অট্ঠচত্তালীসতিম পরিচ্ছেদ

একরাজকো

১. ততো তস্সা’নুজো সেনো, ছত্তং উস্সাপযী পুরে;

পিযং’ৰ পুত্তং পস্সন্তো, সত্তে সব্বে মহাধনো.

২. চরিযং পুব্বরাজূনং, সমাচরি যথাভতং;

অপুব্বম্পি চ ৰত্তেসি, চরিযং ধম্মসংহিতং.

৩. ভিক্খূনং ভিক্খূনীনঞ্চ, ঞাতীনং দীপৰাসিনং;

মচ্ছানং মিগপক্খীনং, কত্তব্বং স সমাচরি.

৪. মহিন্দং পরতীরং সো, গতং যোজিযমারযি;

এৰং সো সুৰিসোধেসি, রজ্জপচ্চত্থিকে’খিলে.

৫. মহাদানং পৰত্তেসি, যাচকানং ধনেসিনং;

ভিক্খূনং ব্রাহ্মণানঞ্চ, মনুঞ্ঞং রাজভোজনং.

৬. অহেসুং অনুজাতস্স, মহিন্দো কস্সপো তথা;

উদযোতি তযো তেসু, মহিন্দো যুৰরাজকো.

৭. হুত্ৰা তস্সানুৰত্তন্তো, সক্কচ্চং তমুপট্ঠহি;

সঙ্ঘানামাসি রাজস্স, ভরিযা তস্স রাজিনী.

৮. কীল়নত্থং সমুদ্দস্স, গতে রাজিনি পট্টনং;

উদযো আদিপাদোসো, ওহীনো নগরে তদা.

৯. নালনামং গহেত্ৰান, ধীতরং মাণিলানিযা;

রক্খিতং রাজরক্খায, পুল়ত্থিনগরং অগা.

১০. রাজা তস্মিং অকুজ্ঝিত্ৰা, সন্ধিং কত্ৰা অকুপ্পিযং;

মহাদীপাদং পেসেত্ৰা, তোসত্ৰা তং ইধানযি.

১১. এৰং সমগ্গা তে আসুং, ততো পট্ঠায খত্তিযা;

রক্খন্তা সাসনং লোকং, ৰসিংসু সুসমাহিতা.

১২. ততো কেনচি কালেন, পণ্ডুরাজা মহাবলো;

জম্বুদীপা ইধা’গম্ম, দীপ গণ্হিতুমারভি.

১৩. রাজা সুত্ৰা মহাসেনং, পেসুযিত্থ তদন্তিকং;

অমচ্চানং ৰিৰাদেন, থদ্ধোতারো নারাধিপো.

১৪. পণ্ডুরাজা ৰিনাসেন্তো, সব্বং তং দেসমুত্তরং;

খন্ধাৰারং নিৰেসেসি, মহাতালিতগামকে.

১৫. ৰসন্তা দমিল়া এত্থ, বহৰো যে তহিং তহিং;

সব্বে তং পক্খিযাহেসুং, ততো সো বলৰা অহু.

১৬. তত্থ গন্তা মহাসেনা, রঞ্ঞো যুজ্ঝিতুমারভি;

হত্থিক্খন্ধগতো পণ্ডু-রাজাপি সমুপাৰিসি.

১৭. অহু দমিল়সেনাসা, পস্সন্তি সামিনো মুখং;

সম্পত্তবলহুস্সাহা, তদত্থে চত্তজীৰিতা.

১৮. দীপসেনা তু সামিন-মভাৰেন নিরুস্সুক্কা;

যুজ্ঝন্তি পরিভিন্দিত্ৰা, পলাযিত্থ ততো ততো.

১৯. ওতরিত্থমহাসেনা, পণ্ডুরাজাস্স তঙ্খণে;

মারসেনাৰ গচ্ছন্তি, ৰিচুণ্ণেন্তি মহাজনং.

২০. রাজা সেনায ভিন্নত্তং, সুক্কা সব্বং সমাদিয;

হত্থসারং পুরং হিত্ৰা, মলযাভিমুখো গতো.

২১. ততো হত্থিং সমারুয্হ, যুৰরাজা মহিন্দকো;

যুজ্ঝন্তো সকসেনায, পলাতত্তং সমেক্খিয.

২২. একেনমে ন সক্কা ৰে, সব্বে এতেহি মারিতুং;

এতেসং ন চ নীচানং, হত্থেসু মরণং সুখং.

২৩. তস্মা ৰরং মে মরণং, মযা এৰেতি চিন্তিয;

হত্থিক্খন্ধগতোযেৰ, ছিন্দি সো সীসমত্তনো.

২৪. তং দিস্ৰা বহৰো সীসে, তত্থ ছিন্দিংসু সেৰকা;

তং দিস্ৰা দমিল়ী সেনা, হট্ঠতুট্ঠা পমোদিসা.

২৫. এতং সব্বং সমেক্খিত্ৰা, আদাপাদো সকস্সপো;

তুরঙ্গৰরমারুয্হ, সুসন্নদ্ধো মহাযুধো.

২৬. ৰিহারমুপসঙ্কম্ম, অভযং এককোৰ সো;

তাদিসম্পি মহাসেনং, ওগাহেত্ৰা ৰিদারযি.

২৭. সুপণ্ণো ৰিয গণ্হন্তো, ভূজগেন সলিলাল যে;

সো তং সব্বং নিৰত্তেসি, অত্তানঞ্চ সুগোপযি.

২৮. অস্সো একোৰ দিস্সিত্থ, তুরঙ্গাৰলিসন্নিভো;

অত্তনো সো জনং কঞ্চি, অপস্সন্তো’নুগামিনং.

২৯. কিং মে একেন ৰেরিনং, পূরিতেন মনোরথং;

কালন্তরেহং জীৰন্তো, পূরেস্সং মে মনোরথং.

৩০. তস্মা গন্তুংৰ যুত্তন্তি, নিম্ফোটেত্ৰা মহাবলং;

নিব্ভযোৰ মহাযোধো, কোণ্ডিৰাতমুপাগমি.

৩১. পণ্ডুরাজা মহাসেনা, অগ্গহেসি ততো পুরং;

সীসং তং যুৰরাজস্স, পণ্ডুরাজস্স দস্সযুং.

৩২. সো তং দিস্ৰা চ ঝাপেত্ৰা, রাজূনং পণ্ডুদেসিনং;

সব্বমাল়াহনে কিচ্চং, তস্স কাতুং নিযোজযি.

৩৩. সব্বং সারং হরাপেসি, ভণ্ডাগারম্হি রাজিনো;

অগ্গণ্হিত্থ গহেতব্বং, ৰিহারে নগরেপি চ.

৩৪. পাসাদে রতনে সব্বে, সোৰণ্ণংসত্থুবিম্বকং;

সিলাময মুনিন্দস্স, চক্খুভূক মণিদ্ৰযং.

৩৫. তথা সোৰণ্ণপট্টে চ, থূপারামম্হি চেতিযে;

সুৰণ্ণ পটিমাযো চ, ৰিহারেসু তহিং তহিং.

৩৬. সব্বং গহেত্ৰা নিস্সারং, লঙ্কাদীপ মকাসি সো;

ছড্ডযিত্থ পুরং রম্ম, যক্খভক্খিত রূপকং.

৩৭. রাজা’পি রক্খং দত্ৰান, মহামগ্গে তহিং তহিং;

গঙ্গাদ্ৰয মুখে ৰাসং, কপ্পেসি পরিসঙ্কিতো.

৩৮. পণ্ডুরাজা ততো সদ্ধিং, কাতুং সীহল়সামিনা;

অমচ্চে তত্থ পেসেসি, দিস্ৰা তে সীহলাধিপো.

৩৯. সুণিত্ৰা সাসনং তেসং, সব্বং তং সম্পটিচ্ছিয;

দূতানং কারযিত্ৰান, যথাকামেন সঙ্গহং.

৪০. হত্থিদ্ৰযং সদত্ৰান, সব্বমাভরণম্পি চ;

তস্স পেসেসি দূতেসো, অত্তনোপি হিতাৰহে.

৪১. পণ্ডুরাজা সিতং সব্বং, দিস্ৰা সন্তুট্ঠমানসো;

নিয্যাতেত্ৰান দূতানং, তদহেৰ মহাপুরং.

৪২. নিক্খমিত্ৰা পুরা গন্ত্ৰা, ন চিরেনেৰ পট্টনং;

তত্থ আরুয্হ নাৰং সো, সক দেস মুপাগমি.

৪৩. ততো আগম্ম নগরং, সীলামেঘো মহীপতি;

যথাঠানে ঠপেত্ৰান, দীপং ৰসি সমাহিতো.

৪৪. ভাতরং দুতিযং কত্ৰা, উদযং নাম খত্তিযং;

মহাদীপাদং তস্সা’দা, সোগত্থং দক্খিণং দিসং.

৪৫. সোপি খো ন চিরেনেৰ, কত্ৰা পুঞ্ঞং যথারহং;

রোগেনেকেন সম্ফুট্ঠো, পৰিট্ঠো মচ্চুনো মুখং.

৪৬. কস্সপো আদিপাদোপি, পুলত্থিনগরে ৰসং;

যোজেত্ৰা পণ্ডুরাজেন, অহোসি কির মারিতো.

৪৭. তদা কস্সপনামস্স, পুত্তা আসুং মহারহা;

আদিপাদস্স চত্তারো, ধঞ্ঞলক্খণ সঞ্ঞুতা.

৪৮. যো সেনং সব্বপঠমো, সেনো নাম কুমারকো;

সূরো ৰীরো মহুস্সাহো, রাজভারক্খমো সমো.

৪৯. রাজা মহাদীপাদত্তং, তস্স দত্ৰা যথাৰিধিং;

ভোগত্থং দক্খিণং দেসং, সৰাহন মুপাদিসি.

৫০. রোহণাধিপতিস্সা’সুং, পুত্তা কিত্তগ্গবোধিতো;

চত্তারো ধীতরো তিস্সো, দস্সনেয্যা মনোরমা.

৫১. তদা জেট্ঠসুতং তস্স, মহিন্দং নাম খত্তিযং;

পিতুচ্ছা মারযিত্ৰান, দেসং গণ্হি সসাধনং.

৫২. ভাতরো তে তযো তস্মিং,

সংরুট্ঠা ভাতু ঘাতনে;

আদায ভগীনী তিস্সো,

রঞ্ঞো সন্তিকমাগমুং.

৫৩. রাজাপি দিস্ৰা তেতীৰ, মমাযন্তো দযালুকো;

সব্বে দেৰকুমারেৰ, সুখং ৰড্ঢেসি পেমৰা.

৫৪. ততো কস্সপনামং সো, তেসং জেট্ঠং নরিস্সরো;

দেসং তং গণ্হ যাহীতি, দত্ৰা বলমপেসযি.

৫৫. সো’পি গন্ত্ৰান তং হন্ত্ৰা, রোহণং কসিণম্পি তং;

কত্ৰা হত্থগতং তত্থ, ৰসিত্থ নিরুপদ্দৰো.

৫৬. অথ সো ভাতরো দ্ৰে’পি, সেনঞ্চ উদযং তথা;

পক্কোসিত্ৰান, ভাজেত্ৰা, দেসং তেহি সহাৰসি.

৫৭. রাজা তা সাধু ৰড্ঢেত্ৰা, ৰযপত্তাসু তীসু সো;

রাজকঞ্ঞাসু ধঞ্ঞাসু, দেৰচ্ছরসূ রূপিসু.

৫৮. ঠপেত্ৰা রাজিনি ঠানে, উপরাজস্স দাপযি;

সঙ্ঘনামং মহাভোগং, দত্ৰা রজ্জসরিক্খকং.

৫৯. কণিট্ঠো উপরাজস্স, মহিন্দো নাম ভাতুকো;

অত্থি সব্বগুণোপেতো, সব্বসত্থৰিসারদো.

৬০. তস্সা’দাসি দুৰে রাজা, রাজকঞ্ঞা মনোহরা;

তিস্সৰ্হকিত্ত নামঞ্চ, দত্ৰা ভোগং যথারুচিং.

৬১. এৰং করোন্তো ঞাতীনং, সংগহং সো যথারহং;

আরাধেন্তো চ দানাদি-সঙ্গহেহি মহাজনং.

৬২. রাজা দসযি রাজূনং, ধম্মেহি সমুপাগতো;

সমাচরন্তো পুঞ্ঞানি, পরিভুঞ্জিত্থ মেদিনিং.

৬৩. পংসুকূলিক ভিক্খূনং, কত্ৰা’রিট্ঠম্হি পব্বতে;

মহাভোগং অদারামং, নিম্মিতং ৰিয ইদ্ধিযা.

৬৪. পরিহারঞ্চ তস্সদা, রাজারহমসেসতো;

আরামিকে চ বহৰো, দাসে কম্মকরেপি চ.

৬৫. পাসাদং সোৰ কারেসি, ৰিহারে জেতনামকে;

অনেকভূমিং ভূমিন্দো, বুদ্ধভূমিগতাসযো.

৬৬. ৰড্ঢেত্ৰা তত্থ কারেত্ৰা, সব্ব সোৰণ্ণযং জিনং;

সণ্ঠপেত্ৰা মহাভোগং, ৰসাপেসি চ ভিক্খৰো.

৬৭. মহাদি পরিৰেণম্হি, কারেসি সুমনোহরং;

পাসাদ মগ্গিসন্দংড্ঢং, তস্মিংযেৰ ৰিহারকে.

৬৮. কত্ৰা ৰীরঙ্কুরারামং, ৰিহারে অভযুত্তরে;

মহাসঙ্ঘিক ভিক্খূনং, থেরিযানঞ্চ দাপযি.

৬৯. পুব্বারামঞ্চ কারেসি, সম্পন্ন চতুপচ্চযং;

সদ্ধিং সো সঙ্ঘনামায, দেৰিযাপি চ অত্তনো.

৭০. মহাৰিহারেতাযেৰ, সদ্ধিং কারেসি ভূমিপো;

আৰাসং সঙ্ঘসেনৰ্হং, মহাভোগং মহামতি.

৭১. কারেত্ৰা সব্বসোৰণ্ণং, কেসধাতু করণ্ডকং;

মহাপূজং পৰত্তেসি, রজ্জং ৰিস্সজ্জি উত্তমো.

৭২. চেতিযস্স গীরিস্সাদা, কাণৰাপিং বহুদযং;

ভিক্খূনং দিপৰাসীনং, দাপেসি চ তিচীৰরং.

৭৩. পুলত্থি নগরে কাসি, ৰাপিযো থুসৰাপিযা;

সেনগ্গবোধিমাৰাসং, গামারামিক সঞ্ঞুতং.