১০. চিনরট্ঠসাসনৰংসকথামগ্গো

১০. ততো পরং পৰক্খামি চীনরট্ঠসাসনৰংসকথামগ্গং যথাট্ঠৰিতমাতিকাৰসেন.

ততিযসঙ্গীতাৰসানে হি মহামোগ্গলিপুত্ততিস্সত্থেরো মজ্ঝিমত্থেরং চিনরট্ঠং পেসেসি,-ত্ৰং এতং রট্ঠং গন্ত্ৰা এত্থ সাসনং পতিট্ঠাপেহীতি.

মজ্ঝিমত্থেরোচ কস্সপগোত্তরেন অল়করেৰত্থেরেন দুন্দভিযত্থেরেন মহারেৰত্থেরেনচ সদ্ধিং হিমৰন্তপ্পদেসে পঞ্চচীনরট্ঠং গন্ত্ৰা ধম্মচক্কপ্পৰত্তনসুত্তন্তকথাযতং দেসং পসাদেত্ৰা অসীতিপাণকোটিযো মগ্গফলরতনানি পটিলাভেসি. পঞ্চপিচ তে থেরা পঞ্চরট্ঠানি পসাদেসুং. একমেকস্স সন্তিকে সহস্সমত্তা পব্বজিংসু. এৰং তে তত্থ সাসনং পতিট্ঠাপেসুং.

গন্ত্ৰা মজ্ঝিমত্থেরো, হিমৰন্তং পসাদযি;

যক্খসেনং পকাসেন্তো, ধম্মচক্কপ্পৰত্তনন্তি.

তত্থ কির মনুস্সা যেভুয্যেন চন্দীপরমীস্ৰারানং যক্খানং পূজং করোন্তি. তেনেৰ তে পঞ্চ থেরা তেসং যক্খসেনং পকাসযিত্ৰা ধম্মং দেসেসুং. কস্মীরগন্ধাররট্ঠং পন কদাচি কদাচি চীনরট্ঠিন্দস্স ৰিজিতং হোতি, কদাচি কদাচি পন ৰিসুং হোতি. তদা পন ৰিসুংযেৰ অহোসীতি দট্ঠব্বং.

চীরনট্ঠে পন ভগৰতো সাসনং দুব্বলংযেৰ হুত্ৰা অট্ঠাসি, ন থিরং হুত্ৰা. তেনেৰ ইদানি তত্থ কত্থচিযেৰ সাসনং ছাযামত্তংৰ পঞ্ঞাযতি, ৰাতৰেগেন ৰিকিণ্ণঅব্ভংৰিয তিট্ঠতীতি.

ইতি সাসনৰংসে চীনরট্ঠসাসনৰংসকথামগ্গো নাম

দসমো পরিচ্ছেদো.

এৰং সব্বেন সব্বং সাসনৰংসকথামগ্গো নিট্ঠিতো.

এত্তাৰতাচ –

লঙ্কাগতেন সন্তেন, চিত্রঞাণেন ভিক্খুনা;

সরণঙ্করনামেন, সদ্ধম্মট্ঠিতিকামিনা.

দূরতোযেৰ দীপম্হা, সুমঙ্গলেন জোতিনা;

ৰিসুদ্ধসীলিনাচেৰ, দীপন্তরট্ঠভিক্খুনা.

অঞ্ঞেহিচাভিযাচিতো, পঞ্ঞাসামীতি নামকো;

অকাসিং সুট্ঠুকং গন্থং, সাসনৰংসপ্পদীপিকং.

দ্ৰিসতেচ সহস্সেচ, তেৰীসাধিকে গতে;

পুণ্ণাযং মিগসীরস্স, নিট্ঠং গতাৰ সব্বসো.

কোচি এত্থেৰ দোসো চে, পঞ্ঞাযতি সুচিত্তকা;

তং খমন্তু চ সুদ্ধিযা, গণ্হন্তু যুত্তিকং হৰেতি.