নৰম পরিচ্ছেদ

অভযাভিসেকো

১. মহেসী জনযী পুত্তে, দস একঞ্চ ধীতরং;

সব্বজেট্ঠো’ভযো নাম, চিত্তানাম কনিট্ঠিকা.

২. পস্সিত্ৰা তং ৰিযাকংসু, ব্রাহ্মণা মন্তপারগা;

‘‘রজ্জহেতু সুতো অস্সা, ঘাতযিস্সতি মাতুলে’’.

৩. ঘাতেস্সামি কনিট্ঠিন্তি, নিচ্ছিতে ভাতরা’ভযো;

ৰারেসি কালে ৰাসেসুং, গেহং তং একথুণিকে.

৪. রঞ্ঞো চ সিরিগব্ভেন, তস্স দ্ৰারমকারযুং;

অন্তো ঠপেসুং একঞ্চ, দাসিং নরসতং বহি.

৫. রূপেনু’ম্মাদযী নরে, দিট্ঠমত্তাৰ সাযতো;

ততো উম্মাদচিত্তা’তি, নামং সোপপদং লভি.

৬. সুত্ৰান লংকাগমনং, ভদ্দকচ্চানদেৰিযা;

মাতরা চোদিতা পুত্তা, ঠপেত্ৰে’কঞ্চ আগমুং.

৭. দিস্ৰান তে পণ্ডুৰাসু-দেৰং লঙ্কিন্দমাগতা;

দিস্ৰান তং কনিট্ঠিঞ্চ, রোদিত্ৰা সহ তায চ.

৮. রঞ্ঞা সুকতসক্কারা, রঞ্ঞো’নুঞ্ঞায চারিকং;

চরিংসু লংকাদীপম্হি, নিৰসুঞ্চ যথারুচিং.

৯. রামেন ৰুসিতঠানং, রামগোণন্তি ৰুচ্চতি;

উরুৰেলা’নুরাধানং, নিৰাসা চ তথা তথা.

১০. তথা ৰিজিতদীঘাযু-রোহণানং নিৰাসকা;

ৰিজিতগামো দীঘাযু-রোহণন্তি চ ৰুচ্চতি.

১১. কারেসি অনুরাধো সো, ৰাপিং দক্খিণতো ততো;

কারাপেত্ৰা রাজগেহং, তত্থ ৰাসমকপ্পযী.

১২. মহারাজা পণ্ডুৰাসু-দেৰো জট্ঠসুতং সকং;

অভযং উপরজ্জম্হি, কালে সমভিসেচযি.

১৩. দীঘাযুস্স কুমারস্স, তনযো দীঘগামণি;

সুত্ৰা উম্মাদচিত্তং তং, তস্সং জাতকুতূহলো.

১৪. গহেত্ৰা’পতিস্স গামং, তং অপস্সি মনুজাধিপং;

অদা সহোপরাজেন, রাজুপট্ঠানমস্সসো.

১৫. গৰক্খাভিমুখট্ঠানে, তং উপেচ্চ ঠিতং তুসা;

দিস্ৰান গামিণিং চিত্তা, রত্তচিত্তা’হ দাসিকং.

১৬. ‘‘কো এসো’’তি ততো সুত্ৰা,

মাতুলস্স সুতোইতি;

দাসিং তত্থ নিযোজেসি,

সদ্ধিংকত্ৰান সো ততো.

১৭. গৰক্খম্হি ডসাপেত্ৰা, রত্তিং কক্কটযন্তকং;

আরুয্হ ছিন্দযিত্ৰান, কৰাটং তেন পাৰিসি.

১৮. তায সদ্ধিং ৰসিত্ৰান, পচ্চূসেযেৰ নিক্খমি;

এৰং নিচ্চং ৰসী তত্থ, ছিদ্দাভাৰা অপাকটো.

১৯. সা তেন অগ্গহী গব্ভং, গব্ভে পরিণতে ততো;

মাতু আরোচযী দাসী, মাতা পুচ্ছিয ধীতরং.

২০. রঞ্ঞো আরোচযী রাজা, অমন্তেত্ৰা সুতে’ব্রহ্মা;

পোসিযোসো’পি অম্হেহি, দেৰ তস্সেৰ তং ইতি.

২১. পুত্তো চে মারযিস্সাম, ত’ন্তি তস্স অদংসু তং;

সা সূতিকালসম্পত্তে, সূতি গেহঞ্চ পাৰিসিং.

২২. সঙ্কিত্ৰা গোপকং চিত্তং, কালৰেলঞ্চ দাসকং;

তস্মিং কম্মে নিস্সাযা’তি, গামণি পরিচারকে.

২৩. তে পটিঞ্ঞং অদেন্তে তে, রাজপুত্তা অঘাতযুং;

যক্খা হুত্ৰান রক্খিংসু, উভো গব্ভে কুমারকং.

২৪. অঞ্ঞং উপৰিজঞ্ঞং সা, সল্লক্খা পেসি দাসিযা;

চিত্তা সা জনযী পুত্তং, সা ইত্থি পন ধীতরং.

২৫. চিত্তং সহস্সং দাপেত্ৰা, তস্সা পুত্তং সকম্পি চ;

আণাপেত্ৰা ধীতরং তং, নিপজ্জাপেসি সন্তিকে.

২৬. ধীতা লদ্ধা’তি সুত্ৰান, তুট্ঠা রাজসুতা অহুং;

মাতা চ মাতুমাতা চ, উভো পন কুমারকং.

২৭. মাতামহস্স নামঞ্চ, জেট্ঠস্স মাতুলস্স চ;

একং কত্ৰা তমকরুং, পণ্ডুকাভযনামকং.

২৮. লংকা পালো পণ্ডুৰাসু-দেৰো রজ্জমকারযি;

তিংস ৰস্সম্হি জাতম্হি, মতো সো পণ্ডুকাভযে.

২৯. তস্মিং মতস্মিং মনুজাধিপস্মিং,

সব্বে সমাগম্ম নরিন্দপুত্তা;

তস্সাভযস্সাভযদস্স ভাতু,

রাজাভিসেকং অকরুং উল়ারাতি.

সুজনপ্পসাদ সংৰেগত্থায কতে মহাৰংসে

অভযাভিসেকো নাম

নৰমো পরিচ্ছেদো.