ভিক্খুনীসংযুত্ত

আল়ৰিকাসুত্ত

পুচ্ছা – ইদানি আৰুসো ভিক্খুনী সংযুত্তং পুচ্ছামি, যং তস্স ভগৰতো অরহতো সম্মাসম্বুদ্ধস্স সাৰিকাহি থেরীহি অত্তনো

চ বুদ্ধসাসনস্স চ যথাভূতং গুণং পকাসেত্ৰা ভাসিতং. তত্থাৰুসো পঠমং পোরাণকেহি মহাকস্সপাদীহি ধম্মসংগাহকেহি থেরৰরেহি সংগীতং আল়ৰিকাসুত্তং কত্থ কং আরব্ভ কিস্মিং ৰত্থুস্মিং কেন কথঞ্চ ভাসিতং.

ৰিস্সজ্জনা – সাৰত্থিযং ভন্তে মারং পাপিমন্তং আরব্ভ আল়ৰিকায ভিক্খুনিযা ভাসিতং. মারো ভন্তে পাপিমা আল়ৰিকায ভিক্খুনিযা ভযং ছম্ভিতত্তং লোমহংসং উপ্পাদেতুকামো ৰিৰেকম্হা চাৰেতুকামো আল়ৰিকং ভিক্খুনিং গাথায অজ্ঝভাসি–

‘‘নত্থি নিস্সরণং লোকে, কিং ৰিৰেকেন কাহসি;

ভুঞ্জস্স কামরতিযো, মাহু পচ্ছানুতাপিনী’’তি.

তস্মিং ভন্তে ৰত্থুস্মিং–

‘‘অত্থি নিস্সরণং লোকে, পঞ্ঞায মে সুফুস্সিতং;

পমত্তবন্ধু পাপিম, ন ত্ৰং জানাসি তং পদং;

সত্তিসূলূপমা কামা, খন্ধাসং অধিকুট্টনা;

যং ত্ৰং কামরতিং ব্রূসি, অরহি ময্হ সা অহূ’’তি.

এৰং খো ভন্তে আল়ৰিকায ভিক্খুনিযা ভাসিতং.

নত্থি নিস্সরণং লোকে, কিং ৰিৰেকেন কাহসি;

ভুঞ্জস্সু কামরতিযো, মাহু পচ্ছানুতাপিনী-হু–

অত্থি নিস্সরণং লোকে, পঞ্ঞায মে সুফুস্সিতং;

পমত্তবন্ধু পাপিম, ন ত্ৰং জানাসি তং পদং.

সত্তিসূলূপমা কামা, খন্ধাসং অধিকুট্টনা;

যং ত্ৰং কামরতিং ব্রূসি, অরতি ময্হ সা অহু–

সোমাসুত্ত

পুচ্ছা – সোমাসুত্তং পনাৰুসো কত্থ কং আরব্ভ কিস্মিং ৰত্থুস্মিং কেন কথঞ্চ ভাসিতং.

ৰিস্সজ্জনা – সাৰত্থিযংযেৰ ভন্তে অন্ধৰনে মারং পাপিমন্তং আরব্ভ সোমায ভিক্খুনিযা ভাসিতং. মারো ভন্তে পাপিমা সোমায ভিক্খুনিযা ভযং ছম্ভিতত্তং লোমহংসং উপ্পাদেতুকামো সমাধিম্হা চাৰেতুকামো সোমং ভিক্খুনিং গাথায অজ্ঝভাসি.

‘‘যং তং ইসীহি পত্তব্বং, ঠানং দুরভিসম্ভৰং;

ন তং দ্ৰঙ্গুলপঞ্ঞায, সক্কা পপ্পোতুমিত্থিযা’’তি.

তস্মিং ভন্তে ৰত্থুস্মিং–

‘‘ইত্থিভাৰো কিং কযিরা, চিত্তম্হি সুসমাহিতে;

ঞাণম্হি ৰত্তমানম্হি, সম্মা ধম্মং ৰিপস্সতো;

যস্স নূন সিযা এৰং, ইত্থাহং পুরিসোতি ৰা;

কিঞ্চি ৰা পন অঞ্ঞস্মি, তং মারো ৰত্তুমরহতী’’তি.

এৰং খো ভন্তে সোমায ভিক্খুনিযা অরিযসাৰিকায ভাসিতং.

যং তং ইসীহি পত্তব্বং, ঠানং দুরভিসম্ভৰং;

ন তং দ্ৰঙ্গুলপঞ্ঞায, সক্কা পপ্পোতুমিত্থিযা–

ইত্থি ভাৰো কিং কযিরা, চিত্তম্হি সুসমাহিতে;

ঞাণম্হি ৰত্ত মানম্হি, সম্মা ধম্মং ৰিপস্সতো.

যস্স নূন সিযা এৰং, ইত্থাহং পুরিসোতি ৰা;

কিঞ্চি ৰা পন অঞ্ঞস্মি, তং মারো ৰত্তুমরহতি.

কিসাগোতমীসুত্ত

পুচ্ছা – তত্থাৰুসো কিসাগোতমীসুত্তং কত্থ কং আরব্ভ কিস্মিং ৰত্থুস্মিং কেন কথঞ্চ ভাসিতং.

ৰিস্সজ্জনা – সাৰত্থিযংযেৰ ভন্তে অন্ধৰনে মারং পাপিমন্তং আরব্ভ কিসাগোতমিযা ভিক্খুনিযা থেরিযা ভাসিতং. মারো ভন্তে পাপিমা কিসাগোতমিযা ভিক্খুনিযা ভযং ছম্ভিতত্তং লোমহংসং উপ্পাদেতুকামো সমাধিম্হা চাৰেতুকামো কিসাগোতমিং ভিক্খুনিং গাথায অজ্ঝভাসি–

‘‘কিং নু ত্ৰং মতপুত্তাৰ, একমাসি রুদম্মুখী;

ৰনমজ্ঝগতা একা, পুরিসং নু গৰেসসী’’তি.

তস্মিং ভন্তে ৰত্থুস্মিং–

অচ্চন্তং মতপুত্তাম্হি, পুরিসা একদন্তিকা;

ন সোচামি ন রোদামি, ন তং ভাযামি আৰুসো.

সব্বত্থ ৰিহতা নন্দী, তমোক্খন্ধো পদালিতো;

জেত্ৰান মচ্চুনো সেনং, ৰিহরামি অনাসৰা’’তি.

এৰং খো ভন্তে কিসাগোতমিযা ভিক্খুনিযা ভাসিতং.

কিং নু ত্ৰং মতপুত্তাৰ, একমাসি রুদম্মুখী;

ৰনমজ্ঝগতা একা, পুরিসং নু গসেসসি-হু–

অচ্চন্তং মতপুত্তাম্হি, পুরিসা এতদন্তিকা;

ন সোচামি ন রোদামি, ন তং ভাযামি আৰুসো.

সব্বত্থ ৰিহতা নন্দী, তমোক্খন্ধো পদালিতো;

জেত্ৰান মচ্চুনো সেনং, ৰিহরামি অনাসৰা.

উপ্পলৰণ্ণাসুত্ত

পুচ্ছা – তত্থাৰুসো পোরাণেহি সংগীতিকারমহাথেরৰরেহি সংগীতং উপ্পলৰণ্ণসুত্তং কত্থ কং আরব্ভ কিস্মিং ৰত্থুস্মিং কেন কথঞ্চ ভাসিতং.

ৰিস্সজ্জনা – সাৰত্থিযংযেৰ ভন্তে অন্ধৰনে মারং পাপিমন্তং আরব্ভ উপ্পলৰণ্ণায ভিক্খুনিযা ভাসিতং. মারো ভন্তে পাপিমা উপ্পলৰণ্ণায ভিক্খুনিযা ভযং ছম্ভিতত্তং লোমহংসং উপ্পাদেতুকামো সমাধিম্হা চাৰেতুকামো উপ্পলৰণ্ণং ভিক্খুনিং গাথায অজ্ঝভাসি–

‘‘সুপুপ্ফিতগ্গং উপগম্ম ভিক্খুনি, একা তুৰং তিট্ঠসি সালমূলে. ন চত্থি তে দুতিযা ৰণ্ণধাতু, বালে ন ত্ৰং ভাযসি ধুত্তকান’’ন্তি.

তস্মিং ভন্তে ৰত্থুস্মিং–

‘‘সতং সহস্সানিপি ধুত্তকানং,

ইধাগতা তাদিসকা ভৰেয্যুং;

লোমং ন ইঞ্জামি ন সন্তসামি,

ন মার ভাযামি তমেকিকাপি.

এসা অন্তরধাযামি, কুচ্ছিং ৰা পৰিসামি তে;

পখুমন্তরিকাযম্পি, তিট্ঠন্তিং মং ন দক্খসি.

চিত্তস্মিং ৰসীভূতাম্হি, ইদ্ধিপাদা সুভাৰিতা;

সব্ববন্ধনমুত্তাম্হি, ন তং ভাযামি আৰুসো’’তি.

এৰং খো ভন্তে উপ্পলৰণ্ণায ভিক্খুনিযা ভাসিতং.

চালাসুত্ত

পুচ্ছা – তত্থাৰুসো চালাসুত্তং কত্থ কং আরব্ভ কিস্মিং ৰত্থুস্মিং কেন কথঞ্চ ভাসিতং.

ৰিস্সজ্জনা – সাৰত্থিযং ভন্তে অন্ধৰনে মারংযেৰ পাপিমন্তং আরব্ভ চালায ভিক্খুনিযা অরিযসাৰিকায ভাসিতং. মারো ভন্তে পাপিমা চালং ভিক্খুনিং উপসঙ্কমিত্ৰা এতদৰোচ ‘‘কিং নু ত্ৰং ভিক্খুনি ন রোচেসী’’তি. জাতিং খ্ৰাহং আৰুসো ন রোচেমী’’তি.

কিং নু জাতিং ন রোচেসি, জাতো কামানি ভুঞ্জতি;

কো নু তং ইদমাদপযি, জাতিং মা রোচ ভিক্খুনীতি.

তস্মিং ভন্তে ৰত্থুস্মিং–

জাতস্স মরণং হোতি, জাতো দুক্খানি ফুস্সতি;

বন্ধং ৰধং পরিক্লেসং, তস্মা জাতিং ন রোচযে.

বুদ্ধো ধম্মমদেসেসি, জাতিযা সমতিক্কমং;

সব্বদুক্খপ্পহানায, সো মং সচ্চে নিৰেসযি.

যে চ রূপূপগা সত্তা, যে চ অরূপট্ঠাযিনো;

নিরোধং অপ্পজানন্তা, আগন্তারো পুনব্ভৰন্তি.

এৰং খো ভন্তে চালায ভিক্খুনিযা ভাসিতং.

কিং নু জাতিং ন রোচেসি, জাতো কামানি ভুঞ্জতি;

কো নু তং ইদমাদপযি, জাতিং মা রোচ ভিক্খুনী.

জাতস্স মরণং হোতি, জাতো দুক্খানি ফুস্সতি;

বন্ধং ৰধং পরিক্লেসং, তস্মা জাতিং ন রোচযে.

বুদ্ধো ধম্মমদেসেসি, জাতিযা সমতিক্কমং,

সব্বদুক্খপ্পহানায, সো মং সচ্চে নিৰেসযি.

সেলাসুত্ত

পুচ্ছা – তত্থাৰুসো সেলাসুত্তং কত্থ কং আরব্ভ কিস্মিং ৰত্থুস্মিং কেন কথঞ্চ ভাসিতং.

ৰিস্সজ্জনা – সাৰত্থিযং ভন্তে মারংযেৰ পাপিমন্তং আরব্ব্ভ সেলায ভিক্খুনিযা অরিযসাৰিকায ভাসিতং. মারো ভন্তে পাপিমা সেলায ভিক্খুনিযা ভযং ছম্ভিতত্তং লোমহংসং উপ্পাদেতুকামো সমাধিম্হা চাৰেতুকামো সেলং ভিক্খুনিং গাথায অজ্ঝভাসি–

কেনিদং পকতং বিম্বং, ক্ৰনু বিম্বস্স কারকো;

ক্ৰনু বিম্বং সমুপ্পন্নং, ক্ৰনু বিম্বং নিরুজ্ঝতীতি.

তস্মিং ভন্তে ৰত্থুস্মিং–

নযিদং অত্তকতং বিম্বং, নযিদং পরকতং অঘং;

হেতুং পটিচ্চ সম্ভূতং, হেতুভঙ্গা নিরুজ্ঝতীতি.

এৰমাদিনা ভন্তে সেলায ভিক্খুনিযা ভাসিতং.

কেনিদং পকতং বিম্বং, ক্ৰনু বিম্বস্স কারকো;

ক্ৰনু বিম্বং সমুপ্পন্নং, ক্ৰনু বিম্বং নিরুজ্ঝতি-হু–

নযিদং অত্তকতং বিম্বং, নযিদং পরকতং অঘং;

হেতুং পটিচ্চ সম্ভূতং, হেতুভঙ্গা নিরুজ্ঝতি.

ৰজিরাসুত্ত

পুচ্ছা – তত্থাৰুসো পোরাণকেহি মহাকস্সপাদীহি ধম্মসংগাহকথেরৰরেহি সংগীতং ৰজিরাসুত্তং কত্থ কং আরব্ভ কেন কথঞ্চ ভাসিতং.

ৰিস্সজ্জনা – সাৰত্থিযং ভন্তে মারং পাপিমন্তং আরব্ভ ৰজিরায থেরিযা ভিক্খুনিযা ভাসিতং. মারো ভন্তে পাপিমা পুরিমনযেনেৰ ৰজিরং ভিক্খুনিং গাথায অজ্ঝভাসি–

কেনাযং পকতো সত্তো, কুৰং সত্তস্স কারকো,

কুৰং সত্তো সমুপ্পন্নো, কুৰং সত্তো নিরুজ্ঝতীতি.

তস্মিং ভন্তে ৰত্থুস্মিং–

কিং নু সত্তোতি পচ্চেসি, মারদিট্ঠিগতং নু তে;

সুদ্ধসঙ্খারপুঞ্জোযং, নযিধ সত্তুপলব্ভতি.

যথা হি অঙ্গসম্ভারা, হোতি সদ্দো রথো ইতি;

এৰং খন্ধেসু সন্তেসু, হোতি সত্তোতি সম্মুতি.

দুক্খমেৰ হি সম্ভোতি, দুক্খং তিট্ঠতি ৰেতি চ,

নাঞ্ঞত্র দুক্খা সম্ভোতি, নাঞ্ঞং দুক্খা নিরুজ্ঝতীতি.

এৰং খো ভন্তে ৰজিরায ভিক্খুনিযা ভাসিতং.

কেনাযং পকতো সত্তো, কুৰং সত্তস্সকারকো;

কুৰং সত্তো সমুপ্পন্নো, কুৰং সত্তো নিরুজ্ঝতি-হু–

কিং নু সত্তোতি পচ্চেসি, মার দিট্ঠিগতং নু তে;

সুদ্ধসঙ্খারপুঞ্জোযং, নযিধ সত্তুপলব্ভতি.