ছপঞ্ঞাসতিম পরিচ্ছেদ

অনুরাধপুরাভিগমনো

১. যুৰরাজপদে তস্স, ঠিতস্সা’থ নযঞ্ঞুনো;

অহূ ৰিজযবাহূতি, নামং সব্বত্থ পাকটং.

২. মহাঞ্ঞণো নিজাণায, তত্থ ভেরিং চরাৰিয;

ঠপেন্তো সচিৰে’নেকে, পতিরূপে পদন্তরে.

৩. চোল়ানং মদ্দনত্থায, রাজরট্ঠাধিৰাসিনং;

চতুরো চতুরোপাযে, যো জযং তত্থ সো ৰসী.

৪. চোল়রাজা সুণিত্ৰা তং, পুল়ত্থিনগরে ঠিতং;

সেনাপতিম পেসেসি, দত্ৰান বলৰাহনং.

৫. সেনিন্দং কাজরগ্গাম-সমীপং সমুপাগতং;

দুপ্পসয্হং ৰিদিত্ৰান, গিরিদুগ্গমগা ততো.

৬. সেনিন্দো কাজরগ্গামং, ৰিলুম্পিত্ৰান ৰেগসা;

তত্থ ৰত্থুমসক্কোন্তো, সদেসং পুন রাগমি.

৭. ততো মহাদিপাদো’পি, আগম্ম মলযা লহুং;

মহতা বলকাযেন, সিপ্পত্থলকমাৰসি.

৮. রাজা রামঞ্ঞৰিসযে, রাজিনো সন্তিকং জনে;

পেসেসি বহুকেসারং, ধনজাতঞ্চ’নপ্পকং.

৯. ৰিচিত্তৰত্থকপ্পূর-চন্দনাদীহি ৰত্থূহি;

পরিপুণ্ণা চ নাৰাযো, নেকাতিত্থে সমোসটা.

১০. ধনজা তেহি নেকেহি, করোন্তো ভটসঙ্গহং;

ততো তম্বলগামম্হি, নিৰসিত্থ মহব্বলো.

১১. অঞ্ঞমঞ্ঞৰিরুদ্ধত্তা, রাজারট্ঠাধিৰাসিনো;

উপগ্গম্ম জনা সব্বে, করং নো দেন্তি সব্বসো.

১২. ৰিপক্খাচোল়রাজস্স, ভিন্দন্তা’ণং মদুদ্ধতা;

আযুত্তকে ৰিহিংসেন্তো, যথাকামং চরন্তি চ.

১৩. তং সুত্ৰা চোল়ভূপালো, সম্পকোপৰসীকতো;

সেনং মহন্তিং দত্ৰান, পেসেসি সচিৰং নিজং.

১৪. মহাতিত্থে’ৰহিণ্ণো সো, তত্থ তত্থ বহূজনে;

ঘাতেন্তো সৰসে কত্ৰা, রাজারট্ঠাধিৰাসিনো.

১৫. অনুক্কমেন গন্ত্ৰান, খরাণো রোহণং তদা;

অজ্ঝোত্থরি সসেনো স, ভিন্নো ৰেলোৰসাগরো.

১৬. রঞ্ঞো পচ্চত্থিকা হুত্ৰা, রৰিদেৰচলৰ্হযা;

উভো দমিল়সেনিন্দ-ৰসং যাতা মহব্বলা.

১৭. মহাপক্খবলোপেতে, তে পস্সিয চমূপতি;

রোহণং সকলং খিপ্পং, মঞ্ঞিত্থ সকহত্থগং.

১৮. একাদসম্হি সো ৰস্সে, রাজা চোল়াভিভূতিযা;

পলুট্ঠপব্বতে দুগ্গং, পৰিধায তহিং ৰসী.

১৯. চোল়সেনা তদাসেলং, সমন্তা সম্পরিক্খিপি;

তত্থো’ভযেসং সেনান-মহূ ভিংসনকং রণং.

২০. রঞ্ঞো ভটা ৰিনাসেত্ৰা, সব্বং তং দমিল়ং বলং;

পলাযন্তং মহাচোল়-সামন্তঞ্চানুবন্ধিয.

২১. গহেত্ৰান সিরং তস্স, গামস্মিং তম্বৰিট্ঠিকে

সদ্ধিং ৰাহনযানেহি, সারভূতধনেহি চ.

২২. তহিং তং সকলং ভণ্ডং, নেত্ৰা রঞ্ঞো পদস্সিয;

পুল়ত্থিনগরং গন্তুং, কালো ইতি সমব্রৰুং.

২৩. মহীপালোপি তং সুত্ৰা, সচিৰানং ৰচো তদা;

মহতা বলকাযেন, পুলত্থিনগরং গতো.

২৪. পৰত্তিমেতং সকলং, সুত্ৰা চোল়নরিস্সরো;

তিব্বকোপৰসংযাতো, ভূপালগহণত্থিকো.

২৫. সামং খিপ্পং সমাগম্ম, ৰীরো সাগরপট্টনং;

ভিয্যোপি মহতিং সেনং, লংকাদীপমপেসযী.

২৬. তং ৰিজানিয ভূমিন্দো, সেনিন্দং পেসযী সকং;

বলং মহন্তং দত্ৰান, চোল়সেনায যুজ্ঝিতুং.

২৭. গচ্ছমানো চমূনাথো, সো’নুরাধপুরন্তিকে;

সদ্ধিং দমিল়সেনায, ৰত্তেসি তুমুলং রণং.

২৮. পতিংসু তস্মিং সঙ্গামে, ভূপালস্স নরা বহূ;

ভিয্যোপি দমিল়াযত্তা, জাতা তং রট্ঠৰাসিনো.

২৯. ৰিহায ধরণীপালো, পুলত্থিনগরং তদা;

ৰিল্লিকাবাণকং রট্ঠং, সম্পাপুণিয ৰেগসা.

৩০. নিহচ্চামচ্চযুগলং, তং রট্ঠাধিট্ঠিতং তদা;

তহিং ৰাসমকপ্পেসি, সভটে সন্নিপাতযং.

৩১. অত্তানমনুবন্ধন্তং, সুত্ৰা চোল়চমূপতিং;

গন্ত্ৰা ৰাতগিরিং নাম, সমযঞ্ঞূ সিলুচ্চযং.

৩২. উপচ্চকায সেলস্স, তত্থ দুগ্গং নিৰেসিয;

রণং করোন্তো তেমাসং, দমিল়ে পটিবাহযি.

৩৩. কেসধাতুকনাথস্স, মারিতস্স পুরারণে;

ভাতা কণিট্ঠো সম্পত্ত, মহাপক্খবলো তদা.

৩৪. মারণং সকভাতুস্স, সরন্তো রুট্ঠমানসো;

সকলং পরিৰত্তেসি, গুত্তহালকমণ্ডলং.

৩৫. অথো লংকিস্সরো তত্থ, খিপ্পং গন্ত্ৰা মহব্বলো;

ঠানে মচ্চুত্থলে নাম, খন্ধাৰারং নিবন্ধিয.

৩৬. খদিরঙ্গণিদুগ্গম্হা, পলাপেত্ৰান তং রণে;

ঠানা কুবুলগল্লা চ, যুজ্ঝন্তো তং পলাপযি.

৩৭. ৰিহায পুত্তদারাদি-সব্বং নেকধনং বলং;

পলাযমানো সো রট্ঠং, চোল়াযত্ত মগালহুং.

৩৮. তদা নরিস্সরো তত, তস্স সব্বং সমাদিয;

গন্ত্ৰা তম্বলগামম্হি, নৰং দুগ্গং নিৰেসিয.

৩৯. অনুক্কমেন গন্ত্ৰান, মহানাগহুলৰ্হযে;

পুরেৰসী সুসজ্জেন্তো, বলং চোল়েহি যুজ্ঝিতুং.

৪০. ততো রাজা সমৰ্হায, সচীৰে দ্ৰে মহব্বলে;

পেসেসি দিক্খিণং পস্সং, ৰসং নেতুং তহিং জনে.

৪১. সম্পেসেসি মহামচ্চ-যুগলং কক্খলং ৰিভূ;

চোল়দপ্পৰিনাসায, ততো ৰেলা মহাপথে.

৪২. পেসিতা দক্খিণং পস্সং, অমচ্চা’মে মহব্বলা;

মুহুন্নরুগ্গমদুগ্গং, বদল়ত্থলমেৰ চ.

৪৩. ৰাপীনগরদুগ্গঞ্চ, বুদ্ধগামকমেৰ চ;

তিলগুল্লং মহাগল্লং, মণ্ডগল্লকমেৰ চ.

৪৪. অনুরাধপুরঞ্চাতি, গহেত্ৰান কমেন তে;

ৰত্তেন্তা সৰসে রট্ঠং, মহাতিত্থমুপাগতা.

৪৫. পেসিতা সচিৰাদ্ৰেতু, ততো ৰেলা মহাপথে;

ৰিলুম্পন্তা ছগামাদি-খন্ধাৰারে তহিং তহিং.

৪৬. পুলত্থিনগরাসন্নং, কমেনা’গম্ম পেসযুং;

দূতে রাজন্তিকখিপ্প-মাগন্তুং ৰট্টতীতিহ.

৪৭. দিসাসা দ্ৰীসু যানেহি, সচিৰেহি পৰত্তিতং;

ৰিক্কমাতি সযং সুত্ৰা, কালঞ্ঞূ সো মহীপহি.

৪৮. সীঘং সন্নয্হ সেনঙ্গং, সমগ্গং ৰিদিকোৰিদো;

উম্মূলনাযচোল়ানং, পুরাতম্হা’ভিনিক্খমি.

৪৯. গচ্ছং গঙ্গায মহিয-ঙ্গণথূপন্তিকে ৰিভূ;

সেনানিৰেসং কারেত্ৰা কঞ্চিকালং তহিং ৰসী.

৫০. কমেনাগম্ম ঠানঞ্ঞূ, পুল়ত্থিনগরন্তিকে;

বন্ধাপেসি মহাৰীরো, খন্ধাৰারং থিরং ৰরং.

৫১. তত্থ তত্থ ঠিতা সূরা, চোল়া যে কক্খলা’খিলা;

পুলত্থিনগরে যুদ্ধং, কাতুং সন্নিপতিংসু তে.

৫২. নিক্খম্ম নগরা গন্ত্ৰা, চোল়া বহি মহারণং;

কত্ৰা পরাজিতা ভীতা, পৰিস্স নগরং সকং.

৫৩. গুত্তা সেসপুরদ্ৰারা, গোপুরট্টালনিস্সিতা;

মহাহৰং বহুস্সাহা, পৰত্তেসুং ভযাৰহং.

৫৪. দিযড্ঢমাসং যুজ্ঝন্তি, নগরং তমুপরুন্ধিয;

সাধেতুং নেৰসা’সক্খি, ভূপালস্স মহাচমূ.

৫৫. মহারঞ্ঞো মহাৰীরা, মহাসূরা মহব্বলা;

মহাভটা মহামানা, রৰিদেৰচলাদযো.

৫৬. উল্লঙ্ঘিত্ৰান পাকারং, পৰিস্স সহসা পুরং;

খণেন দমিল়ে সব্বে, মূলঘচ্চমঘাতযুং.

৫৭. এৰং লদ্ধজযো রাজা, তদা ৰিজযবাহুসো;

চরাপেসি নিজাণায, ভেরিং ভূরিমতিপুরে.

৫৮. তং সুত্ৰা সকসেনায, ৰিনাসং চোল়ভূপতি;

সীহল়া বলৰন্তোতি, ভিয্যো সেনং ন পাহিণি.

৫৯. ৰীরো অসেসনিহতুদ্ধট চোল়সেট্ঠো;

ৰিঞ্ঞূ সুসাধুট্ঠপিতাখিলরাজরট্ঠো;

ইট্ঠন্নুরাধপুরসেট্ঠমতীৰ হট্ঠো;

ৰস্সম্হি পঞ্চদসমে গমি রাজসেট্ঠো.

সুজনপ্পসাদসংৰেগত্থায কতে মহাৰংসে

অনুরাধপুরাভিগমনো নাম

ছপ্পঞ্ঞাসতিমো পরিচ্ছেদো