সট্ঠিম পরিচ্ছেদ

কুমারোদযো

১. রোহণে নিৰসিত্থা’ৰ, জযবাহুমহীপতি;

মিত্তাৰ্হা রাজিনী চেৰ, তদা কালমকংসু তে.

২. সিরীৰল্লভজাযা’থ, জনেসি সুগলা দুৰে;

মাণভরণকং পুত্তং, পুত্তিং লীলাৰতিম্পি চ.

৩. মাণাভরণভূপাল-দেৰী’পি রতনাৰলী;

মিত্তং পভাৰতিঞ্চাপি, অলভী ধীতরো দুৰে.

৪. পস্সন্তস্স উভো তাযো, ধীতরো ৰীরবাহুনো;

তদা মহাদিপাদস্স, এৰং আসি ৰিতক্কিতং.

৫. লোকাভিসম্মতে সব্ব-ভূপালন্ৰযমুদ্ধনি;

ৰিসুদ্ধে সোমৰংসম্হি, অভিজাতা মযং পন.

৬. পিহনীযতরাকারা, সব্বসত্তিসমুন্নতা;

নানাৰিজ্জাসু নিপুণা, হত্থিঅস্সাদিসুক্খমা.

৭. তথা পেকাকিনা ৰে’তে, তযো ৰিক্কমবাহুনা;

পরাজযং পরিভৰং, পাপিতা বহুসো রণে.

৮. সূনুনো সুসমত্থস্স, ৰিসোধেতু মিমং মলং;

ন দিস্সতে পাতুভাৰো, অহো নো অপ্পপুঞ্ঞতা.

৯. জনৰাদকিলিট্ঠেন, রাজত্তেনাপি কিং মম;

ইদানি ৰিসযাসঙ্গং, হিত্ৰা কল্যাণকম্মসু.

১০. অপ্পমত্তস্স সততং, নেতব্বা ৰাসরা’ইতি;

নিয্যাতেত্ৰা অমচ্চানং, সব্বং রজ্জৰিচারণং.

১১. তহিং সত্ত’ট্ঠমাসঞ্হি, ৰসং রত্তিযমেকদা;

দেৰরাজঘরেসেয্যং, কপ্পেসি সীলসংযতো.

১২. ততো পচ্চূসকালম্হি, দেৰপুত্তং মহিদ্ধিকং;

ৰিচিত্তৰত্থাভরণং, গন্ধমালাৰিভূসিতং.

১৩. উল়ারতররূপেন, দেহোভাসেন অত্তনো;

ওভাসেন্তং অসেসা’সা, সূরিযঞ্চ ন ভুগ্গতং.

১৪. ৰদন্তং সুপিনে এৰং, অদক্খি দরণীপতি;

পসীদস্সু মহাভাগ, পিতোভৰ মহিপতি.

১৫. ধঞ্ঞলক্খণসম্পন্নো, ইচ্ছিতত্থস্সসাধকো;

ৰিনীতো লোককুহর-ব্যাপিতেজো পরক্কমো.

১৬. আণবলযসোকিত্তি-ভাসুরো সগ্গুণাকরো;

লোকসাসনসংৰুদ্ধি-করো পুত্তৰরো তৰ.

১৭. লব্ভীস্সতে মহারাজ, ন চিরস্সেৰ সম্পতি;

পুত্তদারাধিৰুত্থং তং, পুরং খিপ্পং পযাহীতি.

১৮. পবুজ্ঝিত্ৰান সঞ্জাত-পীতিৰেগোথ রত্তিযা;

ৰিভাতায ততোপোঙ্খ-গামং গঞ্ছিনরুত্তমো.

১৯. যথা দিট্ঠপ্পকারন্তং, কথেসি সুপিনং সুভং;

মহেসী পমুখানং সো, অমচ্চানং মহীপতি.

২০. সদ্ধিং মহেসিযা তত্থ, পত্থেন্তো পুত্তমুত্তমং;

চিন্তোন্তো দানসীলাদিং, সুভং নানপ্পকারকং.

২১. অথেকদিৰসংকালে, পচ্চূসে সুপিনে পন;

সব্বলক্খণসম্পন্নং, সব্বসেতং মনোহরং.

২২. দন্তীপোতৰরং দন্তং, কণ্ণে গণিযপেমতো;

পৰিসন্তমিৰত্তানং, সেয্যাগব্ভং মহেসিযা.

২৩. সম্পস্সিয পবুজ্ঝিত্ৰা, উট্ঠায সযনাৰরা;

সঞ্জাতপীতিপামোজ্জ-ৰেগপীণিতমানসো.

২৪. তাযং ৰেলাযমেদাসু-সেয্যাগব্ভং মহেসিযা;

পৰিস্সসুপিনং তস্সা, যথাদিট্ঠং পকাসযী.

২৫. অহম্পি তাদিসং হত্থি-পোতকং সযনং মম;

পদক্খিণং করিত্ৰান, ঠিতং সোণ্ডে সমাদিয.

২৬. আকড্ঢিত্ৰান সযনং, সমারোপিয পেমতো;

আলিঙ্গিং সুপিনম্হীতি, দেৰী চাপি তমব্রৰী.

২৭. উভো তে অঞ্ঞমঞ্ঞস্স, দিট্ঠমেৰং পকাসিয;

উট্ঠাপেসুং পহট্ঠাৰ, ৰীতনিদ্দারুণং তদা.

২৮. ততো পাতো উপট্ঠাতু, মুপযাতং পুরোহিতং;

নেমিত্তকে চ পুচ্ছিংসু, সুনিত্ৰা তে পমোদিতা.

২৯. ন চিরস্সেৰ পুত্তস্স, ধঞ্ঞলক্খণসালিনো;

উপ্পত্তিযা অৰস্সং’ৰ, ভৰংতব্বন্তি কিত্তযুং.

৩০. তং সুণিত্ৰা অমচ্চা চ, তথা নগরৰাসিনো;

অৰিন্দিংসু জনিন্দো চ, সব্বেপীতি মহুস্সৰং.

৩১. ততো পট্ঠায সোত্থানং, পত্থযং পত্থিৰোভুসং;

ভিক্খুসঙ্ঘেন বহুসো, ভণাপেসি পরিত্তকং.

৩২. মণিমুত্তাদিকং চিত্তং, মহগ্ঘমনুৰাসরং;

পরিচ্চজি দানমুখে, যাচকানমনেকসো.

৩৩. পুরোহিতাদিৰিপ্পেহি, ৰেদৰেদঙ্গৰিঞ্ঞূহি;

ৰত্তাপেসি চ হোমাদি-ৰিধানং সোত্থি সম্মতং.

৩৪. সুৰিনট্ঠে ৰিহারে চ, ধাতুগব্ভে চ ৰাপিযো;

জিণ্ণা চ পটিসঙ্খত্তুং, যোজযী রাজকপ্পিকে.

৩৫. দিনং নযন্তে কল্যাণ-কম্মেনে’ৰং নরিস্সরে;

ন চিরং সণ্ঠহি গব্ভ-ৰরো কুচ্ছিম্হি দেৰিযা.

৩৬. ততোৰগম্ম তং হট্ঠ-পহট্ঠো সো নরিস্সরো;

মহন্তং দেৰিযা গব্ভ-পরিহারমদাপযি.

৩৭. পরিপক্কগব্ভা দেৰী, কমেন জনযীসুকং;

সমযে ভদ্দনক্খত্ত-মুহুত্তেনভিলক্খিতে.

৩৮. সুপ্পসন্না অসেসা চ, দিসাযো তংখণে অহু;

সমীরণে চ ৰাসিংসু, সুগন্ধিমুদুসীতলা.

৩৯. দন্তীনং কোঞ্চনাদেন, হযানং হেসিতেন চ;

রাজঙ্গণং তদাজাতং, মহাকোলাহলা কূলং.

৪০. অচ্ছেরাতিসযে এৰং, পাতুভূতে অনেকধা;

দিস্ৰা তং ৰিম্হযপ্পত্তো, মাণভরণভূপতি.

৪১. সুত্ৰা নিজস্স পুত্তস্স, তদা সঞ্জাতসাসনং;

অমতেনাভিসিত্তোৰ, পীতিপুণ্ণমনোরথো.

৪২. মোচাপেত্ৰা তদা কারা-ঘরে বদ্ধে বহূজনে;

দানং উল়ারং সমণ-ব্রাহ্মণানং পদাপযি.

৪৩. অমচ্চপমুখা চাপি, জনাপুরনিৰাসিনো;

কদলীতোরণাদীহি, রাজধানী মনেকধা.

৪৪. অলঙ্করিত্ৰা সকলং, সুমণ্ডিতপসাধিতা;

ছণং মহন্তং ৰত্তেসুং, কতিপাহং মনোরমং.

৪৫. ৰেদে ৰুত্তৰিধানেন, জাতকম্মাদিকং ৰিধিং;

সব্বং সমাপযিত্ৰান, কুমারস্সা’ৰনীপতি.

৪৬. পুরোহিতাদযো ৰিপ্পে, ততো লক্খণপাঠকে;

আণাপেত্ৰান সক্কার-সম্মানৰিধিপুব্বকং.

৪৭. নিযোজেসি কুমারস্স, লক্খণানং পটিগ্গহে;

সাধকং সকলং তস্স, যত্থপাদাদিলক্খণং.

৪৮. উপধারিয মহামচ্চ-গণমজ্ঝগতস্স তে;

রাজিনো দেৰিযা চাপি, পকাসেসুং পমোদিতা.

৪৯. লঙ্কাদীপং ঠপেত্ৰান, জম্বুদীপতলম্পি চ;

একচ্ছত্তঙ্কিতং কত্ৰা-নুভোত্তুং নিপুণো ইতি.

৫০. তে সন্তপ্পিয ভোগেহি, ভিয্যো পুচ্ছিত্থ সাদরং;

সন্দিস্সমানং যংকিঞ্চি, অরিট্ঠং অত্থি নত্থী’তি.

৫১. দীঘাযুকো কুমারো’যং, কিঞ্চি পঞ্ঞাযতে ৰত;

জনকারিট্ঠযোগো’তি, তে মহীপতিনো’ব্রৰুং.

৫২. তস্সারিজনসম্মদ্দি-পতাপভুজযো গতো;

সো পরক্কমবাহূ’তি, অন্ৰত্থনামমগ্গহী.

৫৩. কণ্ণৰে ধমহঞ্চেৰ, অন্নুপাসনমঙ্গলং;

কারাপিয ৰিধানঞ্ঞূ, যথাৰিধিমসেসতো.

৫৪. রঞ্ঞো ৰিক্কমবাহুস্স, সপুত্তুপ্পত্তিসাসনং;

ৰত্তুং সদূতে পেসেসি, পুলত্থিনগরং তদা.

৫৫. তেহিসো ভাগিনেয্যস্স, মহাভাগত্তনম্পি চ;

জনকারিট্ঠযোগঞ্চ, সুত্ৰা ৰিক্কমবাহুসো.

৫৬. ধঞ্ঞং ৰিজযরাজাদি-রাজমালায নাযকং;

মণিংৰ ভাসুরং ময্হং, ভাগিনেয্যং জনেসিসো.

৫৭. হানি যাকাচিসততং, যথা তস্স ন হেস্সতি;

তথা মমন্তিকেযেৰ, কুমারো এত্থ ৰড্ঢতং.

৫৮. অলদ্ধং লভিতুং লাভং, লদ্ধঞ্চ পরিরক্খিতুং;

সব্বথা ন সমত্থোযং, পুত্তো গজবাহু মম.

৫৯. সূরভাৰাদিযুত্তো’পি, মহিন্দৰ্হপরোসুতো;

নিহীনো মাতুগোত্তেন, ন রজ্জস্স রহো মম.

৬০. ঠিতস্স ৰিক্কজাতেন, নেকসো সঞ্চিতেন মে;

রজ্জস্স ভাগিনেয্যো’ৰ, কামং ভাগী ভৰিস্সতি.

৬১. ইতিপেসেসি দূতে সো, আনেতুং তং কুমারকং;

কুমারা ভরণং দত্ৰা, সেসং সারঞ্চুপাযনং.

৬২. সব্বং দূতমুখা সুত্ৰা, ৰীরবাহু মহীপতি;

তস্সেতং ৰচনং যুত্তং, ৰুত্তং মেহিত বুদ্ধিযা.

৬৩. তথাপি চ নিজারিট্ঠ-পটিকারত্থমীদিসং;

ওরসং পুত্তরতনং, পেসেতুং না’নুরূপকং.

৬৪. কিঞ্চ তত্থ কুমারম্হি, নীতে ৰিক্কম বাহুনো;

পক্খো লদ্ধমহাৰাহ-বলো ৰিয হুতাসনো.

৬৫. অচ্চুন্নতেন মহতা, তেজসা সঞ্জলিস্সতি;

হানিরেৰ ৰতম্হাকং, মহতী হেস্সতে ভুসং.

৬৬. ইতি হত্থে গতানং সো, দূতানং থনযং সকং;

অপেসেত্ৰা ৰিসজ্জেসি, পসাদিয মনেন সো.

৬৭. সপুত্তদারেহি সমগ্গৰাসং,

নরাদিনাথো নিৰসং তহিংসো;

তিব্বেন ফুট্ঠো মহতাগদেন,

রজ্জেন সদ্ধিং ৰিজহিত্থ দেসং.

সুজনপ্পসাদসংৰে গত্থায কতে মহাৰংসে

কুমারোদযো নাম

সট্ঠিমো পরিচ্ছেদো.