্স সোণকত্থেরস্স, মোগ্গলিপুত্ততিস্সত্থেরো অত্তনো উপজ্ঝাযস্স সিগ্গৰত্থেরস্স চণ্ড ৰজ্জিত্থেরস্স চাতি এৰং সব্বং আচরিযপরম্পরং থেরৰাদঙ্গং আহরিত্ৰা অত্তনো আচরিযং পাপেত্ৰা ঠপেতি. এৰং উগ্গহিতা হি আচরিযপরম্পরা সুগ্গহিতা হোতি.

এৰং অসক্কোন্তেন পন দ্ৰে তযো পরিৰট্টা উগ্গহেতব্বা. সব্বপচ্ছিমেন হি নযেন যথা আচরিযো চ আচরিযাচরিযো চ পাল়িঞ্চ পরিপুঞ্ছঞ্চ ৰদন্তি, তথা ঞাতুং ৰত্ততীতি.

যথা ৰুত্তত্থেরপরম্পরা পন ভগৰতো ধরমানকালতো পট্ঠায যাৰ পোত্থকারুল়া মুখপাঠেনেৰ পিটকত্তযং ধারেসুং, পরিপুণ্ণং পন কত্ৰা পোত্থকে লিখিত্ৰা ন ঠপেন্তি. এৰং মহাথেরা দুক্করকম্মং কত্ৰা সাসনং পগ্গণ্হিংসু. তত্রিদং ৰত্থু,–

সীহল়দীপে কির চণ্ডালতিস্সভযেন সঙ্খুব্ভিত্ৰা দেৰো চ অৰস্সিত্ৰা দুব্ভিক্খভযং উপ্পজ্জি. তদা অক্কো দেৰানমিন্দো আগন্ত্ৰা তুম্হে ভন্তে পিটকং ধারেতুং ন সক্খিস্সথ, নাৰং পন আরূহিত্ৰা জম্বুদীপং গচ্ছথ, সচে নাৰা অপ্পহোনকা ভৰেয্য, কট্ঠেন ৰা ৰেল়ুনা ৰা তরথ, অভযত্থায পন মযং রক্খিস্সামাতি আহ.

তদা সট্ঠিমত্তা ভিক্খূ সমুদ্দতীরং গন্ত্ৰা পুন এতদহোসি,– মযং জম্বুদীপং ন গচ্ছিস্সাম, ইধেৰ ৰসিত্ৰা তেপিটকং ধারিস্সামাতি. ততো পচ্ছা নাৰা তিত্থতো নিৰত্তিত্ৰা সীহল়দীপেকদেসং মলযজনপদং গন্ত্ৰা মূলফলাদীহিযেৰ যাপেত্ৰা সজ্ঝাযং অকংসু. ছাতকভযেন অতিপীল়িতা হুত্ৰা এৰম্পি কাতুং অসক্কোন্তো ৰাল়ুকতলে উরং ঠপেত্ৰা সীসেন সীসং অভিমুখং কত্ৰা ৰাচং অনিচ্ছারেত্ৰা মনসাযেৰ অকংসু. এৰং দ্ৰাদসৰস্সানি সদ্ধিং অট্ঠকথায তেপিটকং রক্খিত্ৰা সাসনং অনুগ্গহেসুং.

দ্ৰাদসৰস্সেসু পন অতিক্কন্তেসু তং ভযং ৰূপসমিত্ৰা পুব্বে জম্বুদীপং গচ্ছন্তা সত্তভিক্খুসতা আগন্ত্ৰা সীহল়দীপেকদেসং রামজনপদে মণ্ডলারামৰিহারং আপজ্জিংসু. তেপি সট্ঠিমত্তা ভিক্খূ তমেৰ ৰিহারং গন্ত্ৰা অঞ্ঞমঞ্ঞং সম্মন্তেত্ৰা সজ্ঝাযিংসু. তদা অঞ্ঞমঞ্ঞং সমেন্তি, ন ৰিরুজ্ঝন্তি, গঙ্গাদকেন ৰিয যমুনোদকং সংসন্দেন্তি. এৰং পিটকত্তযং মুখপাঠেনেৰ ধারেত্ৰা মহাথেরা দুক্করকম্মং করোন্তীতি ৰেদিতব্বা.

যম্পি পরিযত্তিং একপদমত্তম্পি অৰিরজ্ঝিত্ৰা ধারেন্তি, তং দুক্করকম্মমেৰ.

সীহল়দীপে কির পুনব্বসুকস্স নাম কুটুম্বিকস্স পুত্তো তিস্সত্থেরো বুদ্ধৰচনং উগ্গণ্হিত্ৰা ইমং জম্বুদীপং আগন্ত্ৰা যোনকধম্মরক্খিতত্থেরস্স সন্তিকে বুদ্ধৰচনং উগ্গণ্হিত্ৰা গচ্ছন্তো নাৰং অভিরূহনতিত্থে একস্মিং পদে উপ্পন্নকঙ্খো যোজনসতমগ্গং নিৰত্তিত্ৰা আচরিযস্স সন্তিকং আগচ্ছন্তো অন্তরামগ্গে একস্স কুটুম্বিকস্স পঞ্হং কথেসি. সো পসীদিত্ৰা সতসহস্সগ্ঘনকং কম্পলং অদাসি. সোপি তং আহরিত্ৰা আচরিযস্স অদাসি. থেরো ৰা সিযা কোট্টেত্ৰা নিসীদনট্ঠানে পরিভণ্ডং কারেসি. কিমত্থাযাতি. পচ্ছিমায জনতায অনুগ্গহত্থায. এৰং কিরস্স অহোসি,– অম্হাকং গতমগ্গং আৰজ্জিত্ৰা অনাগতে সব্রহ্মচারিনো পটিপত্তিং পূরেতব্বং মঞ্ঞিস্সন্তীতি. তিস্সত্থেরোপি আচরিযস্স সন্তিকে কঙ্খং ছিন্দিত্ৰা সীহল়দীপমেৰ সকট্ঠানং আগমাসীতি. ইচ্চেৰং পরিযত্তিং একপদমত্তম্পি অৰিরজ্ঝিত্ৰা ধারণম্পি দুক্করকম্মমেৰাতি দট্ঠব্বং.

যম্পি যেভুয্যেন পগুণং ন করোন্তি, তস্স অনন্তরধানত্থায অসম্মোসত্থায উগ্গহধারণাদিৰসেন রক্খনম্পি করোন্তি, তং দুক্করকম্মমেৰ.

সীহল়দীপেযেৰ কির মহাভযে একস্সেৰ ভিক্খুনো মহানিদ্দেসো পগুণো অহোসি. অথ চতুনিকাযিকতিস্সত্থেরস্স উপজ্ঝাযো মহাতিপিটকত্থেরো নাম মহারক্খিতত্থেরংআহ,– আৰুসো মহারক্খিত অসুকস্স সন্তিকে মহানিদ্দেসং গণ্হাহীতি. পাপোকিরাযং ভন্তে ন গণ্হামীতি. গণ্হাৰুসো অহং তে সন্তিকে নিসীদিস্সামীতি. সাধু ভন্তে তুম্হেসু নিসিন্নেসু গণ্হিস্সামীতি পট্ঠপত্ৰা রত্তিন্দিৰং নিরন্তরং পরিযাপুণন্তো ওসানদিৰসে হেট্ঠামঞ্চে ইত্থিং দিস্ৰা ভন্তে সুতংযেৰ মে পুব্বে, সচাহং এৰং জানেয্যং, ন ঈদিসস্স সন্তিকে ধম্মং পরিযাপুণেয্যন্তি আহ. তস্স পন সন্তিকে বহূ মহাথেরা উগ্গণ্হিত্ৰা মহানিদ্দেসং পতিট্ঠাপেসুং. এৰং যং যেভুয্যেন পগুণং ন করোন্তি, তস্স অনন্তরধানত্থায অসম্মোসত্তায উগ্গহধারণাদিৰসেন রক্খনম্পি দুক্করকম্মং যেৰাতি দট্ঠব্বং.

ইচ্চেৰং ভগৰতো ধরমানকালতো পভুতি চিরকালং যথাৰুত্তমহাথেরপরম্পরা পরিযত্তিং মুখপাঠেনেৰ ধারেসুং. অহোৰত পোরাণিকানং মহাথেরানং সতিপঞ্ঞাসমাধিৰেপুল্লতায হি তে মুখপাঠেনেৰ ধারেতু সক্কাতি. মুখপাঠেনেৰ পোরাণকত্থেরানং পরিযত্তিধারণং পঞ্চনৰুতাধিকানি চতুসতানি অহোসি.

ভগৰতো পরিনিব্বানতো মহাৰংসসারত্থসঙ্গহেসু আগতনযেন জিনচক্কে পণ্ণাস্সাধিকে চতুসতে সম্পত্তে তম্বপণ্ণিদীপে রাজূনং অট্ঠারসমকো’সদ্ধাতিস্সস্স নাম রঞ্ঞো পুত্তো ৰট্টগামণি নাম রাজা রজ্জং পত্ৰা ছৰস্সকালে অনাগতে সত্তা হীনসতিপঞ্ঞাসমাধিকা হুত্ৰা ন সক্খিস্সন্তি মুখপাঠেন ধারেতুন্তি উপপরিক্খিত্ৰা পুব্বে ৰুত্তেহি মহাথেরেহি অনুপুব্বেন আগতা পঞ্চমত্তা মহাথেরসতা ৰট্টগামণিরাজানং নিস্সায তম্বপণ্ণিদীপেকদেসে মলযজনপদে আলোকলেণে অট্ঠকথায সহপিটকত্তযং পোত্থকে আরোপেসুং.

তঞ্চ যথাৰুত্তসঙ্গীতিযো উপনিধায চতুত্থসঙ্গীতিযেৰ নামাতি ৰেদিতব্বা. ৰুত্তঞ্হেতং সারত্থদীপনিযং নাম ৰিনযটীকাযং,– চতুত্থসঙ্গীতিসদিসা হি পোত্থকারোহসঙ্গীতীতি.

সীহল়দীপে পন ৰট্টগামণিরাজা মরম্মরট্ঠে সিরিখেত্তনগরে একো নাম কুক্কুটসীসরাজা চ এককালেন রজ্জং কারেসি. অমরপুরমাপকস্স রঞ্ঞো কালে সীহল়দীপভিক্খুহি ইধ পেসিতসন্দেসকথাযং পন তেত্তিংসাধিকচতুসতে সম্পত্তে পোত্থকারুল়ং অকংসূতি আগতং. ৰুত্তঞ্হেতং তত্থ,– তেত্তিংসাধিকচতুৰস্সসতপরিমাণকালন্তি.

ইদং সীহল়দীপে যাৰ পোত্থকারুল়্হা

সাসনস্স পতিট্ঠানং.

অথাপরং জম্বুদীপে সীহল়দীপে চ ভিক্খূ ৰিসুং ৰিসুং গণৰসেন ভিজ্জিংসু, যথা অনোতত্তদহতো নিক্খমননদিযা গঙ্গাযমুনাদিৰসেন ভিজ্জন্তীতি. তত্থ জম্বুদীপে গণানং ভিজ্জমানতং উপরিযেৰ ৰক্খাম.

সীহল়দীপে পন গণানং ভিজ্জমানতা এৰং দট্ঠব্বা. কথং. সীহল়দীপে হি সাসনস্স পতিট্ঠমানকালতো অট্ঠারসাধি কদ্ৰিৰস্সসতে সম্পত্তে ৰট্টগামণিরঞ্ঞা কারাৰিতে অভযগিরিৰিহারে পরিৰারখন্ধকং পাঠতো চ অত্থতো চ ৰিপল্লাসং কত্ৰা মহাৰিহারৰাসিগণতো পুথু হুত্ৰা একো গণো ভিজ্জি, সো অভযগিরিৰাসিগণো নাম, ধম্মরুচিগণোতি চ তস্সেৰ নামং.

অভযগিরিৰাসিগণস্স ভিজ্জমানতো দ্ৰেচত্তালীসাধিকতিৰস্সসতে সম্পত্তে মহাসেনেন নাম রঞ্ঞা কারাপিতে জেতৰনৰিহারে ভিক্খূ উভতোৰিসঙ্গপাঠে ৰিপরীতৰসেন অভিসঙ্খরিত্ৰা অভযগিরিৰাসিগণতো ৰিসুং একো গণো অহোসি, সো জেতৰনৰাসিগণো নাম, সাগলিযগণোতি চ তস্সেৰ নামং.

জেতৰন ৰাসিগণস্স ভিজ্জমানকালতো একপঞ্ঞাসৰস্সাধিকানং তিণ্ণং ৰস্সসতানং উপরি কুরুন্দৰাসিনো চ কোলম্বৰাসিনো চ ভিক্খূ ভাগিনেয্যং দাঠাপতিং নাম রাজানং নিস্সায উভতোৰিভঙ্গপরিৰারখন্ধকপাঠে ৰিপরীতৰসেন অভিসঙ্খরিত্ৰা ৰুত্তেহি দ্ৰীহি গণেহি ৰিসুং হুত্ৰা মহাৰিহার ৰাসিগণ্হত্তমং তুলযিত্ৰা উপধারেত্ৰা মহাৰিহারনামং গহেত্ৰা একো গণো ভিজ্জি. এৰং সীহল়দীপে মহামহিন্দত্থেরাদীনং ৰংসভূতেন মহাৰিহারৰাসি গণেন সদ্ধিং চত্তারো গণা ভিজ্জিংসু.

তত্থ মহাৰিহারৰাসি গণোযেৰ একো ধম্মৰাদী অহোসি, সেসা পন অধম্মৰাদিনো. তে চ তযো অধম্মৰাদিনো গণা ভূতত্থং পহায অভূতত্থেন ধম্মং অগরুং কত্ৰা চরিংসূতি ৰচনতো সীহল়দীপে অধম্মৰাদিনো তযোপি অলজ্জিনো গণা পরিমণ্ডলসুপ্পটিচ্ছন্নাদিসিক্খাপদানি অনাদিযিত্ৰা ৰিচরিংসু. ততো পট্ঠায সাসনে একচ্চানং ভিক্খূনং নানপ্পকারৰসেন নিৰাসনপারুপনাদীনি দিস্সন্তিতি ৰেদিতব্বং.

অধম্মৰাদিগণানং ভিজ্জমানকালতো সত্তৰীসাধিকানং পঞ্চসতানং ৰস্সানঞ্চ উপরি সিরিসঙ্ঘবোধি নাম রাজা মহাৰিহার গণস্স পক্খো হুত্ৰা অধম্মৰাদিনা তযো গণে নিগ্গহিত্ৰা জিনসাসনং পগ্গহেসি. সো চ সিরিসঙ্ঘ বোধিরাজা অম্হাকং মরম্মরট্ঠে অরিমন্দননগরে অনুরুদ্ধেন নাম রঞ্ঞা সমকালৰসেন রজ্জসম্পত্তিং অনুভৰি.

ততো পচ্ছা সীহল়দীপে ৰোহারকতিস্সস্স নাম রঞ্ঞো কালে কপিলেন নাম অমচ্চেন সদ্ধিং মন্তেত্ৰা মহাৰিহার ৰাসিনো ভিক্খূ নিস্সায অধম্মৰাদিগণে নিগ্গণ্হিত্ৰা জিনসাসনং পগ্গণ্হাতি.

ততো পচ্ছা চ গোট্ঠাভযস্স নাম রঞ্ঞো কালে অভযগিরি ৰাসিনো ভিক্খূ পরসমুদ্দং পব্বাজেত্ৰা মহাৰিহার ৰাসিনো ভিক্খূ নিস্সায সাসনং ৰিসোধযি.

ততো পচ্ছাপি গোট্ঠাভযরঞ্ঞো পুত্তভূতস্স মহাসেনস্স নাম রঞ্ঞো কালে অভযগিরিৰাসীনং ভিক্খূনং অব্ভন্তরে সঙ্ঘমিত্তো নাম একো ভিক্খু রঞ্ঞো পধানাচরিযো হুত্ৰা মহামহিন্দত্থেরাদীনং অরহন্তানং নিৰাসট্ঠানভূতং মহাৰিহারারামং ৰিনস্সিতুং মহাসেনরঞ্ঞা মন্তেত্ৰা আরভি. তদা নৰৰস্সানি মহাৰিহারে ভিক্খু সঞ্ঞো অহোসি. অহোৰত মহাথেরানং মহিদ্ধিকানং নিৰাসট্ঠানং অলজ্জিনো ভিক্খূ ৰিনস্সাপেসুং, সুৰণ্ণহংস্সানং নিৰাসট্ঠানং কাকা ৰিযাতি.

জেতৰনৰাসীনঞ্চ ভিক্খূনং অব্ভন্তরে একো তিস্সো নাম ভিক্খু তেনেৰ রঞ্ঞা মন্তেত্ৰা মহাৰিহারে সীমং সমূহনি. অছেকত্তা পন তেসং সীমসমূহনকম্মং ন সম্পজ্জীতি. অহোৰত দুস্সীলানং পাপকানং কম্মং অচ্ছরিযং, সেয্যথাপি নাম সাখমিগো অগ্গগ্ঘো কাসিৰত্থং মহগ্ঘং ভিন্নতি, এৰমেৰ ভিন্দিতব্বৰত্থুনা ভেদকপুগ্গলো অতিৰিয দূরো অহোসীতি. ভৰন্তি চেত্থ, –

যথা সাখমিগো পাপো, অপ্পগ্ঘোযেৰ কাসিকং;

মহগ্ঘং কচ্চ ভিন্নংভিন্নং, মহুস্সাহেন ছিন্দতি.

এৰং অধম্মৰাদী পাপো, ধম্মৰাদিগণং সুভং;

মহুস্সাহেন ভিন্দযি, অহো অচ্ছরিযো অযং.

আরকা দূরতো আসুং, ভিন্দিতব্বেহি ভেদকা;

ভূমিতোৰ ভৰগ্গন্তো, অহো কম্মং অজানতন্তি.

ইচ্চেৰং অধম্মৰাদিগণানং বলৰতায ধম্মৰাদিগণো পরিহাযতি. যথা হি গিজ্ঝসকুণস্স পক্খৰাতেন সুৰণ্ণহংসা পকতিযা ঠাতুং ন সক্কোন্তি, এৰমেৰ অধম্মৰাদীনং বলৰতায ধম্মৰাদী পরিহাযতি. ব্যগ্ঘৰনে ৰিয সুৰণ্ণমিগো নিল্লযিত্ৰা গোচরং গণ্হাতি, যথারুচিৰসেন ধম্মং চরিতুং ওকাসং ন লভি.

সীহল়দীপে সাসনস্স পতিট্ঠানতো দ্ৰিসত্ততাধিকানং চতুসতানং ৰস্সসহস্সানঞ্চ উপরি সম্মাসম্বুদ্ধস্স পরিনিব্বানতো অট্ঠসত্তসতাধিকানং ৰস্সসহস্সানং উপরি মহারাজা নাম ভূপালো রজ্জং কারেসি. সো পন রাজা ঞদুম্বরগিরিৰাসিকস্সপত্থেরগ্গমুখা মহাৰিহারৰাসিনো ভিক্খূ তমেৰ রাজানং নিস্সায সাসনে মলং ৰিসোধেসুং, যথা হেরঞ্ঞিকো হিরঞ্ঞে মলন্তি.

মহাৰিহারৰাসিগণতো অঞ্ঞে অধম্মৰাদিনা উপ্পব্বা জেত্ৰা ৰিসোধেসুং. সো চ মহারাজা অম্হাকং মরম্মরট্ঠে অরিমদ্দননগরে নরপতিচঞ্ঞিসূনা নাম রঞ্ঞা সমকাল ৰসেন রজ্জং কারেসীতি ৰেদিতব্বো.

ততো পচ্ছা ৰি ৰিজযবাহুরাজানং পরক্কমবাহুরাজানঞ্চ নিস্সায মহাৰিহার ৰাসিনো ভিক্খূ সাসনং পরিসুদ্ধং অকংসু, অধম্মৰাদিনো সব্বেপি উপ্পব্বাজেত্ৰা মহাৰিহারৰাসিগণোযেৰ একো পতিট্ঠহি, যথা অব্ভাদিউপক্কিলেসমলেহি ৰিমুত্তো নিসানাথোতি.

সিরিসঙ্ঘবোধিরাজা ৰোহারিকতিস্সরাজা গোট্ঠাভযরাজাতি এতে রাজানো সাসনং ৰিসোধেন্তোপি সব্বেন সব্বং অধম্মৰাদিগণানং অৰিনস্সনতো সাসনং পরিসুদ্ধং ন তাৰ অহোসি. সিরিসঙ্ঘবোধিরঞ্ঞো মহারঞ্ঞো ৰিজযবাহুরঞ্ঞো পরক্কমবাহুরঞ্ঞোতি এতেসংযেৰ রাজূনং কালে সব্বেন সব্বং অধম্মৰাদীনং ৰিনস্সনতো সাসনং পরিসুদ্ধং অহোসি. তদা পন অধম্মৰাদিনা সীসম্পি উট্ঠহিতুং ন সক্কা, যথা অরুণুগ্গে কোসিযাতি.

অপরভাগে পন চিরং কালং অতিক্কন্তে মিচ্ছাদিট্ঠিকানং ৰিজাতিযানং ভযেন লঙ্কাদীপে সাসনং ওসক্কিত্ৰা গণপূরণমত্তস্সপি ভিক্খুসঙ্ঘস্স অৰিজ্জমানতায মহাৰিজযবাহুরঞ্ঞো কালে রামঞ্ঞদেসতো সঙ্ঘং আনেত্ৰা সাসনং পতিট্ঠাপেসি.

ততো পচ্ছা চ ৰিমলধম্মসূরিযস্স নাম রঞ্ঞো কালে রক্খাপুররট্ঠতো সঙ্ঘং আনেত্ৰা সাসনং পতিট্ঠাপেসি. ততো পচ্ছা চ ৰিমলস্স নাম রঞ্ঞো কালে ততোযেৰ সঙ্ঘং আনেত্ৰা সাসনং পতিট্ঠাপেসি. ততো পচ্ছা চ কিত্তিস্সিরিরাজসীহস্স নাম রঞ্ঞো কালে স্যামরট্ঠতো সঙ্ঘং আনেত্ৰা তথেৰ অকাসীতি.

অযং সীহল়দীপে সাসনস্স ওসক্কনকথা.

ততো পচ্ছা জিনসাসনে নৰুতাধিকে অট্ঠৰস্সসতে সম্পত্তে বুদ্ধদাসস্স নাম রঞ্ঞো কালে একো ধম্ম কথিকত্থেরো ঠপেত্ৰা ৰিনযপিটকং অভিধম্মপিটকঞ্চ অৰসেসং সুত্তন্তপিটকং সীহল়ভাসায পরিৰত্তিত্ৰা অভিসঙ্খরিত্ৰা ঠপেসি. তঞ্চ কারণং চূল়ৰংসে ৰুত্তং.

তস্স কির বুদ্ধদাসস্স রঞ্ঞো পুত্তা অসীতিমত্তা অসীতিমহাসাৰকানং নামেনেৰ ৰোহারিতা অহেসুং. তেসু পুত্তেসু সারিপুত্তত্থেরস্স নামেন ৰোহারিতো একো উপতিস্সো নাম রাজকুমারো পিতরি দেৰঙ্গতে দ্ৰেচত্তালীসৰস্সানি রজ্জং করেসি.

ততো পচ্ছা কনিট্ঠো মহানামো নাম রাজকুমারো দ্ৰাৰীসৰস্সানি রজ্জং কারেসি. তস্স রঞ্ঞো কালে জিন চক্কে তেত্তিংসাধিকনৰসতৰস্সে সীহল়দীপে ছসট্ঠিমত্তানং রাজূনং পূরণকালে বুদ্ধঘোসো নাম থেরো সীহল়দীপং গন্ত্ৰা সীহল়ভাসায লিখিতে অট্ঠকথাগন্থে মাগধভাসায পরিৰত্তিত্ৰা লিখি.

সো পন মহানাম রাজা অম্হাকং মরম্মরট্ঠে সিরিপচ্চযনগরে সৰিলঞ্ঞিক্রোৰি নামকেন রঞ্ঞা সমকালো হুত্ৰা রজ্জং কারেসি. পরিত্তনিদ্দানে পন ব্রূমৰি?থী? নামকেন রঞ্ঞা সমকালো হুত্ৰা রজ্জং কারেসীতি ৰুত্তং. তং ন যুজ্জতিযেৰ.

সীহল়দীপে পন কিত্তিস্সিরিমেঘো নাম রাজা হুত্ৰা নৰমে ৰস্সে তস্মিংযেৰ দীপে রাজূনং দ্ৰাসট্ঠিমত্তানং পূরণকালে জিনচক্কে তিংসাধিকে অট্ঠসতৰস্সে জম্বুদীপে কলিঙ্গপুরতো কুহসিৰস্স নাম রঞ্ঞো জামাতা দন্তকুমারো হেমমালং নাম রাজধীতং গহেত্ৰা দাঠাধাতুং থেনেত্ৰা নৰায তরিত্ৰা সীহল়দীপং অগমাসি. জিনচক্কে তিংসাধিকঅট্ঠৰস্সসতে জেট্ঠতিস্সরাজা নৰৰস্সানি রজ্জং কারেসি.

বুদ্ধদাসরাজা একূনতিংসতি ৰস্সানি উপলিস্সরাজা চদ্ৰিচত্তালীসৰস্সানি মহানামরাজা দ্ৰাৰীসৰস্সানীতি সব্বানি সম্পিণ্ডিত্ৰা জিনসাসনং দ্ৰত্তিংসাধিকনৰৰস্সসতপ্পমাণং হোতি.

তস্মিঞ্চ কালে যদা দ্ৰীহি ৰস্সেহি ঊনং অহোসি, তদা মহানামরঞ্ঞো কালে তিংসাধিকনৰৰস্সসতমত্তে সাসনে বুদ্ধঘোসো নাম থেরো লঙ্কাদীপং অগমাসি.

অমরপুরমাপকস্স রঞ্ঞো কালে সীহল়দীপিকেহি ভিক্খূহি পেসিতসন্নেসপণ্ণে পন ছপণ্ণাসাধিকনৰৰস্সসতাতিক্কন্তে সূতি ৰুত্তং.

এত্থ ঠত্ৰা বুদ্ধঘোসত্থেরস্স অট্ঠুপ্পত্তিংসঙ্খেপমত্তং ৰক্খাম. কথং. সীহল়ভাসক্খরেহি পরিৰত্তিতং পরিযত্তিসাসনং মাগধসাসক্খরেন কো নাম পুগ্গলো পরিৰত্তিতুং সক্খিস্সতীতি মহাথেরা নিমন্তযিত্ৰা তাৰতিংসভৰনং গন্ত্ৰা ঘোসং দেৰপুত্তং দিস্ৰা সদ্ধিং সক্কেন দেৰানমিন্দেন তং যাচিত্ৰা বোধিরুক্খসমীপে ঘোসগামে কেসস্স নাম ব্রাহ্মণস্স কেসিযা নাম ব্রাহ্মণিযা কুচ্ছিম্হি পটিসন্ধিং গণ্হাপেসুং. খাদথ ভোন্তো পিৰথ ভোন্তোতিআদিনা ব্রাহ্মণানং অঞ্ঞমঞ্ঞং ঘোসকালে ৰিজাযনত্তা ঘোসোতি নামং অকাসি. সত্তৰস্সিককালে সো তিণ্ণং ৰেদানং পারগূ অহোসি.

অথ খো একেন অরহন্তেন সদ্ধিং ৰেদকথং সল্লপন্তো তং কথং নিট্ঠাপেত্ৰা কুসলা ধম্মা অকুসলা ধম্মা অব্যাকতা ধম্মাতিআদিনা পরমত্থৰেদং নাম বুদ্ধমন্তং পুচ্ছি. তদা সো সুত্ৰা উগ্গণ্হিতুকামো হুত্ৰা তস্স অরহন্তস্স সন্তিকে পব্বজিত্ৰা দেৰসিকং দেৰসিকং পিটকত্তযং সট্ঠিমত্তেহি পদসহস্সেহি সজ্ঝাযং অকাসি, ৰাচুগ্গতং অকাসি. একমাসেনেৰ তিণ্ণং পিটকানং পারগূ অহোসি.

ততো পচ্চা রহো এককোৰ নিসিন্নস্স এতদহোসি,– বুদ্ধভাসিতে পিটকত্তযে মম ৰা পঞ্ঞা অধিকা, উদাহু উপজ্ঝাযস্স ৰাতি. তং কারণং ঞত্ৰা উপজ্ঝাচরিযো নিগ্গহং কত্ৰা ওৰদি. সো সংৰেগপ্পত্তো হুত্ৰা খমাপেতুং ৰন্দি. উপজ্ঝাচরিযো ত্ৰং আৰুসো সীহল়দীপং গন্ত্ৰা পিটকত্তযং সীহল়স্সাসক্খরেন লিখিতং মাগধভাসক্খরেন লিখাহি, এৰং সতি অহং খমিস্সামীতি আহ.

বুদ্ধঘোসো চ পিতরং মিচ্ছাদিট্ঠিভাৰতো মোচেত্ৰা আচরিযস্স ৰচনং সিরসা পটিগ্গহেত্ৰা পিটকত্তযং লিখিতুং সীহল়দীপং নাৰায অগমাসি. তদা সমুদ্দমজ্ঝে তীহি দিৰসেহি তরন্তে বুদ্ধদত্তত্থেরো চ সীহল়দীপতো নাৰায আগচ্ছন্তো অন্তরামগ্গে দেৰান আনুভাৰেন অঞ্ঞমঞ্ঞং পস্সিত্ৰা কারণং পুচ্ছিত্ৰা জানি. জানিত্ৰা চ বুদ্ধদত্তত্থেরো এৰমাহ,- মযা আৰুসো কতো জিনালঙ্কারো অপ্পস্সারোতি মঞ্ঞিত্ৰা পিটকত্তযং পরিৰত্তিতুং লিখিতুং ওকাসং নাদাসুং, ত্ৰং পন পিটকত্তযং সংৰণ্ণেহীতি ৰত্ৰা অত্তনো সক্কেন দেৰানমিন্দেন দিন্নং হরিতকিফলং অযোমযলেখন দণ্ডং নিসিতসিলঞ্চ বুদ্ধঘোসত্থেরস্স অদাসি. এৰং তেসং দ্ৰিন্নং থেরানং অঞ্ঞমঞ্ঞং সল্লপন্তানংযেৰ নাৰা সযমেৰ অপনেত্ৰা গচ্ছিংসু.

বুদ্ধঘোসত্থেরো চ সীহল়দীপং পত্ৰা পঠমং সঙ্ঘপালত্থেরং পস্সিত্ৰা পিটকত্তযং মাগধভাসক্খরেন পরিৰত্তেতুং আগতোম্হীতি কারণং আরোচেত্ৰা সীহল়ভিক্খূ চ সীলে পতিট্ঠাযাতিআদিগাথং নিয্যাদেত্ৰা ইমিস্সা গাথায অত্থং পিটকত্তযং আলোলেত্ৰা সংৰণ্ণেহীতি উয্যোজেসুং, তস্মিংযেৰ দিৰসে সাযন্হকালতো পট্ঠায যথাৰুত্তগাথং পমুখং কত্ৰা ৰিসুদ্ধিমগ্গং অকাসি. কত্ৰা তং কম্মং নিপ্ফাদেত্ৰা তস্স ঞাণপ্পভৰং ৰীমংসেতুকামো দেৰানমিন্দো তঞ্চ গন্থং অন্তরধাপেসি. পুনাপি থেরো অকাসি. তথেৰ দেৰানমিন্দো অন্তরধাপেসি. পুনাপি থেরো অকাসি. এৰং তিক্খত্তুং কারাপেত্ৰা পুব্বগন্থেপি দস্সেসি. তিণ্ণম্পি গন্থানং অঞ্ঞমঞ্ঞং একপদমত্তেনপি ৰিসেসতা নত্থি সঙ্ঘপালত্থেরো চ তং আরাধযিত্ৰা পিটকত্তযং নিয্যাদেসি. এৰং ৰিসুদ্ধিমগ্গে সঙ্ঘপালত্থেরস্স যাচনং আরব্ভ ৰিসুদ্ধিমগ্গো কতোতি আগতং. বুদ্ধঘোসুপ্পত্তিকথাযং পন সঙ্ঘরাজত্থেরস্স আযাচনং আরব্ভাতি আগতং.

অযং বুদ্ধঘোসুপ্পত্তিকথাযং আগতনযেন দস্সিতবুদ্ধঘোসুপ্পত্তিকথাসঙ্খেপো.

চূল়ৰংসে পনেৰং আগতো. বুদ্ধঘোসত্থেরো নাম মহাবোধিরুক্খসমীপে একস্মিং ব্রাহ্মণগামে ৰিজাতো তিণ্ণম্পি ৰেদানং পারগূ অহোসি তেসু তেসু ৰাদেসু চ অতিছেকো. সো অঞ্ঞেহি চ সদ্ধিং পুচ্ছাব্যাকরণকম্মং কত্তুকামো জম্বুনীপতলে আহিণ্ডন্তো একং ৰিহারং পত্ৰা তস্মিং ৰা আগন্তুকভাৰেন নিসীদি. তস্মিঞ্চ ৰিহারে রেৰতো নাম থেরো ৰসি. তেন থেরেন সদ্ধিং ভল্লপন্তো সো ব্রাহ্মণমাণৰো তীসু ৰেদেসু অলোলেত্ৰা পঞ্হং পুচ্ছি. পুচ্ছিতং পুচ্ছিতং থেরো ব্যাকাসি. থেরস্স পন পুচ্ছিতং পঞ্হং মাণৰো ন সক্কা ব্যাকাতুং. অথ মাণৰো পুচ্ছি,–কো নামাযং ভন্তে মন্তোতি. বুদ্ধমন্তো নামাযন্তি ৰুত্তে উগ্গণ্হিতুকামো হুত্ৰা থেরস্স সন্তিকে পব্বজিত্ৰা পিটকত্তযং উগ্গণ্হি. অচিরনেৰ তিণ্ণম্পি পিটকানং পারগূ অহোসি. বুদ্ধস্সেৰ ঘোসো যস্স অত্থীতি বুদ্ধঘোসোতি নামেন পাকটো অহোসি.

বুদ্ধঘোসো চ আযস্মতো রেৰতস্স সন্তিকে নিসীদন্তো ঞাণোদযং নাম গন্থং অট্ঠস্সালিনিঞ্চ নাম গন্থং অকাসি. ততো পচ্ছা পরিত্তট্ঠকথং কত্তুকামো হুত্ৰা আরভি. তদা আচরিযো এৰমাহ,– জম্বুদীপে পন আৰুসো পাল়িমত্তংযেৰ অত্থি, অট্ঠকথা পন নত্থি, আচরিযৰাদো চ ভিন্নো হুত্ৰা অত্থি, তেনেৰ মহামহিন্ধত্থেরেন আনিতা অট্ঠকথা তীসু চ সঙ্গীতীসু আরুল়ো পাল়িযো সারিপুত্তত্থেরাদীহি দেসিতো কথামগ্গো সীহল়দীপে অত্থি, ত্ৰং গন্ত্ৰা মাগধভাসক্খরেন লিখেহীতি উয্যোজিযমানো বুদ্ধঘোসত্থেরো সীহল়দীপং গন্ত্ৰা অনুরাধপুরে মহাৰিহারং পৰিসিত্ৰা সঙ্ঘপালত্থেরস্স সন্তিকে সদ্ধিং সীহল়ট্ঠকথায থেরৰাদে সুত্ৰা অট্ঠকথং করিস্সমীতি আরোচেসি. সীহল়ভিক্খূ চ পুব্বে ৰুত্তনযেনেৰ সীলে পতিট্ঠাযাতিআদি গাথা নিয্যাদেসুং. বুদ্ধঘোসো চ সদ্ধিং অট্ঠকথায পিটকত্তযং সঙ্খিপিত্ৰা ৰিসুদ্ধিমগ্গং অকাসি.

পুব্বে ৰুত্তনযেনেৰ সক্কো অন্তরধাপেত্ৰা তিক্খত্তুং কারাপেসি. সঙ্ঘপালত্থেরোপি অরাধযিত্ৰা পিটকত্তযং নিয্যাদেসীতি.

কিঞ্চাপি নানা গন্থেসু নানাকারেহি বুদ্ধঘোসুপ্পত্তি আগতা, তথাপি বুদ্ধঘোসত্থেরস্স সীহল়দীপং গন্ত্ৰা পিটকত্তযস্স লিখনং অট্ঠকথানঞ্চ করণমেৰ পমাণন্তি মনোকিলিট্ঠং ন উপ্পাদেতব্বন্তি. বুদ্ধঘোসত্থেরো ৰিকটত্তযং লিখিত্ৰা জম্বুদীপং পচ্চাগমাসি.

ইচ্চেৰং পাল়িভাসায পরিযত্তিং পরিৰত্তিত্ৰা পচ্ছা আচরিযপরম্পরসিস্সানুসিস্সৰসেন সীহল়দীপে জিনচক্কং মজ্ঝন্তি কংসুমাসী ৰিয অতিদিব্বতি, অনেককোটিপ্পমাণেহি সোতাপন্নসকদাগামিঅনাগামিঅরহন্তেহি লঙ্কাদীপং অতিসোভতি, সব্বপালিফুল্লেন তিযোজনিকপারিচ্ছত্তকরুক্খেন তাৰতিংসভৰনং ৰিয সতপত্তপদুমাদীহি মহাপোক্খরণী ৰিয তেসু তেসু ঠানেসু মগ্গমহামগ্গআপকঘরদ্ৰারতিত্থৰনপব্বতগুহমন্দিরৰিহারসালাদীসু অলদ্ধমগ্গফলট্ঠানং নাম কিঞ্চি নত্থি, থোকং আগমেত্ৰা পিণ্ডায পতিট্ঠমানপদেসেপি মগ্গফলানি লভিংসুযেৰ.

মগ্গফলানি সচ্ছিকরোন্তানং পুগ্গলানং বাহুল্লতায অযং পুথুজ্জনো অযং পুথুজ্জনোতি অঙ্গুলিং পসারেত্ৰা দস্সেতব্বো হোতি. একস্মিং কালে সীহল়দীপে পুথুজ্জন ভিক্খু নাম নত্থি. তথা হি ৰুত্তং ৰিভঙ্গট্ঠকথাযং, একৰারং পুথুজ্জনভিক্খু নাম নত্থীতি.

অভিঞ্ঞালাভীনং কির মহিদ্ধিকানং গমনাগমনৰসেন সূরিযোস্সাসং অলভিত্ৰা ধঞ্ঞকোট্টকা মাতুগামা ধঞ্ঞকোট্টিতুং ওকাসং ন লভিংসু.

দেৰলোকতো সুমনসামণেরো দক্খিণক্খকং সীহল়দীপং অনেত্ৰা তস্স পাটিহারিযং দস্সনৰসেন উদ্ধকবিন্ধূহি তিযোজনসতং সকলম্পি লঙ্কাদীপং ব্যাপত্ৰা ভগৰতা পরিভুত্তচেতিযঙ্গণং ৰিয হুত্ৰা নৰায গচ্ছন্তা মহাসমুদ্দে উদকতো নাল়িকেরমত্তম্পি দিস্ৰা সকলঙ্কাদীপং পূজেন্তি, মহামহিন্দত্থেরস্স সন্তিকে অরিট্ঠত্থেরেন সদ্ধিং পঞ্চমত্তা ভিক্খুসতা পঠমং তাৰ ৰিনযপিটকং উগ্গণ্হিংসূতি ইমেহি কারণেহি লঙ্কাদীপং জিনচক্কস্স পতিট্ঠানং হুত্ৰা ৰরদীপন্তি নামং পটিলভি.

সীহল়দীপেযেৰ পিটকত্তযং পোত্থকারুল়ৰসেন পতিট্ঠাপেত্ৰা ততো পচ্ছা চোরনাগস্স নাম রঞ্ঞো কালে সকললঙ্কাদীপং দুব্ভিক্খভযেন পীল়েত্ৰা পিটকত্তযং ধারেন্তা ভিক্খূ জম্বুদীপং আগমংসু. অনাগন্ত্ৰা তত্থেৰ ঠিতাপি ভিক্খূ ছাতকভযেন পীল়েত্ৰা উদরপটলং বন্ধিত্ৰা কুচ্ছিং ৰালুকরাসিম্হি ঠপেত্ৰা পিটকত্তযং ধারেসুং.

কুট কণ্ণতিস্সস্স রঞ্ঞো কালেযেৰ দুব্ভিক্খভযং ৰূপসমিত্ৰা জম্বুদীপতো ভিক্খূ পুন গন্ত্ৰা সীহল়দীপে ঠিতেহি ভিক্খূহি সদ্ধিং মহাৰিহারে পিটকত্তযং অৰিরোধাপেত্ৰা সমসমং কত্ৰা ঠপেসুং. ঠপেত্ৰা চ পন সীহল়দীপেযেৰ সুট্ঠু ধারেসুং.

তত্থেৰ অট্ঠকথাযো বুদ্ধঘোসত্থেরো মাগধভাসায পরিৰত্তেত্ৰা ৰিরচি. পচ্ছা চ যেভুয্যেন তত্থেৰ অট্ঠকথাটীকাঅনুমধুলক্খণগণ্ঠিগন্থন্তরানি অকংসু. পুন সাসনং নভে রৰিন্দুৰ পাকটন্তি.

তত্থ বুদ্ধৰংসট্ঠকথং বুদ্ধদত্তত্থেরে অকাসি. ইতিৰুত্তোদানচরিযাপিটকথেরাথেরীৰিমানৰত্থুপেতৰত্থুনেত্তিঅট্ঠকথাযো আচরিযধম্মপালত্থেরো অকাসি. সো চ আচরিযধম্মপালত্থেরো সীহল়দীপস্স সমীপে দমিলরট্ঠে বদরতিত্থম্হি নিৰাসিতত্তা সীহল়দীপেযেৰ সঙ্গহেত্ৰা ৰত্তব্বো.

পটিসম্ভিদামগ্গট্ঠকথং মহানামো নাম থেরো আকাসি. মহানিদ্দেসট্ঠকথং উপসেনো নাম থেরো অকাসি. অভিধম্মটীকং পন আনন্দত্থেরো অকাসি. সা চ সব্বাসং টীকানং আদিভূতত্তা মূলটীকাতি পাকটা.

ৰিসুদ্ধিমগ্গস্স মহাটীকং দীঘনিকাযট্ঠকথায টীকং মজ্ঝিমনিকাযট্ঠকথায টীকং সংযুত্তনিকাযট্ঠকথায টীকঞ্হাতি ইমাযো আচরিযধম্মপালত্থেরো অকাসি.

সারত্থদীপনিং নাম ৰিনযটীকং অঙ্গুত্তরনিকাযটীকঞ্চ পরক্কমবাহুরঞ্ঞা যাচিতো সারিপুত্তত্থেরো অকাসি. ৰিমতিৰিনোদনিং নাম ৰিনযটীকং দমিলরট্ঠৰাসিকস্সপত্থেরো অকাসি.

অনুটীকং পন আচরিযধম্মপালত্থেরো. সা চ মূলটীকায অনুত্তানত্থানি উত্তানানি সংৰণ্ণিতত্তা অনুটীকা তিৰুচ্চতি.

ৰিসুদ্ধিমগ্গস্স চূল়টীকং মখুদীপনিঞ্চ অঞ্ঞেতরা থেরা অকংসু. সা চ মূলটীকায অত্থাৰসেসাতি চ অনুত্তানত্থাতি চ কত্ৰা মূলটীকায সদ্ধিং সংসন্দিত্ৰা কতত্তা মধুর সত্তা চ মধুদীপনিন্তি ৰুচ্চতি. মোহৰিচ্ছেদনিং পন লক্খণগন্থং কস্সপত্থেরো অকাসি.

আভিধম্মাৰতারং পন রুপারূপৰিভাগং ৰিনযৰিনিচ্ছযঞ্চ বুদ্ধ দত্তত্থেরো. ৰিনযসঙ্গহং সারিপুত্তত্থেরো. খুদ্দসিক্খং ধম্মসিরিত্থেরো. পরমত্থৰিনিচ্ছযং নামরূপপরিচ্ছেদং অভিধম্মত্থসঙ্গঞ্চ অনুরুদ্ধত্থেরো. সচ্চসঙ্খেপং ধম্মপালত্থেরো. খেমং খেমত্থেরো. তে চ সঙ্খেপতো সংৰণ্ণিতত্তা সুখেন চ লক্খণিযত্তা লক্খণগন্থাতি ৰুচ্চন্তি.

তেসং পন সংৰণ্ণনাসু অভিধম্মত্থসঙ্গহস্স পোরাণটীকং নৰৰিমলবুদ্ধিত্থেরো অকাসি. সচ্চংসঙ্খেপনামরূপপরিচ্ছেদখেমাঅভিধম্মাৰতারানং পোরাণটীকং ৰাচিস্সরমহাসামিত্থেরো. পরমত্থৰিনিচ্ছযস্স পোরাণটীকং মহাবোধিত্থেরো.

অভিধমত্থসঙ্গহাভিধম্মাৰতারাভিনৰ টীকাযো সুমঙ্গলসামিত্থেরো. সচ্চসঙ্খেপাভিনৰটীকং অরঞ্ঞৰাসিত্থেরো. নামরূপপরিচ্ছেদাভিনৰটীকং মহাসামিত্থেরো. পরমত্থৰিনিচ্ছযাভিনৰটীকং অঞ্ঞতরত্থেরো. ৰিনযৰিনিচ্ছযটীকং রেৰতত্থেরো. খুদ্দসিক্খায পুরাণটীকং মহাযসত্থেরো. তাযযেৰ অভিনৰটীকং সঙ্ঘরক্খিতত্থেরোতি.

ৰজিরবুদ্ধিং নাম ৰিনযগণ্ঠিপদত্থং ৰজিরবুদ্ধিত্থেরো. চূল়গণ্ঠিং মজ্ঝিমগণ্ঠিং মহাগণ্ঠিঞ্চ সীহল়দীপৰাসিনো থেরা. তে চ পদক্কমেন অসংৰণ্ণেত্ৰা অনুত্তানত্থাযেৰ সংৰণ্ণিতত্তা গণ্ঠিপদত্থাতি ৰুচ্চন্তি.

অভিধানপ্পদীপিকং পন মহামোগ্গলানত্থেরো. অত্থব্যক্খানং চূল়বুদ্ধত্থেরো. ৰুত্তোদযং সম্বন্ধচিন্তনং সুবোধালঙ্কারঞ্চ সঙ্ঘরক্খিতত্থেরো. ব্যাকরণং মোগ্গলানত্থেরো.

মহাৰংসং চূল়ৰংসং দীপৰংসং থূপৰংসং বোধিৰংসং ধাতুৰং সঞ্চ সীহল়দীপৰাসিনো থেরা. দাঠাধাতুৰংসং পন ধম্মকিত্তিত্থেরো অকাসি. এতে চ পাল়িমুত্তকৰসেন ৰুত্তত্তা গন্থন্তরাতি ৰুচ্চন্তি.

ইচ্চেৰং বুদ্ধঘোসাদযো থের ৰরা যথাবলং যথাসত্তিং পরিযত্তিং সাসনং উপত্থম্ভেত্ৰা বহূহি মূলেহি বহুহিসাখাহি বহূহি চ ৰিটপেহি উপত্থম্ভিযমানো ৰেপুল্লমা পজ্জমানো মহানিগ্রোধরুক্খো ৰিয থিরং হুত্ৰা চিরকালং তিট্ঠতীতি ৰেদিতব্বং.

ইদং সীহল়দীপে পোত্থকারুল়্হতো পচ্ছা সাসনস্স পতিট্ঠানং.

এতেপি চ মহাথেরো, যথাসত্তিং যথাবলং;

অট্ঠকথাদযো কত্ৰা, মচ্চুমুখং উপাগমুং.

সেয্যথাপি চ লোকস্মিং, ওভাসিত্ৰান চন্দিমা;

আৰহিত্ৰান সত্তানং, হিতং অত্থংৰ গচ্ছতি.

এৰমেৰ মহাথেরা, ঞাণোভাসেহি ভাসিয;

আৰহিত্ৰান সত্তানং, হিতং অত্থংৰ গচ্ছতি.

ইতি সাসনৰংসে সীহল়দীপিকসাসনৰংসকথামগ্গো

নাম দুতিযো পরিচ্ছেদো.