পঞ্চচত্তালীসতিম পরিচ্ছেদ

১. রঞ্ঞো তস্সচ্চযে রাজা, মাণৰম্মো অহোসি সো;

কিং গোত্তো কস্স পুত্তো চ, কথং রজ্জমপাপুণি.

২. মহাসম্মতৰংসম্হি, জাতো জাতিগুণাৰহো;

পুত্তো কস্সপনামস্স, থূপারামস্স ভেদিনো.

৩. ধীতা মলযরাজস্স, সঙ্ঘনামস্স রাজিনো;

তং লভিত্ৰা ৰসং দেসে, উত্তরে লীনৰুত্তিকো.

৪. হত্থদাঠনরিন্দেন, তস্মিং অত্থেৰ ধারিতে;

জম্বুদীপমুপাগম্ম, নরসীহং মহীপতি.

৫. গন্ত্ৰা ৰত্ৰা সকং নামং, সেৰিতুং তমুপক্কমি;

আরাধেসি চ সব্বেহি, পযোগেহি নরাধীপং.

৬. ৰিদিত্ৰা তস্স সোহজ্জং, নেত্ৰা ভরিযমত্তনো;

ৰাসং তত্থেৰ কপ্পেসি, সেৰমানো দিৰানিসং.

৭. সোপি আরাধিতো তেন, কণ্ডুৰেট্ঠি নরুত্তমো;

সব্বং নেন্তোৰ তং রজ্জং, মহাভোগমদাপযি.

৮. তেন সংৰাসমন্ৰায, ভরিযা সঙ্ঘনামিকা;

চতস্সো ধীতরো পুত্তে, চত্তারোপি ৰিজাযথ.

৯. অথেকদিৰসং রাজা, হত্থিক্খন্ধৰরং গতো;

সঞ্চরন্তো যথাকামং, মাণৰম্মেন একতো.

১০. নাল়িকেরং পিৰিত্ৰান, তত্রট্ঠোৰ পিপাসিতো;

মাণৰম্মস্স পাদাসি, মঞ্ঞন্তো অঞ্ঞমেৰ তং.

১১. সো তং গহেত্ৰা চিন্তেসি, সখং পেস নরাধিপো;

উচ্ছিট্ঠং নাম কিং হোতি, সত্তানং পরমত্থতো.

১২. তস্মা যুত্তং মযাপাতু-মীতি চিন্তিয তং পিৰি;

এৰং হোন্তি মহুস্সাহা, দেতুকামাহি বুদ্ধিনো.

১৩. রাজাপি দিস্ৰা তং ভীতো, তস্সপী তাৰ সেসকং;

সযং পিৰি তথাহোতি, কম্মং পুঞ্ঞৰতং সদা.

১৪. ঠপেসি সকৰেসেৰ, ততো পট্ঠায অত্তনো;

ভোজনে সযনে চেৰ, পরিহারে চ ৰাহনে.

১৫. এৰং তেসু ৰসন্তেসু, যুদ্ধত্থাযমুপক্কমি;

ৰল্লভো নরসীহেন, নরসীহো ৰিচিন্তযি.

১৬. অযং খো মম সেৰায, রজ্জং ৰংস গতং সকং;

লভিস্সামীতি সেৰেতি, রত্তিং দিৰ মতন্দিতো.

১৭. সচে সোপি মযা গন্ত্ৰা, যুজ্ঝন্তো মরণং গতো;

তক্কিতং তস্স ময্হঞ্চ, সব্বং তমফলং ভৰে.

১৮. এৰং চিন্তিযতং রাজা, নিৰত্তেত্ৰা সকে পুরে;

সযং ৰল্লভরাজেন, কাতুং সঙ্গামমারসি.

১৯. মাণৰম্মোপি চিন্তেসি, সচে’যং মযি জীৰিতি;

রাজা মীযতি যুদ্ধম্হি, কিং ফলং মম জীৰিতে.

২০. ৰিস্সাসো দুক্কতো তেন, ভৰিস্সতি তথাসতি;

সঙ্গহেসি কিমত্থং মং, সমানত্তেন অত্তনো.

২১. তস্মা যুত্তং মযা গন্তুং, সহসঙ্গাম মণ্ডলং;

সুখঞ্হি সদ্ধিং তেনেত্থ, জীৰিতং মরণংপি ৰা.

২২. এৰং চিন্তিয সন্নদ্ধ-বলো হত্থিৰরং গতো;

গন্ত্ৰা দস্সেসি অত্তানং, সো তং সঙ্গাম মণ্ডলে.

২৩. নরসীহোৰ তং দিস্ৰা, হট্ঠতুট্ঠো সমুগ্গিরি;

সহো সন্থৰমেতস্মিং, কত্তব্বং মে কতং ইতি.

২৪. ততো মানস্স সেনা চ, সেনা চেৰস্সরাজিনো;

সেনং ৰল্লভরাজস্স, ৰিদ্ধংসেসি সমাগতা.

২৫. মাণৰম্মোপি দস্সেসি, তহিং সুরত্তমত্তনো;

পরক্কমন্তো দেৰানং, রণে নারাযণো ৰিয.

২৬. নরসীতোপি সন্তুট্ঠো, মাণৰম্মস্স ৰিক্কমে;

আলিঙ্গত্ৰা সিনেহেন, ত্ৰং খো মে জযদো ইতি.

২৭. অত্তনো পুরমাগম্ম, কত্ৰা ৰিজযমঙ্গলং;

মাণৰম্মস্স সেনায, কত্তব্বং সব্বমাচরি.

২৮. অথেৰং চিন্তযি রাজা, কত্তব্বং মে সহাযকো;

অত্তনা’কাসি সব্বঞ্চ, অনণো সো মমজ্জতো.

২৯. ইণং মমাপি সোধেমি, কত্ৰা কত্তব্বমত্তনা;

কত্তঞ্ঞূ কতৰেদীহি, পুরিসা’তীৰদুল্লভা.

৩০. অমচ্চে সন্নিপাতেত্ৰা, ইদং ৰচনমব্রৰি;

সহাযস্স মমেতস্স, কম্মে তুম্হেপি সক্খিনো.

৩১. মযাপি তস্স কত্তব্বং, কম্মং সাধু সুখাৰহং;

উপকারো হি সাধূনং, ধম্মো পুব্বোপকারিনো.

৩২. এৰং ৰুত্তে অমচ্চা তে, পচ্চাহংসু মহীপতি;

যং যমিচ্ছতি দেৰোহি, তং তং রুচ্চতি নো ইতি.

৩৩. অথ সো মাণৰম্মস্স, সেনং দত্ৰা সৰাহনং;

সব্বোপকরণঞ্চেৰ, সব্বকম্মকরেপি চ.

৩৪. গচ্ছাতি ৰত্ৰা তং যন্তং, সহসেনাযপেক্খিয;

পরিদেৰিত্থ ভূমিন্দো, ৰিপ্পৰুত্থং’ৰ পুত্তকং.

৩৫. মাণৰম্মোপি আরুয্হ, নাৰাযো জলধীতটে;

ন চিরেনেৰ আগম্ম, সমত্তিক্কম্ম ৰেগসা.

৩৬. সহ সেনায মদ্দন্থো, লঙ্কাদীপমুপৰিসী;

তং সুত্ৰান পলাযিত্থ, রাজা দাঠোপতিস্সকো.

৩৭. মাণৰম্মো পুরং গন্ত্ৰা, অহুত্ৰাৰ নরাধিপো;

পলাতমনুবন্ধিত্থ, পদানুপদমুগতো.

৩৮. তদা সা দমিল়ি সেনা, অস্সোসি কির সামিকো;

মহারোগা’ভিভূতোতি, সুত্ৰা তং সা অপক্কমি.

৩৯. সুত্ৰা দাঠোপতিস্সো তং, সমাদায মহাবলং;

মাণৰম্মং উপাগম্ম, কাতুমারভি সংযুধং.

৪০. মাণৰম্মো চ চিন্তেসি, সব্বা সেনা গতা মম;

মতে মযি সমিজ্ঝেয্য, ৰেরিনো মে মনোরথং.

৪১. জম্বুদীপংৰ তস্মা’হং, গন্ত্ৰা’দাস বলং ততো;

পুন রজ্জং গহেস্সংতি, তস্মা এৰমকাসি সো.

৪২. গন্ত্ৰা পুন’পি দিস্ৰান, সহাযং নরসীহকং;

আরাধহন্তো নিপুণং, সক্কচ্চং তমুপট্ঠহি.

৪৩. যাৰ রাজচতুক্কংসো, মাণাম্মো তহিং ৰসি;

নরসীহো’থ চিন্তেসি, মানত্থদ্ধো যসোধনো.

৪৪. রজ্জত্থং মে সহা যো মং, সেৰন্তোযেৰ অদ্ধগো;

ৰুদ্ধো হেস্সতি তং পস্সং, কথং রজ্জং করোমহং.

৪৫. ইমস্মিং পন ৰারস্মিং, পেসযিত্ৰা বলং মম;

রজ্জং তং ন গহেস্সামি, কো অত্থো জীৰিতেন মে.

৪৬. এৰং চিন্তিয সো সেনং, সন্নিপাতিয অত্তনো;

সন্নাহেত্ৰা যথা যোগং, দাপেত্ৰান যথারুচিং.

৪৭. সযমেৰ তমাদায, সমুদ্দতটমাগতো;

নাৰাযো চিত্তরূপাযো, কারযিত্ৰা থিরা বহূ.

৪৮. অমচ্চে আহ ‘‘এতেন, সদ্ধিং গচ্ছথ ভো’’ইতি;

নাৰং আরোহিতুং সব্বে, ন ইচ্ছিংসু তদা জনা.

৪৯. তদা সীহো ৰিচিন্তেত্ৰা, সযং হুত্ৰা তিরোহিতো;

অত্তনো পরিহারং সো, রাজলক্খণসম্মতং.

৫০. সব্বং তস্সেৰ দত্ৰান, অলঙ্কারম্পি অত্তনো;

আরোপেত্ৰান তং নাৰং, গচ্ছ ঠত্ৰান সাগরে.

৫১. ইমং ভেরিংচ ৰাদেহি, কোট্ঠনামন্তি যোজযী;

সো’পি সব্বং তথাকাসি, রাজানো অগমা ইতি.

৫২. আরুহিংসু জনা নাৰং, একং কত্ৰা নরাধিপং;

সো তং সেনঙ্গমাদায, মাণো গন্তুং সমারভি.

৫৩. কেৰলো’পি সমুদ্দো সো, অহোভি নগরূপমো;

অথ সো পট্টনং পত্ৰা, ওতরিত্ৰা সৰাহনো.

৫৪. ৰিস্সামেত্ৰা বলং তত্থ, ৰসং কতিপযে দিনে;

উত্তরং দেসমাদায, কত্ৰা হত্থগতং জনং.

৫৫. অক্খোব্ভিয মহাসেনো, নগরং গন্তুমারভি;

পোত্থকুট্ঠোপি তং সুত্ৰা, পচ্চুগ্গঞ্ছি মহাবলো.

৫৬. সংগচ্ছিংসু উভো সেনা, ভিন্নৰেলা’ৰ সাগরা;

মাণৰম্মো ততো হত্থি-মারুয্হ গহিতাযুধো.

৫৭. পোত্থকুট্ঠঞ্চ রাজানং, দ্ৰেধা কত্ৰা পলাপযি;

হত্থদাঠং পলাযন্তং, দিস্ৰা জনপদা নরা.

৫৮. সীসমস্স গহেত্ৰান, মাণৰম্মস্স দস্সযুং;

পোত্থকুট্ঠোপলাযিত্ৰা, মেরুকন্দরমাগমি.

৫৯. ততো তং সামিকো দিস্ৰা, সহাযো মে অযংচিরং;

তস্মা ন সক্কা চড্ডেতুং, আপদে সরণাগতং.

৬০. সামিনো চ সহাযস্স, নিদ্দোসোহং কথং ভৰে;

ইতি চিন্তিয পূৰং সো, সৰিসং খাদিযা’মরি.

৬১. কুট্ঠকোপি চ তেনেৰ, খাদিত্ৰা পূৰকং মতো;

মাণৰম্মস্স তস্সেৰং, দীপো আসি অকণ্টকো.

৬২. মাণৰম্মো ততো দীপে, ছত্তং উস্সাপযি তদা;

ৰারেন্তো ৰিয তেনেৰ, দুক্খং দীপে জনস্স সো.

৬৩. পুঞ্ঞকম্মানি সো’কাসি, অনগ্ঘানি বহূনি চ;

সমত্থো কোহি তং সব্বং, ৰত্তুং পটিপদং নরো.

৬৪. কপ্পগামৰ্হযঞ্চেৰ, তথা সেপণ্ণিনামকং;

পধানরক্খে চ সিরিং, সিরীসঙ্ঘাদি বোধিকে.

৬৫. পাসাদং সোৰ কারেসি, পসাদাৰহমুত্তমো;

ছাদেসি লোহপাসাদং, থূপারামঘরং তথা.

৬৬. থূপারামে চ পাসাদং কত্ৰা’দা পংসুকূলিনং;

জিণ্ণকং পটিসঙ্খাসি ছত্তং চেতিযমুদ্ধনি;

বহৰো জিণ্ণকাৰাসে তত্থেৰ পটিসঙ্খরি.

[এত্থ মাণৰম্মস্স রজ্জকথায ঊনতা দিস্সতি. ইতো পট্ঠায অগ্গবোধিস্স রজ্জপটিবদ্ধা কথা ৰির খাযতি.]