নমো তস্স ভগৰতো অরহতো সম্মাসম্বুদ্ধস্স

নীতিমঞ্জরী

১. কুলক্খযে ৰিনস্সন্তি,

কুলধম্মা সনন্তনা;

ধম্মে নট্ঠে কুলং সব্বং,

অধম্মো অভিভূ খলং.

২. অধম্মাভিভৰা দন্তা,

পদুস্সন্তি কুলিত্থিযো;

থীসু দুট্ঠা স্ৰ ধম্মেন,

জাযতে ৰণ্ণসঙ্করো.

৩. পিযং ভাসে গুণগ্গাহো,

সূরো সিযা ৰিকন্তনো;

দাতা চন্দসমা নারী,

দিট্ঠং দিট্ঠং নহাসযে.

৪. কুতোত্থি কুমিত্তে সচ্চং,

কুদারে রতিৰড্ঢনং;

কুদেসম্হি মনো রম্মং,

কুরাজে ভোগসম্পদং.

সঙ্কেতেৰ অমিত্তস্মিং,

মিত্তস্মিং পি নৰিস্সসে;

অভযা ভয মুপ্পন্নং,

অপি মূলানি কন্ততি.

অদিট্ঠোৰ পরো সেয্যো,

দুম্মিত্তো নো ৰিস্সাসিকো.

অগ্গিহোমফলং ৰেদো,

সত্থংসীলফলং মতং;

রতিপুত্তফলং নারী,

দানভুত্তিফলং ধনং.

অসচ্চং সাহসং মাযা,

মূল়্হত্ত ম তিলোভতা;

অসোচং নিদ্দযত্তঞ্চ,

থীনং দোসা সভাৰজা.

জাযায ভত্তুনো ভারো,

সিস্সেন গুরুনো কতো;

অমচ্চকেহি রাজস্স,

পিতরানং নিজেনচ.

৫. উয্যমেন হি সিজ্ঝন্তি,

কম্মানি ন মনোরথা;

ন হি সুত্তস্স সীহস্স,

পৰীসন্তি মুখে মিগা.

অতিসীতং অতিউণ্হং,

অতিসাযমিদং অহু;

ইতি ৰিসট্ঠকম্মন্তে,

খণা অচ্চেন্তি মাণৰে.

আদানস্স পদানস্স,

কত্তব্বস্স চ কম্মুনো;

খিপ্পং অকয্যমানস্স,

কালে পিৰতি সম্পদং.

নাদব্বে নিহিতা কাচি,

ক্রিযা ফলৰতী ভৰে;

নব্যাপারসতেনাপি,

সুকোৰ পাঠতে বকো.

যো দন্ধকালে তরতি,

তরণীযে চ দন্ধযে;

সুক্খপণ্ণং ৰ অক্কম্ম,

অত্থং ভঞ্জতি অত্তনো.

৬. যং দদাতি যং ভুঞ্জতি,

তদেৰ ধনিনো ধনং;

অঞ্ঞে মতস্স কীল়ন্তি,

দারেহিপি ধনেহিপি.

দানোপভোগহীনেন,

ধনেন ধনিনো সুখং;

কো ৰিসেসো দলিদ্দস্স,

অধিকং ধনরক্খণং.

নিজসোখ্যং নিরুন্ধন্তো,

নীচভোগো মিতম্পচো;

ধনং সঞ্চযতে যো সো,

পরভারৰহো পসু.

যং উস্সুকা সঙ্খরোন্তি,

অলক্খিকা বহুং ধনং;

সিপ্পৰন্তো অসিপ্পাৰা,

লক্খি ৰা তানি ভুঞ্জতি.

৭. সম্পত্যং মহতং চিত্তং,

ভৰে উপ্পলে কোমলং;

ৰিপত্যংচ মহাসেল,

সিলাসঙ্ঘাতকক্কসং.

৮. অসম্ভব্যগুণং থুত্ৰা,

খেদো মুধাৰ জাযতে;

অৰ্হাযং চন্দ মু ল্লোক্য,

নচন্দোত মু পাগমী.

৯. সচ্চং মুখম্হি ধারেয্য,

কণ্ণে সুতং ভুজে জযং;

হদযম্হি খমং ৰীরং,

লোকাদাসংচ লোচনে.

সদ্দমত্তং নফন্দেয্য,

অঞ্ঞত্ৰা সদ্দকারণং;

সদ্দহেতুং পরিঞ্ঞায,

পমোদো ৰা ভযো তথা.

সব্বসুত ম ধীযেয্য,

হীনমুক্কট্ঠমজ্ঝিমং.

১০. দুন্নারিযা কুলং সুদ্ধং,

পুত্তো নস্সতি লালনা;

সমিদ্ধি অনযা বন্ধু,

পৰাসা মদনা হিরী.

লালযে পঞ্চৰস্সানি,

দসৰস্সানি তালযে;

পত্তেতু সোল়সেৰস্সে,

পুত্তং মিত্তংৰ আচরে.

লালনে বহৰো দোসা,

লালনে বহৰো গুণা.

পাপা নিৰারযতি যোজযতে হিতায,

গুয্হানি গূহতি গুণং পকটীকরোতি;

আপত্তিকঞ্চ নজহাতি দদাতি কালে,

সম্মিত্ত লক্খণমিদং পৰদন্তি সন্তো.

১১. দুজ্জনো জীযতে যুত্যা,

নিগ্গহেন নধীমতা;

নিপাত্যতে মহারুক্খো,

তস্সমীপ খতিক্খযা.

ৰনে মিগাচ লুদ্ধানং,

দুজ্জনানঞ্চ সজ্জনা;

অকারণৰেরী হোন্তি,

তিণভক্খা সুপেসলা.

পাদলগ্গং করট্ঠেন,

কণ্ডকেনেৰ কণ্ডকং.

বালং নপস্সে নসুণে,

নচবালেন সংৰসে;

বালেনাল্লাপসল্লাপং,

নকরে নচরোচযে.

১২. উপ কত্তুং যথা খুদ্দো,

সমত্থো নতথামহা;

কূপো হি হন্তি পিপাসং,

নতু পাযো মহম্বুধি.

১৩. আদানস্স পদানস্স,

কত্তব্বস্সচ কম্মুনো;

খিপ্পং অকরমানস্স,

কালো ভক্খতি তং রসং.

নক্খত্তং পটিমানেন্তং,

অত্থো বালং উপজ্ঝগা;

অত্থো অত্থস্স নক্খত্তং,

কিং করিস্সন্তি তারকা.

অজরামরোৰ পঞ্ঞো,

ৰিজ্জমত্থঞ্চ চিন্তযে;

গহিতোৰিয কেসেসু,

মচ্চুনা ধম্মমাচরে.

১৪. ৰজ্জা গুরূচ মন্তীচ,

তযো রট্ঠাভিসঙ্খতা;

জীৰীত দক্খ কোসানং,

ৰড্ঢনা নাসনাচ তে.

১৫. থিরেন কম্মং ৰড্ঢতি,

অথিরেন তুরেন নো;

ফলন্তি সমযে রুক্খা,

সিত্তাপি বহুৰারিনা.

ৰাযামেথেৰ পুরিসো,

ননিব্বিন্দেয্য পণ্ডিতো.

পযতনো তাদিসো নেৰ,

কয্যো যেন ফলং নহি;

সেলগ্গে কূপখণনা,

কথং তোযসমাগমো.

ঞাণঙ্কুসেন সম্মগ্গং,

নিয্যত্যুস্সাহকুঞ্জরো.