১০. পুরেজাতপচ্চযো

তিৰিধো পুরেজাতপচ্চযো. ৰত্থুপুরেজাতপচ্চযো চ আরম্মণপুরেজাতপচ্চযো চ ৰত্থারম্মণপুরেজাতপচ্চযো চ.

তত্থ ৰত্থুপুরেজাতো চ ৰত্থারম্মণপুরেজাতো চ পুব্বে নিস্সযপচ্চযে নিস্সযনামেন ৰুত্তা এৰ.

আরম্মণপুরেজাতো নাম পচ্চুপ্পন্নানি অট্ঠারসনিপ্ফন্নরূপানি এৰ. তেসুপি পচ্চুপ্পন্নানি রূপসদ্দাদীনি পঞ্চারম্মণানি পঞ্চন্নং পঞ্চৰিঞ্ঞাণ ৰীথিচিত্তানং নিযমতো আরম্মণপুরেজাতপচ্চযা হোন্তি. যথা হি ৰীণাসদ্দা নাম ৰীণাতন্তীসু ৰীণাদণ্ডকেন পহরণ পচ্চযা এৰ উপ্পজ্জন্তি. এৰঞ্চ সতি তে সদ্দা পুরেজাতাহি ৰীণাতন্তি ৰীণাদণ্ডকেহি ৰিনা উপ্পজ্জিতুং ন সক্কোন্তি. এৰমেৰং পঞ্চ ৰিঞ্ঞাণ ৰীথিচিত্তানিপি পঞ্চসু ৰত্থুদ্ৰারেসু পঞ্চন্নং আরম্মণানং আপাতাগমন পচ্চযা এৰ উপ্পজ্জন্তি. আপাতাগমনঞ্চ তেসং দ্ৰিন্নং ঠিতিপত্তকালে এৰ হোতি. ন কেৰলঞ্চ তস্মিং কালে তানি পঞ্চারম্মণানি তেসু পঞ্চৰত্থূসু এৰ আপাতমাগচ্ছন্তি. অথ খো ভৰঙ্গমনোদ্ৰারেপি আপাতং আগচ্ছন্তিযেৰ. তস্মিং আপাতগমনত্তা এৰ তং ভৰঙ্গম্পি দ্ৰিক্খত্তুং চলিত্ৰা উপচ্ছিজ্জতি, ভৰঙ্গুপচ্ছেদে এৰ তানি ৰীথিচিত্তানি উপ্পজ্জন্তি. এৰঞ্চ সতি তানি ৰীথিচিত্তানি পুরেজাতেহি ৰত্থু দ্ৰারারম্মণেহি ৰিনা উপ্পজ্জিতুং ন সক্কোন্তীতি. তানি পন সব্বানিপি অট্ঠারসনিপ্ফন্নরূপানি নিরুদ্ধানি হুত্ৰা অতীতানিপি হোন্তি, অনুপ্পন্নানি হুত্ৰা অনাগতানিপি হোন্তি. উপ্পন্নানি হুত্ৰা পচ্চুপ্পন্নানিপি হোন্তি. সব্বানিপি মনোৰিঞ্ঞাণৰীথিচিত্তানং আরম্মণানি হোন্তি. তেসু পচ্চুপ্পন্নানি এৰ তেসং আরম্মণপুরেজাতপচ্চযা হোন্তি. যদা দূরে ৰা পটিচ্ছন্নে ৰা ঠিতং তং তং আরম্মণৰত্থুং মনসা এৰ আরম্মণং করোতি, তদা তং তং ৰত্থু সচে তত্থ তত্থ ৰিজ্জমানং হোতি, পচ্চুপ্পন্নং নাম হোতি. পুরেজাতপচ্চযদীপনা নিট্ঠিতা.