পকিণ্ণক-নিদ্দেস

২৫৩. কুমুদং কো পবোধযি,

নাথো রৰিন্দু পণ্ডিতো;

কমলং কো কুমুদং কো,

নরপং কো পবোধযি.

২৫৪. চিত্তেন নিয্যতি লোকো,

চিত্তেন পরিকস্সতি;

চিত্তস্স এক-ধম্মস্স,

সব্বেৰ ৰসমন্ৰগূ.

২৫৫. সমণো রাজানুরাজা,

সেনাপতি মহা-মত্তো;

ধম্মট্ঠো পণ্ডিতো দিস্ৰা,

পচ্চক্খত্থং ন কারিযা.

২৫৬. দীপো নৰ-দিসং তেজো,

ন হেট্ঠা চ তথা সকং;

পর-ৰজ্জং ৰিদূ পস্সে,

সক-ৰজ্জংপি পস্সতু.

২৫৭. স-ফলং পণ্ডিতো লোকে,

স-কারণং ৰচং ভণে;

অ-কারণংফলং বালো,

ইদং উভয-লক্খণং.

২৫৮. তস্স ৰাচায জানেয্য,

কুটিলং বাল-পণ্ডিতং;

ৰাচা-রূপং মিত্তং করে,

ৰাচা-রূপং ধুৰং জহে.

২৫৯. দুচ্চিন্তিতস্স চিন্তা চ,

দুব্ভাসিতস্স ভাসনা;

দুক্কম্মস্স কতঞ্চাতি,

এতং বালস্স লক্খণং.

২৬০. সু-চিন্তিতস্স চিন্তা চ,

সু-ভাসিতস্স ভাসনা;

সু-কম্মস্স কতঞ্চাতি,

এতং ধীরস্স লক্খণং.

২৬১. অ-নযং নযতি দুম্মেধো,

অ-ধুরাযং নি-যুঞ্জতি;

দুন্নযো সেয্যসো হোতি,

সম্মা ৰুত্তো পকুপ্পতি;

ৰিনযং সো ন জানাতি,

সাধু তস্স অ-দস্সনং.

২৬২. নযং নযতি মেধাৰী,

অ-ধুরাযং ন যুঞ্জতি;

সু-নযো সেয্যসো হোতি,

সম্মা ৰুত্তো ন কুপ্পতি;

ৰিনযং সো পজানাতি,

সাধু তেন সমাগমো.

২৬৩. অ-নাযকা ৰিনস্সন্তি,

নস্সন্তি বহু-নাযকা;

থী-নাযকা ৰিনস্সন্তি,

নস্সন্তি সুসু-নাযকা.

২৬৪. জেট্ঠো কম্মেসু নীচানং,

জানংজানংৰ আচরে;

অ-জানেৰং করে জানং,

নীচো এতি ভযং পিযং.

২৬৫. কম্মং দুজ্জন-সারুপ্পং,

দুধা সুজন-সারুপ্পং;

দুজ্জনং তেসু দুক্কম্মে,

সু-কম্মে সুজনং ইচ্ছে.

২৬৬. পণ্ডিতো ৰেরী বালো চ,

দুজ্জযো বাল-ৰেরিতো;

পণ্ডিতং-ৰেরী পমাদেন,

ন তং জযো হি সব্বদা.

২৬৭. গুয্হস্স হি গুয্হমেৰ সাধু,

ন হি গুয্হস্স পসত্থমাৰি-কম্মং;

অ-নিপ্ফন্নতায সহেয্য ধীরো,

নিপ্ফন্নত্থোৰ যথা-সুখং ভণেয্য.

২৬৮. গুয্হমত্থং ন ৰিৰরেয্য,

রক্খেয্য নং যথা নিধিং;

ন হী পাতুকতো সাধু,

গুয্হো অত্থো পজানতা.

২৬৯. থিযা গুয্হং ন সংসেয্য,

অ-মিত্তস্স চ পণ্ডিতো;

যো চামিসেন সংহীরো,

হদয-ত্থেনো চ যো নরো.

২৭০. ৰিৰিচ্চ ভাসেয্য দিৰা রহস্সং,

রত্তিং গিরং নাতি-ৰেলং পমুঞ্চে;

উপস্সুতিকা হি সুণন্তি মন্তং,

তস্মা হি মন্তো খিপ্পমুপেতি ভেদং.

২৭১. ন পকাসতি গুয্হং যো,

সো গুয্হং পটিগুয্হতি;

ভযেসু ন জহে কিচ্চে,

সু-মিত্তোনুচরো ভৰে.

২৭২. করোতি দুক্করং সাধুং,

উজুং খমতি দুক্খমং;

দুদ্দদং সামং দদাতি,

যো সু-মিত্তো হৰে ভৰে.

২৭৩. পিয-ৰাচা সদা মিত্তো,

পিয-ৰত্থুং ন যাচনা;

ইচ্ছাগতেন দানেন,

সু-দল়্হো সু-প্পিযো হৰে;

তদঙ্গতো চ হীনেন,

অ-প্পিযো ভিজ্জনো ভৰে.

২৭৪. দেহীতি যাচনে হিরী,

সিরী চ কায-দেৰতা;

পলাযন্তি সিরিচ্ছিতো,

ন যাচে পর-সন্তকং.

২৭৫. স্ৰানো লদ্ধান নিম্মংসং,

অট্ঠিং তুট্ঠো পমোদতি;

সকন্তিকং মিগং সীহো,

হিত্ৰা হত্থিংনুধাৰতি.

২৭৬. এৰং ছন্দানুরূপেন,

জনো আসীসতে ফলং;

মহা ছন্দা মহন্তংৰ,

হীনংৰ হীন-ছন্দকা.

২৭৭. নানা-ছন্দা মহারাজ,

একাগারে ৰসামসে;

অহং গাম-ৰরং ইচ্ছে,

ব্রাহ্মণী চ গৰং সতং.

২৭৮. পুত্তো চ আজঞ্ঞ-রথং,

কঞ্ঞা চ মণি-কুণ্ডলং;

যা চেসা পুণ্ণকা জম্মী,

উজুক্খলংভি-কঙ্খতি.

২৭৯. ঠানং মিত্তে ধনে কম্মে,

সতুস্সাহে সু-লব্ভিতং;

তং দল়্হং দুক্করং করে,

পঞ্ঞা-সতি-সমাধিনা.

২৮০. ভেসজ্জে ৰিহিতে সুদ্ধ,

বুদ্ধাদি-রতনত্তযে;

পসাদমাচরে নিচ্চং,

সজ্জনে স-গুণেপি চ.

২৮১. রাজা রট্ঠেন ধাতুসো,

বালো পাপেহি দুম্মনো,

অলঙ্কারেন ইত্থীপি,

কামেহি চ ন তপ্পতি.

২৮২. অপ্পিচ্ছো চ ধুতঙ্গেন,

আরদ্ধো ৰীরিযেন হি;

ৰিসারদো পরিসায,

পরিচ্চাগেন দাযকো;

সৰনেন সু-ধম্মংপি,

ন তপ্পতিৰ পণ্ডিতো.

২৮৩. জেট্ঠস্স সিতং হসিতং,

মজ্ঝস্স মধুরস্সরং;

লোকে অংস-সিরো-কম্পং,

জম্মস্স অপ-হস্সিতং;

এতেসং অতি-হস্সিতং,

হাসো হোতি যথাক্কমং.

২৮৪. নত্থি দুট্ঠে নযো অত্থি,

ন ধম্মো ন সু-ভাসিতং;

নিক্কমং দুট্ঠে যুঞ্জেয্য,

সো হি সব্ভিং ন রঞ্জতি.

২৮৫. দুল্লভং পকতিং ৰাচং,

দুল্লভো খেমকো সুতো;

দুল্লভা সদিসী জাযা,

দুল্লভো স-জনো পিযো.

২৮৬. ধজো রথস্স পঞ্ঞাণং,

ধূমো পঞ্ঞাণমগ্গিনো;

রাজা রট্ঠস্স পঞ্ঞাণং,

ভত্তা পঞ্ঞাণমিত্থিযা.

২৮৭. দুন্নারিযা কুলং সুদ্ধং,

পুত্তো নস্সতি লালনা;

সমিদ্ধি অ-নযা বন্ধু,