চতুপঞ্ঞাসতিম পরিচ্ছেদ

ছ রাজকোনাম

১. কত্ৰা ৰিক্কম্ম বাহূ’তি, নাম ভূপালসূনুতো;

তস্সাণায পৰত্তিংসু, সাদরং সীহল়া খিলা.

২. সো রাজা দমিল়ে হন্তুং, ধনং সঞ্চিয’নেকাধা;

সঙ্গহং সেৰকানঞ্চ, কুরুমানো যথোচিতং.

৩. অলঙ্কারকিরীটানি, ছত্তসীহাসনানি চ;

কারযিত্ৰা’ভিসেকত্থং, সচিৰেহা’ভিযাচিতো.

৪. ন যাৰ রাজরট্ঠস্স, গহণং হোতি তাৰ মে;

ছত্তুস্সাপনকম্মেন, কিং তেনা’তি ৰিৰারিয.

৫. সতং নরসহস্সানং, সঙ্কলেত্ৰা মহব্বলো;

সঙ্গামারব্ভ কালম্হি, ৰাতরোগাভিপীল়িতো.

৬. যুজ্ঝিতুং সমযো নেতি, দ্ৰাদসে ৰচ্ছরে লহুং;

উপেচ্চ দেৰনগরং, গঞ্ছিদেৰসহব্যতং.

৭. কিত্তিনামো চ সচিৰো, সেনাপচ্চমধিট্ঠিতো;

রজ্জত্থিকো দিনানট্ঠ, নিজাণং সম্পৰত্তযি.

৮. ঘাতেত্ৰা তং মহালান-কিত্তিনামো মহব্বলো;

পত্ৰা’ভিসেকং ভুঞ্জন্তো, দেসং তং রোহণৰ্হযং.

৯. সংৰচ্ছরম্হি ততিযে, চোল়যুদ্ধে পরাজিতো;

সহত্থেন সকং সীসং, ছিন্দিত্ৰা সহসা মরি.

১০. তদাপিতে কিরীটাদি-ধনসারং সমাদিয;

পেসেসুং দমিল়া চোল়-মহীপালস্স সন্তিকং.

১১. ভযা সরট্ঠং হিত্ৰা’থ, দুট্ঠদেসে ৰসং তদা;

একো ৰিক্কমপণ্ডূতি, ৰিস্সুতো পত্থিৰত্তজো.

১২. ৰিঞ্ঞাতলঙ্কাৰুত্তন্তো, দেসমাগম্ম রোহণং;

কাল়তিত্থে ৰসং ৰস্স-মেকং রজ্জমকারযি.

১৩. রামন্ৰযসমুব্ভূতো, তদাযুজ্ঝ পুরাগতো;

জগতী পালনামেন, ৰিস্সুতো ভূভুজত্তজো.

১৪. রণে ৰিক্কমপণ্ডুতং, ঘাতাপেত্ৰা মহব্বলো;

ততো চত্তারি ৰস্সানি, রজ্জং কারেসি রোহণে.

১৫. তম্পি চোল়ারণে হন্ত্ৰা, মহেসিং ধীতরা সহ;

ৰিত্তসারঞ্চ সাকলং, চোল়রট্ঠমপেসযুং.

১৬. রাজা পরক্কমো নাম, পণ্ডুরাজসুতো ততো;

অকা ৰস্সদ্ৰযং চোল়া, ঘাতেসুং তম্পি যুজ্ঝিয.

১৭. ইমে ভুসং লোভবলাভিভূতা,

গতা অসেসা ৰিৰসা ৰিনাসং;

ইচ্চেৰমঞ্ঞায সদা সপঞ্ঞো,

তণ্হক্খযেযেৰ রতিং করেয্য.

সুজনপ্পসাদসংৰেগত্থায কতে মহাৰংসে

ছ রাজকো নাম

চতুপঞ্ঞাসতিমো পরিচ্ছেদো.